Skip to content

Skip to secondary menu

Skip to table of contents

Jehovah’s Witnesses

Khana

Leyere Ue A Aaba Bari!

 NUENƆ 5

Ena alu ekɛɛrɛ Bari kiiloo kɛnɛkɛ̄ ani?

Ena alu ekɛɛrɛ Bari kiiloo kɛnɛkɛ̄ ani?

1. Ena anuā Bari bee dɛm kɛnɛkɛ̄ a?

Jɛhova bee dɛm kɛnɛkɛ̄ nɛ pya nɛɛ̄dam le nɛɛ̄wa. Ɛɛ i be. Nyɔwo, lo tua tua dam le wa, Adam le Iv, naa bee lu edɛm wa kɔ ba a mana mma bunyɔɔ—Bari ebee dɛm ge pya ɛnjɛl kɔ ba atɔɔ̄ bunyɔɔ. (Job 38:4, 7) Taāwo, Bari bee su lo tua tua nɛɛ̄ a, sa ye sere bu paradais a kpedɛɛ̄ alu e kue gɔh Eden. (Jɛnɛsis 2:15-17) Jɛhova bee ye nɛ dee le pya miɔ̄ŋɔ e ɛrɛ kɔ ba a ɛrɛ ekpeloo dum anaatah a kɛnɛkɛ̄.Buū Le-yɔɔ 37:29; 115:16.

Aā bɔātɛ̄, aba gɔh Eden na abee lu paradais a. Tua tua dam le wa a, na ba ebee mmɛɛ wa miɔ̄ŋɔ a nyɔɔ kɛnɛkɛ̄ a. Sɔ̄ sɔ̄ gaa kiisī, ba ebee mana mma bu nyɔuwe sa kwa nua paradais. (Jɛnɛsis 1:28) Kɛnɛkɛ̄ naa lee lu e gbeesī lɔgɔ sɔ̄. E kiisī elu be pya nɛɛ̄.Buū Le-yɔɔ 104:5.

2. Ena anuā kɛnɛkɛ̄ naa le paradais anyawo a?

Adam le Iv bee lɛɛbeekɛɛ̄ Bari, nyɔwo, Jɛhova bee wa kpo lɛɛ bu lo gɔh. Paradais bee pe, sa lɔgɔ nɛɛ̄ sii dap obara sere ye dɔ. Kpa Baibol kɔ: “A elua esu nyɔuwe yere kɛ̄ bah pya bag dogo.”—Job 9:24.Buū Jɛnɛsis 3:23, 24.

Elua Jɛhova elɛra baloo edoo ekɛɛrɛ abee ɛrɛ tua sɔ̄ kumaloo gānɛɛ ni? Eeye! Alɛ na a eenyɔɔ dɛ̄dɛɛ̄ nu a. A naa lee lɔɛ edoo. (Aisaia 45:18) Alɛ gaa lee obara pya nɛɛ sere dum bu sīdee abee gbī.Buū Le-yɔɔ 37:11, 34.

3. Bu mɛ sīdee na Paradais elu e obara nuā ani?

Paradais elu e obara nuā kɛnɛkɛ̄ sɔ̄ Jizɔs e bɛɛ doodoo Mɛnɛ Bari wu. Bu nɔ̄ alu ekue Haamagedon Jizɔs gaa lee zaāsī pya ɛnjɛl Bari loe gbeesī dɛ̄dɛɛ̄ pya a gbanasī Bari. Lo sɔ̄ Jizɔs eyere Setan kpɔghɔrɔ loo 1,000 zua. Pya nɛɛ Bari etɛɛ̄ yeebah gbeerasī nyɔnɛbee Jizɔs e baɛ wa loo sa wa  kpega. Ba e ɛrɛ ekpeloo dum anaatah bu paradais a kɛnɛkɛ̄ ina deedee.Buū Mumuuna 20:1-3; 21:3, 4.

4. Mɛ sɔ̄ na tɔga e’ina kuma ani?

Mɛ sɔ̄ na Bari esu kuma mmɛ loo pɔrɔ a nyɔɔ kɛnɛkɛ̄ ani? Jizɔs bee nɛ “edoba nu” a tɔgɛ sɔ̄ kuma e waɛloo. Kɛ̄tɔɔ̄ nyɔuwe anii’ee nuā bɔɔ loo tɔɔ̄dum pya nɛɛ̄, sa tɔgɛ kɔ i le “kuma lo sɔ̄ eku nu ama.”Buū Matiu 24:3, 7-14, 21, 22.

Sɔ̄ Jizɔs ebɛɛ nyɔuwe-aā li bunyɔɔ loo 1,000 zua, a gaa le lɛɛ dɛ̄dɛɛ̄ bee tɔga. (Aisaia 9:6, 7; 11:9) Kaɛlɛɛ bɛbɛɛ doodoo Mɛnɛ, Jisus e sinage tam doodoo Nɛɛ tɛsī ewɔp, sa gaa le zugere pɔrɔ pya ba wereloo Bari lɛɛ. Nyɔwo, tɛmaloo Jisus, Bari elɛɛ dumɛloo, ānā, le luh.Buū Aisaia 25:8; 33:24.

5. Ba mɛɛ̄ na ba etɔɔ̄ bu paradais li deesī ani?

Li Tɔ Nɔnu Buɛ̄-mɛnɛ, o zɔgia pya ba wereloo Bari sa gbī enɔ̄ loe doo nu a ye niā

Pya nɛɛ ba gbaɛ̄tɔ̄loo Bari etɔɔ̄ bu Paradais. (1 Jɔn 2:17) Jizɔs bee yere pya awee ye nyɔnɛ dumɛ kɔ ba a gbī pya kuma nyiɛ kɛ̄, sa wa tɔgɛ sīdee ba elu pya Bari esu. Nii’ee ama, Jɛhova gaa kwa loo miliɔn miliɔn pya nɛɛ ba e tɔɔ̄dum bu Paradais a kɛnɛkɛ̄ li deesī. (Zefania 2:3) Bie Kingdom Hall pya Ekeebee Jɛhovah, pya nɛɛ nɔ̄ kɛ̄ elu le dam le tɛ, le wa, le le ka doo. Pya miɔ̄ŋɔ le tɛ le ka wee gbaa taāŋaba sa nɔ̄ kɛ̄ e ɛrɛ biī aāloo leyere ue doo.Buū Maika 4:1-4.