Fakkeenya 27:1-27
27 Wanta guyyaan fidu* waan hin beekneef,Waaʼee boruutiif of hin jajin.+
2 Namni kan biraan* si haa jaju malee, afaan kee si hin jajin;Namoota kaan* malee, arrabni kee si hin jajin.+
3 Dhagaan ni ulfaata, cirrachis baayʼee ulfaata,Aariin namni gowwaan namatti fidu garuu lamaan isaanii iyyuu caalaa ulfaata.+
4 Aariin gara jabeessa dha, dheekkamsis akkuma lolaa yaaʼuu ti,Hinaaffaa dura garuu eenyutu dhaabbachuu dandaʼa?+
5 Jaalala dhokfame irra ifannaa ifatti kenname wayya.+
6 Madaan michuun geessisu amanamummaa irraa kan madde dha,+Dhungannaan diinaa garuu hedduu dha.*
7 Namni* quufe damma dhaaba dammaa keessaa coccophu ni tuffata,*Namni* beelaʼe garuu wanti hadhaaʼu illee isatti miʼaawa.
8 Namni mana isaa irraa fagaateAkkuma simbira manʼee ishii irraa fagaattee ti.*
9 Zayitii fi ixaanni garaa namaa ni gammachiisu;Michuun garaadhaa* gorsa kennus akkanuma dha.+
10 Michuu kee yookiin michuu abbaa keetii hin dhiisin,Guyyaa badiisni sitti dhufuttis mana obboleessa keetti hin seenin;Obboleessa fagoo jiru mannaa ollaa dhihoo jiru wayya.+
11 Isa na arrabsuuf deebii kennuu akkan dandaʼutti,+Yaa ilma koo, ogeessa taʼi, garaa koos gammachiisi.+
12 Namni abshaalli balaa ni arga, jalaas ni dhokata,+Namni muuxannoo hin qabne garuu ittuma deema, miidhaanis* isa irra gaʼa.
13 Namni tokko ormaaf yoo wabii taʼe uffata isaa irraa fudhadhu;Kana kan godhe dubartii biyya ormaatiif yoo taʼe immoo qabsiisa irraa fudhadhu.+
14 Namni tokko ganama bariidhaan sagalee isaa ol kaasee michuu isaa yoo eebbise,Akka isa abaaretti ilaalama.
15 Haati manaa nyakkistuu taate akkuma baaxii guyyaa roobu hundumaatti dhimmisuu ti.+
16 Namni ishii toʼachuu dandaʼu kam iyyuu bubbee toʼachuu ni dandaʼa,Harka isaa mirgaatiinis zayitii qabachuu ni dandaʼa.
17 Akkuma sibiilli sibiila qaruNamnis michuu isaa* ni qara.+
18 Namni muka harbuu kunuunsu firii isaa nyaata,+Namni gooftaa isaa kunuunsus ulfina argata.+
19 Akkuma bishaan fuula namaa mulʼisu,Garaan nama tokkoos garaa nama kan biraa mulʼisa.
20 Awwaallii fi iddoon badiisaa* matumaa hin quufan,+Ijji namaas yoom iyyuu hin quufu.
21 Meetiin qodaa itti baqsan keessatti, warqiinis iddoo ibiddaa keessatti ni qorama,+Namnis galata argatuun ni qorama.*
22 Akkuma midhaan mooyyeedhaan tumameettiNama gowwaa taʼe muka mooyyeetiin yoo tumte illeeGowwummaan isaa isa hin gadhiisu.
23 Bifa bushaayee keetii akka gaariitti beeki.
Hoolota kee akka gaariitti kunuunsi,*+
24 Sababiin isaas, qabeenyi bara baraaf hin turu,+Gonfoonis bara baraaf dhalootaa dhalootatti hin darbu.
25 Margi lalisaan ni bada, margi haaraan ni biqila,Biqiltoonni gaarota irra jiranis walitti qabamanii galfamu.
26 Hoolonni xobbaallaan uffata siif argamsiisu,Korbeeyyiin reʼees gatii maasii siif argamsiisu.
27 Aannan reʼee sii fi maatii kee sooruuf,Akkasumas tajaajiltoota kee warra durbaa ittiin jiraachisuuf gaʼu ni qabaatta.
Miiljaleewwan
^ Kal., “dhalu.”
^ Kal., “Keessummaan.”
^ Kal., “Orma.”
^ Ykn tarii, “garaadhaa kan hin taane dha; kan dirqamaa ti.”
^ Ykn., “Lubbuun.”
^ Kal., “irra ni ejjeta.”
^ Ykn., “Lubbuun.”
^ Ykn., “baqattee baddee ti.”
^ Ykn., “lubbuu isaa irraa.”
^ Ykn., “adabnis.”
^ Kal., “fuula michuu isaa.”
^ Ykn., “Siʼoolii fi Abaadoon.”
^ Ykn., “Namnis akkuma galata isaaf dhihaatuu ti.”
^ Ykn., “Garaa kee hoolota kee irra kaaʼi; Hoolota keetiif xiyyeeffannaa kenni.”

