Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 11

Ba Bee Ɛm Nu Akiiloo Jizɔs

Ba Bee Ɛm Nu Akiiloo Jizɔs

O muɛge pya nɛɛ̄ ale bu foto aya ni?— Aba na Matiu, Mak, Liuk, Jɔn, Pita, Jems, Jud, le Pɔɔl. Dɛ̄dɛɛ̄ nɛɛ̄ ama le Jizɔs bee tɔɔ̄dum aba eku sɔ̄, eba bee ɛm nu akiiloo Jizɔs. Doo i nɔ̄ pio nu a wa kiiloo.

Ena o suā akiiloo pya nɛɛ̄ ama ani?

Taa aba bee le pya nɛɛ̄ lɛɛratam ba bee nyɔnɛ Jizɔs zue ue. O suāge loo taa aba ni?— Matiu, Jɔn, le Pita. Nɛɛ̄ lɛɛratam Matiu le Jɔn bee suā loo Jizɔs leere, sa ziī ziī aba bee ɛm kpa akiiloo dum Jizɔs. Nɛɛ̄ lɛɛratam Jɔn  bee ɛmanage kpa alu ekue Mumuuna le taa dɔɔ̄na kpa alu ekue Tua kpa, Baɛ kpa le Taa kpa Jɔn. Nɛɛ̄ lɛɛratam Pita bee ɛm baɛ kpa ale bu Baibol. Lu ekue wa Tua Kpa le Baɛ Kpa Pita. Bu ye eree baɛ Kpa, Pita bee ɛm nu akiiloo sɔ̄ Jɛhova bee kɔ ue aā bunyɔɔ sa kɔ kumaloo Jizɔs kɔ: ‘Alɛ ama na mdaa nwiīnɛɛ̄dam a. Bu mɛ ɛɛ ye loo, e m ɛɛŋa ye loo.’

Pya dɔɔ̄na nɛɛ̄ o bee muɛ̄nage bu foto a, tɔgɛ nage i nu akiiloo Jizɔs bu pya kpa ba bee ɛm. Ziī aba na Mak. Naa daba alɛ bee le kɛ̄ mɔmadɛɛ̄ sɔ̄ alu e’aa Jizɔs sa muɛ̄ dɛ̄dɛɛ̄ nu a sira. Dɔɔ̄na nɛɛ̄ na Liuk. A bee le nɛɛ̄ dambie, e naa daba a bee lu Nɛɛkraist sɔ̄ Jizɔs e’ua sah.

Baɛ pya lo dɔɔ̄na nɛɛ̄ a ɛm Baibol o muɛ̄ bu foto a, bee le pya nwīgbagbara wuga Jizɔs. O suāge wa bee ni?— Wa bee na Jems le Jud. Tua sɔ̄ ba naa bee yira nɛ̄ Jizɔs. Ba bee kɛɛrɛ nage kɔ a bɔdaa. Mɛ sɔ̄ esaa ba bee yira nɛ Jizɔs sa lu pya Nɛɛkraist.

Lo kpɛdumɛ̄ nɛɛ̄ abee ɛm Kpa Baibol o muɛ̄ bu foto aya, na Pɔɔl. Lɛɛ a gaa lu Nɛɛkraist ye bee bee kura Sɔɔl. A bee baaloo pya Nɛɛkraist sa wa tɛŋaloo. O suāge nu adoo kɔ Pɔɔl alu Nɛɛkraist ni?— Ziī dee, Pɔɔl gaa bee kiā nyɔɔ dee sɔ̄ bu bugia a dā nɛɛ̄ a ye kɔ ue nɛ̄ aā bunyɔɔ. Lo nɛɛ̄ bee le Jizɔs! A bee bip Pɔɔl kɔ: ‘Ena anuā o tɛŋaloo pya a mɛ yira nɛ̄ ani?’ Sɔ̄ lo ama etɛ̄na, Pɔɔl bee nyaā sa lu Nɛɛkraist. Pɔɔl bee ɛm 14 Kpa ale bu Baibol, aāloo Kpa Pya Rom mmɛ loo Kpa Pya Hibru.

I wee buū Kpa Baibol dɛ̄dɛɛ̄ dee. Sɛh ii wee doo wo ni?— Tɛ̄maloo ebuū Kpa Baibol, i nɔ̄ gbɛnɛ-edo nu akiiloo Jizɔs. E niā ge a loe nɔ̄ gbɛnɛ-edo nu akiiloo Jizɔs ni?—

BUŪ BU O KPA BAIBOL

  • 2 Pita 1:16-18

  • Maak 3:21; 14:51

  • Jud 1

  • Doonu 9:1-18