Skip to content

Skip to secondary menu

Skip to table of contents

Jehovah’s Witnesses

Khana

Leyere Ue A Aaba Bari!

 NUENƆ 11

Bu Mɛ Sīdee Na Pya Zuurabahtɔ̄ Ale Bu Baibol i Dɔbiī Nɛ A?

Bu Mɛ Sīdee Na Pya Zuurabahtɔ̄ Ale Bu Baibol i Dɔbiī Nɛ A?

1. Ena anua i gbī baɛloo ani?

Mɛ sīdee na zuurabatɔ̄ ale bu Baibol e yerebah inɛ loe kpega i loo ani?—LE-YƆƆ 36:9.

Nɛɛ̄ abee i dɛm suānu i ee. Doodoo Tɛ ai wereloo, a kuū-i-dɛɛ̄ loo. Gbaānage loo wo, anaa gbī kɔ i tɔɔ̄ nyɔɔ i loo ye aa kɛɛ̄. (Jeremia 10:23) Nyɔwo, dookɛ̄ nwīgbagbara nwiī gbī baɛloo a aaba ye tɛ le ye ka doo, kɛ̄ ili gbīnage baɛloo a aaba Bari doolo (Aisaia 48:17, 18) Zuurabahtɔ̄ Baibol nɛ i baɛloo, lo alu dɔɔ̄nu a aaba Bari.Buū 2 Timɔti 3:16.

Pya lok le zuurabahtɔ̄ Jɛhova tɔgɛ sīdee tɔɔ̄dum alee eera anyawo, sa i tɔgɛ nage nu edoo lokwa i ɛrɛ leelee anaatah li mmsī. kuma sɔ̄ Bari bee i dɛm a, abɔloo kɔ i tɔgɛ nia loo ye baɛloo.Buū Le-yɔɔ 19:7, 11; Mumuuna 4:11.

2. Pya ena alu zuurabahtɔ̄ Baibol a?

Pya zuurabahtɔ̄ ale bu Baibol lu ekatɛ̄ kaka ue. Lok dap aadee tubo baloo ziī ziī kɛ̄tɔɔ̄. (Deuteronomi 22:8) I ɛrɛ esu ekɛɛrɛ buābee daā beeloo kɛ̄ zuurabahtɔ̄ ɛrɛ nu edoo loo ziī ziī kɛ̄tɔɔ̄ doo. (Kam 2:10-12) Bu edoba, Baibol tɔgɛ kɔ dum lu dɔɔ̄nu a aaba Bari. Lo kpog bee zuurabahtɔ̄ ama, dap i baɛloo sɔ̄ i le kɛ̄tam, butɔ, le sɔ̄ i le dee kiā. A doo kɔ i nwaɛ̄dɛɛ̄ lokwa ii yere i dum le dum pya dɔɔ̄na bu pe.Buū Doonu 17:28.

3. Baɛ amunu zuurabahtɔ̄ na akuī eera ani?

Jizɔs bee kɔ ue akiiloo baɛ nu alu egbī i aāba akuī eera. Lo tuatua muūna siā nu alu ekɛɛrɛ ale dumɛ dum miɔ̄ŋɔ nɛɛ̄. Lo ale, loe suā loo Bari, sa ye wereloo, le loe sitam ye nɛ bu yira. Lo tuatua nu alu egbī i aāba lu nu i kɛɛrɛ bu dɛ̄dɛɛ̄ sɔ̄ i biaɛ-nu-fii. (Kam 3:6) Pya a  nyɔnɛ nu alu egbī ama ɛrɛ biī lo elu gbo Bari, sa ɛrɛ kaānā ɛɛbu, eba e ɛrɛ dum anaatah.Buū Matiu 22:36-38.

Lo eree baɛ nu alu egbī i aāba dap i baɛloo lokwa i nyɔnɛ pya dɔɔ̄na tɔɔ̄ bu efɛɛloo. (1 Pya Kɔrint 13:4-7) Su lo eree baɛ nu alu egbī i aāba ama yere bu dogo kura nɔ̄ kɛ̄ Bari aara pya nɛɛ̄ doo.Buū Matiu 7:12; 22:39, 40.

4. Bu mɛ sīdee na pya nu Baibol i gbī bah i dɔbiī nɛ ani?

Pya nu Baibol i gbī aāba tɔgɛ kɛ̄ pya ale butɔ a gbaaloo bu wereloo doo. (Pya Kɔlɔsi 3:12-14) Muɛ̄ Ue Bari baɛ nage loo pya butɔ tɛmaloo e tɔgɛ dɔɔ̄na nu alu egbī i aāba—kɔ iya dam le wa alu biakɛ̄. Buū Jɛnɛsis 2:24.

Tɛ̄maloo e nyɔnɛ tɔgɛnu ale bu Baibol, i dap baɛloo i zɔ le ekɛɛrɛ. Bu edoba, pya tɛtam wee gbī pya nɛɛ̄tam ba tɔɔ̄dum nyɔnɛ nu Baibol i gbī aāba, kɔ i kaānā sa sitam leere. (Kam 10:4, 26; Pya Hibru 13:18) Muɛ̄ Ue Bari tɔgɛ nage kɔ nu i ɛrɛ a gbɔɛ̄-i-loo le kɔ yii gbo Bari akuī i loo ee zɔ.Buū Matiu 6:24, 25, 33; 1 Timɔti 6:8-10.

Doo pya nu Baibol i gbī aāba dap doo kɔ i tɔɔ̄dum enɛ i nwanaloo. (Kam 14:30; 22:24, 25) Bu edoba, gbaɛ̄tɔ̄loo lok Bari akɔ ia ɔ̄ miī tɛɛādɛɛ̄ kpega i lɛɛloo dumɛnu awee nua luh le bugia sira nu. (Kam 23:20) Jɛhova lɛɛ baloo kɔ i ɔ̄ miī, mɛ, akɔ ia ɔ̄ tɛɛā dɛɛ̄. (Le-yɔɔ 104:15; 1 Pya Kɔrint 6:10) Pya nu Baibol i gbī aāba dɔbiī inɛ. Nyɔnɛbee, a tɔgɛ kɔ ia baɛloo aba i dogo, mɛ i baɛ nage loo ie kɛɛrɛ. (Le-yɔɔ 119:97-100) Kerewo, pya kaka Nɛɛ̄kraist naa nwādɛɛ̄ daakuu Bari aba nyɔɔ biī ba e’ɛrɛ. Ba doowo loe nɛka Jɛhova.Buū Matiu 5:14-16.