Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 23

Pya i kpa lu e’ɛm sa tap doodoo wa?

Pya i kpa lu e’ɛm sa tap doodoo wa?

Kɛ̄ Ɛm Kpa, U.S.A.

South Korea

Armenia

Burundi

Sri Lanka

Lokwa i dap doo leere loe zue “leyere ue” bu “dɛ̄dɛɛ̄ edonyɔɔ le edo, le edɛm, le pya nɛɛ̄,” i kwa kpa bu nu alu 700 muɛ̄ ue. (Mumuuna 14:6) Bu mɛ sīdee na i dap mmɛɛ̄ loe aga tam ama ani? I doo lo ba ama tɛmaloo yerebah a aaba pya tap kpa le dɔɔ̄na nu ba lu 3,300 le pya nɛɛ̄ ɛm kpa a aabu dɛ̄dɛɛ̄ edonyɔɔ—dɛ̄dɛɛ̄ aba Pya Ekeebee Jɛhova.

Lo tua e’ɛma nu lu e’ɛm bu bekee. Eku A Baɛbee kuūdɛɛ̄ loo esiatam alu esi Kɛ̄ Ɛm Kpa li beekɛ̄ Pya Ekeebee Jɛhova tɛɛ̄ ɛŋɛnɛ̄ nyɔuwe. Pya nɛɛ̄ ale bee ɛm kpa nɔɔ̄ tam alu enɛ̄ pya ɛm kpa lo ba sitam li beekɛ̄ bu dɛ̄dɛɛ̄ nyɔuwe le pya tɔnaa-tam. Sɔ̄ alu e ɛrɛ pya ɛm kpa ba aa keekee barasī, a yerebah inɛ̄ kɔ i dap ɛm nu nyɔɔ pya ekobee ue a ɛrɛ pah nyɔɔ pya nɛɛ̄ a ɛrɛ keekee sīdee doonu, loa doo kɔ pya nɛɛ̄ a aa keekee edonyɔɔ a tɔgɛ nia bu pya i kpa.

Nu alu e’ɛm lu eyere mā pya etap. Sɔ̄ ae lua esitam nyɔɔ sah sa Eku A Baɛbee kɔ alee nu alu e’ɛm ama lu eyere tɛmabu kɔmputa mā dɛ̄dɛɛ̄ eku pya etap ale tɛɛ̄ ɛŋɛnɛ̄ nyɔuwe lo ba tap, tɛɛ̄ nyɔɔ, sa kwa baloo pya nu a bɔloo. Ba piiga loe sagɛ pya bee ue “kaka” alera loa su taɛ taɛ nu alu e’ɛm bu Bekee yere bu lo muɛ̄ ue a gaa lu etap ture bu.—Eklisiastis 12:10.

Kɔmputa doo kɔ lo tam a waɛ. Kɔmputa naa dap tɔɔ̄ dɔ pya nɛɛ̄ ɛm kpa ale pya atap. Kerewo wa esiatam lu edoo kɔ awaɛ sɔ̄ alu esu kɔmputa le pya kpa a baatɛ̄ nu ziī ziī bee ue kura daā. Pya Ekeebee Jɛhova kwa ziī nu siātam alu ekue (MEPS) loa yerebah nɛ̄ pya tap kpa loe tap aā bu ziī muɛ̄ ue ture bu booboo muɛ̄ ue gbaānage loo wa foto.

Ena anuā i piaga doowo loo tam ama a, kere bu lo muɛ̄ ue nwīepoo nɛɛ̄ kɔ a? Nyɔnɛbee Jɛhova gbī kɔ ‘dɛ̄dɛɛ̄ nɛɛ̄ a ɛrɛ kpɔā sa lu loo suānu kaka.’—1 Timɔti 2:3, 4.

  • Amunu tam na ai su bah loe ɛm pya i kpa a?

  • Ena anuā i tap pya i kpa yere bu gbɛnɛ-edo muɛ̄ ue a?