Rhie riẹ irhomẹmro re havwiẹ

Rhie riẹ eghwẹmro re havwiẹ

 ENYERẸN ILELE KRISTI

Nyerẹnmwu Ovwan Ọfuanfon Ọrẹ i Jehova

Nyerẹnmwu Ovwan Ọfuanfon Ọrẹ i Jehova

Jehova Osolobrugwẹ ọ yẹ ituakpọ ovwan ọfuanfon rẹ aye ine nyerẹnmwu. Jerẹ udje, o jurhi taghene orọnmo o rhirhiẹ ye bẹmẹdẹ uvwre ọhworhare owu ọrhẹ ọmase owu. (Mt 19:4-6, 9) O vwo utuoma kpahen irueruo ọfanrhiẹn ephian. (1Co 6:9, 10) Ọ tobọ ha iruemru-uhi ri sekpahen ewun ọrhẹ osẹme phia neneyo ihworho enẹyen i vẹnẹ awọrọ.—De 22:5; 1Ti 2:9, 10.

Inyenana, ihworho buebun a tiẹn irhi Jehova. (Ro 1:18-32) Aye a ha uphẹn rẹn ekwakwa ri titiri no sun iroro aye kpahen ewun, osẹme ọrhẹ uruemru aye. Ihworho buebun e dje orusọ aye phia jeghwai tẹmro esọsọ kpahen ihworho re nyerẹnmwuẹ ovwan ọrẹ Osolobrugwẹ.—1Pe 4:3, 4.

Ọwan e rhiẹ Iseri Jehova na, ọwan ine vi fiudugbere nyerẹnmwu ovwan Osolobrugwẹ. (Ro 12:9) Izede ọgo? O fori nẹ ọwan i ha izede ona je aye rhe kpahen oborẹ Osolobrugwẹ o kwerhọ. Ọrẹn, ọwan ina vi sẹrorẹ urhi Jehova uvuẹn akpenyerẹn ọwan. Jerẹ udje, ọke ọwan a sanọ aruẹ ewun re ne kurhọ ọrhẹ osẹme ra na sẹ, o fori nẹ ọwan i nọ oma ọwan: ‘Odjẹ mẹ o dje ovwan i Jehova phia gbinẹ ọrẹ akpọ na? Ewun mẹ ọrhẹ osẹme mẹ o dje mẹ rhẹ Olele Kristi ro vwo ofẹnzẹ Osolobrugwẹ?’ Yanghene ọke ra djẹ ughe re ne ni, ọwan ina sabu nọ oma ọwan: ‘Jehova ono kwerhẹ ughe ọnana? Ovwan ọgo yẹ ughe na o jirẹ? Odjẹ mẹ kpahen ughe ọrhẹ iruẹn ọnọ sabu lẹrhẹ uruemru mẹ kpahen oborẹ ọfonron seriotọre? (Ps 101:3) Ọnọ sabu rhiẹ ukọ harẹn ihworho ekrun mẹ yanghene awọrọ?’—1Co 10:31-33.

Mesoriẹ ọghanren ne nyerẹnmwu ovwan ọfuanfon ọrẹ i Jehova? Phẹrẹkpẹ, Jesu Kristi ọnọ ghwọghọ egbamwa na ọrhẹ irueruo ọkon ephian. (Eze 9:4-7) Ihworho re ruẹ ọhọre Osolobrugwẹ ọvo yi ne rhirhiẹ ye bẹmẹdẹ. (1Jo 2:15-17) Omarana, jenẹ ọwan i nyerẹnmwu ovwan ọfuanfon ọrẹ i Jehova neneyo ihworho ra mẹrẹn omamọ iruemru ọwan i sabu jiri Osolobrugwẹ.—1Pe 2:11, 12.

Me yẹ odjẹ mẹ kpahen ewun ọrhẹ osẹme ọ ta kpahen uruemru mi vwori kpahen ovwan ọfuanfon na?

NI IVIDIO NA RHIẸ UGBEHIAN I JEHOVA—ỌHWORHARE OWU, ỌMASE OWU, ORHO RU GBE RORO KPAHEN ENỌ ENANA:

  • Mesoriẹ orhiẹ emru ẹghwanren re ne nyerẹnmwu ovwan ọfuanfon ọrẹ i Jehova?

  • Mesoriẹ o fo nẹ emiemọ i yono emọ aye nẹ ọke emọvwerhe kpahen ovwan ọfuanfon ọrẹ i Jehova?

  • Marhẹ iphuphẹn ọrhẹ ihworho ri kpako ne ine ru sabu ha userhumu rẹn ihworho mẹrẹn erere nẹ orhorhomu ọrẹ Osolobrugwẹ?