Skip to content

Skip to secondary menu

Skip to table of contents

Jehovah’s Witnesses

Khana

Leyere Ue A Aaba Bari!

 NUENƆ 4

Mɛɛ̄ Na Jizɔs Kraist Ani?

Mɛɛ̄ Na Jizɔs Kraist Ani?

1. Dum Jizɔs bee bɔātɛ̄ doodoo wa?

Pya amunu elap dogo na a doo kɔ Jizɔs alu nɛɛ awaɛ e yiiloo a?—MATIU 11:29; MAAK 10:13-16.

Jizɔs naa bee lɔgɔ nwiīnɛɛ nyɔnɛbee abee tɔɔ̄dum bu edɔɔ̄ li bunyɔɔ doodoo ɛngɛl, lɛɛ a gaa lu e maɛ̄ ye a kɛnɛkɛ̄. (Jɔn 8:23) A bee le tua tua dɛm nu Bari, ea bee yerebah loe dɛm pya dɔɔ̄na nu. Alɛ na aba Jɛhova dɛm a, nyɔwo abɔloo ekue ye aba “Nwī-nɛɛdam Bari.” (Jɔn 1:14) Jizɔs bee sitam doodoo nɛɛ Bari wee kɔ ue tɛ̄maloo, nyɔwo alu nage ekue ye “Bee-ue.”Buū Kam 8:22, 23, 30; Pya Kɔlɔsi 1:15, 16.

2. Ena anuā Jizɔs bee lu bu nyɔuwe a?

Bari bee yere ye Saaro nuā a kɛnɛkɛ̄ tɛ̄maloo e nyaanā ye dum aā li bunyɔɔ yere bu edɛh ziī nwiī-emuā Ju asii sinɛɛ̄, akura Meri. Nyɔwo Jizɔs naa bee ɛrɛ tɛ bu namloo a kɛnɛkɛ̄. (Luk 1:30-35) Jizɔs bee lu bu nyɔuwe (1) lo etɔgɛ kaka akiiloo Bari, (2) lo etɔgɛ i edoba kɛ̄ i doo nu ania Bari doo, kere sɔ̄ i le bu eaga kɛ̄tɔɔ̄, le (3) lo enɛ ye dum a mmaa nuā “nu a agara.”Buū Matiu 20:28.

3. Ena anuā nu a agara bɛɛ̄ ia?

Nu a agara, lu -nu alu ekpɛ loe agara nɛɛ lɛɛ bu kɛ̄tɔɔ̄ anuā luh. (A’aa 21:29, 30) Ānā le luh naa bee le ekɛɛrɛ Bari kumaloo gānɛɛ̄. I tɛɛ̄ doodoo wa suā? Bari bee kɔ nɛ lo tua tua nɛɛ Adam, kɔ loa doo nu Baibol kure “pɔrɔ,” a gaa lee u. Nyɔwo lo ale Adam naa bee doo pɔrɔ, a naalee bee u. (Jɛnɛsis 2:16, 17; 5:5) Dookɛ̄ Baibol kɔ doo, luh “bee yii” bu nyɔuwe tɛ̄maloo Adam. Nyɔwo Adam tɛma pɔrɔ le ye kpɛ kɔm, luh, mmɛ loo dɛ̄dɛɛ̄ pya ye mana mana. Nu a agara bɛɛ̄ i loe agara i lɛɛ bu kpɛ kɔm luh i bee ɛrɛ aāba Adam.Buū Pya Rom 5:12; 6:23.

 Mɛɛ̄ na e dap kpɛ nu a agara loe agara i lɛɛ bah luh ani? Sɔ̄ i u, i kpɛ aba ilii kɔm pɔrɔ. Lɔgɔ nɛɛ anaa mma naa dap kpɛ kɔm pɔrɔ pya dɔɔ̄na.Buū Le-yɔɔ 49:7-9.

4. Ena anuā Jizɔs bee u ani?

Jizɔs naa bee i, a bee mma. Nyɔwo naa bee lu ebɛɛ̄ kɔ a u nyɔɔ ye pɔrɔ—anaa bee doo lɔgɔ pɔrɔ. Taāwo, Jizɔs bee u nyɔɔ pɔrɔ pya dɔɔ̄na. Bari bee tɔgɛ keebee wereloo kumaloo pya gānɛɛ tɛ̄maloo eyere ye Saaro kɔ a u i bee. Jizɔs tɔgɛ nage wereloo tɛmaloo e gbaɛ̄tɔ̄loo ye Tɛ sa su ye dum nɛ nyɔɔ i pɔrɔ.Buū Jɔn 3:16; Pya Rom 5:18, 19.

5. Ena Jizɔs gaa doo anyawo a?

Sɔ Jizɔs bee le a kɛnɛkɛ̄, abee boh pya loo dumɛ, a lɛɛ pya abee u kɛ̄ bu luh, sa agara pya nɛɛ lɛɛ bu kɛ̄tɔɔ̄ pe. A bee tɔgɛ nu edoo li deesī nɛ dɛ̄dɛɛ̄ nɛɛ a dā sa doo nu Bari kɔ. (Matiu 15:30, 31; Jɔn 5:28) Sɔ̄ Jizɔs e ua sah, Bari bee ye obara sere dum bu edɔɔ̄. (1 Pita 3:18) Lo sɔ̄ Jizɔs bee ɛ̄ŋɛtɛ̄ bara bale Bari, mmɛ sɔ̄ Jɛhova ye nɛ ekpo loe bɛɛ doodoo Mɛnɛ bu yube nyɔuwe. (Pya Hibru 10:12, 13) Nyawo Jizɔs gaa bɛɛ doodoo mɛnɛ li bunyɔɔ, e pya a ye nyɔnɛ dumɛ gaa kɔ lo leyere ue siā tɛma ɛ̄ŋɛnɛ̄ yube nyɔuwe.Buū Daniel 7:13, 14; Matiu 24:14.

Sɔ̄ sɔ̄ naalee binia, Jizɔs gaa lee su ye ekpo doodoo Mɛnɛ lo esu kuma nuā loo dɛ̄dɛɛ̄ tɔga le pya nɛɛ̄ anuā tɔga. Dɛ̄dɛɛ̄ pya nɛɛ̄ a ɛrɛ yira bu Jizɔs tɛ̄maloo e gbaɛ̄-ye-tɔ̄loo e ɛrɛ ekpeloo dum bu paradais a kɛnɛkɛ̄.Le-yɔɔ 37:9-11.