Skip to content

Skip to secondary menu

Skip to table of contents

Jehovah’s Witnesses

Khana

Ena Baibol I Dap Tɔgɛ Ani

 LOP LE NIA EKOBEE

O Butɔ Dap Tɔɔ̄ Bu Ɛɛbu

O Butɔ Dap Tɔɔ̄ Bu Ɛɛbu

1, 2. Jɛhova gbī kɔ butɔ a le bu mɛ dua kɛ̄tɔɔ̄?

JƐHOVA BARI na a bee doo lo tuatua iya dam le wa a. Baibol kɔ i nɛ kɔ a bee dɛm lo tuatua nɛɛwa sa “ye su nɛ” nɛɛdam a. Bu Adam bee ɛɛ gbɛnɛ mmɛ lo dɔ a kɔ: “Ɛhɛɛ̄, alɛ ama na ekpo a aaloo na ekpo le namloo a aaloo na namloo a.” (Jɛnɛsis 2:22, 23) Lo ama doo kɔ i suā kɔ Jɛhova gbī kɔ pya dam le wa a tɔɔ̄ bu ɛɛbu.

2 Alu nu ekiɛ̄nu kɔ, gbɛnɛ-edo nɛɛ naa ɛrɛ ɛɛbu bu wa dum butɔ. Kerewo, Baibol aara pya zuurabahtɔ̄ lo e yerebah nɛ dɛ̄dɛɛ̄ nɛɛ a le butɔ, kɔ ba a doo kɔ wa butɔ a kiisī leere sa ba gbaa tɔɔ̄ bu ɛɛbu.​—Luk 11:28.

NU JƐHOVA GBĪ AĀBA PYA DAM

3, 4. (a) Bu mɛ sīdee na dam e aara ye wa a? (b) Ena anua alu gbɛnɛ kɔ dam le wa a aaloo nɛ ziī ani?

3 Baibol kɔ kaāna dam a aara ye wa bu wereloo le enwadɛɛ̄. Soosoo buū Pya Ɛfɛsɔs 5:25-29. Dam ɛrɛ e aara ye wa bu wereloo dɛ̄dɛɛ̄ sɔ̄. A kpega ye wa, ye kuūdɛɛ̄loo, sa a naale edoo lɔgɔ nu enɛ ye taāŋa.

4 Mɛ ena dam edoo sɔ̄ ye wa tɛɛ̄ ekwɔ ani? Lu ekɔ nɛ pya dam kɔ: “Pya dam wa, wereaaloo bui wa, e bui aa wa yere saŋ bu.” (Pya Kɔlɔsi 3:19) Pya dam, nyɛŋiaa bu kɔ bɔɔlo wee tɛɛ̄ nage ekwɔ. E lo  o gbī kɔ Bari a aaloo a nɛ, o ɛrɛ e aaloo nɛ o wa. (Matiu 6:12, 14, 15) Sɔ̄ dam le wa kpɛ̄naloo lo e aaloo nɛ ziī, e yerebah kɔ wa iya dam le wa a le bu ɛɛbu.

5. Ena anua dam a yere ka loo ye wa a?

5 Jɛhova ɛmadɛɛ̄ kɔ dam a yere ka loo ye wa. Dam a kɛɛrɛ nu a bɛɛ̄ ye wa leere. Ue ama kuī gbɛnɛ. Lo dam naa aara ye wa leere, dap doo kɔ Jɛhova aa gbaɛ̄tɔ̄ ye kara. (1 Pita 3:7) Nu a doo kɔ pya nɛɛ a kuī gbɛnɛ kɛ̄ dɛɛ̄ Jɛhova na sɔ̄ ba ye wereloo. A naa ɛp pya nɛɛdam emanyɔɔ pya nɛɛwa.

6. Ena akura kɔ dam le wa lu “aba namloo” ani?

6 Jizɔs bee kɔ dam le wa “naa le esinakɛ̄ lu baɛ mɛ aba namloo.” (Matiu 19:6) Ba tɔɔ̄ nɛ ziī sa naale elɔgara ziī. (Kam 5:15-21; Pya Hibru 13:4) Dam le wa a nyɔɔnɛ ziī maniakɛ̄ dookɛ̄ alu taɛ ziī ziī aba doo, bu sīdee wiibu naale loo. (1 Pya Kɔrint 7:3-5) Dam e nyɛŋia bu kɔ “Lɔgɔ nɛɛ naa wee baaloo ye namloo lɔgɔ sɔ̄, mɛ a ɛp ye leere sa ye kpɔā.” Nyɔɔwo dam e wereloo ye wa sa ye ɛp leere. Eenyɔɔ dɛ̄dɛɛ̄ nu, wa gbī kɔ ye dam alu fɛgɛ sa ye wereloo.​—Pya Ɛfɛsɔs 5:29.

NU BARI GBĪ AĀBA PYA WA

7. Ena anua butɔ gbī nɛɛ elu ekobee a?

7 Dɛ̄dɛɛ̄ butɔ gbī nɛɛ elu ekobee, nɛɛ e baɛloo butɔ lokwa ba gbaa doonu sa kiisī leere. Baibol kɔ bu 1 Pya Kɔrint 11:3 kɔ: “Ekobee dɛ̄dɛɛ̄ nɛɛ [dam] na Kraist, ekobee dɛ̄dɛɛ̄ nɛɛwa na nɛɛdam, e ekobee Kraist na Bari.”

8. Bu mɛ sīdee na wa dap tɔgɛ toga toga enwadɛɛ̄ loo ye dam ani?

 8 Dɛ̄dɛɛ̄ dam wee tɛɛ̄ ekwɔ. Mɛ sɔ̄ wa yere kpotɛ̄ biaɛfii ye dam sa ye gbabeebah leere, wee dɔbiī nɛ dɛ̄dɛɛ̄ nɛɛ a le butɔ. (1 Pita 3:1-6) Baibol kɔ: “Wa a ɛrɛ [toga toga] enwadɛɛ̄ loo ye dam.” (Pya Ɛfɛsɔs 5:33) E lo a le dam le wa naa gbaa ɛrɛ aba yira a? Alu ebɛɛ̄ kɔ a kiisī lo e ɛrɛ toga toga enwadɛɛ̄ loo ye dam. Baibol kɔ, “Bɔɔlo pya wa, tɔɔ̄naa kɛɛ̄ bui dam, lokwa pio kere ba naa yira ue, elu e ɛrɛ wa doodoo biī kere ue a naale tɛ̄maloo dogo wa wa, sɔ̄ ba muɛ̄ bui dee dum a kumalookɛ̄ sa lu ɛɛ.” (1 Pita 3:1, 2) Le elap dogo wa edap yerebah nɛ ye dam kɔ a dābeeloo sa nɛ enwadɛɛ̄ ye yira.

9. (a) Ena wa edoo lo nu ye dam kɔ naa nia ye ani? (b) Ena alu zuurabahtɔ̄ a le nɛ pya wa ale bu kpa Taitɔs 2:4, 5 ani?

9 Ena wa dap doo sɔ̄ nu ye dam kɔ naa nia ye ani? A ɛrɛ ekɔ ye ekɛɛrɛ siā bu enwadɛɛ̄. Bu edoba,  Sera bee kɔ nu a naa nia Abreham, mɛ Jɛhova bee kɔ nɛ Abreham “gbaɛ̄tɔ̄loo o wa.” (Jɛnɛsis 21:9-12) Dam alu Nɛɛ Kraist naale e aadee nɛ biaɛfii a naa gbaaloo nu a le bu Baibol, nyɔɔwo ye wa a yere ye kpotɛ̄. (Doonu pya Nɛɛ-lɛɛratam 5:29; Pya Ɛfɛsɔs 5:24) Kaāna wa e kuūdɛɛ̄loo ye butɔ. (Buū Taitɔs 2:4, 5.) Sɔ̄ ye dam le pya miɔŋɔ muɛ̄ kɛ̄ wa gaa piiga doo, ba e were ye loo sa ye nɛ enwadɛɛ̄ kaāna.​—Kam 31:10, 28.

Bu mɛ sīdee na Sera lu le edoba nɛ pya wa a?

10. Ena Baibol kɔ kumaloo aaloo ziī le kiī dam ale wa ani?

10 Pio sɔ̄ dam le wa dap nwaabah biaɛfii lo e aaloo ziī ale kiī ziī. Kerewo, Baibol kɔ “wa aa aaloo ye dam” le kɔ “dam aa kiī ye wa.” (1 Pya Kɔrint 7:10, 11) Ɛrɛ pio kɛ̄tɔɔ̄ a yeekɛ̄ lo a dap doo kɔ dam le wa a aaloo ziī, mɛ lo ama lu biaɛfii a kuī gbɛnɛ. E kiī wa a le dam a? Baibol tɔgɛ kɔ, aba nu dam dap kiī ye wa ale wa dap kiī ye dam nyɔɔ na, lo a nyɔɔnɛ dɔɔ̄na nɛɛ a naale ye wa ale ye dam maniākɛ̄.​—Matiu 19:9.

NU BARI GBĪ AĀBA PYA TƐ LE KA

Jizɔs lu kaāna le edoba nɛ ziī ziī nɛɛ a le butɔ

11. Ena a bɛɛ̄ gbomiɔŋɔ gbɛnɛ a?

11 Pya tɛ le ka, suaa gbɛnɛ-edo sɔ̄ tɔma kpaɛ̄ bui miɔŋɔ. Pya bui miɔŋɔ gbī i, e nu a wa bɛɛ̄ gbɛnɛ na kɔ buī tɔgɛ wa nu akiiloo Jɛhova.​—Deuteronomi 6:4-9.

12. Ena tɛ le ka edoo lo e baɛloo wa miɔŋɔ a?

12 Nyɔuwe Setan gaa agɛrɛba gbe gbɛnɛ, sa pio nɛɛ e gbī e gbee pya i miɔŋɔ, ba dap nage gbī esu bah ekpo wa aā māloo. A aga bah pio tɛ le ka lo e  nyɔɔnɛ wa miɔŋɔ kɔnia ue nyɔɔ lo ama. Mɛ alu ebɛɛ̄ kɔ tɛ le ka a zuurabahtɔ̄ wa miɔŋɔ kiiloo pya nɛɛ a le doo wo, sa wa tɔgɛ kɛ̄ ba edap wa nwaɛ̄dɛɛ̄ loo doo. Pya tɛ le ka, bui ɛrɛ e baɛloo bui miɔŋɔ. *​—1 Pita 5:8.

13. Bu mɛ sīdee na tɛ le ka e tɔgɛnu wa miɔŋɔ ani?

13 Alu toh a le bee tɛ le ka lo e tɔgɛnu wa miɔŋɔ le kɛ̄ ba etɔɔ̄dum doo. Bu mɛ sīdee na o dap  tɔgɛnu pya o miɔŋɔ a? Pya o miɔŋɔ gbī kpɔā, mɛ, zuurabahtɔ̄ aa lu edoo bu bag le saŋ. (Jeremia 30:11) Nyɔɔwo, o a zuurabahtɔ̄ pya o miɔŋɔ sɔ̄ saŋ a le bu. Oo gbī kɔ pya o ue a le doodoo “uŋi gɛ̄ nɔ” sa wa yere muū loo. (Kam 12:18) Tɔgɛ pya o miɔŋɔ nu anua ba ɛrɛ e gbaɛ̄tɔ̄loo.​—Pya Ɛfɛsɔs 6:4; Pya Hibru 12:9-11; buū 30 Ue ale dumɛ.

NU BARI GBĪ AĀBA PYA MIƆŊƆ

14, 15. Ena anua gbomiɔŋɔ a gbaɛ̄tɔ̄loo wa tɛ le ka ani?

14 Jizɔs wee gbaɛ̄tɔ̄loo ye tɛ dɛ̄dɛɛ̄ sɔ̄, kere sɔ̄ a naa bee waɛ edoo wo. (Luk 22:42; Jɔn 8:28, 29) Jɛhova gbī nage kɔ pya miɔŋɔ a gbaɛ̄tɔ̄loo wa tɛ le ka.​—Pya Ɛfɛsɔs 6:1-3.

15 Gbomiɔŋɔ, kere a tɔɔ̄ i loo kɔ a aga lo e gbaɛ̄tɔ̄loo bui tɛ le ka, nyɛŋiabu kɔ sɔ̄ o wa gbaɛ̄tɔ̄loo ɛɛrɛ bu Jɛhova le o tɛ le ka. *​—Kam 1:8; 6:20; 23:22-25.

Ena e yerebah nɛ pya zege kɔ ba a yira agara nɛ Bari sɔ̄ alu edoā wa ɛp kɔ ba a doo nu a bee piya ani?

16. (a) Bu mɛ sīdee na Setan gbī edoā-ɛp pya zege kɔ ba a doo nu a bee piya ani? (b) Ena anua alu ebɛɛ̄ kɔ o yii gbo pya nɛɛ a wereloo Jɛhova a?

16 Pɔrɔ-edɔɔ̄ dap su pya o gbo ale pya dɔɔ̄na zege a doā-ɛp kɔ o doo nu a bee piya. A suā kɔ ezū ama dap aga lo e kiī. Bu edoba, Daina nwiī-nɛɛwa Jekob bee ɛrɛ pya gbo a naa wereloo Jɛhova. Lo ama bee su gbɛnɛ etɛɛrɛ ye nua nyɔɔ le pya ye butɔ. (Jɛnɛsis 34:1, 2) Lo pya o gbo naa wereloo Jɛhova, ba dap a doā-ɛp kɔ o doo nu Jɛhova baaloo, lo edap su gbɛnɛ ezialoo a nua loo, loo o butɔ le Bari. (Kam  17:21, 25) Nu anua alu ebɛɛ̄ kɔ o yii gbo pya nɛɛ a wereloo Jɛhova lo.​—1 Pya Kɔrint 15:33.

O BUTƆ DAP TƆƆ̄ BU ƐƐBU

17. Amunu toh na ziī ziī nɛɛ a le butɔ ɛrɛ a?

17 Sɔ̄ pya a le butɔ nyɔɔnɛ zuurabahtɔ̄ Bari, ba edoo nu a naale enua taāŋa le gbɛnɛkpo etɛɛrɛ. Nyɔɔwo, lo o lu dam, wereloo o wa sa ye aara bu fɛgɛ. Lo o lu wa, nɛ enwadɛɛ̄ o dam sa su loo ye sere kɛɛ̄, sa o nɔ edoba wa a lu ekɔ nu kumaloo bu kpa Kam 31:10-31. Lo o lu tɛ ale ka, tɔgɛ pya o miɔŋɔ kɔ ba a wereloo Bari. (Kam 22:6) Lo o lu tɛ, “aara o butɔ leere.” (1 Timɔti 3:4, 5; 5:8) E gbomiɔŋɔ, gbānaatɔ̄ bui tɛ le ka. (Pya Kɔlɔsi 3:20) Nyɛŋiabu kɔ ziī ziī nɛɛ a le butɔ dap tɛɛ̄ ekwɔ, nyɔɔwo kumaalookɛ̄ bara aaloo aāba ɛnia bui. Aiī, Baibol aara zuurabahtɔ̄ Jɛhova nɛ dɛ̄dɛɛ̄ nɛɛ a le butɔ.

^ bar. 12 O dap nɔ yereloo pya sīdee o dap baɛloo pya o miɔŋɔ bu 32 ekobee ue loo kpa akura Learn From the Great Teacher, alu e’ɛm tɛ̄mabah Pya Ekeebee Jɛhova.

^ bar. 15 Naa bɔloo kɔ nwiī a gbaɛ̄tɔ̄loo ye tɛ le ka lo ba gbī kɔ a doo nu a naa nia Bari.​—Doonu pya Nɛɛ-lɛɛratam 5:29.

Learn More

O BUTƆ DAP TƆƆ̄ BU ƐƐBU

Doo Nu Bari Kɔ Lokwa O Iya Dam Le Wa Le BU Ɛɛbu

Su baɛ ewɛpba ebip daānu dap a yerebah nɛ loe nyimɛ o iya dam le wa.

O BUTƆ DAP TƆƆ̄ BU ƐƐBU

Bui Butɔ A Gbaa Taaŋaba Jɛhova

Bu mɛ sīdee na o dap nyimɛ ekpeloo bu o taaŋaba butɔ ani?