Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 17

Bu Mɛ Sīdee Na Pya Kuūdɛɛ̄ loo Bɔŋanaloo Aa Ziī Buɛ̄ Yii Ziī I Yerebah Nɛ̄ A?

Bu Mɛ Sīdee Na Pya Kuūdɛɛ̄ loo Bɔŋanaloo Aa Ziī Buɛ̄ Yii Ziī I Yerebah Nɛ̄ A?

Malawi

Eku pya zue ue

Tam zue leyere ue

Zɔ̄zɔŋia pya kanɛɛ̄

Gbɛnɛkpo sɔ̄ kpa Kaɛ Pya Nɛɛ̄ Kraist abee lu e’ɛm bu muɛ̄ ue Grik, kɔ nu akiiloo Banabas le nɛɛ̄ lɛɛratam Pɔɔl. Pya nɛɛ̄ ama bee sitam doodoo pya kuūdɛɛ̄ loo bɔŋanaloo aa ziī buɛ̄ yii ziī, sa sigara loo pya bɔŋanaloo abee le lo sɔ̄. Ena anuā ba bee doowo a? Ba bee ɛrɛ kaānā ekɛɛrɛ kumaloo kɛ̄tɔɔ̄ pya wa wuga bu yira. Pɔɔl bee kɔ a gbīe e “obia sa si loo pya wuga” sa ɛp kɛ̄ ba le doo. Abee ɛrɛ taɛ lo ekiā gbɛnɛ-edo o’oo tup mile lokwa adap ina loo pya wuga sa wa nɛ̄ eagaloo. (Doonu 15:36) Nu alu taɛ pya a kuūdɛɛ̄ loo bɔŋanaloo aā zii buɛ̄ yii ziī anii’ee lo.

Ba lu wee yere i mɛm loo. Ziī nɛɛ̄ kuūdɛɛ̄ loo sekiut wee kuūdɛɛ̄ loo nu adap lu 20 bɔŋanaloo, wa tɔɔ̄loo ziī kaɛ sa si loo dɛ̄dɛɛ̄ lo bɔŋanaloo baɛ sɔ̄ bu ziī zua. I dap ɛrɛ gbɛnɛ biī aāloo suānu le dum pya wuga nɛɛ̄dam ama le lo wa wa lo ale ba e ira wa. Pya a kuūdɛɛ̄ loo bɔŋanaloo aa ziī buɛ̄ yii ziī le pya wa wa wee piiga loe suā loo pya zege le pya nama nɛɛ̄, sa ba ɛrɛ taɛ lo egbaa i loo bu esiatam zue leyere ue le bu i sere enɔā Baibol. Pya kanɛɛ̄ bu bɔŋanaloo wee nyɔnɛ pya kuūdɛɛ̄ loo ama si loo pya nɛɛ̄, ale butɔ bu bɔŋanaloo alu enɔɔ̄ lo esi, sa ba yere nage i mɛm loo tɛmaloo pya ekɔaue alu enɛ̄ bie enɔānu, le bu gbɛnɛ bɔŋanaloo.—Doonu 15:35.

Ba tɔgɛ taɛ bu dɛ̄dɛɛ̄ nɛɛ̄. Pya nɛɛ̄ kuūdɛɛ̄ loo ɛrɛ kaānā taɛ kumaloo kɛ̄ bɔŋanaloo kiisī loe taāŋaba Jɛhova leere doo. Ba nyɔnɛ pya kanɛɛ̄ le pya yerebah tam zɔŋia loe tɛɛ̄nyɔɔ nyim yiiloo ae lua edoo bu bɔŋanaloo le loe nɛ̄ wa pya zuurabahtɔ̄ loe yerebah wa nɛ̄ kɔ ba a si wa tam leere. Ba yerebah nɛ̄ pya sɛmdee loe kiisī leere bu wa esiatam zue ue, sa a ɛɛrɛ wa bu loe suā loo pya aā nɛɛ̄ bu bɔŋanaloo le lo edā kɛ̄ ba gaa nyim kiisī bu dee kaka doo. Ziī ziī pya wuga ama su wa loo nɛ̄ lo egbaa i loo “bu esiatam” loa dɔbiī nɛ̄ ili. (2 Pya Kɔrint 8:23) A bɔloo kɔ i nɔ̄ wa yira le wa kiīloo nɛ̄ Bari.—Pya Hibru 13:7.

  • Ena anuā pya kuūdɛɛ̄ loo sekiut wee si loo ziī ziī bɔŋanaloo ani?

  • Bu mɛ sīdee na o dap ɛrɛ biī aāloo wa lulu a?