Skip to content

Skip to secondary menu

Skip to table of contents

Jehovah’s Witnesses

Khana

Tɔgɛnu Pya O Miɔ̄ŋɔ

 Nuenɔ̄ 10

Jizɔs Wee Gbaɛ̄tɔ̄loo Dɛ̄dɛɛ̄ Sɔ̄

Jizɔs Wee Gbaɛ̄tɔ̄loo Dɛ̄dɛɛ̄ Sɔ̄

Ekɔ gbaɛ̄tɔ̄loo o tɛ le o ka wee waɛge dɛ̄dɛɛ̄ sɔ̄ ni?— A’aga pio sɔ̄. O suāge kɔ Jizɔs bee gbaɛ̄tɔ̄loo Jɛhova le ye tɛ le ka ni?— Ye edoba dap a yerebah nɛ̄ kɔ o gbaɛ̄tɔ̄loo o tɛ le o ka kere sɔ̄ anaa waɛ. Doo i naa nɔ̄ nu akiiloo lo ama.

Lɛɛ Jizɔs gae bee lu a kɛnɛkɛ̄, a bee le loo ye tɛ Jɛhova li bunyɔɔ. Mɛ Jizɔs bee ɛrɛnage tɛ le ka a nyɔɔ kɛnɛkɛ̄. Wa bee kura Josɛf le Meri. O suāge kɛ̄ ba bee tɛɛ̄ doo lu ye tɛ le ka ni?—

Sɔ̄ Jizɔs bee le li bunyɔɔ, Jɛhova bee su ye dum yere bu Meri lokwa adap mɛā sa tɔɔ̄dum a kɛnɛkɛ̄. Lo ama bee le tam nyɛŋia! Jizɔs bee nyim yiiloo bie bu Meri dookɛ̄ pya dɔɔ̄na nwiī wee nyim bu wa ka doo. Sɔ̄ ɛrɛnia enɔɔ̄ etɛna, Jizɔs bee mɛā. Kɛ̄ Meri le ye dam Josɛf bee tɛɛ̄ doo lu tɛ le ka Jizɔs a nyɔɔ kɛnɛkɛ̄ lo.

Sɔ̄ Jizɔs ebee luge 12 zua, a bee doo ziī nu a tɔgɛ kɛ̄ a wereloo ye tɛ Jɛhova doo. Lo ama bee sira sɔ̄ Jizɔs le pya ye tɔ bee kiā nyɔɔnyɔɔ kiā kii uwe Doonu Tɛɛ̄yee li Jerusalɛm. Sɔ̄ ba gaa obia kii be Josɛf le Meri naa bee muɛ̄na Jizɔs. O suāge kɛ̄ abee le ni?—

Ena anuā Jizɔs bee le bu tɔkaɛ ani?

Josɛf le Meri bee nwaabah obia kii Jerusalɛm wee gbī Jizɔs tɛɛ̄ dɛ̄dɛɛ̄ kɛ̄. A bee wa taɛ̄ŋɛ gbɛnɛ nyɔnɛbee ba naa bee ye dap gbī muɛ̄. Mɛ sɔ̄ taa biradee etɛ̄nā ba bee ye gbī muɛ̄ bu tɔ kaɛ! O suāge nu anuā Jizɔs bee le bu tɔkaɛ ni?— Nyɔnɛbee adap nɔ̄ gbɛnɛkpo nu akiiloo ye Tɛ Jɛhova lo kɛ̄. A bee wereloo Jɛhova sa gbī enɔ̄ edoo kɔ bu ye a ɛɛ. Kere sɔ̄ enyima nage sa lu kagbara nɛɛ̄, Jizɔs bee gbaɛ̄tɔ̄loo Jɛhova dɛ̄dɛɛ̄ sɔ̄. Jizɔs bee gbaɛ̄tɔ̄ kere sɔ̄ doowo bee aga le sɔ̄ a kura nage kɔ a ɛrɛ etɔga. Ekɔ Jizɔs bee gbaɛ̄getɔ̄loo Josɛf le Meri ni?— Aiī, Kpa Baibol kɔ a bee doowo.

Ena o dap nɔ̄ aāloo edoba Jizɔs ani?— Alu e bɛɛ̄ kɔ o gbaɛ̄tɔ̄loo o tɛ le o ka keresɔ̄ a aga. O dooge wo ni?—

BUŪ BU O KPA BAIBOL

  • Luk 1:30-35; 2:45-52

  • Pya Ɛfɛsɔs 6:1

  • Pya Hibru 5:8