Rhie riẹ irhomẹmro re havwiẹ

BAIBOL NA O WENE AKPENYERẸN

Mia Guọlọ Hwu-u!

Mia Guọlọ Hwu-u!
  • ẸGBUKPE RE VWIẸ YE: 1964

  • ẸKWOTỌRE RO NURHE: ENGLAND

  • IKUEGBE YI: UPHUPHẸN RO KIKI VWIẸ JI NYERẸN ORHARHERE AKPỌ

AKPENYERẸN MẸ BI

E vwiẹre mẹ uvuẹn Paddington, ro rhiẹ amwa rọ vuọnren rhẹ ihworho uvuẹn London, England. Mẹmẹ rhẹ izu mẹ kugbe imizu mẹ ekpako awansa ri rhiẹ egbọtọ ye rhirhiẹ. Ọsẹ mẹ o vwo lele ame rhirhiẹ oghwa gbọriọ-ọ, nime o biomu enyo ẹda omamọ.

Ọke mia ha ọmọvwerhe, izu mẹ o yonirin mẹ ne mi rha nẹrhomo kason kason. Mi vwo ibiẹ i Baibol ro vwo ọbe i Psalms ọvo, ni mi ha ẹmro ri ha uvuien ruẹ ijoro ne mi rha sabu so aye. Mi karorhọ ọke mie se ẹmro owu uvuẹn ọbe owu rọ hobọte mẹ omamọ, rọ tare: “ Ẹdẹ owu, ekwakwa ephian ine vwoba.” Ẹmro erana a lẹrhe mẹ zonzon vẹnrẹn ason, ji roro kpahen obaro na. Ni mie roro, ‘O vwo ekwakwa erọrọ ri surhobọmwu akpenyerẹn.’ ‘Mesoriẹ mie nyerẹn?’ Mia guọlọ hwu-u!

Ni mi me vwo omamerhomẹ kpahen irueruo ikpodje. Ni mia damoma lele irinmi tẹmro, mẹmẹ rhẹ igbehian mẹ e ji riẹ ekete re sin ihworho rhọ, jeghwai nẹ ughe re mwuofẹn omamọ. Ughe na ọ merhen ame oma, ọrẹn ọ ji vuọn rhẹ ofẹn.

Mi tuẹn orharhere akpenyerẹn rhọ ọke mia ha ẹgbukpe ikpe. Ni mie se itaba, mi dabu ruẹ uvuien siyẹ. Ọke oru, ni mie phopho igbo. Ọke mie te ẹgbukpe 11, ni mie bru enyo da. Dedevwo amerhen enyo na o vwo je mẹ-ẹ, ọrẹn oborẹ oma o ru mẹ orho mwu mẹ ne o merhen mẹ oma. Mi ji vwo ẹguọlọ kpahen ijoro ọrhẹ igbegbe omamọ. Mie riẹ akpẹriọ ọrhẹ iklọbu uvuẹn ason ọke ro jeri mẹ. Mia dẹrẹ nẹ oghwa ason, jeghwai dẹrẹ ruẹ oghwa bọmọke ọke ono rhie. Oma ọrhọ bẹn mẹ ẹdẹ ọreva ye, mi vwe rhe riẹ isukuru-u. Mi rha vabu nya dede, ni mia da enyo uvuẹn iklasi.

Ni mi seri ọke ame a ya ọdamuni rọ kẹta uvuẹn isukuru ame. Ọke izu mẹ o mo rhe kpahen erharhere iruemru mẹ, ẹhẹn yen no seriotọre ji biomu evwan kpahen mẹ. Ame ni kunu, ni mi zẹ nẹ oghwa. Uvwrọke owu, ni mi kwa bru iboifrẹndi mẹ re se Tony ro rhiẹ ologbozighi. Ọye ohi, ọ rhẹ imwu egbogbanhon, e ji rhe yi rhẹ ohworho ro gbozighi omamọ. O jiri-i, ni mi mẹrenvwan ji vwiẹ ọmọ ọhworhare ọke mia ha ẹgbukpe 16.

 OBORẸ I BAIBOL NA O WENE AKPENYERẸN MẸ LELE

Ọke mie rhirhiẹ oghwa ra bọn rẹn emẹse ri vwe vwo esa, ri ji vwo emọ rhẹ obọ, yi mia tu mẹrẹn Iseri Jehova. Igọmẹti yẹre mẹ obuvun owu ni mi rhirhiẹ. Iseri Jehova awanva ri rhiẹ emẹse a kọn bruẹ emẹse erọrọ ri ji kiki vwiẹ, ri ha uvuẹn ogba na. Ẹdẹ owu ni mi homaba aye uvuẹn ẹmro aye a ta. Mi vwo ẹhẹn mi ne biomu ẹmro Iseri Jehova na. Ọrẹn, aye ni kpahenrhọ enọ mẹ buebun izede ọghọ, ro ji fiotọre nẹ uvuẹn i Baibol na rhe. Aye i ji dje uruemru esiri ọrhẹ uruemru dẹndẹn phia, ọrana ọ hobọte mẹ omamọ. Omarana, ni mi kweri taghene aye i ha i Baibol na yoni mẹ.

O jiri-i, ni mi yono oborẹ o wene akpenyerẹn mẹ uvuẹn i Baibol na. Nẹ ọke uphuphẹn mẹ rhe, mia zofẹn uhwu. Ọrẹn vwana, ni mi ma mẹrẹn uyono i Jesu rọ ta kpahen ẹrhọmọnuhwu! (John 5:28, 29) Habaye, mi ji yono taghene Osolobrugwẹ o vwo ọdamẹ kpahen mẹ. (1 Peter 5:7) Oborẹ ọ ha uvuẹn Jeremiah 29:11 ọ hobọte mẹ omamọ, rọ tare: “ ‘Mẹmẹ i dabu rhe oborẹ mie roro kpahen are,’ omaran i Jehova ọ tare, ‘iroro ufuoma, orhiẹ ọrẹ okpetu-u, ne mi yẹ are omamọ obaro akpọ kugbe ifiẹrorhọ.’ ” Ni mi me vwo imwẹro taghene mi na sabu vwo ifiẹrorhọ mi ne nyerẹn bẹmẹdẹ uvuẹn Paradais otọrakpọ na.—Psalm 37:29.

Iseri Jehova i dje obọdẹn ẹguọlọ ha mẹ. Ọke mie tu riẹ uyono aye, erhirhiẹ na ọ merhoma, aye ephian ihworho esiri ri vwo ẹhẹn ghwologhwolo. (John 13:34, 35) Ọnana ọ vẹnẹ oborẹ e ru mẹ uvuẹn ishọshi mẹ. Iseri Jehova na i rhiabọ dedi mẹ udabọ erhirhiẹ mi havwọ. Aye i yẹre mẹ ọke aye, hẹrote mẹ, ji dje ọdamẹ ha mẹ, aye i ji tobọ yẹ mẹ userhumu mi guọlọre. Ni mi ma mẹrẹn omamẹ taghene mi ha uvuẹn ekrun ro vwo ẹguọlọ.

Nyoma uyono i Baibol mẹ, ni mi mọ mẹrẹnvwrurhe taghene mi ne ruẹ ewene uvuẹn akpenyerẹn mẹ ni mi sabu rhiẹ ugbehian i Jehova. Ọ lọhọ ha mẹ mi na dobọ itaba e se ji-i. Uvuẹn ọke owu ọvo na, mi ji mẹrẹnvwrurhe taghene o vwo ijoro ezẹko ra lẹrhẹ mẹ vwo ẹhẹn mi ne phopho igbo, omarana ni mi wene ijoro mie kporo jeghwai kerhọ. Nime mi guọlọ vwo iroro rọ gbare, mi vwe rhe riẹ akpẹriọ ọrhẹ iklọbu uvuẹn aso-on, ni mi je rhe se rhẹ ufi mi na da enyo vrẹn oma. Ni mi ji mwu igbehian ekpokpọ, rẹ omamọ iruemru aye ina sabu ha userhumu mẹ nyamwu ewene mẹ.

Ọrẹn, baghini Tony o ji lele Iseri Jehova yono i Baibol na kuẹgbe. Ọke Iseri Jehova na a kpahanrhọ enọ yen, no vwo imwẹro kpahen urhomẹmro ro yono na. No ruẹ ewene eduado uvuẹn akpenyerẹn yen: o vwo rho lele ukoko ilogbozighi ọnẹye-en, o vwo rho so uhi-i, nọ ji dobọ igbo ephopho ji. Nẹ ame i sabu lẹrhẹ oma merhen i Jehova dẹn, ame awanva ni mẹrẹnvwrurhe taghene o fori nẹ ame i ru ewene kpahen akpọ ọfanrhiẹn ame, jeghwai ruẹ oghwa mẹ rhiẹ ekete ame ina sabu mọrọn ọmọ ame. Ame ni rọnmọren uvuẹn ẹgbukpe 1982.

“Mi vwe rhe zonzon vẹnrẹn ason fọkiẹ uduebro kpahen obaro na yanghene uhwu-u”

Mi karorhọ ọke mia guọlọ irhomu-ẹmro sansan uvuẹn Oghwa Odẹrẹ ọrhẹ Awake! * ri ta kpahen ikuegbe ihworho ri sabu ruẹ ewene mia guọlọ ruẹ na. Idje aye i ha udu rhọ mẹ aghwẹ omamọ! Aye i ruru mẹ gbanhon ni mi je rhe fiobọrhotọre. Mia nẹrhomo vwe i Jehova ọke ephian taghene ọ vwọ nyaji mẹ vwo-o. Mẹmẹ rhẹ Tony ni bromarhame rhiẹ usuẹn Iseri Jehova uvuẹn July 1982.

ERERE MI MẸRẸN NE

Ugbehian mi mwurun rhẹ i Jehova o simi arhọ mẹ. Mẹmẹ rhẹ Tony i rhiẹromẹrẹn userhumu i Jehova uvuẹn ọke ebẹnbẹn. Ame i yono oborẹ a hẹroso Osolobrugwẹ uvuẹn ọke ebẹnbẹn, ame i jeghwai mẹrẹn userhumu ọrhẹ obẹhatua ọnẹyen ọke ephian uvuẹn ekrun ame.—Psalm 55:22.

Mi ji ha userhumu rẹn ọmọ ame ọhworhare ọrhẹ ọgbọtọ rhe i Jehova ne jerẹ omẹmẹ. Vwana, oma ọ merhen mẹ ọke mia mẹrẹn emọ aye re ruẹ riaro uvuẹn irherhe ọrẹ Osolobrugwẹ.

Mi vwe rhe zonzon vẹnrẹn ason fọkiẹ uduebro kpahen obaro na yanghene uhwu-u. Mẹmẹ rhẹ i Tony e riẹ ikoko Iseri Jehova sansan ya ha udu rhọ aye aghwẹ kọkprughwre kọkprughwre. Ame a homaba imizu na yono ihworho taghene aye i rhe vwo esegburhomẹmro kpahen i Jesu, aye ina sabu vwo arhọ i bẹmẹdẹ.

^ Udjoghwẹmro 19 Iseri Jehova yi ji fomie.