Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 10

Ena Taaŋaba Butɔ Ani?

Ena Taaŋaba Butɔ Ani?

South Korea

Brazil

Australia

Guinea

Aā dee kere Jɛhova wee gbī kɔ ziī ziī butɔ a gbaa ɛniā sɔ̄ lo ewu ziī agɛrɛ bu gbanialoo kiiloo alɛ le ɛniā aba. (Deuteronomi 6:6, 7) Nu anua lo Pya Ekeebee Jɛhova wee sere sɔ̄ bu ziī ziī kaɛ loe gbaa taāŋaba doodoo ziī butɔ, lo sɔ̄ ama ba wee kɔniā sɔh bu ziīnɛloo sa ɛp nu Bari kɔ nyɔɔ pya wa ebɛɛ̄ taɛ lo sɔ̄. Kere aba ɔɔ tɔɔ̄, o dap su dua sɔ̄ ama gbīātɛ̄ nu Baibol kɔ kiiloo o taāŋaba Bari.

Taāŋaba butɔ lu sɔ̄ etɔɔ̄ waɛloo Jɛhova. “Suaa bui loo nuā loo Bari, e alɛ etɔɔ̄ i waɛloo.” (Jemes 4:8) I suā loo Jɛhova leere sɔ̄ i nɔ̄ ye elap dogo le pya nu a doo aābu ye Muɛ̄ Ue. Ziī ewara sīdee e bɔātɛ̄ o taāŋaba butɔ na e gbaa su sɔ̄ buā Baibol siā nyɔɔ. O dap nyɔnɛ nɔɔ̄nu buū Baibol Tɔkpa Esiatam Buɛ̄-mɛnɛ bu ziī ziī kaɛ. Ziī ziī epoo loo kɛ̄ a gaa le lu ebuū dap lu enɛ ziī ziī nɛɛ̄ ale butɔ, sɔ̄ ba ebūna sah, dɛ̄dɛɛ̄ nɛɛ̄ tura ekɛɛrɛ nyɔɔ nu enɔ̄ ba ɛrɛ aābu pya lo dɔ Kpa Kaɛ.

Alu sɔ̄ etɔɔ̄ waɛloo ziī doodoo butɔ. Sɔ̄ pya dam, pya wa, pya tɛ le ka le gbomiɔ̄ŋɔ gbaa nɔ̄ Baibol doodoo ziī butɔ, ba yere mɛm loo gbanialoo ale yɛɛ ɛniā aba. A gaa le lu sɔ̄ e ɛrɛ ɛɛbu le efɛɛloo lo dɛ̄dɛɛ̄ nɛɛ̄ butɔ ɛmadɛɛ̄ bu ziī ziī kaɛ. Pya tɛ le ka dap sagɛ ekobee ue enɔ̄ dɛɛa nyɔɔ zua pya wa miɔ̄ŋɔ aābu keekee dɔ bu Watchtower le Awake! ale aā nyɔɔ i dɔ Intanɛt, jw.org. O dap kɔ nu akiiloo ziī taāŋa pya o miɔ̄ŋɔ bee kpesī bie tɔkpa le kɛ̄ a dap lu e aaba loo doo.Ena anua buii gbaa si ee nu alu etɔgɛ nyɔɔ JW Broadcasting (tv.jw.org) sa kɔnia ue nyɔɔ ani? Bui dap ɛrɛ ekpeloo aāloo tɛɛ̄ nyɔɔ pya yɔɔ elu e’uɛ bie enɔānu. Bui dapnage ɛrɛ ewaraba nuede sɔ̄ lo taāŋaba butɔ e ina kuma.

Lo keebee sɔ̄ alu esere ziī ziī kaɛ lo egbaa taāŋaba Jɛhova ama e yerebah nɛ̄ dɛ̄dɛɛ̄ nɛɛ̄ ale butɔ loe gbī ɛɛbu muɛ̄ bu nɔnɔ̄ Muɛ̄ Ue Bari, e Bari gaa le nɛ̄ leelee bui epiaga.—Le-yɔɔ 1:1-3.

  • Ena anuā i wee nɔɔ̄ sɔ̄ loo taāŋaba butɔ ani?

  • Ena pya tɛ le ka edoo lokwa dɛ̄dɛɛ̄ nɛɛ̄ ɛrɛ ekpeloo loo taāŋaba butɔ ani?