Rhie riẹ irhomẹmro re havwiẹ

Oja-ẹriọ Ono Vwo Oba Dẹ?

Oja-ẹriọ Ono Vwo Oba Dẹ?

Wu na taghene . . .

  • ee?

  • ẹjo?

  • ọkezẹko?

 OBORẸ I BAIBOL Ọ TARE

‘Osolobrugwẹ . . . ono hionron ame-oviẹ nẹ aye ẹro, uhwu, oja-ẹriọ, oviẹ, ọrhẹ omiamiamo i rhe rhirhiẹ ye-e.’ —Revelation 21:3, 4, Contemporary English Version.

OBORẸ ỌRANA ỌNỌ SABU MEVIRHỌ WẸN

Omwẹro taghene rhẹ Osolobrugwẹ yẹ ọ suẹ ebẹnbẹn ọwa-an.—James 1:13.

Rẹ ọwan e rhe taghene Osolobrugwẹ o roro harẹn ọwan ọke rẹ ọwan a rha riẹ-oja, ọ lẹrhẹ ẹhẹn ọwan totọre.—Zechariah 2:8.

Ẹro-efirhọ ọ havwiẹ taghene oja-ẹriọ ephian ine vwo oba.—Psalm 37:9-11.

 ỌWAN INE GHINI SABU KWERHỌ OBORẸ I BAIBOL NA Ọ TARE??

Ee, orho riotọre, fọkiẹ iroro eva:

  • Osolobrugwẹ o vwo utuoma kpahen oja-ẹriọ ọrhẹ osehiẹn. Gbe roro oborẹ o te i Jehova Osolobrugwẹ ẹhẹn, re sehiẹn ihworho enẹyen ọke jijiri rọ vrẹn ne. Baibol ọ tare taghene oma ọ merhiẹn kpahen ‘otu rẹ amwa ihworho yi kprekpre-e.’—Judges 2:18, New World Translation.

    Evwan o biomu Osolobrugwẹ kpahen ihworho ra ha ẹkuọn rẹn awọrọ. Jerẹ udje, Baibol ọrhọ ta taghene ‘ihworho re biomu ọbara’ aye emru utuoma harẹn Osolobrugwẹ.—Proverbs 6:16, 17.

  • Osolobrugwẹ o vwo ọdamẹ kpahen owuowọnwan. Orhiẹ owuowọnwan ọvo yẹ ‘orhe oborẹ ọlahiẹ rhẹ oborẹ ọmiamiẹ’ ẹhẹn-ẹn, Jehova o ji rhe yi!2 Chronicles 6:29, 30.

    Phẹrẹkpẹ, Jehova ọnọ ha oja owuowọnwan ọria toba nyoma Uvie yi rhe. (Matthew 6:9, 10) Ọke ọnana, Jehova ọ ha urhebro rẹn ihworho ra guọliẹ nẹ ẹhẹn sa.—Acts 17:27; 2 Corinthians 1:3, 4.

 GBE RORO KPAHEN ỌNANA

Mesoriẹ Osolobrugwẹ ọ fọkiẹ ha uphẹn rẹn oja-ẹriọ?

Baibol ọ kpahenrhọ onọ na uvuẹn ọbe ROMANS 5:12 rhẹ 2 PETER 3:9.