Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 18

I Wee Yerebah Nɛ̄ Pya I Wuga Sɔ̄ Ba Le Bu Gbɛnɛ Etɛɛrɛloo Doodoo Wa Ni?

I Wee Yerebah Nɛ̄ Pya I Wuga Sɔ̄ Ba Le Bu Gbɛnɛ Etɛɛrɛloo Doodoo Wa Ni?

Dominican Republic

Japan

Haiti

Sɔ̄ bugia siranu a gbeesī nu dooa, Pya Ekeebee Jɛhova wee nɔɔ̄ yerebah bu nwaanwaaba kumaloo pya wa wuga nu sira loo. Dua epiaga ama tɔgɛ kɛ̄ wereloo i ɛrɛ kumaloo ɛniā ii lu kaānā doo. (Jɔn 13:34, 35; 1 Jɔn 3:17, 18) Bu pya amunu sīdee na i wee yerebah a?

I wee tura kpugi. Sɔ̄ gbɛnɛ kii bee dɔ bu Judia pya tua Nɛɛ̄ Kraist ale Antiɔk bee yere kpugi mā pya wa wuga bu Kraist li Judia loe yerebah wa nɛ̄. (Doonu 11:27-30) Bu aba lo sīdee, sɔ̄ ili dā kɔ pya i wuga ba le ɛrɛgeba kɛ̄ bu nyɔuwe gaa kpesī eaga kɛ̄tɔɔ̄, i wee yere dɔɔnu tɛmaloo ilii bɔŋanaloo loe yerebah nɛ̄ pya i wuga ba le bu gbɛnɛ ebɛɛ̄.—2 Pya Kɔrint 8:13-15.

I wee nɛ̄ yerebah a bɔloo. Pya kanɛɛ̄ ba le taɛ kɛ̄ lo bugia siranu dooa wee ɛrɛ esuā kɛ̄ ziī ziī wuga bu bɔŋanaloo le, sa muɛ̄ kɔ ba le bu kpooga loo. Ziī eku pya nɛɛ̄ a kuūdɛɛ̄ loo nɔɔ̄ nɔɔ̄nu bugia siranu wee baɛbee nɛ̄ nu a doodoo nuede, le maā e ɔ̄, nu eyaa, kɛ̄ etɔɔ̄ le boa. Gbɛnɛ-edo Pya Ekeebee a ɛrɛ kari alu ebɛɛ̄ wee kii lo kɛ̄ nyɔɔ wa loo sa sitam loe yerebah bu esikɛ̄ kwa pya tɔ le Tɔ Nɔ̄nu Buɛ̄-mɛnɛ loa bee gbe. Gbaaloo i ɛrɛ bu i bɔŋanaloo le nu ie nɔā aāloo gbaa sitam yerebah kɔ i dap nwaaba bɔŋɛnɛloo nutam le pya tam sɔ̄ ebɛɛ̄. Kere adoo i yerebah nɛ̄ “pya gā wuga loo yira,” i yere nage bah nɛ̄ pya dɔɔ̄na sɔ̄ awaɛ e doowo kaɛlɛɛ wa sīdee yiga Bari.—Pya Galetia 6:10.

I wee nɛ̄ gbɔ̄gbɔ̄ aābu kpa kaɛ sa yerebah kɔ pya nɛɛ̄ aa pee benyiɛ wa. Pya bugia siranu dooa loo wee gbī kaānā gbɔ̄gbɔ̄. Sɔ̄ dua nu a doowo sira, i ɛrɛ eagaloo aāba Jɛhova, “Bari dɛ̄dɛɛ̄ eaga benyiɛ.” (2 Pya Kɔrint 1:3, 4) Wee i ɛɛrɛ bu loe nyɔnɛ pya nɛɛ̄ wa benyiɛ epea kɔ ue nyɔɔ pya yii ale bu Baibol sa wa nɛ̄ eagaloo kɔ a bia kina Buɛ̄-mɛnɛ Bari eyere kumaloo dɛ̄dɛɛ̄ pɔrɔ siranu anuā ezialoo le tɔga.—Mumuuna 21:4.

  • Ena anuā Pya Ekeebee dap nwaaba nɛ̄ yerebah sɔ̄ bugia siranu a gbeesī nu sira a?

  • Pya amunu gbɔ̄gbɔ̄ a aabu kpa kaɛ na i dap nyɔnɛ pya nɛɛ̄ nu sira loo ponia a?