Skip to content

Skip to secondary menu

Skip to table of contents

Jehovah’s Witnesses

Khana

Ena Baibol I Dap Tɔgɛ Ani

 ƐRƐTAA EKOBEE

Ena A Kura Buɛ̄-Mɛnɛ Bari Ani?

Ena A Kura Buɛ̄-Mɛnɛ Bari Ani?

1. Amunu kara gbɛnɛ-edo nɛɛ suā na i gaa le kɔ ue kumaloo ani?

GBƐNƐ-EDO miliɔn pya nɛɛ suā kara awee lu ekɔ nu kumaloo gbɛnɛ a. Bee lo kara kura Ilii Tɛ a le li Bunyɔɔ, ale Kara Nɛɛ-a-i-ɛrɛ. Jizɔs bee su kara ama tɔgɛ pya awee ye nyɔɔnɛ dumɛ, kɛ̄ ba eyere kara doo. Ena a bee yere kara bara ani? Ena anua kara ama kuī i loo aniī’ee ani?

2. Taa e a kuī na Jizɔs bee i tɔgɛ kɔ i yere kara bara ani?

2 Jizɔs bee kɔ, “Nyɔɔbee wo bui taāŋa doo wo ama: ‘Ilii Tɛ a le li bunyɔɔ, doolo o bee le kaɛ. Doolo o Buɛ̄-mɛnɛ lu, Doolo nu o gbī alu edoo, dookɛ̄ ale doo li bunyɔɔ a le nage a kɛnɛkɛ̄.’” (Buū Matiu 6:9-13.) Ena anua Jizɔs tɔgɛ i kɔ i yere kara bara taa nu ama ani?​—Buū 20 Ue ale dumɛ.

3. Ena a i bɛɛ̄ lo esuā akiiloo Buɛ̄-mɛnɛ Bari ani?

3 I enɔā kɔ bee Bari kura Jɛhova. E i e kɔa nu alu ekɛɛrɛ Bari kumaloo miɔŋɔ nɛɛ le kumaloo kɛnɛkɛ̄. Mɛ, ena Jizɔs gaa kɔa sɔ̄ a bee kɔ: “Doolo o Buɛ̄-mɛnɛ lu” ani? I gaa le nɔ nu Buɛ̄-mɛnɛ Bari kura, nu a gaa le doo, le kɛ̄ edoo kɔ bee Bari a le kaɛ doo.

ENA A KURA BUƐ̄-MƐNƐ BARI ANI?

4. Ena a kura Buɛ̄-mɛnɛ Bari a, e mɛɛ̄ na ye Mɛnɛ ani?

4 Jɛhova wu ye bɛbɛɛ li bunyɔɔ sa sagɛ Jizɔs kɔ alu ye Mɛnɛ. Baibol su bɛbɛɛ ama kure Buɛ̄-mɛnɛ  Bari. Jizɔs na “Mɛnɛ a ee pya mɛnɛ, le Nɛɛ-a-ɛrɛ pya Nɛɛ-a-ɛrɛ” a. (1 Timɔti 6:15) Jizɔs dap doo le nu eenyɔɔ ɛrɛgeba nɛɛ alu mɛnɛ-buɛ̄, kere o su ekpo dɛ̄dɛɛ̄ nɛɛ alu mɛnɛ bii loo ziī ye ekpo kuī ee.

5. Bɛbɛɛ Bari ebɛɛ aā mɛ kɛ̄? E a ebɛɛ bee ba mɛɛ̄?

5 Baɛ tup biradee sɔ̄ Jizɔs e aara kɛ̄ bu luh sah, a bee obia kii bunyɔɔ. Sɔ̄ esaa, Jɛhova bee ye tubo baloo nua Mɛnɛ lo Buɛ̄-mɛnɛ. (Doonu pya Nɛɛ-lɛɛratam 2:33) Bɛbɛɛ Bari gaa le bɛɛ bee nyɔuwe aā li bunyɔɔ. (Mumuuna 11:15) Ɛɛ na anua Baibol su Buɛ̄-mɛnɛ Bari kure “Buɛ̄-mɛnɛ bunyɔɔ” a.​—2 Timɔti 4:18.

6, 7. Ena anua Jizɔs lee ee ɛrɛgeba pya dɔɔ̄na mɛnɛ-buɛ̄ ani?

6 Baibol kɔ Jizɔs eenyɔɔ dɛ̄dɛɛ̄ miɔŋɔ nɛɛ alu mɛnɛ-buɛ̄, nyɔnɛbee “aba ɛɛ tɔɔ̄ bu dum a naatah.” (1 Timɔti 6:16) Dɛ̄dɛɛ̄ nɛɛ a bɛɛ doodoo mɛnɛ wee sah ba u, mɛ Jizɔs naale e’u doo pippip. Dɛ̄dɛɛ̄ le nu Jizɔs edoo i nɛ etɔɔ̄ ina deedee.

7 Mɔmanudɛɛ̄ Baibol kɔ Jizɔs elu Mɛnɛ elee sa ɛrɛ toesaɛ̄ sɔ̄ a kɔ: ‘Edɔɔ̄ Jɛhova gaa le tɔɔ̄ ye nyɔɔ, edɔɔ̄ buābee le dābeeloo nu, edɔɔ̄ zuurabahtɔ̄ le ekpo, edɔɔ̄ suānu le aabɔɔ loo Jɛhova. E ye ɛɛbu gaa le le bu aabɔɔ Jɛhova. A naale e biaɛ tɛ̄maloo nu ye baɛ dɛɛ̄ emɔna, ale nɛ zuurabahtɔ̄ tɛ̄maloo nu baɛ tɔ̄ ye edaā. Mɛ, tɛ̄maloo kaāna dogo na a gaa le biaɛ pya kporo [pya a kii kɛ̄] a.’ (Aisaia 11:​2-4) Eniage a kɔ dua mɛnɛ ama, a bɛɛ a ni?

8. I tɛɛ̄ doodoo wa suā kɔ a naale aba Jizɔs na a e bɛɛ ani?

8 Bari esagɛ pio pya nɛɛ kɔ ba a nyɔɔnɛ Jizɔs bɛɛ li bunyɔɔ. Bu edoba, nɛɛ-lɛɛrɛtam Pɔɔl bee kɔ  nɛ Timɔti kɔ: “Lo a le i ɛrɛ e’aga nyiɛ, i yɔ na ye ge bɛɛ.” (2 Timɔti 2:12) Ku nɛɛ e nyɔɔnɛ Jizɔs bɛɛ doodoo mɛnɛ ni?

9. Ku nɛɛ e nyɔɔnɛ Jizɔs bɛɛ ni? Mɛ sɔ̄ na Bari bee bɔātɛ̄ wa sagɛ a?

9 Dookɛ̄ i bee nɔ bu 7 ekobee ue doo, nɛɛ-lɛɛratam Jɔn bee muɛ̄ mɔmanudɛɛ̄ sa a muɛ̄ Jizɔs doodoo Mɛnɛ li bunyɔɔ gbaāloo 144,000 pya dɔɔ̄na mɛnɛ a ye le loo. Ba mɛɛ̄ na pya 144,000 nɛɛ ani? Jɔn baatɛ̄ kɔ ba “ɛrɛ bee [Jizɔs] le bee ye Tɛ alu e’ɛm wa nyɔɔ gbɔɔsī” A sikɛ̄ kɔ, “Ba alaba ama na pya a nyɔɔnɛ Nwiīnaana pee [lo a le Jizɔs] ɛrɛgeba kɛ̄ a kii a.” Alaba na pya a bee lu e’agara aā yɛɛ nɛɛ” a. (Buū Mumuuna 14:1, 4.) Pya 144,000 nɛɛ na pya Nɛɛ Kraist ba bɔloo eture nyiɛ loo lo Bari sagɛ kɔ ba a nyɔɔnɛ Jizɔs bɛɛ “lu mɛnɛ bee nyɔuwe.” Sɔ̄ ba u, alu elɛɛ wa kɛ̄ bu luh kuma bunyɔɔ. (Mumuuna 5:10) Jɛhova bee bɔātɛ̄ sagɛ 144,000 pya Nɛɛ Kraist ba bɔloo eture nyiɛ loo ama aābu dee pya nɛɛ-lɛɛratam nua mɛnɛ.

10. Ena anua i suā kɔ Jɛhova were i loo lo e kɔ Jizɔs le pya 144,000 nɛɛ a bɛɛ bee miɔŋɔ nɛɛ ani?

10 Jɛhova kuū i dɛɛ̄ loo gbɛnɛ, nu anua a nɔɔ̄ kɔ miɔŋɔ nɛɛ a nyɔɔnɛ Jizɔs bɛɛ lo. Jizɔs gaa le bɛɛ i leere nyɔnɛbee a dā i beeloo. A e bee lu nɛɛ sa tɔga dookɛ̄ i gaa doo. Pɔɔl bee kɔ Jizɔs to-i-esaɛ̄, a dap i “nyɔɔnɛ muɛ̄ pɔrɔ loo i e’ɔaloo,” e a “bee lu edoā-ye-ɛp doodoo ili.” (Pya Hibru 4:15; 5:8) Pya 144,000 nɛɛ suā nage kɛ̄tɔɔ̄ miɔŋɔ nɛɛ le bu. Pɔrɔ le dumɛloo bee wa nɛ nage taāŋa. Nyɔɔwo, i dap suā mmɛɛ̄ kɔ Jizɔs le pya 144,000  nɛɛ e dābeeloo kɛ̄ nu i tɔɔ̄loo doo le pya taāŋa i gaa tɛɛ̄ nage bu.

ENA BUƐ̄-MƐNƐ BARI EDOO ANI?

11. Ena anua Jizɔs bee tɔgɛ pya awee ye nyɔɔnɛ dumɛ kɔ ba a yere kara kɔ ekɛɛrɛ Bari a dooa li bunyɔɔ ani?

11 Jizɔs bee tɔgɛ pya awee ye nyɔɔnɛ dumɛ kɔ ba a yere kara kɔ ekɛɛrɛ Bari asu dɔ li bunyɔɔ. Ena a nua ani? I bee nɔ bu 3 Ekobee ue bu kpa ama kɔ Setan bee lɛɛbeekɛɛ̄ Jɛhova. Sɔ̄ Setan e lɛra beekɛɛ̄ sah, Jɛhova bee lɛɛbaloo kɔ alɛ le pya ɛnjɛl ba naa bɔloo ture nyiɛ loo, ale pya gbo-yɔ, a tɔɔ̄ li bunyɔɔ bu pio sɔ̄. Nyɔɔwo, naale dɛ̄dɛɛ̄ nɛɛ a bee le bunyɔɔ na a bee doo nu a nia Bari a. Bu 10 Ekobee ue bu kpa ama, i gaa le nɔ nu akiiloo Setan le pya gbo-yɔ yere loo.

12. Baɛ amunu gbɛnɛ sira nu na alu ekɔ bu kpa Mumuuna 12:10 ani?

12 Baibol baatɛ̄ kɔ nwīgbagbara sɔ̄ aā sɔ̄ alu esu Jizɔs nua Mɛnɛ Buɛ̄-mɛnɛ Bari, a gaa le be nɔ̄ loo Setan. (Buū Mumuuna 12:7-10.) Ye 10 barakpaɛ̄ kɔ baɛ gbɛnɛ nu bee sira. Bɛbɛɛ Buɛ̄-mɛnɛ Bari bee bɔātɛ̄, e Jizɔs Kraist bee bɛɛ doodoo Mɛnɛ, e a bee lu etop Setan lɛɛ bunyɔɔ tɛrɛ kɛnɛkɛ̄. Dookɛ̄ i gaa le nɔ doo, pya nu ama edooa.

13. Ena a bee sira li bunyɔɔ sɔ̄ a bee lu etop Setan lɛɛ ani?

13 Baibol kɔ dua ɛɛbu pya Ɛnjɛl a bɔloo eture nyiɛ loo bee ɛrɛ sɔ̄ Setan le pya ye gbo-yɔ bee lu etop lɛɛ bunyɔɔ. I buū kɔ: “Nyɔɔbee wo ama ɛɛŋa, bunyɔɔ le pya a ye tɔɔ̄ bu!” (Mumuuna 12:12) Nyaawo, mmɛɛ efɛɛloo le gbaaloo le bunyɔɔ nyɔnɛbee dɛ̄dɛɛ̄ nɛɛ a le gaa doo nu a nia Bari.

Aā sɔ̄ Setan le pya ye gbo-yɔ bee lu etop lɛɛ bunyɔɔ, gbɛnɛ-edo mɔna taāŋa le a kɛnɛkɛ̄. Sɔ̄ sɔ̄ naa binia mɔna taāŋa ama e’ina kuma

14. Ena a sira a kɛnɛkɛ̄ nyɔnɛbee elua etop Setan lɛɛ bunyɔɔ ani?

 14 Mɛ, dum le e aga a kɛnɛkɛ̄. Pɔrɔ pɔrɔ nu gaa sira loo pya nɛɛ “nyɔnɛbee Pɔrɔ-edɔɔ̄ esira i loo bu gbɛnɛ saŋ nyɔnɛbee a suā kɔ ye sɔ̄ lu nwīekpuru.” (Mumuuna 12:12) Setan ɛrɛ gbɛnɛ saŋ. E bee lu etop ye lɛɛ bunyɔɔ, e a suā kɔ sɔ̄ elu egbee ye sī ewara. A gaa si ekpo lo e yere taāŋa, ezialoo, le tɔga bu yube nyɔuwe.

15. Ena a lu ekɛɛrɛ Bari kumaloo kɛnɛkɛ̄ ani?

15 Mɛ ekɛɛrɛ Bari kumaloo kɛnɛkɛ̄ sii nyaā. A lege gaa gbī kɔ pya nɛɛ a mma a tɔɔ̄ bu paradais a kɛnɛkɛ̄ ina deedee. (Le-yɔɔ 37:29) Nyɔɔwo, bu mɛ sīdee na Buɛ̄-mɛnɛ Bari edoo kɔ lo ama a waɛ ani?

16, 17. Ena kpa Daniel 2:44 i kɔ nɛ akiiloo Buɛ̄-mɛnɛ Bari ani?

16 Mɔmanudɛɛ̄ a le bu kpa Daniel 2:44 kɔ: “Bu gbo dee pya lo mɛnɛ-buɛ̄ ama, Bari lo bunyɔɔ gaa le wu ziī Buɛ̄-mɛnɛ sere lo a naale edap lu e gbee ina deedee, e ye bɛbɛɛ naale elu e’aaloo nɛ pya dɔɔ̄na nɛɛ. A gaa le kpɔ dɛ̄dɛɛ̄ buɛ̄-mɛnɛ ama nua nwīkere kere, sa doo kɔ ba a tah, e a gaa le yira mmɛ deedee.” Ena mɔmanudɛɛ̄ ama i tɔgɛ akiiloo Buɛ̄-mɛnɛ Bari ani?

17 Tuatua, a kɔ i nɛ kɔ Buɛ̄-mɛnɛ Bari e bɔātɛ̄ bɛɛ “bu gbo dee pya lo mɛnɛ-buɛ̄ ama.” Lo ama kura kɔ pya dɔɔ̄na bɛbɛɛ elege a kɛnɛkɛ̄ sɔ̄ lo Buɛ̄-mɛnɛ bɔātɛ̄ e bɛɛ. Eree baɛ, a kɔ i nɛ kɔ Buɛ̄-mɛnɛ Bari e tɔɔ̄ ina deedee, e a naale elu e nyaāna dɔɔ̄na bɛbɛɛ ye loo. E eree taa, na kɔ nɔ̄ edɔ yɛɛ Buɛ̄-mɛnɛ Bari le bɛbɛɛ nyɔuwe ama. Buɛ̄-mɛnɛ Bari e be eeba sa lu aba bɛbɛɛ a gaa le bɛɛ yube nyɔuwe.  Lo sɔ̄ miɔŋɔ nɛɛ ele kɛɛ̄ lo bɛbɛɛ a lee ee dɛ̄dɛɛ̄ bɛbɛɛ.

18. Bee lo kpɛdumɛ nɔ̄ a le yɛɛ Buɛ̄-mɛnɛ Bari le bɛbɛɛ nyɔuwe kura wa?

18 Bu mɛ sīdee na Buɛ̄-mɛnɛ Bari e bɔātɛ̄ bɛɛ nyɔuwe ani? Lɛɛ lo kpɛdumɛ nɔ̄, alu e kue Amagidɔn bɔātɛ̄, pya pɔrɔ-edɔɔ̄ edag “pya mɛnɛ dɛ̄dɛɛ̄ nyɔuwe, lo e bɔŋɛnɛ wa loo lo ebea nɔ̄ lo gbɛnɛ dee Bari lo a Bɛɛ Dɛ̄dɛɛ̄ Nu.” Aiī, bɛbɛɛ miɔŋɔ nɛɛ gaa le bebe loo Buɛ̄-mɛnɛ Bari.​—Mumuuna 16:14, 16; buū 10 Ue ale dumɛ.

19, 20. Ena anua i gbī kɔ Buɛ̄-mɛnɛ Bari a bɛɛ nyɔuwe ani?

19 Ena anua Buɛ̄-mɛnɛ Bari bɛɛ̄ i a? Ɛrɛ taa nu anua. Tuatua, ii pya pɔrɔ, nyɔɔwo, loo i dumɛ sa i u. Mɛ, Baibol kɔ, kɛɛ̄ Buɛ̄-mɛnɛ Bari, i gaa le tɔɔ̄dum ina deedee. Bu kaka, kpa Jɔn 3:16 kɔ: “Nyɔnɛbee Bari bee wereloo nyɔuwe doowo, kɔ a bee su aba ye nwiīnɛɛdam a bee ɛrɛ nɛ lokwa ɛrɛgeba nɛɛ a ye yira nɛ naale epe, mɛ a e ɛrɛ dum anaatah.”

20 Eree baɛ nu anua i gbī Buɛ̄-mɛnɛ Bari na bee pya bag dogo tɛɛ̄ i ɛŋɛnɛ. Gbɛnɛ-edo nɛɛ kɔ esah, ziā nɛɛ sa kunagā. Lɔgɔ nu i dap doo lo elɛɛ wa naale, mɛ Bari elɛɛ wa. Pya a kiisī lo edoo bag dogo gaa le lu e gbee wa sī bu nɔ̄ Amagidɔn. (Buū Le-yɔɔ 37:10.) Eree taa nu anua i gbī Buɛ̄-mɛnɛ na bee bɛbɛɛ miɔŋɔ nɛɛ ɔloo, doo bag dogo, ale ziā nɛɛ. Ba naa ɛrɛ nia lo edoo kɔ pya nɛɛ a doo nu Bari kɔ. Baibol kɔ, “nɛɛ ɛrɛ ekpo loo nɛɛ . . . lo edoo ye.”​—Ekliasiastis 8:9.

21. Bu mɛ sīdee na lo Buɛ̄-mɛnɛ edoo kɔ nu alu ekɛɛrɛ Bari a dooa a kɛnɛkɛ̄ ani?

 21 Sɔ̄ nɔ̄ Amagidɔn e’ina kuma, Buɛ̄-mɛnɛ Bari edoo kɔ ekɛɛrɛ Bari alu edoo a kɛnɛkɛ̄. Bu edoba, a gaa le lɛɛ Setan le pya ye gbo-yɔ. (Mumuuna 20:1-3) Lo sɔ̄, loo lɔgɔ nɛɛ naale edumɛ ale kɔ ba e’u. Nyɔɔbee a’agara a, dɛ̄dɛɛ̄ pya nɛɛ a bɔloo eture nyiɛ loo edap tɔɔ̄dum ina deedee bu Paradais. (Mumuuna 22:1-3) Buɛ̄-mɛnɛ Bari edoo kɔ bee Bari a le kaɛ. Ena lo ama kura ani? A kura kɔ sɔ̄ bɛbɛɛ Bari e bɛɛ nyɔuwe, dɛ̄dɛɛ̄ nɛɛ enɛ ka bee Jɛhova.​—Buū 21 Ue ale dumɛ.

MƐ SƆ̄ NA JIZƆS BEE LU MƐNƐ A?

22. I tɛɛ̄ doodoo wa suā kɔ Jizɔs naa bee lu Mɛnɛ sɔ̄ a bee le a nyɔɔ kɛnɛkɛ̄ ale aba sɔ̄ a bee aakɛ̄ bu luh ni?

22 Jizɔs bee tɔgɛ pya awee ye nyɔɔnɛ dumɛ kɔ ba a yere kara kɔ: “Doolo o Buɛ̄-mɛnɛ lu.” Nyɔɔwo a sira leere kɔ bɛbɛɛ Bari elu li deesī. Jɛhova edasī wu ye bɛbɛɛ sa su Jizɔs nua ye Mɛnɛ. Ekɔ a bee luge esu Jizɔs nua Mɛnɛ aba sɔ̄ a obia ina bunyɔɔ ni? Eeye, a ɛrɛ edasī yira. Pio sɔ̄, sɔ̄ Jizɔs e bee  aakɛ̄ bu luh sah, Pita le Pɔɔl doo kɔ alu esuā doowo sɔ̄ ba su mɔmanudɛɛ̄ li bu kpa Le-yɔɔ 110:1 kɔā ue kumaloo Jizɔs. Bu lo mɔmanudɛɛ̄ Jɛhova kɔ: “Ɛŋɛtɛ̄ mɛ bara bale, mmɛ sɔ̄ m doo kɔ dɛ̄dɛɛ̄ pya o nɛɛ baa alu o nu dɛrɛ baɛ tɔ nyɔɔ.” (Doonu pya Nɛɛ-lɛɛratam 2:32-35; Pya Hibru 10:​12, 13) Jizɔs e yira mmɛ mɛ sɔ̄ lɛɛ Jɛhova wu ye nua Mɛnɛ ni?

Buɛ̄-mɛnɛ Bari gaa le doo kɔ ekɛɛrɛ Bari a dooa a kɛnɛkɛ̄

23. (a) Mɛ sɔ̄ na Jizɔs bɔātɛ̄ ebɛɛ lu Mɛnɛ loo bɛbɛɛ Bari ani? (b) Ena i gaa le nɔ bu lo ekobee ue a e nyɔɔnɛ ama a?

23 Bu gbɛnɛkpo zua lɛɛ zua 1914 gae ina, ziī eku pya kaāna Nɛɛ Kraist bee dābeeloo kɔ zua ama lu gbɛnɛ bu mɔmanudɛɛ̄ Baibol. Pya nu a gaa sira bu nyɔuwe aābu zua 1914 tɔgɛ kɔ ba bee kɔ kaka. Jizɔs bee bɔātɛ̄ elu Mɛnɛ sa bɛɛ bu lo zua. (Le-yɔɔ 110:2) Nwīkere sɔ̄ aā lo sɔ̄, Setan bee lu etop ye tɛrɛ nyɔuwe, e nyaawo, “ye sɔ̄ lu nwīekpuru.” (Mumuuna 12:12) Bu lo ekobee ue a e nyɔɔnɛ ama, i gaa le muɛ̄ pya dɔɔ̄na nu a tɔgɛ kɔ i tɔɔ̄dum bu lo sɔ̄. I nɔ nage kɔ Buɛ̄-mɛnɛ Bari esaa edoo kɔ ekɛɛrɛ Bari a dooa a kɛnɛkɛ̄.​—Buū 22 Ue ale dumɛ.