Skip to content

Skip to secondary menu

Skip to table of contents

Jehovah’s Witnesses

Khana

Ture loo 10 ebip pya zege bip

 EBIP 6

Bu Mɛ Sīdee Na M Dap Kiī Ezū A Aaba Pya Na Gbo Ani?

Bu Mɛ Sīdee Na M Dap Kiī Ezū A Aaba Pya Na Gbo Ani?

NU ANUĀ ALU EBƐƐ̄

Sɔ̄ o biaɛfii nu nyɔɔ o loo, o ɛrɛ ba ekpo loo o tɔɔ̄dum, taā o lɛɛ baloo pya dɔɔ̄na a biaɛfii nu nɛ.

ENA O DOO ANI?

Naa kɛɛrɛ kɛ̄tɔɔ̄ ama: Aba sɔ̄ Brian muɛ̄ baɛ ye gbo tɔkpa a gaa kiā lu, bu ye bɔātɛ̄ edɔ. Bu kaɛ ama, baɛ sɔ̄ ba ebee ye zū kɔ a ɔ̄ sɔɔ̄ lo. Lo ama na eree taa sɔ̄ a.

Lo tua nwiīnɛɛdam kɔ:

“O lege etɔɔ̄ aba ɔɔ dɔɔ̄na sɔ̄ ni? Doo m tɔgɛ a ziī na gbo.”

A nɛ ye dɛɛ̄ sa su sɔɔ̄ a bee le bu ye bɛrɛ bɛtɛ̄ nɛ Brian sa kɔ “oo muɛ̄ na gbo ama.”.

Brian muɛ̄ lo sɔɔ̄ a ye le bah. Bu Brian bee sikɛ̄ agɛrɛba dɔ.

Brian kɔ, “piīnu, m e bee a kɔ nɛ kɔ mm wee . . . ”

Lo eree baɛ nwiīnɛɛdam kɔ sɔrɛ yɛɛ: “Bɔɔ aa a aa!”

Brian bee agɛrɛloo kɔ: “Bɔɔ naa aa mɛ!”.

Lo eree baɛ nwiīnɛɛdam dɛrɛ ye bah nyɔɔ gaŋana sa kɛɛrɛ loo kɔ “zuura ziī nwīkina.”.

Lo tua nwiīnɛɛdam a, su lo sɔɔ̄ warɛloo nyɔnu Brian sa yagara kɔ: “Ii lee kɔ nɛ lɔgɔ nɛɛ. Lɔgɔ nɛɛ naale esuā doo pip pip.”

Lo ale o bee le Brian, ena o bee doo ani?

 YIRA KINA SA KƐƐRƐ!

Ekɔ pya gbo Brian kɛɛrɛge nu ba gaa doo ni? Ba biaɛ ge fii nyɔɔ wa loo ni? Bee kɔ ba sii biaɛfii. Bu kaka, ba doo nu pya dɔɔ̄na wa zū yere bu. Ba bee gbī kɔ bu pya wa gbo a ɛɛ wa loo, nyɔwo ba bee wa lɛɛ baloo kɔ ba a tɔ̄ nu ba e doo wa nɛ.

Lo ale o bee kpesī dua kɛ̄tɔɔ̄ ama, ena o bee doo loe kiī ezū a aaba pya o gbo ani?

  1. KPƐNALOO

    Kpa Baibol kɔ: “Nɛɛ a ɛrɛ buābee muɛ̄ nu bɔɔ sa gɔ̄ ye loo, mɛ pya a naa ɛrɛ ekɛɛrɛ kiisī sa muɛ̄ pɔrɔ ye tɛ̄maloo.”—Kam 22:3.

    Gbɛnɛkpo sɔ̄, o dap bagara muɛ̄ taāŋa ale sī. Bu edoba, lo ale o muɛ̄ pya o gbo tɔkpa ba le ebini gaa ɔ̄ sɔɔ̄. Tɛ̄maloo e bagara kɛɛrɛ nu akiiloo lo taāŋa, o dap be eeba.

  2. KƐƐRƐ

    Kpa Baibol kɔ: “Sere bui ekɛɛrɛ benyiɛ leere.”—1 Pita 3:16.

    Bip oloo, ‘Etɔɔ̄ mɛ loo doodoo wa lo ale m nyɔnɛ pya na gbo doo nu ba gaa doo ni?’ Bu kaka, ye tua sɔ̄, o dap doo kɔ bu pya o gbo aa biira. Mɛ etɔɔ̄ a loo doodoo wa sɔ̄ sɔ̄ etɛna ni? O gbīge elɛɛ baloo edoo nu Bari kɔ, aba nyɔbee o gbī edoo nu pya o gbo tɔkpa kɔ ni?—A’aa 23:2.

  3. BIAƐFII

    Kpa Baibol kɔ: ‘Nɛɛ suānu wee nwaɛ̄dɛɛ̄.’—Kam 14:16.

    Nyawo ale mmsī li, i ɛrɛ e biaɛ nu fii sa kpesī ɛrɛgeba nu a sira aabu. Kpa Baibol kɔ nu akiiloo pya nɛɛ a le doodoo Josɛf, Job le Jizɔs lo ba bee doo le biaɛfii. A kɔnage nu akiiloo Ken, Isɔ le Judas, lo ba naa bee sagɛ nu leere. Ena o doo ani?

Kpa Baibol kɔ: ‘Lu nɛɛ a bɔloo eture nyiɛ loo’ (Le-yɔɔ 37:3) Lo ale oe kɛɛrɛ nu esira aabu sa biaɛfii, kɔ o biaɛfii siā dap waɛ kina—sa dɔbiī.

Oa nɛ taāŋa loo a—naa lu ebɛɛ̄ kɔ o dasī kɔ gbɛnɛ-edo ue nɛ pya o gbo. Lo o yira agara sa doo EEYE bu efɛɛloo, elee. Ale loe doo kɔ o yira agara a sira pie leere o dap kɔ:

  • “Būnaa mɛ lɛɛ yɛɛ!”

  • “Mm wee doo dua nu ama!”

  • “Bui suaā, mm lee dap doo a!”

Nu e yerebah na lo e’agara ue aba sɔ̄ le bu e’agaloo. Lo o doowo, elu a nyɛŋia loo kɛ̄ pya o gbo e nwaāba a obia aa dumɛ doo!

 KƐ̄ ETAMA SƆ̄ BA A KƐGƐ DOO

Lo o su bɔɔ daā nu pya o gbo a kɔ nɛ, o lu nɛɛ ezu ba gaa tāŋibah kuma sī le dumɛ

Elo ale pya o gbo kɛgɛ a? Elo ba kɔ, “Ena a sira a—o wee zuuga ni?” Suā dua nu egbɛa ama lu—taɛ pɔrɔ ezū a aaba pya o gbo. O doodoo wa ni? O ɛrɛ baɛ nu o dap doo.

  • O dap yira lo egbɛa sa kɔ. (“O kɔ leere, m zuuga!” Sa o kɔ nu anua bu ekpuruba.)

  • O dap obara lo ezū. Kɔ nu anua o amana, sa doo kɔ pya o gbo a dā beeloo. (“M bee kɛɛrɛ kɔ o nwaɛdɛɛ̄ gbɛnɛ loe ɔ̄ sɔɔ̄!”)

Lo ale pya o gbo kiisī loe gbɛ a, kiā aa! Nyɛŋia bu kɔ, kɛ̄ o wa tɔɔ̄ yɛɛ nyɔɔnyɔɔ sɔ̄ doo, kɛ̄ wa ezū e’aga gbɛnɛ doolo. Tɛ̄maloo e aa lo kɛ̄, o tɔgɛ kɔ oo yira kɔ pya dɔɔ̄na a nyaana nu o lu.

Bu kaka, oo lee dap teera aaloo taāŋa a aaba pya o gbo. Mɛ o dap biaɛfii nu o gbī edoo, kɔ nu o yira, sa doo dogo sue dɛɛ̄. Bu kpɛdumɛ, o biaɛ nu fii nɛ oloo!Joshua 24:15.