Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 4

Ena Anua I Bee Ɛm New World Translation A?

Ena Anua I Bee Ɛm New World Translation A?

Congo (Kinshasa)

Rwanda

Eba kpa Symmachus a aara bee ale kaɛ bu kpa Le-yɔɔ 69:31, bu 1,600 ale 1,700 zua akii adumɛ̄

Bu gbɛnɛkpo zua akii adumɛ̄, Pya Ekeebee Jɛhova wee su keekee tatap Baibol daānu, su kpe ɛma, sa dɔɔ̄ yaari. Kerewo, i bee muɛ̄ ebɛɛ̄ e ɛrɛ aā tatap loe yerebah nɛ̄ pya nɛɛ̄ leere loe nɔ̄ “suānu kaka” ue a era, lo alu ekɛɛrɛ Bari kumaloo dɛ̄dɛɛ̄ nɛɛ̄. (1 Timɔti 2:3, 4) Nyɔwo, bu zua 1950 i bee bɔātɛ̄ elɛɛ tɔ pio kpa ale bu Baibol bu muɛ̄ ue-Beke ilii sɔ̄, New World Translation. Lo Baibol ama elua etap bu sīdee a lera sa era yere bu nu a yeeloo 120 muɛ̄ ue.

Ziī Baibol a waɛ edābee loo bee lu ebɛɛ̄. Sɔ̄ sɔ̄ gaa tɛɛ̄ muɛ̄ ue wee nyaā. Gbɛnɛ-edo Baibol abee lu etap ebini sɔ̄ ɛrɛ ekɔaue anaa sirapie leere ale kɛ̄ asere muɛ̄ loo doo naa lena bu dee sa agaba edābee loo. Lo dɔɔ̄na, pya nama eba kpa e’ɛma Baibol bee le bu a dee kere, lo wa e’ɛma nu lera sa era sa waɛloo pya lo tuatua elua egbī muɛ̄, loa doo kɔ alu edābee loo pya muɛ̄ ue abee lu e’ɛma Baibol lo ale Hibru, Aramaik, le Grik.

Ziī tatap bee lu ebɛɛ̄ loa naa nyaānā Muɛ̄ Ue Bari. Taā ba aakɛ̄ nyaānā nu loo Muɛ̄ Ue Bari, pya tap Baibol nyɔnɛ taɛ kɛ̄ lo tuatua bee le doo. Kɛ̄ ale doo, lo bee ale kaɛ, Jɛhova, naa lu e’ɛm bu booboo tatap Kpa Kaɛ.

Ziī Baibol bee lu ebɛɛ̄ loa nɛ̄ka Nɛɛ̄ a ɛrɛ, lo ale Bari. (2 Samuel 23:2) Bu New World Translation, bee Jɛhova elua e obara sere pya ye dɔ sa a sirage nu alu 7,000 sɔ̄ bu lo nama e’ɛma Baibol dookɛ̄ edoba ale kɛɛ̄ tɔgɛ doo. (Le-yɔɔ 83:18) Nu a sira aaloo epiaga gbītɛ̄ nu bu gbɛnɛ-edo zua na Baibol a kpeloo ebuū ama nyɔbee a para etɔgɛ ekɛɛrɛ Bari siā. Ale o ɛrɛ New World Translation bu o muɛ̄ ue ale oo ɛrɛ, i yere a mɛm loo kɔ o bɔātɛ̄ enɔɔ̄ leere loe buū Muɛ̄ Ue Jɛhova dɛ̄dɛɛ̄ dee.—Joshua 1:8; Le-yɔɔ 1:2, 3.

  • Ena anua i bee biaɛfii kɔ ziī aā tatap Baibol lu ebɛɛ̄ a?

  • Amunu le nu na ɛrɛgeba nɛɛ̄ agbī edoo nu Bari gbī edoo ziī ziī dee ani?