Rhie riẹ irhomẹmro re havwiẹ

A MA RIẸN?

Omẹgbanhon Arimwamwa ọ Ha Sọrhen

Omẹgbanhon Arimwamwa ọ Ha Sọrhen

Egba irherhe i tare taghene erimwamwa a sabu ha omẹgbanhon aye a ha sọrhen e vwrurhe ẹgbukpe erimwamwa erọrọ e havwọ, rhe sẹ ọrẹ ase yanghene ọhworhare, ọrhẹ oborẹ aye e ruẹ lele. Ana sabu yono erimwamwa nẹ aye i vwrurhe ekwakwa ri na sabu suẹ oghwọghọ jerẹ ibọmbu, ọrhẹ imwu egbogbanhon rẹ igọmẹti i jurhi kpahen. Ituakpọ a ha ikẹro aye mẹrẹn ekwakwa ri kinhariẹ aye, ọrẹn erimwamwa a ha omẹgbanhon aye a ha sọrhen ruiruo. Aye a sabu “rhe” emru nyoma irhuen aye.

Roro kpahen ọnana: Omẹgbanhon arimwamwa ọ ha sọrhen o rhomu ghwẹ erẹ ọwan ọgbọ iduduru buebun. Lele oborẹ U.S. National Institute of Standards and Technology ọ tare, arimwamwa “ọnọ sabu sọrhen oborẹ ikẹmika ezẹko i bun te uvuẹn ekwakwa ezẹko. Ọnana ọ họhọ ọke wu rha damu ame i swimin pul jeghwai rhe taghene e fiẹ ibiẹ oyibu rhọye.”

Mesoriẹ omẹgbanhon arimwamwa ọ ha sọrhen o rhomu ghwẹ ọrẹ ọwan?

  • Arimwamwa ọ sabu sọrhen ekwakwa fọkiẹ irhuen yi rọ kpọtọre.

  • Irhuen arimwamwa o vwo unu eva​—ọ ha owu mwuẹhẹn, ọ ha ọreva ye sọrhen. Arimwamwa orho sọrhen, aphẹrẹ nọ ruẹ ekete omẹgbanhon rọ lẹrhiẹ sabu sọrhen ọ havwọ.

  • Oborẹ ọ lẹrhẹ arimwamwa sabu sọrhen ọ do ghwẹ ọrẹ ituakpọ omamọ.

  • Iyẹn ri ha uvuẹn irhuen arimwamwa rọ lẹrhiẹ sabu sọrhen, i bun ghwẹ ọrẹ ituakpọ omamọ.

Enana ephian ya lẹrhẹ arimwamwa sabu rhe ovẹnẹ ọrhen rọ ha uvuẹn ekwakwa buebun. Jerẹ udje, ọwan a sabu sọrhen emaren, ọrẹn arimwamwa ọ sabu vwrurhe ekwakwa ephian ra ha sere emaren na, omaran egba irherhe ezẹko i tare.

Egba irherhe ri ha uvuẹn Pine Street Foundation, ro rhiẹ ekete re yono kpahen ikansa, i tare taghene aphẹrhiẹn ọrhẹ irhuen arimwamwa a wian kugbe, ọnana no rhiẹ ona “owu rọ mai rhomu kparobọ usuẹn ekwakwa ra ha sọrhen uvuẹn akpọ na.” Itu isayẹnsi e ruẹ ekwakwa ra ha sọrhen, ra sabu vwrurhe ekwakwa ra suẹ oghwọghọ, ekwakwa igọmẹti i jurhi kpahen, ọrhẹ emiamo, tobọ te ikansa.

Me wu rorori? Omẹgbanhon arimwamwa ọ ha sọrhen, ọ varhe? Gbinẹ a ma riẹn?