Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 4

A Bee Doo Kɔ Bu Ye Tɛ Le Jɛhova a Ɛɛ

A Bee Doo Kɔ Bu Ye Tɛ Le Jɛhova a Ɛɛ

Amunu yii na Jɛfta gaa yira nɛ Jɛhova ani?

Naa bee waɛ, mɛ sira Jɛfta bee doo nu ye tɛ bee yira

O muɛ̄ge nwiīgbobia ale bu foto aya ni?— Ɛɛ sira ziī gbara ye bee kura Jɛfta. Kpa Baibol naa kue ye bee inɛ, mɛ i suā kɔ a bee doo kɔ bu ye tɛ le Jɛhova a ɛɛ. Doo i nɔ̄ nu a ye kiiloo le ye tɛ Jɛfta.

Jɛfta bee le le nɛɛ, ea bee su gbɛnɛkpo ye sɔ̄ tɔgɛnu ye sira a kiiloo Jɛhova. Jɛfta bee lunage nɛɛ a ɛrɛ ekpo sa para zaāsī. Nyɔwo pya Izrɛl bee ye bara kɔ a zaāe wa sī loe benɔ̄ loo pya wa nɛɛ̄ baa.

Jɛfta bee yere kara bara yerebah aāba Bari loe be eeba. Jɛfta bee yira yii nɛ Jɛhova kɔ lo ale a bee eeba, a gaa le sue tua tua nɛɛ a ye zɔŋia aābu ye tɔ nɛ̄ Jɛhova sɔ̄ e aa uwe nɔ̄. Lo nɛɛ etɔɔ̄ sa sitam bu tɔkpo zɔ̄zɔ̄ŋia Bari bu dɛ̄dɛɛ̄ dee  a tɔɔ̄dum. Tɔkpo zɔ̄zɔ̄ŋia bee le kɛ̄ pya nɛɛ wee si wee taāŋaba Bari lo sɔ̄. Kɛ̄adoo, Jɛfta bee eeba lo nɔ̄! O suāge tua nɛɛ̄ abee aa ye tɔ ye zɔ̄ŋia sɔ̄ a obia lu be ni?—

Aiī, bee le sira Jɛfta! A bee le aba ye bee nwiī, e Jɛfta ɛrɛ e yere ye ture anyawo. Lo ama bee ye biirebu gbɛnɛ. Mɛ nyiɛŋia bu kɔ, ae bee yira yii. Aba sɔ̄ a, ye sira bee kɔ: ‘Na tɛ o ebee yira yii nɛ Jɛhova, doo dookɛ̄ o ebee yira doo.’

Dɛ̄dɛɛ̄ zua, pya gbo sira Jɛfta wee ye ina loo

Bu sira Jɛfta bee biira nage. Bie lo tɔkpo zɔ̄zɔ̄ŋia, a naalee dap iya dam sa maɛ gbomiɔ̄ŋɔ. Mɛ a bee ye nia gbɛnɛ loe sere yii ye tɛ le loe doo kɔ bu Jɛhova a ɛɛ. Lo ama bee ye kuī loo gbɛnɛ ee iya dam ale maɛ gbomiɔ̄ŋɔ. Nyɔwo a bee aa wa tɔ sa tɔɔ̄ tɔkpo zɔ̄zɔ̄ŋia dɛ̄dɛɛ̄ dee ye tɔɔ̄dum.

O kɛɛrɛge kɔ nu a bee doo bee ɛɛrɛ bu ye tɛ le Jɛhova ni?— Aiī, bee wa ɛɛrɛ bu! Lo ale olo gbaɛ̄tɔ̄loo sa wereloo Jɛhova, o dap nage le doodoo sira Jɛfta. Olo o doonage kɔ bu o tɛ le ka le Jɛhova a ɛɛ kaānā.

BUŪ BU O KPA BAIBOL

  • Deuteronomi 6:4-6

  • Pya Biaɛ 11:30-40

  • 1 Pya Kɔrint 7:37, 38