Skip to content

Skip to secondary menu

Skip to table of contents

Jehovah’s Witnesses

Khana

Obia pii Jɛhova

Lɛta a aaba Eku Abaɛbee

Lɛta a aaba Eku Abaɛbee

Na wereloo i gbaa yira:

Dookɛ̄ o suā doo, kpa Baɛbɛl kɔ gbɛnɛkpo nu abee sira loo pya nɛɛ. Gbɛnɛ-edo aba bee le pya nɛɛdam le nɛɛwa ba ɛrɛ yira lo ba bee kpesī pya taaŋa a gaa i sira loo. Ba bee ɛrɛ “ekɛɛrɛ abee lo ili.” (Jemes 5:17) Taaŋa le gbɛnɛ ekɛɛrɛ bee zia pio aba gbɛnɛ. Pya lo dɔɔna, pya abee doo nu awa ziloo gbɛnɛ na pya wa butɔ le pya ba gbaa yira. E nyiɛ gbɛnɛkpo aba bee wa begee ue loo taɛ alaba tɛɛ̄ ekwɔ.

Ekɔ, pya nɛɛ ama bee aaloo Jɛhova doo pippip ni? Eeye. Gbɛnɛ-edo aba bee le doodoo nɛɛ-uɛ le-yɔɔ loa bee yere kara kɔ: “M kiā pe doodoo naana pee a pe. Gbī o zooro, nyɔnɛbee mm ibere dɛ̄dɛɛ̄ o lok.” (Le-yɔɔ 119:176) Lege kɛ̄ a tɔɔ̄ loo olo doolo ni?

Jɛhova naa wee ibere pya aye taaŋaba ba dag aa yɛɛ gbo naana. Taāwo, a gbī wa—gbɛnɛkpo sɔ̄ awee doowo tɛmaloo pya le aba gbaa yira. Bu edoba, naa kɛɛrɛ kɛ̄ Jɛhova bee yerebah nɛ ye zooro Job, loa bee mɔna gbɛnɛkpo etɛɛrɛ—gbaāloo kɔ kɛ̄ awee tɛɛ̄ ɛrɛ kpugi bee dɔ, abee peere pya ye nɛɛ a wereloo, sa ɛrɛ gbɛnɛ dumɛloo. Job bee egere nage bu sɔ̄ alu ekɔ ye gbee tɛmaba pya nɛɛ ebee ye yerebah nɛ. Mɛ, anaa bee aaloo Jɛhova kere adoo a ɛrɛ sɔ̄ abee kɛɛrɛ nu bu elɔh sīdee. (Job 1:22; 2:10) Bu amunu sīdee na Jɛhova bee yerebah nɛ Job kɔ asikɛ̄ ɛp nu bu sīdee abɔloo ani?

Ziī sīdee Jɛhova bee yerebah nɛ Job na tɛmaloo ziī nɛɛ le ɛɛ gbaa yira lo akura Elihu. Sɔ̄ Job bee kɔ ye kɛtɔɔ̄ siā, Elihu bee gbaɛtɔ, esa abee lu ezū ye kɔ akɔ ue. Ena ekɔ ani? Ekɔ, ae kɔ Job gbɛ ale edoo kɔ kɛɛ abɔp ye sa a begee ue yeloo ni? Eeye doo pippip? Edɔɔ̄ Bari zū Elihu kɔ akɔ: “M le doodoo olo kɛsī lo kaka Bari; bee lu edɛm mɛ aāloo baɛ̄.” Lɛɛ anɛ eagaloo Job kɔ: “Lɔgɔ bɔɔ amɛ aaloo aa doo kɔ o nyɔŋa, e mdaa ezū aa anɛ taaŋa gbɛnɛ.” (Job 33:6, 7) Taā adoo kɔ taaŋa Job a yiiloo, bu wereloo Elihu nɛ zuurabahtɔ le agɛrɛloo lo Job bee gbī.

Soosoo suāe, kɔ aba ekɛɛrɛ ama na adoo nage kɔ ili akwa nwīekpo kpa ama a. Bu tua dɔ, i bee dasī gbaɛtɔ sa dā, kɛɛrɛ kɛtɔɔ̄ le ue a aanu gbɛnɛkpo pya abee kiā pe kaānā. (Kam 18:13) Lɛɛ i si bu Kpa Kaɛ, yere kara nyɔɔ bu egbītɛ̄ kɛ̄ Jɛhova bee yerebah nɛ pya ye zooro ba bee kpesī dua kɛtɔɔ̄ ama, a sɔ̄ akii adumɛ doo. Bu ye kpɛdumɛ, i su pya ue i ɛrɛ aābu Kpa Kaɛ gbaāloo nu abee sira loo pya nɛɛ anii’ee ɛma nwīekpo kpa ama. Bu ɛɛbu, i kɔ o gbītɛ̄ nu ale bu nwīekpo kpa ama. Soosoo, suā leere kɔ i ɛrɛ kaana wereloo aloo.

Eku Abaɛbee pya Ɛkeebee Jɛhova