Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 2

Ribeka Bee Gbī Edoo Kɔ Bu Jɛhova a Ɛɛ

Ribeka Bee Gbī Edoo Kɔ Bu Jɛhova a Ɛɛ

Ribeka bee le wa abee wereloo Jɛhova. Bee ye dam bee kura Aizik. Ye dam bee were-nage-loo Jɛhova. Ribeka bee tɛɛ̄ doodoo wa muɛ̄ Aizik ni? Bu mɛ sīdee na lo wa tɔgɛ kɔ a gbī edoo kɔ bu Jɛhova a ɛɛ ani? Doo i naā nɔ̄ pio nu a ye kiiloo.

Tɛ le ka Aizik bee le Abreham le Sera. Ba bee tɔɔ̄ bu buɛ̄ Kenan, e pya lo buɛ̄ naa bee taāŋaba Jɛhova. Mɛ Abreham bee gbī kɔ ye nwiīnɛɛ̄dam a ii wa a taāŋaba Jɛhova. Nyɔwo, a bee yere ye zooro ture, dap lu Elieza, lo egbī wa nɛ Aizik bu buɛ̄ alu ekue Haran, kɛ̄ pya manamana Abreham bee tɔɔ̄.

Ribeka bee ɛrɛ taɛ loe si eaga tam bu enɛ maā gbo enyanya toora toh

Elieza bee su pya dɔɔ̄na zooro Abreham gbaāloo ye siā. A bee le gbɛnɛ nyɔɔnyɔɔ dɛɛ̄ kiā. Ba bee aara lop ka enyanya a toora nuede le gbɛnɛ-edo le dɔɔ̄nu. Elieza etɛɛ̄ doodoo wa suā loo wa esagɛ nɛ Aizik ni? Sɔ̄ Elieza le pya elua zooro a ina Haran, ba bee yira kpaɛ̄ ziī bana maā, nyɔnɛbee Elieza suā kɔ pya nɛɛ̄ elu wee ibi maā sɔ̄ sɔ̄ naa binia. A bee yere kara nɛ Jɛhova sa kɔ: ‘Doolo emuā lo mda gaa le kɔ nɛ, ‘soosoo seea o kānā maā lokwa m ɔ̄, e a gaa le kɔ, ɔ̄, e m nɛnage maā dɛ̄dɛɛ̄ o enyanya toora toh,’ doolo wa ama lu wa olo ebee tube baloo.’

Lo sɔ̄, nwiī emuā Ribeka bee lu wee ibi maā aābu Bānā maā. Kpa Baibol kɔ abee  kpedɛɛ̄ gbɛnɛ. Elieza bee ye bara maā e ɔ̄, e lo nwiī emuā bee kɔ: ‘Ɔ na tɛ-ɛrɛ, m ibinage nɛ dɛ̄dɛɛ̄ o enyanya toora toh mmɛ sɔ̄ ba e ɔā mmɛ̄a bu.’ Naa kɛɛrɛ! Gbo enyanya toora toh, oo kaga wee ɔ̄ gbɛnɛ-edo maā, nyɔwo, Ribeka ɛrɛ e teera si nu bānā maā wee ibi gbɛnɛedo sɔ̄. O muɛ̄ge bu foto aya kɛ̄ a gaa si eaga tam doo ni?— Bee lu nyɛŋia loo Elieza kɛ̄ Jɛhova bee agara ye kara doo.

Elieza bee su gbɛnɛ-edo le dɔɔ̄nu nɛ Ribeka. E Ribeka bee kɔ nɛ Elieza le pya lo dɔɔ̄na zooro a, kɔ ba a nyɔnɛɛ ye kii tɔ ye tɛ. Elieza bee kɔ baatɛ̄ nu anuā Abreham bee ye yere ture lo kɛ̄, le kɛ̄ Jɛhova bee agara ye kara doo. Abee nia pya butɔ Ribeka kɔ a iya Aizik.

Ribeka bee nyɔnɛ Elieza kii Kenan sa bee iya Aizik

Mɛ, olo kɛɛrɛ ge kɔ ania Ribeka loe iya Aizik ni?— Ribeka bee suā kɔ Jɛhova na a yere Elieza nua a. Nyɔwo sɔ̄ pya butɔ Ribeka bee ye bip sɛh a gbīge ekii Kenan sa iya Aizik, a bee ture kɔ: Aiī “M gaa le kii” li. Aba sɔ̄ a, a bee nyɔnɛ Elieza kii. Sɔ̄ ba bee ina Kenan, a bee iya Aizik.

Nyɔnɛbee Ribeka bee doo nu Jɛhova bee gbī a, Jɛhova bee ye nɛ leelee. Sɔ̄ gbɛnɛ-edo zua etɛna, Jizɔs bee mɛā aabu ye gā! Lo o bee Ribeka sa doo kɔ bu Jɛhova a ɛɛ, ae nɛnage a leelee.

BUŪ BU O KPA BAIBOL

  • Jɛnɛsis 12:4, 5; 24:1-58, 67