Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 19

Mɛɛ na lo zooro a bɔloo eture nyiɛ loo sa suā nu a?

Mɛɛ na lo zooro a bɔloo eture nyiɛ loo sa suā nu a?

Dɛ̄dɛɛ̄ ii ɛrɛ biī aāloo i nuede bu edɔɔ̄

Sɔ̄ luh Jizɔs ewara loo, abee nyɔnɛ aba niā pya awee ye nyɔnɛ dumɛ̄, Pita, Jems, Jɔn le Andru kɔniā ue. Kuma sɔ̄ Jizɔs gaa bee kɔ sere kɛ̄ pya edoba nu loo ye lele bu sɔ̄ kpɛdumɛ̄ abee bip ziī gbɛnɛ ebip kɔ: “Mɛɛ̄ na lo zooro a bɔloo eture nyiɛ loo sa suānu, lo nɛɛ̄ nɛɛ̄-a-ye-ɛrɛ bee ye su sere loo ye tɔ, lo enɛ̄ wa nuede taɛ ye sɔ̄?” (Matiu 24:3, 45; Maak 13:3, 4) Jizɔs gaa bee doo kɔ pya awee ye nyɔnɛ̄ dumɛ̄ asuā leere kɔ doodoo wa “tɛ-ɛrɛ,” alɛ gaa le tubo baloo pya nɛɛ̄ a gaa le nɛ̄ nuede bu edɔɔ̄ pya awee ye nyɔnɛ dumɛ̄ dɛ̄dɛɛ̄ sɔ̄ bu sɔ̄ kpɛdumɛ̄. Ba mɛɛ̄ na elu pya lo zooro ama ani?

Ba lu nwīgbagbara eku yɛɛ pya alu etɔ̄ nɔɔ̄ bee a nyɔnɛ̄ dumɛ̄ Jizɔs. Lo zooro lu e suā loo doodoo Eku A Baɛbee ale yɛɛ Pya Ekeebee Jɛhova. Ba nɛ̄ nuede bu edɔɔ̄ pya nɛɛ̄ le aba gbaa taāŋaba Jɛhova taɛtaɛ sɔ̄ a bɔloo. I dɛɛa nyɔɔ lo zooro a bɔloo eture nyiɛ loo lo ekiisī bu enɛ̄ i “epoo nuede” taɛ sɔ̄ abɔloo.—Luk 12:42.

Ba kuūdɛɛ̄ loo bɔŋanaloo Bari. (1 Timɔti 3:15) Jizɔs bee nɛ̄ gbɛnɛ tam lo zooro ama lo e kuūdɛɛ̄ loo bɔŋanaloo Bari ale a nyɔɔ kɛnɛkɛ̄, kuūdɛɛ̄ loo pya Tɔ Nɔ̄nu Buɛ̄-mɛnɛ, pya kɛ̄ i wee ɛrɛ gbɛnɛ bɔŋanaloo, pya tɔnaa-tam le dɛ̄dɛɛ̄ nu a wa le bu tɛɛ̄ ɛŋɛnɛ̄ nyɔuwe sa baɛbee tam zue ue le lo etɔgɛ i nu tɛmaloo pya i bɔŋanaloo. Nyɔwo, loe nɛ̄ i pya nu alu i ebɛɛ̄ taɛ sɔ̄ i gbī, pya “zooro a bɔloo eture nyiɛ loo sa suānu” gaa kiisī loe dɔɔ̄ nuede bu edɔɔ̄ yaari tɛmaloo pya kpa lo i su siā tam zue ue le tɛmaloo pya ekɔaue alu enɛ̄ bie pya i enɔānu bɔŋanaloo le bu pya i gbɛnɛ bɔŋanaloo.

Lo zooro bɔ ture nyiɛ loo bu aa baloo kaka ue Baibol le kiiloo tam alu enɛ̄ wa loe zue leyere ue, sa suānu bu su buābee aā baloo tam kuūdɛɛ̄ loo pya nu Kraist ɛrɛ a nyɔɔ kɛnɛkɛ̄. (Doonu 10:42) Jɛhova gaa nɛ̄ leelee wa esiatam tɛmaloo edoo kɔ gbɛnɛ-edo nɛɛ̄ alu pya ye Ekeebee sa gaa yerebah nɛ̄ lo zooro lo edoo kɔ nuede bu edɔɔ̄ a gbɔɛ̄ kɛ̄.—Aisaia 60:22; 65:13.

  • Mɛɛ̄ na abee lu etubo baloo tɛmaba Jizɔs kɔ a nɛ̄ nuede pya a wee ye nyɔnɛ dumɛ̄ a?

  • Bu pya amunu sīdee na lo zooro ama bɔloo eture nyiɛ loo sa suānu a?