Skip to content

Skip to secondary menu

Skip to table of contents

Jehovah’s Witnesses

Khana

Ena Baibol I Dap Tɔgɛ Ani

 ZIĪ EKOBEE

Mɛɛ̄ Na Bari Ani?

Mɛɛ̄ Na Bari Ani?

1, 2. Amunu ebip na pya nɛɛ wee bip gbɛnɛkpo sɔ̄ ani?

GBOMIƆŊƆ wee bip ebip gbɛnɛ. Lo o agara wa nɛ, gbɛnɛkpo sɔ̄ ba bip kɔ, ‘Ena anua a?’ E lo o gbī e baatɛ̄ wa nɛ, ba dap sikɛ̄ bip kɔ ‘Ena anua ani?’

2 Dɛ̄dɛɛ̄ ii wee bip ebip, ale i le nwiī ale i elua nama nɛɛ. I dap bip ebip kumaloo nu i de, nu i yaa ale nu i yaɛ. I dap nage bip gbɛnɛ-gbɛnɛ ebip akiiloo dum le kɛ̄ deesī li e mɛā doo. Mɛ, sɔ̄ ii ɛrɛ kaāna ture loo pya ebip ama, i dap ɔbɛ e gbī wa ture.

3. Ena anua gbɛnɛ-edo nɛɛ kɛɛrɛ kɔ ba naale edap e ɛrɛ ture loo wa gbɛnɛ-gbɛnɛ ebip ani?

3 Ekɔ Baibol ɛrɛge ture pya gbɛnɛ-gbɛnɛ ebip i wee bip ama ni? Pio nɛɛ dap yiga doo wo, mɛ ba kɛɛrɛ kɔ Baibol aga gbɛnɛ lo e dābeeloo. Ba dap kɛɛrɛ kɔ aba pya tɔgɛnu le pya zaāsī tɔbari na ba suā wa ture a. E pya dɔɔ̄na ɛrɛ kɛɛ lo eyiga kɔ ba naa suāe wa ture. Ena olo kɛɛrɛ a?

4, 5. Pya amunu gbɛnɛ ebip na o ɛrɛ a? Ena anua o kiisī lo e gbī wa ture ani?

4 Naa daba, o gbī e suā ture pya ebip a le doodoo: Ena anua m le akɛāma ani? Sɔ̄ m u, m le bu mɛ dua kɛ̄tɔɔ̄ ni? Bari lu mɛ dua nɛɛ ni? Lo gbɛnɛ nɛɛ tɔgɛnu akura Jizɔs bee kɔ: “Baraa, e a elu enɛ i; gbiaā, e bui gbī muɛ̄; tɔaā baloo, e a elu e kpaāna i  nɛ.” (Matiu 7:7) O a biewo e gbī wa ture mmɛ sɔ̄ o emɔna pya ture a bɔloo.

5 Aiī, lo o ‘kiisī lo e gbī,’ o muɛ̄ wa ture aābu Baibol. (Kam 2:1-5) Wa ture naa aga e dābeeloo. Nu o suā edoo kɔ o tɔɔ̄dum bu ɛɛbu sa o ɛrɛ nyɛŋia bɛābu akiiloo deesī. Doo i naa kɔ nu akiiloo ziī ebip a ekwɔa gbɛnɛ-edo nɛɛ.

EKƆ BARI KUŪGE I DƐƐ̄LOO, SƐH A ƐRƐ I PƆRƆ NYIƐ LOO NI?

6. Sɔ̄ i gaa tɔga, ena anua pio nɛɛ kɛɛrɛ kɔ Bari naa kuū i dɛɛ̄loo ani?

6 Gbɛnɛ-edo nɛɛ kɛɛrɛ kɔ Bari naa kuū i dɛɛ̄loo. Ba kɛɛrɛ kɔ lo Bari bee i kuūdɛɛ̄loo, kɛ̄tɔɔ̄ nyɔuwe e bee lee eewo ama. I muɛ̄ nɔ̄, baaloo, le pɔrɔ sira nu a gaa sira dɛ̄dɛɛ̄ kɛ̄. Loo pya nɛɛ gaa dumɛ, ba gaa tɔga, e ba gaa u. Pio nɛɛ bip kɔ, ‘Lo Bari gaa i kuūge dɛɛ̄loo, ena anua a naa ɔbɛ dɛ̄dɛɛ̄ tɔga ama ani?’

7. (a) Bu mɛ sīdee na pya zaāsī yigabari etɔgɛ pya nɛɛ kɔ Bari ɛrɛ pɔrɔ nyiɛ ani? (b) Ena anua i suā leere kɔ pɔrɔ nu a sira naa aaba Bari ani?

Pio sɔ̄ pya zaāsī yigabari doo kɔ pya nɛɛ a yiga kɔ Bari ɛrɛ pɔrɔ nyiɛ. Sɔ̄ piya nu sira, ba kɔ alu nia Bari. Ba kɔ a gbī kɔ a sira doo wo. Ba gaa begee ue Bari sɔ̄ ba kɔ doo wo. Mɛ, Baibol tɔgɛ kɔ pɔrɔ kɛ̄tɔɔ̄ naa aaba Bari doo pippip. Kpa Jemes 1:13 kɔ i nɛ kɔ Bari naa wee su pɔrɔ kɛ̄tɔɔ̄ doā-ɛp lɔgɔ nɛɛ. A kɔ: “Doolo lɔgɔ nɛɛ aa kɔ, sɔ̄ a lu e’ɛma ye ɛp, ‘Bee lu e’ɛma mɛ ɛp tɛ̄mabah Bari.’ Nyɔnɛbee pɔrɔ naa dap ɛma-ɛp Bari, e alɛ alɛɛ loo naa doā lɔgɔ nɛɛ ɛp.” Lo ama kura kɔ, kere Bari sii  ɔbɛ pɔrɔ-pɔrɔ nu kɔ aa sira na, a naale alɛ na a doo kɔ ba a sira a. (Buū Job 34:10-12.) I naa ɛp ziī edoba.

8, 9. Ena anua a naa lee kɔ i begee ue Bari loo pya i taāŋa ani? Naa nɛ edoba.

8 Naa kɛɛrɛ ziī nwiīzuguru lo a wee le be kpaɛ̄ ye tɛ le ye ka. Ye tɛ were ye loo gbɛnɛ sa etɔgɛ ye kɛ̄ a biaɛ nu fii leere doo. Sɔ̄ a e saa, lo zuguru gbara lɛɛbeekɛɛ̄ ye tɛ sa aa be. A doo pɔrɔ-pɔrɔ nu sa yii bu taāŋa. O bege ge ue ye tɛ loo nu a sira ama nyɔɔbee a naa bee kpaɛ̄ ye nwiī kɔ aa aa be ni? Kɛādoo, oo le e bege ye! (Luk 15:​11-13) Doodoo lo tɛ, Bari naa kpaɛ̄ miɔŋɔ nɛɛ sɔ̄ ba biaɛfii lo elɛɛ ye beekɛɛ̄ sa doo piya nu. Nyɔɔwo, sɔ̄ piya nu sira, i nyɛŋiabu kɔ naale Bari na a doo kɔ a sira a. Naa lee e begee ue Bari.

9 Ɛrɛ le nu anua Bari sii ɔbɛ pɔrɔ-pɔrɔ nu kɔ aa sira na. Bu 11 Ekobee ue bu kpa ama, o gaa le nɔ nu Baibol kɔ kumaloo lo ama. Mɛ, o dap suā leere kɔ, Bari were i loo e a naa lee kɔ i begee ye ue nyɔɔ pya i taāŋa. Bu kaka, aba Alɛ na a dap kwa i taāŋa a.​—Aisaia 33:2.

10. Ena anua i dap suā leere kɔ Bari gaa le kwa dɛ̄dɛɛ̄ pɔrɔ-pɔrɔ nu pya nɛɛ edoora ani?

10 Bari le kaɛ. (Aisaia 6:3) Dɛ̄dɛɛ̄ nu a doo loga, ɛɛ, sa lee. Nyɔɔwo, i dap ye dɛrɛ nyiɛ nyɔɔ. Miɔŋɔ nɛɛ naale doo wo. Pio sɔ̄ ba doo piya nu. Kere nɛɛ a gaa bɛɛ a kaāna gbɛnɛ, naa ɛrɛ ekpo ekwaā pɔrɔ-pɔrɔ nu pya nɛɛ gaa doo. Lɔgɔ nɛɛ naa ɛrɛ ekpo tɔɔ̄ Bari. A dap kwa dɛ̄dɛɛ̄ nu pya pɔrɔ nɛɛ e gbeera. A  gaa le doo wo. A gaa le lɛɛ pɔrɔ dogo mmɛ deedee.​—Buū Le-yɔɔ 37:9-11.

SƆ̄ PYA NƐƐ TƆGA, TƆƆ̄ LOO BARI DOODOO WA NI?

11. A tɔɔ̄ loo Bari doodoo wa sɔ̄ o tɔga ni?

11 Sɔ̄ Bari muɛ̄ nu a gaa sira bu nyɔuwe le kɛ̄tɔɔ̄ o le bu, a tɔɔ̄ ye loo doodoo wa? Baibol kɔ Bari “wereloo kaāna biaɛ.” (Le-yɔɔ 37:28) Nyɔɔbee wo, a gaa muɛ̄ sɔ̄ i le bu le kɛ̄tɔɔ̄ le sɔ̄ i le bu pɔrɔ kɛ̄tɔɔ̄. A kiɛ̄ ye sɔ̄ pya nɛɛ tɔga. Baibol kɔ, “e a bee ye kiɛ̄ bu ye beenyiɛ” sɔ̄ a bee muɛ̄ kɔ bag dogo mma bu nyɔuwe sɔ̄ akii adumɛ a. (Jɛnɛsis 6:5, 6) Bari naa wee nyaa. (Malaki 3:6) Baibol kɔ, Bari kuū a dɛɛ̄ loo kaāna.​—Buū 1 Pita 5:7.

Baibol tɔgɛ kɔ Jɛhova na nɛɛ a dɛm nyɔuwe a, e a ɛrɛ wereloo

12, 13. (a) Ena anua i wereloo sa kuūdɛɛ̄loo pya dɔɔ̄na a, e tɔga a le bu nyɔuwe tɔɔ̄ i loo doodoo wa? (b) Ena anua i suā leere kɔ Bari gaa le lɛɛ tɔga le pɔrɔ biaɛ ani?

12 Baibol kɔ nage kɔ Bari bee i dɛm bu ye bera. (Jɛnɛsis 1:26) Lo ama kura kɔ Bari bee i dɛm sa yere pya le elap dogo a ɛrɛ i bu. Nyɔɔwo, lo a kiɛ̄ a sɔ̄ o muɛ̄ pya nɛɛ ue naa bee gaa tɔga, ɛrɛ nage e kiɛ̄ Bari eewo sɔ̄ a muɛ̄! I tɛɛ̄ doodoo wa suā lo ama?

13 Baibol tɔgɛ i kɔ “Bari na wereloo” a. (1 Jɔn 4:8) Bari doo dɛ̄dɛɛ̄ nu tɛ̄maloo wereloo. Nyɔɔwo, i wereloo, nyɔnɛbee Bari were i loo. Naa kɛɛrɛ: Lo o bee ɛrɛ ekpo lo elɛɛ tɔga, le pɔrɔ biaɛ bu nyɔuwe, o bee lɛɛ ge ni? Bu kaka, o bee lɛɛ, nyɔnɛbee o wereloo pya nɛɛ. Bari edoo ge wo ni? A ɛrɛ ekpo, e nyɔnɛbee a were i loo a, a gaa le lɛɛ dɛ̄dɛɛ̄ tɔga le  pɔrɔ biaɛ. Suā leere kɔ, dɛ̄dɛɛ̄ yii Bari a bee lu ekɔ a bɔātɛ̄ kpa ama a, e dooa gbɔmɛɛ̄! Mɛ, lokwa o dɛrɛ nyiɛ nyɔɔ pya yii ama, alu ebɛɛ̄ kɔ o suā loo Bari leere.

BARI GBĪ KƆ O SUĀE YE LOO

Lo o gbī eyii gbo ziī nɛɛ, o kue o bee ye nɛ. Bari kue ye bee i nɛ bu Baibol

14. Bee Bari kura wa, e i tɛɛ̄ doodoo wa suā kɔ i ɛrɛ e kue ni?

14 Lo o gbī eyii gbo ziī nɛɛ, tua e na o wee ye kɔ nɛ a? O bee. E kɔ Bari ɛrɛge bee ni? Gbɛnɛ-edo sīdee taāŋabah kɔ ye bee na Bari ale Nɛɛ-a-i-ɛrɛ. Mɛ, ba naale bee. Ba lu esobee, doodoo, “mɛnɛ-buɛ̄” ale “gbɛnɛ mɛnɛ.” Bari ekɔa i nɛ kɔ ye bee kura Jɛhova. Kpa Le-yɔɔ 83:18 kɔ: “Doolo ba suā kɔ mɛ aba olo, nɛɛ o bee kura Jɛhova, na o Eenyɔɔ Dɛ̄dɛɛ̄ Nu ale bu nyɔuwe a.” Pya a bee ɛm Baibol, bee ɛm bee Bari bu gbɛnɛ-edo sɔ̄. Jɛhova gbī kɔ o suāe ye bee sa ye kue. A kue ye bee a nɛ lokwa o dap lu ye gbo.

15. Ena lo bee, Jɛhova kura a?

15 Bee Bari, lo a le Jɛhova, ɛrɛ gbɛnɛ nu akura. A kura kɔ Bari dap doo ɛrɛgeba yii a yira, le ye  ekɛɛrɛ gbɔmɛɛ̄. Lɔgɔ nu naa dap ye kpaɛ̄. Aba Jɛhova na a dap yiga bee ama a. *

16, 17. Ena pya esobee ama kura a? (a) “Nɛɛ a dap doo dɛ̄dɛɛ̄ nu” (b) “Mɛnɛ a tɔɔ̄dum ina deedee” (c) “Nɛɛ a dɛm nu.”

16 Dookɛ̄ i bee buū tua sɔ̄ doo, kpa Le-yɔɔ 83:18 kɔ kumaloo Jɛhova kɔ: “Aba olo . . . na o Eenyɔɔ Dɛ̄dɛɛ̄ Nu” a. Gbaāloo wo, Kpa Mumuuna 15:3  kɔ: “O tam kuī sa lu nyɛŋia, A Nɛɛ-a-i-ɛrɛ, lo Bari a bɛɛ dɛ̄dɛɛ̄ nu. Dɛ̄dɛɛ̄ o dee kaāna sa lu kaka, A Mɛnɛ loo dɛ̄dɛɛ̄ buɛ̄.” Ena lo esobee, “Nɛɛ a dap doo dɛ̄dɛɛ̄ nu” kura a? A kura kɔ Jɛhova ɛrɛ ekpo ee ɛrɛgeba dɔɔ̄na nɛɛ aā bunyɔɔ mmɛ kɛnɛkɛ̄. E lo esobee, “Mɛnɛ a tɔɔ̄dum ina deedee” kura kɔ a bee le aā dee. Kpa Le-yɔɔ 90:2 baatɛ̄ kɔ a bee le aā deedee sa ele ina deedee. E kɔ lo ama naa lu nyɛŋia!

17 Aba Jɛhova na Nɛɛ a dɛm nu a. Kpa Mumuuna 4:11 kɔ: “Nɛɛ-a-i-ɛrɛ le i Bari, olo bɔloo esu ka, le enwadɛɛ̄, le ekpo, nyɔnɛbee olo na o bee doo dɛ̄dɛɛ̄ nu a, e tɛ̄maloo kɛ̄ o gbī doo ba bee le, e a bee lu edɛm wa.” Aiī, aāloo pya ɛnjɛl a le li bunyɔɔ, le zina bunyɔɔ, mmɛ loo bee te le bari a  le bu pɛnɛ, le ɛrɛgeba dɔɔ̄na nu Jɛhova na a wa dɛm a!

O DAPGE LU GBO JƐHOVA NI?

18. Ena anua pio nɛɛ kɛɛrɛ kɔ ba naale edap e lu gbo Bari a? Ena Baibol kɔ kumaloo a?

18 Sɔ̄ pio nɛɛ buū nu akiiloo pya nyɛŋia dogo Jɛhova, bɔɔ aa wa. Nyɔɔwo, ba kɛɛrɛ kɔ, “Bari ɛrɛ ekpo sa kuī gbɛnɛ, e a tɔɔ̄ ebini i aaloo, etɛɛ̄ doodoo wa mɛ yii gbo ni? Mɛ, Bari gbīge kɔ i ɛrɛ dua ekɛɛrɛ ama ni? Eeye doo pippip. Jɛhova gbī etɔɔ̄ i waɛloo. Baibol kɔ, Bari “naa le kɛ̄ a binia aaloo ziī ziī ii.” (Doonu pya Nɛɛ-lɛɛratam 17:27) Bari gbī kɔ o tɔɔ̄ ye waɛloo, e a yira yii kɔ “alɛ etɔɔ̄ i waɛloo.”​—Jemes 4:8.

19. (a) O dap doodoo wa lu gbo Bari ni? (b) Amunu yɛɛ pya elap dogo Jɛhova na a a niā gbɛnɛ a?

19 O dap doodoo wa lu gbo Bari ni? Jizɔs bee kɔ: “E alɛ ama na dum a naatah a, lokwa ba suāloo olo aba kaka Bari, le Jizɔs Kraist nɛɛ o bee yere.” (Jɔn 17:3) Kiisī lo enɔ nu, e o suā loo Jɛhova le Jizɔs. E lo sɔ̄, o dap ɛrɛ dum anaatah. Bu edoba, i e nɔā kɔ “Bari na wereloo” a. (1 Jɔn 4:16) Mɛ, a ɛrɛ nage pya dɔɔ̄na le elap dogo. Baibol kɔ i nɛ kɔ Jɛhova lu Bari “lo toesaɛ̄ le ewonu, lo a naa wee nwaabah ɛrɛ saŋ sa mma bu wereloo a naa wee nyaa le kaāna yira.” (A’aa 34:6) Jɛhova lu “le sa aaloo pɔrɔ.” (Le-yɔɔ 86:5) Bari ɛrɛ egerebu sa lu nɛɛ a i tɔɔ̄ agara nɛ. (2 Pita 3:9; Mumuuna 15:4) O gaa le nɔ gbɛnɛ-edo nu akiiloo pya ye le elap dogo sɔ̄ o buū nu a ye kiiloo bu Baibol.

20-22. (a) O dap doodoo wa tɔɔ̄ waɛloo Bari, lo oo muɛ̄ ni? (b) Ena o doo lo pya dɔɔ̄na gbī e’ɔbɛ a lɛɛ loo nɔ Baibol a?

 20 O dap doodoo wa tɔɔ̄ waɛloo Bari lo oo muɛ̄ ni? (Jɔn 1:18; 4:24; 1 Timɔti 1:17) Sɔ̄ o buū nu akiiloo Jɛhova bu Baibol, o suā dua Nɛɛ a lu. (Le-yɔɔ 27:4; Pya Rom 1:20) Sɔ̄ o gaa nɔ nu akiiloo Jɛhova yereloo, wereloo o ye ɛrɛ loo enyim sa o tɔɔ̄ ye waɛloo.

Tɛ wee wereloo pya ye miɔŋɔ, mɛ i Tɛ a le li bunyɔɔ were i loo eewo

21 O suā kɔ Jɛhova na i Tɛ a. (Matiu 6:9) A nɛ i dum, e a gbī nage kɔ i tɔɔ̄ bu ekpeloo dum. Kɛ̄ tɛ a wereloo pya ye miɔŋɔ wee doolo. (Le-yɔɔ 36:9) Aiī, Baibol tɔgɛ kɔ o dap lu gbo Jɛhova. (Jemes 2:23) Lu nyɛŋia nia. Jɛhova Nɛɛ a  dɛm bunyɔɔ le kɛnɛkɛ̄, gbī kɔ o lue ye gbo!

22 Pio nɛɛ dap gbī kɔ o ɔbɛ enɔ Baibol. Ba dap ɛrɛ bɔɔ kɔ o gaa le nyaana o sīdee taāŋabah. Mɛ, o a yiga kɔ lɔgɔ nɛɛ a ɔbɛ a lɛɛ loo elu gbo Jɛhova. A e lee ee dɛ̄dɛɛ̄ gbo o dap ɛrɛ.

23, 24. (a) Ena anua o kiisī lo e bip ebip ani? (b) Ena i gaa le kɔ bu lo ekobee ue a e nyɔɔnɛ ama a?

23 Sɔ̄ o gaa nɔ Baibol, a ɛrɛ pya nu oo le e dābeeloo. Kɛɛ aa a bɔp lo e bip ebip ale gbī yerebah. Jizɔs bee kɔ i kumalookɛ̄ doodoo gbomiɔŋɔ. (Matiu 18:2-4) E gbomiɔŋɔ wee bip ebip gbɛnɛ. Bari gbī kɔ o gbītɛ̄ suā wa ture. Nyɔɔwo, nɔ Baibol kaāna sa ɛp sɛh nu o gaa nɔ luge kaka.​—Buū Doonu pya Nɛɛ-lɛɛratam 17:11.

24 Le sīdee enɔ nu akiiloo Jɛhova na tɛ̄maloo nɔ Baibol. Bu ekobee ue a e nyɔɔnɛ ama, i gbītɛ̄ suā nu anua Baibol lu kee loo dɛ̄dɛɛ̄ dɔɔ̄na kpa.

^ bar. 15 Lo bee a kura Jɛhova naale bu o Baibol ale lo e nia a esuā nu akura le kɛ̄ e kue bee Bari doo, soosoo buū 1 Ue ale dumɛ.