Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 13

Timoti Bee Gbī e Yerebah Nɛ̄ Pya Nɛɛ̄

Timoti Bee Gbī e Yerebah Nɛ̄ Pya Nɛɛ̄

Timoti bee le nwiī zege bu ye bee ɛɛ loe yerebah nɛ̄ pya nɛɛ̄. A bee si gbɛnɛ-edo kɛ̄ loe yerebah nɛ̄ pya dɔɔ̄na. Nyɔbee wo, abee ɛrɛ ekpeloo bu dum gbɛnɛ. Eniā ge a loe dā nu a ye kiiloo ni?—

Ka Timoti le ye Kaāmā bee ye tɔgɛ nu akiiloo Jɛhova

Timoti bee nyim aakɛ̄ bu gbɛnɛ buɛ̄ a kura Listra. Sɔ̄ a bee lege nwiī, ye kaāmā Lɔis le ye ka Yunis, bee bɔātɛ̄ etɔgɛ ye nu akiiloo Jɛhova. Sɔ̄ Timoti gaa bee nyim aakɛ̄, a bee gbīnage kɛ̄ etɛɛ̄ doo yerebah nɛ̄ pya dɔɔ̄na kɔ ba a nɔ̄ nu akiiloo Jɛhova.

Sɔ̄ Timoti bee lege zege, Pɔɔl bee ye kɔ nɛ̄ kɔ a nyɔnɛ ye kii dɔɔ̄na buɛ̄ uwe zue ue. Timoti bee yiga! A bee kpɛnaloo ekii wee yerebah nɛ̄ pya dɔɔ̄na.

 Timoti bee nyɔnɛ Pɔɔl si ziī gbɛnɛ buɛ̄ ale bu Masɛdɔnia akura Tɛsalɔnaika. Ba ɛrɛ ekiā nyɔɔnyɔɔ dɛɛ̄ kiā sa yiinage bu fah-maā lɛɛ ba gae ina lo buɛ̄. Sɔ̄ ba e’ina lo buɛ̄, ba bee yerebah nɛ̄ gbɛnɛ-edo nɛɛ̄ kɔ ba a nɔ̄ nu akiiloo Jɛhova. Mɛ pio nɛɛ̄ bee wa ɛrɛ saŋ loo sa gbī edoo wa nu. Nyɔwo Pɔɔl le Timoti bee aa lo kɛ̄ sa kii dɔɔ̄na buɛ̄ uwe zue ue.

Timoti bee ɛrɛ ɛɛbu le ekpeloo dum

Sɔ̄ pio enɔɔ̄ etɛna, Pɔɔl bee kɔ nɛ̄ Timoti kɔ a obia kii Tɛsalɔnaika sa ɛp kɛ̄ pya wuga le doo. A gbī gbɛnɛ e’agaloo loe obia kii buɛ̄ a yere bɔɔ ama! Mɛ Timoti bee si nyɔnɛbee a bee gbī esuā kɛ̄ pya wuga a le lo kɛ̄ le doo. A bee su le kpɛa ue mā Pɔɔl. Pya wuga a bee le Tɛsalɔnaika gaa bee doo leere kaānā!

Timoti bee nyɔnɛ Pɔɔl sitam bu gbɛnɛ-edo zua. Ɛrɛ sɔ̄ Pɔɔl bee ɛm kɔ aba Timoti na a dap e yere mā bɔŋanaloo loe yerebah wa nɛ̄ ā. Timoti bee wereloo Jɛhova, ea bee were nage loo pya nɛɛ̄.

Olo werege loo pya nɛɛ̄ sa gbī e yerebah wa nɛ̄ kɔ ba a nɔ̄ nu akiiloo Jɛhova ni?— Lo o doowo, o dap ɛrɛ gbɛnɛ ɛɛbu le ekpeloo bu dum, dookɛ̄ Timoti bee doo!

BUŪ BU O KPA BAIBOL

  • 2 Timɔti 1:5; 3:15

  • Doonu 16:1-5; 17:1-10

  • 1 Pya Tɛsalɔnaika 3:2-7

  • Pya Filipai 2:19-22