Skip to content

Skip to secondary menu

Skip to table of contents

Jehovah’s Witnesses

Khana

Leyere Ue A Aaba Bari!

 NUENƆ 14

Ena Anua Bari ɛrɛ Ziī Bɔŋanaloo Ani?

Ena Anua Bari ɛrɛ Ziī Bɔŋanaloo Ani?

1. Ena anua Bari bee bɔŋɛnɛloo pya Izrɛl akere a?

Bari bee bɔŋɛnɛloo pya mana mana Abraham nua ziī edonyɔɔ sa wa nɛ lok. A bee su lo edonyɔɔ kure “Izrɛl” sa wa nua pya ba esu kaka taāŋaba le ye muɛ̄ ue kumasī. (Le-yɔɔ 147:19, 20) Nyɔwo pya nɛɛ̄ bu dɛ̄dɛɛ̄ edonyɔɔ dap ɛrɛ biī aāloo pya Izrɛl.Buū Jɛnɛsis 22:18.

Bari bee sagɛ pya Izrɛl kɔ ba alu pya ye ekeebee. Eloh awa kiiloo tɔgɛ kɛ̄ pya nɛɛ̄ dap ɛrɛ biī aāloo gbaɛ̄tɔ̄loo lok Bari doo. (Deuteronomi 4:6) Nyɔwo, tɛmaloo pya Izrɛl pya dɔɔ̄na dap suā loo lo kaka Bari.Buū Aisaia 43:10, 12.

2. Ena anua pya kaka Nɛɛ̄Kraist gbaa bɔŋanaloo a?

Sɔ̄ sɔ̄ etɛna, pya Izrɛl bee peere ewonu Bari, Jɛhova bee obara bɔŋanaloo pya Nɛɛ̄Kraist sere dɔ lo edonyɔɔ. (Matiu 21:43; 23:37, 38) Nii’ee, pya ayira dɔ pya Izrɛl na pya kaka Nɛɛ̄Kraist lo ale Pya Ekeebee Jɛhova.Buū Doonu 15:14, 17.

Jizɔs bee bɔŋɛnɛloo pya awee ye nyɔnɛ dumɛ̄ loe zue ue sa doo kɔ dɛ̄dɛɛ̄ edonyɔɔ alu pya a ye nyɔnɛ dumɛ̄. (Matiu 10:7, 11; 24:14; 28:19, 20) Tam ama gaa lu esi ye ee dɛ̄dɛɛ̄ sɔ̄ anyawo, abu kuma lo sɔ̄ eku ama. Tua tua sɔ̄ bu eloh Jɛhova gaa bɔŋɛnɛloo gbɛnɛ-edo miliɔn pya nɛɛ̄ aābu dɛ̄dɛɛ̄ edonyɔɔ yere bu kaka taāŋaba lo. (Mumuuna 7:9, 10) Pya kaka Nɛɛ̄Kraist gbaa bɔŋanaloo loe yere mɛm loo sa yerebah nɛ ziī. Ba ɛrɛ ekpeloo bu enɔ̄ aba nu aābu Baibol bie wa enɔānu bu yube nyɔuwe.Buū Pya Hibru 10:24, 25.

 3. Bɔŋanaloo pya Ekeebee Jɛhova bee bɔātɛ̄ doodoo wa a ilii dee ama?

Bu pya zua 1870, ziī igbagbara eku pya nɔ̄ Baibol bee bɔātɛ̄ esikɛ̄ gbī pya kaka ue ale bu Baibol muɛ̄ lo a bee pe bu nyɔɔnyɔɔ sɔ̄. Ba bee suā kɔ Jizɔs ebɔŋɛnɛloo ziī bɔŋanaloo pya Nɛɛ̄Kraist kɔ ba a zue ue. Nyɔwo, ba bee bɔātɛ̄ zue yere ue Buɛ̄-mɛnɛ yaari. Bu zua 1931 ba bee yira bee akura pya Ekeebee Jɛhova.Buū Doonu 1:8; 2:1, 4; 5:42.

4. Bu mɛ sīdee na pya Ekeebee Jɛhova lu e bɔŋɛnɛ wa loo ani?

Bu tua sɔ̄ o’oo tup zua a, bɔŋanaloo pya Nɛɛ̄Kraist bu gbɛnɛ-edo naɛsī bee ɛrɛ biī aāloo aba ziī eku abaɛ bee, lo asu Jizɔs nua nɛɛ̄bee bɔŋanaloo. (Doonu 16:4, 5) Bu aba sīdee ama anii’ee, pya Ekeebee Jɛhova bu yube nyɔuwe ɛrɛ biī aāloo ziī Eku Abaɛbee ba lu pya kanɛɛ̄ ba suā gbɛnɛ-edo nu. Ba baɛbee dɛ̄dɛɛ̄ tɔtam pya Ekeebee Jɛhova lo ba ɛm, sa dɔɔ̄ kpa nɔā Baibol yaari bu nu a ee loo 700 muɛ̄ ue. Nyɔwo, Eku Abaɛbee dap su Kpa Kaɛ yeā mɛmloo sa tɔgɛ dee nu a eeloo 115,000 bɔŋanaloo bu yube nyɔuwe. Bu ziī ziī bɔŋanaloo, pya nɛɛ̄dam a nyim tura sitam doodoo pya kanɛɛ̄, ale pya kuūdɛɛ̄ loo, pya nɛɛ̄ ama baɛ loo naana pee Bari bu wereloo.Buū 1 Pita 5:2, 3.

Pya Ekeebee Jɛhova lu e bɔŋɛnɛ wa loo loe zue leyere ue, le lo edoo kɔ pya nɛɛ̄ anyɔnɛ dumɛ Kraist. Doodoo pya nɛɛ̄ lɛɛratam, i zue ue aā ziī tɔ yii ziī. (Doonu 20:20) I wee gbī enyɔnɛ pya ba wereloo kaka ue nɔ̄ Baibol. Mɛ pya Ekeebee Jɛhova naa aadee lu bɔŋanaloo akɛ̄. I lu butɔ a ɛrɛ Tɛ ai wereloo. I lu pya wuga nɛɛ̄dam le nɛɛ̄wa i gbaa kuūdɛɛ̄ loo ɛ̄nia ii. (2 Pya Tɛsalɔnaika 1:3) Kuma sɔ̄ pya nɛɛ̄ ama lu e bɔŋɛnɛ wa loo loe doo nu ania Bari le loe yerebah nɛ pya dɔɔ̄na a, ba lu pya eku a ɛrɛ ɛɛbu eera a kɛnɛkɛ̄.Buū Le-yɔɔ 33:12; Doonu 20:35.