Skip to content

Skip to secondary menu

Skip to table of contents

Jehovah’s Witnesses

Khana

Ture loo 10 ebip pya zege bip

 EBIP 7

Ena M Doo Lo Ba Zū Mɛ Kɔ M Yɔ Wa Makɛ̄ a?

Ena M Doo Lo Ba Zū Mɛ Kɔ M Yɔ Wa Makɛ̄ a?

NU ANUĀ ALU EBƐƐ̄

O biaɛfii akiiloo maniakɛ̄ e ɛrɛ gbɛnɛ pah a nyɔɔ li mmsī.

ENA O DOO ANI?

Naa kɛɛrɛ kɛ̄tɔɔ̄ ama: Aba baɛ enɔɔ̄ Heather emɔna Mike lo, mɛ a tɔɔ̄loo lo nwiīnɛɛwa doodoo bee ae bee suā loo Mike aādee. Ba yere ue mā ziī bu fon dɛ̄dɛɛ̄ sɔ̄, sa wee kɔ ue nɛ ziī bu gbɛnɛ-edo awa, e ba kuūnɛ muɛ̄ bu wa ekɔa sɔh! Mɛ nyawo, Mike gbī kɔ a eenyɔɔ kɔnia sɔh.

Bu baɛ enɔɔ̄ akii adumɛ, Mike le Heather aagi bah ziī sa kuɛ̄ nyɔnu loo ziī. Heather naa gbī kɔ a yee wo. Mɛ anaa gbīnage epeere Mike. Heather kɔ nɛ aba ɛɛ kɔ lɔgɔ nɛɛ sii kɔ m kpedɛɛ̄ sa lu keebee dookɛ̄ Mike kɔ doo. ‘Kaɛlɛɛ wo, Bu Mike le mm ɛɛ loo ziī . . . ’

Lo oe nyima tura iya dam ale ii wa, sa o le bu kɛ̄tɔɔ̄ Heather, ena o sikɛ̄ doo a?

YIRA KINA SA KƐƐRƐ!

Māniakɛ̄ lu dɔɔ̄nu Bari nɛ aba pya ba e iya ziī. Māloo nɛɛ o sii ii ale nɛɛ o sii iya lu ɛp lo dɔɔ̄nu tɛrɛ. A le doodoo su ekpedɛɛ̄ bɛloo nɛɛ a dɔɔ̄ nɛ nuā esaɛbɛ siŋa nu

Lo ale o gbee lok abɛɛ dɛmnu, doodoo lok a kɔ dɛ̄dɛɛ̄ nu o top kuma nyɔɔ e obia lu kɛ̄, o toora ɛrɛgeba nu a sira aabu. Kɛ̄ a lenage doolo lo o gbee lok tɔɔ̄dum a ɛɛ, doodoo lo a kɔ: “Aaloo kunāgā.” —1 Pya Tɛsalɔnaika 4:3.

Pya ena esira aabu lo ale o gbee lok ama ani? Kpa Baibol kɔ: ‘Ɛrɛgeba nɛɛ a kunāgā doo pɔrɔ ye ekpaloo.’ (1 Pya Kɔrint 6:18) Bu mɛ sīdee na lo ama lu kaka ani?

 Pya gbītɛ̄nu edoora kɔ i suā kɔ gbɛnɛ-edo pya zege ba yii bu dum kunāgā e ɛrɛ ziī ale gbɛnɛkpo taāŋa ama:.

  • EKIƐ̄NU. Gbɛnɛ-edo pya zege ba yii bu dum māniakɛ̄ sɔ̄ ba sii iya ziī kɔ a kiɛɛ̄ wa sɔ̄ ba esaa.

  • BA NAA DƐRƐ NA NYIƐ NYƆƆ ZIĪ. Sɔ̄ ba egbaa maniakɛ̄ sah, ziī ziī aba bɔātɛ̄ kɛɛrɛ kɔ: ‘Dɔɔ̄na mɛɛ̄ na alu ye gā a?’

  • LƆGARA ZIĪ. Bu nyiɛ wa, wee nia gbɛnɛkpo miɔ̄ŋɔ nɛɛwa e ɛrɛ nɛɛ e kpega wa, e a naale aba nɛɛ ewee wa yɔ mākɛ̄. E gbɛnɛkpo miɔ̄ŋɔ nɛɛdam naa wee ɛrɛna taɛ bu nwiīnɛɛwa ba ebee nyɔnɛ māniakɛ̄.

  • Nu i nɔ̄ aāloo: Lo o kunāgā, o ɛp aba ɔɔ kumakɛ̄ sa peere ziī nu a si gbɛnɛ du. (Pya Rom 1:24) O ekpaloo kuī gbɛnɛ kɔ o su daā nu anaa lee!

Tɔgɛ kɔ o ɛrɛ ekpo loe “aaloo kunāgā.” (1 Pya Tɛsalɔnaika 4:3) Elo o iya dam ale ii wa ziī dee a ee, o dap ye nyɔnɛ mākɛ̄. Sa o ɛrɛ kaāna ekpeloo aāloo, e oo le e’ɛrɛ ekiɛnu, ale doo taā m bee, le kɔ oo ɛrɛ kpega, lo awee sira loo pya a kunagā.—Kam 7:22, 23; 1 Pya Kɔrint 7:3.

 ENA O KƐƐRƐ A?

  • Ekɔ nɛɛ bu ye a ɛɛ loo kaāna edoo ge nu e bie a bu ekiɛnu sa anɛ taāŋa ni?

  • Ekɔ nɛɛ a a kuūdɛɛ̄ loo kaāna ezū ge a kɔ o gbee o gbanialoo kiikɛ̄ Bari le ni?—Pya Hibru 13:4.