Skip to content

Skip to secondary menu

Skip to table of contents

Jehovah’s Witnesses

Khana

Obia pii Jɛhova

 GAH 3

Ɛrɛ Saŋ—Sɔ̄ Alu E “Pima a Ue”

Ɛrɛ Saŋ—Sɔ̄ Alu E “Pima a Ue”

“Ziī wuga nɛɛwa ale bu na bɔŋanaloo bee mɛ dɛrɛ esah ue kɔ m yib kpugi ye aāba. Pya dɔɔ̄na nɛɛ bu bɔŋanaloo bee dā sa ye yere kpotɛ̄. Sɔ̄ ae saa, lo wuga gbobia bee mɛ kɔnɛ kɔ a ɛrɛ aā ue a dāe a tɔgɛ kɔ mm bee yib lo kpugi. Kere adoo abee taaŋa, nyiɛ mɛ bee kɔ mm lee aaloo ye nɛ doo pippip loo nu ae doora mɛ loo.”—Linda.

EKƆ o dapge kɔ dua ue linda kɔ ama, lo abee lu eyere ye saŋ bu gbɛnɛ tɛmaloo dogo nɛɛ le ɛɛ yira ni? Lu nu ekiɛnu kɔ, dogo pya dɔɔ̄na enɛā taaŋa pio nɛɛ gbɛnɛ mmɛ lo dɔ a ɛrɛ pah nyɔɔ wa taaŋaba. Ekɔ esira loo olo doowo ni?

Ekɔ Ziī Nɛɛ “Edap i kpoora Lɛɛ Loo Wereloo Bari” ni?

I yira kɔ, adap i aga bah gbɛnɛ loe aaloo pɔrɔ nɛ nɛɛ le ii gbaa yira loa doo nu ai yere saŋ bu. Lo i nyɔnɛ, pya nɛɛkraist ɛrɛ e wereloo ziī. (Jɔn 13:34, 35) Lo ale nɛɛ le ii yira doo i piya nu loo, nu ii bee ɛmadɛɛ̄, lo ezialoo ama dap i ziloo gbɛnɛ.—Le-yɔɔ 55:12.

Kɛadoo, kpa Baibol kɔge kɔ a ɛrɛ sɔ̄ pya Nɛɛkraist doo ge nu ɛnia aba e ‘kpɛa ue loo.’ (Pya Kɔlɔsi 3:13) Kerewo, lo asira loo ziī ii, adap i aga bah loe tamā. A ɛrɛge ziī nu ae dap i yerebah nɛ ni? Naa kɛɛrɛ taa biakɛ̄ nɔɔ̄nu ale bu kpa kaɛ:

I Tɛ ale li bunyɔɔ Suā dɛ̄dɛɛ̄ nu. Jɛhova gaa muɛ̄ dɛ̄dɛɛ̄ nu asira, gbaā nage loo ɛrɛgeba pɔrɔ biaɛ ai sira loo le tɔga ai nua loo. (Pya Hibru 4:13) Loa eenyɔɔ tɔɔ̄, sɔ̄ i tɔga, akiɛ̄ Jɛhova. (Aisaia 63:9) A naale elɛɛ baloo kɔ “etaŋiloo sɛh tɔga” ale ɛrɛgeba dɔɔ̄na nu—kere kunɛ dɔɔ̄na ye zooro—“kɔ a kpoora (i) lɛɛloo wereloo Bari.” (Pya Rom 8:35, 38, 39) Ekɔ anaa luge e zū i bu aba lo sīdee ni, kɔ ia lɛɛ baloo lɔgɔ nu ale nɛɛ kɔ a kpoora i lɛɛ loo Jɛhova ni?

Loe aaloo Pɔrɔ naa kura kɔ o yere Kpotɛ̄. Sɔ̄ i aaloo nɛ pya ai doo pɔrɔ loo, ii su lo pɔrɔ nua nu bii, leere ue, ɛrɛ nu edɛrɛ bee, ale yere kpotɛ̄ wa dogo. Nyɛŋia bu kɔ, Jɛhova naa wee yere kpotɛ̄ pɔrɔ, mɛ awee aaloo pɔrɔ lo ale a muɛ̄ nu eyira nyɔɔ daā wo lo. (Le-yɔɔ 103:12, 13; Habakuk 1:13) Sɔ̄ ai agɛrɛloo kɔ i aaloo pɔrɔ nɛ pya dɔɔ̄na, Jɛhova gaa i kɔnɛ kɔ i nɔɛ̄ ye. Anaa wee “sere ye saŋ ina deedee.” —Le-yɔɔ 103:9; Matiu 6:14.

Sɔ̄ i lɛa saŋ bu, i ɛrɛ bere nɛ i loo. Bu mɛ sīdee? Naa kɛɛrɛ nu akiiloo kɛtɔɔ̄ ama. O dānā ziī ekpo dɛm mmɛ benyiɛ a, naa daba a dɔŋia kina. Naa daba enɛ a kina taaŋa lo o dānā bie doowo bu ziī nwīkere sɔ̄. Mɛ, lo ale o gbī ebie bah a bu nyɔɔ̄nyɔɔ̄ sɔ̄ niā? Bu nyɔɔnyɔɔ sɔ̄ ale doodoo wa na o dap aaraa a—bu pio minit ni? Bu ziī hour? Sɛh eewo ni? Lɔgɔ baɛ benyiɛ naale loo, bah a elɛɛ! Kɛadoo, taɛ edɔŋia lo dɛm naale enyaā. Kɛ̄ aa biɛ̄ bah doo kɛ̄ edɔŋia nage a bah gbɛnɛ doolo. Kɛ̄ ale nage doolo loo saŋ. Kɛ̄ aa bia bu doo—kere abee tera—kɛ̄ ai zinage loo gbɛnɛ doolo. Kɛadoo alo, Jɛhova agɛrɛ iloo kɔ i lɛa saŋ bu alo. Bu kaka, lo i lɛa bu, elee i loo.—Kam 11:17.

Sɔ̄ i lɛa saŋ bu, i ɛrɛ bere nɛ i loo

 “Abee mɛ tɔɔ̄loo doodoo bee Jɛhova gaa mɛ kɔ ue nɛ”

Ena abee yerebah nɛ Linda kɔ aa biea saŋ bu loo kɛ̄ nɛɛ le ɛɛ yira bee ye doo dogo loo doo ani? Ziī yɛɛ pya nu alɛ bee doo na, ɛrɛ ekɛɛrɛ nyɔɔ pya nu anua kpa kaɛ kɔ i aaloo pɔrɔ. (Le-yɔɔ 130:3, 4) Nu abee zū Linda gbɛnɛ na suā kɔ sɔ̄ i aaloo pɔrɔ, Jɛhova, esikɛ̄ aaloo nɛ ili. (Pya Ɛfɛsɔs 4:32–5:2) Aāloo kɛ̄ pya ue ama ye tɔa loo doo, abee kɔ: “Abee mɛ tɔɔ̄loo doodoo bee Jɛhova alɛɛ loo gaa mɛ kɔ ue nɛ.”

Sɔ̄ sɔ̄ etɛna Linda bee dap lɛa saŋ bu. Abee aaloo nɛ lo wuga gbobia bu yɔrɔ, sa nyawo, lo wuga gbobia lu ye kaana gbo. Linda enyima kiisī bu ye taaŋaba Jehova. Suā mmɛnɛ kɔ Jɛhova gbī e yerebah anɛ kɔ o doo nage wo.