Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 12

I Tam Zue Ue Buɛ̄-mɛnɛ Lu Enɔɔ̄ Doodoo Wa Ni?

I Tam Zue Ue Buɛ̄-mɛnɛ Lu Enɔɔ̄ Doodoo Wa Ni?

Spain

Belarus

Hong Kong

Peru

Sɔ̄ luh Jizɔs ewara loo a bee kɔsiā kiiloo tam zue ue kɔ: “A elu ezue le yere ue ama lo buɛ̄-mɛnɛ tɛma ɛŋɛnɛ̄ dɛ̄dɛɛ̄ nyɔuwe, doodoo nu ekeebee nɛ̄ dɛ̄dɛɛ̄ edonyɔɔ, elo sɔ̄ na kuma elua.” (Matiu 24:14) Bu mɛ sīdee na tam zue ue tɛma ɛŋɛnɛ̄ dɛ̄dɛɛ̄ nyɔuwe ama elu edoo gbɔmɛɛ̄ ani? Tɛmaloo enyɔnɛ edoba Jizɔs bee sere kɛ̄ sɔ̄ a bee le a nyɔɔ kɛnɛkɛ̄.—Luk 8:1.

I wee piiga loe zɔŋia pya nɛɛ̄ bu wa tɔ. Jizɔs bee tɔgɛ pya awee ye nyɔnɛ dumɛ̄ kɔ ba a zue ue aa ziī tɔ yii ziī. (Matiu 10:11-13; Doonu 5:42; 20:20) Pya zue ue bu tua sɔ̄ o’oo tup zua a, bee lu epoo taɛ kɛ̄ ba ewee zue ue wa nɛ̄. (Matiu 10:5, 6; 2 Pya Kɔrint 10:13) Aba lo sīdee anii’ee, i tam zue ue lu enɔɔ̄ leere sa ziī ziī bɔŋanaloo ɛrɛ epoo kɛ̄ alu enɛ̄ wa loe sitam zue ue. Lo ama yerebah inɛ̄ kɔ i dap mmɛ lok Jizɔs “lo ezue nɛ̄ pya nɛɛ̄ le lo eyira ekeebee agɛrɛ.”—Doonu 10:42.

I agɛrɛloo gbī pya nɛɛ̄ muɛ̄ ɛrɛgeba kɛ̄ ba le. Jizɔs bee serenage edoba kɛ̄ lo ezue ue nɛ̄ pya nɛɛ̄ taɛkɛ̄ doodoo, nu egā maā, ale nu bānā maā buɛ̄. (Maak 4:1; Jɔn 4:5-15) Ili wee nyɔnɛ pya nɛɛ̄ kɔniā ue aābu Baibol ɛrɛgeba kɛ̄ i wa gbī muɛ̄—nyɔɔ dee buɛ̄, kɛ̄ tam gbora, kɛ̄ pya nɛɛ̄ seea ale nyɔɔ fon. I yira nage ekeebee nɛ̄ pya i gbaa tɔɔ̄ kɛ̄ zɔ̄ŋɔ, pya i nyɔnɛ siniā tam, pya i gbaa si tɔkpa le pya i mana mana sɔ̄ dee i kpaā nɛ̄. Dɛ̄dɛɛ̄ sīdee epiaga ama doo warɛ kɔ edo miliɔn pya nɛɛ̄ tɛɛ̄ ɛŋɛnɛ̄ nyɔuwe a dā leyere ue “kpɔā.” —Le-yɔɔ 96:2.

O dapge kɛɛrɛ bu loo ziī nɛɛ̄ eniā a enyɔnɛ ponia leyere ue buɛ̄-mɛnɛ Bari, le nu lo yere ue ama kura kiiloo wa deesī ni? O a aaloo, ale pee sɔ̄ loe yɔ pya dɔɔna ponia yere ue bɛābu ama!

  • Amunu “leyere ue” na i ɛrɛ ekɔ yaari a?

  • Mɛ sīdee na Pya Ekeebee Jɛhova nyɔnɛ edoba zue ue Jizɔs a?