Skip to content

Skip to secondary menu

Skip to table of contents

Jehovah’s Witnesses

Khana

Ture loo 10 ebip pya zege bip

 EBIP 10

Bu Mɛ Sīdee Na Baibol Edap Mɛ Yerebah Nɛ A?

Bu Mɛ Sīdee Na Baibol Edap Mɛ Yerebah Nɛ A?

NU ANUĀ ALU EBƐƐ̄

Kpa Baibol kɔ, “dɛ̄dɛɛ̄ nu abee lu e’ɛm bu kpa kaɛ tɛɛ̄ aabu ekɛɛrɛ Bari.” (2 Timɔti 3:16) Lo alu kaka doo wo, Baibol dap a tɔgɛ dee a bɔloo.

ENA O DOO ANI?

Naa kɛɛrɛ kɛ̄tɔɔ̄ ama: David gaa ɔp fah kɛ̄ anaa suā dee. Pya nu amuɛ̄ ba ɛm ya, le kɛ̄ kɛnɛkɛ̄ mɛā doo tɔgɛ kɔ a naale kɛ̄ a gaa bee kii na ama. David suā kɔ ae daga. Pio sɔ̄ adap lu kɔ a tɛɛ̄ dee a naale e bee tɛɛ̄.

Lo ale o bee le David, ena o bee doo ani?

YIRA KINA SA KƐƐRƐ!

O ɛrɛ pio nu edoo:

  1. Kɔ nɛ pya nɛɛ kɔ ba a tɔgɛ a dee.

  2. Ɛp kpa ale nu etɔgɛ a dee.

  3. Kiisī loe ɔp fah, sa kɛɛrɛ kɔ o dap e suā dee sɔ̄ e saa.

Bu kaka, lo eree taa Nu Esagɛ (C) aya naa lee kaāna.

Lo eree baɛ Nu Esagɛ (B) lee ee lo tua-tua. Lo a eega na bee, kpa ale nu a tɔgɛ dee e le a bah dɛ̄dɛɛ̄ sɔ̄ o le nyɔɔ kiā, sa a yerebah nɛ kɔ oa dag pe.

Kpa Baibol dap nage a yerebah nɛ bu aba sīdee ama!

Lo kpa gbɛnɛkpo nɛɛ ɛrɛ ama dap:

  • a baɛloo bu pya taāŋa ale bu dum

  • a yerebah nɛ kɔ o suā nɛɛ o lu, le loe lu kaāna nɛɛ

  • a tɔgɛ kɛ̄ e tɔɔ̄dum a lee eera doo

 TURE PYA GBƐNƐ EBIP BU DUM

Aā dee i bee bɔātɛ̄ kɔ ue, i wee bip-ebip.

  • Ena anuā bunyɔɔ lu blum-blum ani?

  • Ena alu edɛma zina ani?

Sɔ̄ ie saa, i bɔātɛ̄ ebip nu akiiloo nyɔuwe i tɔɔ̄ bu.

  • Ena anuā pɔrɔ pɔrɔ nu sira ani?

  • Ena anuā nɛɛ ua?

Elo aadoo wa ture e tɔɔ̄na bu kpa Baibol bu nyɔɔ nyɔɔ sɔ̄ a?

Gbɛnɛ-edo nɛɛ wee kɔ, esah loo le looge mma bu Kpa Baibol, kɔ a naa bɔloo ilii sɔ̄, ale bee a’aga gbɛnɛ lo e dā beeloo. Mɛ, ekɔ alege taɛ Kpa Baibol na anuā taāŋa a, sɛh nu pya nɛɛ kɛɛrɛ akiiloo Kpa Baibol ni? Dap ge lu kɔ elua edag wa ni?

Bu edoba, pya nɛɛ kɛɛrɛ kɔ Kpa Baibol kɔ, Bari na a gaa baɛbee nyɔuwe a. Mɛ etɛɛ̄ doodoo wa le doo wo ni? Pya nu a gaa sira bu nyɔuwe bee piya yee kɛ̄! Ezialoo le tɔga mma bu, dumɛloo le luh, kporo le gbeerasī nu. Etɛɛ̄ doodoo wa dɛ̄dɛɛ̄ nu ama aaba Bari a ɛrɛ wereloo ni?

Eniā ge a loe suā ye ture ni? Nu Kpa Baibol kɔ akiiloo nɛɛ a gaa baɛbee nyɔuwe dap alu nyɛŋia loo!

Naa daba o muɛ̄ kɔ zuurabahtɔ̄ ale bu nwīekpo kpa ama dɛɛa nyɔɔ nu Kpa Baibol kɔ. Pya Ekeebee Jɛhova yiga kɔ Baibol lu kaāna nu adap baɛloo nɛɛ. Nu anuā na bee a “tɛɛ̄ aabu ekɛɛrɛ Bari, sa ɛrɛ biī loe tɔgɛ̄nu, loe su pɔrɔ pya doo gbee wa kɔ sī, lo edoo kɔ ekɛɛrɛ nɛɛ a lera.” (2 Timɔti 3:16, 17) Ale anɛ loe nɔ̄ lo Kpa abee lu e’ɛm a kere ama. Mɛ, a lege gaa dɔbiī nɛ pya ilii dee ama!