Skip to content

Skip to secondary menu

Skip to table of contents

Jehovah’s Witnesses

Khana

Ba Mɛɛ̄ Na Ba Gaa Doo Nu Jɛhova Gbī Anii’ee Ani?

 NUENƆ̄ 21

Ena Bɛtɛl A?

Ena Bɛtɛl A?

Kɛ̄ Tɔ̄-nu U.S.A.

Germany

Kenya

Colombia

Bɛtɛl, lu bee ue Hibru loa kura “Tɔ Bari.” (Jɛnɛsis 28:17, 19) Alu bee a bɔloo tɔtam Pya Ekeebee Jɛhova ewua tɛɛ̄ ɛŋɛnɛ̄ dɛ̄dɛɛ̄ nyɔuwe. Lo ba tɔɔ̄ bu sitam loe leredee bah sa yere kpotɛ̄ tam zue ue. Eku A Baɛbee sitam li beekɛ̄ Pya Ekeebee Jɛhova bu dɛ̄dɛɛ̄ nyɔuwe ale New York U.S.A., sa ba yira lo kɛ̄ kuūdɛɛ̄ loo tam alu esi bu pya tɔnaa-tam ale keekee edonyɔɔ. Doodoo ziī eku, pya a sitam li Bɛtɛl lu esuā loo doodoo ziī butɔ. Doodoo ziī butɔ, ba gbaa tɔɔ̄ sa siniātam, gbaa denu bu ɛɛbu, sa gbaa nɔ̄ Baibol bu kumaloo loo ziī.—Le-yɔɔ 133:1.

Alu ziī keebee kɛ̄ pya nɛɛ̄ ale su wa loo nɛ̄ bu esiatam. Bu dɛ̄dɛɛ̄ Bɛtɛl, pya wuga nɛɛ̄dam le nɛɛ̄wa su loo wa nɛ̄ loe doo nu a niā Bari sa bu mmɛ sɔ̄ ba kiisī loe sitam Buɛ̄-mɛnɛ. (Matiu 6:33) Naa lu ekpɛ kpugi lɔgɔ aba, mɛ dɛ̄dɛɛ̄ aba wee lu enɛ̄ wa kɛ̄ etɔɔ̄ le nuede sa alu edɔɔ̄ nwīgbagbara kpugi wa nɛ̄ lokwa ba dap su ɛma loo wa. Dɛ̄dɛɛ̄ nɛɛ̄ ale Bɛtɛl ɛrɛ tam esi, pio aba sitam bu ɔfiis, kɛ̄-bui-nu ale kɛ̄ etɔɔ̄ denu. E pio aba sitam kɛ̄ awee lu ekuɛ̄ kpa ale kwa-tɔ-sere nyɔɔ-etaā, kɛ̄ log bɛ, kwa nu agbe le pya dɔɔ̄na nu.

Alu ziī kɛ̄ tam lu kirikiri loa yere kpotɛ̄ tam zue ue Buɛ̄-mɛnɛ. Taɛ taɛ nu dɛ̄dɛɛ̄ bɛtɛl le loo na lo edoo kɔ kaka ue Baibol a ina loo dɛ̄dɛɛ̄ nɛɛ̄. Lo nwīekpo kpa ama lu ziī edoba lo ama. Eku A Baɛbee kuūdɛɛ̄ loo ye ɛ’ɛm sa alu eyere tɛmabu kɔmputa mā eku a tap I kpa tɛɛ̄ ɛŋɛnɛ dɛ̄dɛɛ̄ nyɔuwe. Alu ekuɛ̄ nyɔɔ pya nu kuɛ̄ma kpa ale kɛ̄ kuɛ̄ kpa bu keekee bɛtɛl sa lu eyere mā nu a yeeloo 115,000 bɔŋanaloo. Kuma sɔ̄ dɛ̄dɛɛ̄ lo ama gaa kiisī pya ale Bɛtɛl yere kpotɛ̄ esiatam alu gbaragbara ee dɛ̄dɛɛ̄ tam lo ale zue leyere ue.—Maak 13:10.

  • Mɛɛ̄ na a wee sitam Bɛtɛl a, e alu ekuū wa dɛɛ̄loo doodoo wa?

  • Amunu tam alu gbaragbara na alu eyere kpotɛ̄ tɛmaloo esiatam ale ziī ziī Bɛtɛl a?