Isaayyaas 12:1-6
12 Guyyaa sanatti ati dhugumaan akkana jetta:
“Yaa Yihowaa, sin galateeffadha,Ati natti dheekkamtee kan turte taʼus,Dheekkamsi kee suutuma suuta qabbanaaʼeera, atis na jajjabeessiteetta.+
2 Kunoo, Waaqayyo fayyisaa koo ti.+
Ani amanannaa qaba, homaas hin sodaadhu;+Sababiin isaas, Yaah* Yihowaan cimina koo fi jabina koo ti,Inni fayyisaa koo naaf taʼeera.”+
3 Isin gammachuudhaan,Burqaawwan fayyinaa keessaa bishaan ni waraabdu.+
4 Guyyaa sanattis akkana jettu:
“Yihowaadhaaf galata galchaa, maqaa isaas waammadhaa,Gochawwan isaa saboota gidduutti beeksisaa!+
Maqaan isaa ol qabamuu isaas labsaa.+
5 Inni wantoota dinqisiisoo+ waan raawwateef, Yihowaadhaaf faarfannaa galataa faarfadhaa.*+
Kun guutummaa lafaa irratti haa beeksifamu.
6 Inni Qulqulluun kan Israaʼel inni gidduu keessanitti argamu guddaa waan taʼeef,Isin jiraattonni* Xiyoon iyyaa, ililchaas.”
Miiljaleewwan
^ Jechi, “Yaah” jedhu maqaan Yihowaa yommuu gabaabaatti barreeffamu dha.
^ Ykn., “muuziqaa qopheessaa.”
^ Kal., “Ati ishiin jiraattuu Xiyoon taate,” guutummaan sabichaa dubartii takkatti fakkeeffamee ti.
