Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 6

Bɔɔ Naa Bee Aa Devid

Bɔɔ Naa Bee Aa Devid

Olo wee doo doodoo wa sɔ̄ bɔɔ a aa ni?— Naa daba o wee gbī yerebah aā bah o tɛ le o ka. Mɛ a ɛrɛ nage ziī dɔɔ̄na nɛɛ̄ adap a yerebah nɛ. Lo nɛɛ̄ ɛrɛ ekpo ee ɛrɛgeba dɔɔ̄na nɛɛ̄. O suāge loo lo nɛɛ̄ ni?— Aiī, ɛɛ na Jɛhova Bari. Doo i naā kɔ nu akiiloo ziī nwiī zuguru ale bu Kpa Baibol. Ye bee kura Devid. Bɔɔ naā bee ye aa nyɔnɛbee a bee suā kɔ Jɛhova gaa le yerebah ye nɛ dɛ̄dɛɛ̄ sɔ̄.

Aā sɔ̄ Devid bee le nwiī gbagbara nwiī, ye tɛ le ka bee ye tɔgɛ kɔ a wereloo Jɛhova. Lo ama bee yerebah nɛ Devid kɔ bɔɔ aa ye aa kere sɔ̄ nu a yere bɔɔ bee ye sira loo. A bee suā kɔ Jɛhova lue ye gbo esa a gaa le yerebah ye nɛ. Ziī dee sɔ̄ Devid gaa bee tɔɔ̄loo gbo naāna pee, ziī gbɛnɛ ka sasa-ekpo bee lu sa su egā aā ziī ka lo naāna pee! O suāge nu Devid bee doo ni? A bee kponia lo sasa-ekpo sa su bah ye fɛā! Dɔɔ̄na dee sɔ̄ ziī ka bɛa bee lunage wee aa naāna, Devid bee ye fɛnage! Mɛɛ̄ na o kɛɛrɛ kɔ a bee yerebah nɛ Devid ani?— Aiī, bee le Jɛhova.

A ɛrɛnage dɔɔ̄na sɔ̄ Devid bee tɔgɛ eagaloo alu keebee. Pya Izrɛl le pya Filistia gaa bee be nɔ̄. Ziī nɛɛ nɔ̄ pya Filistia bee le gbɛnɛ nyɔɔnyɔɔ nɛɛ a kuī gbara gbɛnɛ! Ye bee kura Golia. Gbɛnɛ gbara ama gaa bee su pya nɔ̄ Izrɛl le wa Bari Jɛhova nuā nu mɔm. Golia bee kɔ kaaga kɔ pya nɔ̄ Izrɛl a lu wee bee ye. Mɛ dɛ̄dɛɛ̄ pya Izrɛl bee ɛrɛ gbɛnɛ bɔɔ lo e be ye. Sɔ̄ Devid bee dā nu akiiloo, a bee kɔ nɛ Golia: ‘M gaa le be a be loo! Jɛhova e yerebah mɛ nɛ, e m be a eeba!’ O kɛɛrɛge kɔ Devid bee ɛrɛ eagaloo ni?— Aiī, abee ɛrɛ gbɛnɛ e’agaloo. O gbīge esuā nu a sikɛ̄ sira ni?

Devid bee su ye eziī toma dɛm le o’oo ekpo dɛm, sa kii ee wee be-be loo lo gbɛnɛ gbara. Sɔ̄ Golia bee muɛ̄ kɛ̄ Devid lu nwiī zege doo, a bee su Devid nuā nu mɔm. Mɛ Devid bee ye kɔ nɛ: ‘O lu mɛ loo sa aara gɛnɔ̄, mɛ mda lu a loo bu bee Jɛhova!’ Lo sɔ̄, a bee su ziī ekpo dɛm a, yere nyɔɔ ye eziī, teera pii Golia, sa ye top lere bee pima. Lo dɛm bee zia taɛ nyɔɔ-gbɔɔsī Golia! Lo gbɛnɛ gbara bee dɔ kɛnɛkɛ̄ sa  u! Bɔɔ bee aa Pya Filistia e dɛ̄dɛɛ̄ aba bee teera yaara. Tɛɛ̄ doodoo wa na nwiī zege doodoo Devid dap eeba lo gbɛnɛ gbara ani?— Jɛhova bee ye yerebah nɛ. E Jɛhova bee ɛrɛ gbɛnɛ ekpo ee lo gbɛnɛ gbara!

Devid naa bee ɛrɛ bɔɔ nyɔnɛbee a bee suā kɔ Jɛhova e yerebah ye nɛ

Ena o dap nɔ̄ aāloo eloh Devid ani?— Jɛhova ɛrɛ gbɛnɛ ekpo eenyɔɔ ɛrɛgeba dɔɔ̄na nɛɛ̄. E alɛ lu o gbo. Nyɔwo, dɔɔ̄na sɔ̄ bɔɔ a aa, nyiɛŋia bu kɔ Jɛhova dap a yerebah nɛ loe ɛrɛ e’agaloo!

BUŪ BU O KPA BAIBOL

  • Le-yɔɔ 56:3, 4

  • 1 Samuel 17:20-54