Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 9

Jeremaia Naa Bee Ɔbɛ Ekɔ Nu Akiiloo Jɛhova

Jeremaia Naa Bee Ɔbɛ Ekɔ Nu Akiiloo Jɛhova

Ena anuā pya nɛɛ̄ ama ɛrɛ saŋ loo Jeremaia ani?

Jɛhova bee kpɔā Jeremaia

Pio sɔ̄ pya nɛɛ̄ su i nua nu mɔm ale ɛrɛ i saŋ loo sɔ̄ i kɔ nu akiiloo Jɛhova wa nɛ̄. Lo ama dap i ɔbɛ lɛɛloo kɔ nu akiiloo Bari. E bee a sirage loo doowo ni?— Kpa Baibol kɔ inɛ nu a kiiloo ziī zege nɛɛ̄dam a bee wereloo Jɛhova, mɛ, bia kina aa ɔbɛ ekɔ nu a ye kiiloo. A bee kura Jeremaia. Doo i nɔ̄ nu a ye kiiloo.

Sɔ̄ Jeremaia bee le zege gbara, Jɛhova bee ye kɔ nɛ̄ kɔ a ɛrɛ e zuurabahtɔ̄ pya nɛɛ̄ kɔ ba a ɔbɛ edoo piya nu. Lo ama bee agaloo Jeremaia gbɛnɛ, e bɔɔ bee ye aa. A bee kɔ nɛ̄ Jɛhova: ‘Mm suā kɛ̄ ekɔ ue doo. Nyɔnɛbee m lege nwiī.’ Mɛ Jɛhova bee kɔ: ‘Bɔɔ aa a aa. M gaa le yerebah anɛ.’

 Nyɔwo, Jeremaia bee bɔātɛ̄ e zuurabahtɔ̄ pya nɛɛ̄ kɔ elu ekpɔ-wa-te loo lo ba naa nyaā. O kɛɛrɛ ge kɔ pya lo nɛɛ bee doo nu Jeremaia bee kɔ ni?— Eeye. Ba bee ye su nua nu mɔm sa ye ɛrɛ saŋ loo. Pio aba bee gbīnage efɛ ye! Olo kɛɛrɛ kɔ a bee tɔɔ̄loo Jeremaia doodoo wa ni?— Bɔɔ bee ye aa, e a kɔ: ‘Mm lee sinakɛ̄ kɔ nu akiiloo Jɛhova.’ Bu kaka, a bee ɔbɛge ni?— Eeye, a naa bee ɔbɛ. A bee wereloo Jɛhova gbɛnɛ sa naa bee ɔbɛ e kɔ nu a ye kiiloo. Nyɔnɛbee Jeremaia naa bee ɔbɛa, Jɛhova bee ye kpɔā.

Bu edoba, pio pɔrɔ nɛɛ̄ bee top Jeremaia tɛrɛ bu toga-toga bānā maā gba le bu. Naa bee ɛrɛ nuede ale maā e’ɔ̄. Pya nɛɛ̄ ama bee gbī kɔ Jeremaia a u bia bu lo bānā. Mɛ tɛmaloo yerebah Jɛhova, abee lu elɛɛ ye bu ea naa bee u!

Ena i dap nɔ̄ aāloo edoba Jeremaia ani?— Anaa bee ɔbɛ ekɔ nu akiiloo Jɛhova, kere bɔɔ bee ye aa pio sɔ̄. Sɔ̄ o kɔ nu akiiloo Jɛhova, pya nɛɛ̄ dap asu nuā nu mɔm ale ɛrɛ a saŋ loo. Kɛɛ dap a bɔp ale bɔɔ e aa a. Mɛ oa ɔbɛ ekɔ nu akiiloo Jɛhova. A gaa le yerebah anɛ̄ dɛ̄dɛɛ̄ sɔ̄, dookɛ̄ a bee yerebah nɛ̄ Jeremaia doo.

BUŪ BU O KPA BAIBOL

  • Jeremia 1:4-8; 20:7-9; 26:8-19, 24; 38:6-13