Skip to content

Skip to secondary menu

Skip to table of contents

Jehovah’s Witnesses

Khana

O Butɔ Dap Tɔɔ̄ Bu Ɛɛbu

 Ekpokɛ̄ 8

Sɔ̄ Pɔrɔ Sira Nu Sira

Sɔ̄ Pɔrɔ Sira Nu Sira

“Ɛɛŋaa eenyɔɔ, kere nwīgbagbara sɔ̄, bui gaa le ɛrɛ ekiɛnu loo keekee ɛma-ɛp.”—1 Pita 1:6

Kere o piiga kumakɛ̄ o dap doo loe doo kɔ o iya dam le wa ale o butɔ ale bu ɛɛbu, nu oo bee ɛmadɛɛ̄ dap sira loe doo kɔ a aga a bah kɔ o bia bu ɛɛbu. (Eklisiastis 9:11) Bari yerebah inɛ bu wereloo sɔ̄ i kpesī taaŋa. Lo o doo pya nu Kpa Kaɛ i gbī bah ae lu ekɔ ama, olo le o butɔ dap tāmā, kere bu pya kɛtɔɔ̄ a aga gbɛnɛ.

 1 DƐƐA NYƆƆ JƐHOVA

NU KPA BAIBOL KƆ: “Tobaa dɛ̄dɛɛ̄ bui ekɛɛrɛ ebɛɛ̄ ye tɛrɛ nyɔɔ, nyɔnɛbee alɛ e kuū-i-dɛɛ-loo.” (1 Pita 5:7, NW) Dɛ̄dɛɛ̄ sɔ̄ nyɛŋiabu kɔ oo lee begee ue Bari loo pya etɛɛrɛ aa sira loo. (Jemes 1:13) Kuma sɔ̄ o ye tɔɔ̄ waɛloo, ae yerebah anɛ bu sīdee alee eera. (Aisaia 41:10) “Egaraa bui benyiɛ ye kɛsī.”—Le-yɔɔ 62:8.

Lo o buū sa nɔ̄ o Kpa Baibol dɛ̄dɛɛ̄ dee o ɛrɛ egbɔ̄ nyiɛ. Nu ae sira aaloo, na bee o muɛ̄ kɛ̄ Jɛhova lu Nɛɛ a “agɛrɛ nyiɛ dɛ̄dɛɛ̄ ii bu ebɛa loo”, doo. (2 Pya Kɔrint 1:3, 4; Pya Rom 15:4) Ayira yii loe nɛ a “efɛɛloo Bari loa eenyɔɔ dɛ̄dɛɛ̄ suānu.”—Pya Filipai 4:6, 7, 13.

NU O DAP DOO:

  • Yere kara bara yerebah Jɛhova loe sue loo kɛ̄ sa kɛɛrɛ nu leere

  • Tɛɛ̄nyɔɔ dɛ̄dɛɛ̄ nu o kɛɛrɛ sa sagɛ loe lee aloo eera

2 KUŪDƐƐ̄ LOO OLOO LE PYA O BUTƆ

NU KPA BAIBOL KƆ: “Benyiɛ a ɛrɛ ekɛɛrɛ gbī suānu muɛ̄, e tɔ̄ pya suānu gbī nu esuā.” (Kam 18:15) Suā dɛ̄dɛɛ̄ nu anuā lo taaŋa. Gbītɛ̄ suā nu abɛɛ̄ dɛ̄dɛɛ̄ pya ale o butɔ. Nyɔnɛ wa kɔnia ue. Gbaɛ̄-wa-tɔ̄loo.—Kam 20:5.

Elo ale ziī o nɛɛ ua? Kɛɛ aa a bɔp lo o toh. Nyɛŋiabu kɔ kunɛ Jisus “bee to.” (Jɔn 11:35; Eklisiastis 3:4) Lunage gbɛnɛ loe seea sa daa leere. (Eklisiastis 4:6) Lo ama edoo kɔ awaɛ a bah etɔmā biigaloo kɛtɔɔ̄.

NU O DAP DOO:

  • Lɛɛ pɔrɔ sira nu gae sira, nyɔnɛ pya o tɔ kɔnia ue dɛ̄dɛɛ̄ sɔ̄. Sɔ̄ taaŋa sira, ba esue nyiɛ kɛ̄ akɔ ue nɛ

  • Nyɔnɛ pya ae bee le bu dua kɛtɔɔ̄ ama kɔnia ue

 3 ƐRƐ YEREBAH AA BƐƐ̄

NU KPA BAIBOL KƆ: “Gbo wereloo dɛ̄dɛɛ̄ sɔ̄, e wuga mɛā . . . sɔ̄ etɛɛrɛ.” (Kam 17:17) Pya o gbo gbī e yerebah anɛ, mɛ ba naa dap suā nu edoo. Oa lɔɛ ekɔ taɛ nu aa bɛɛ̄ wa nɛ. (Kam 12:25) Gbīnage yerebah a aaba Bari aāba pya a dā beeloo Baibol. Baɛloo ba edap anɛ aābu Kpa Baibol e yerebah anɛ.—Jemes 5:14.

O ɛrɛ yerebah aa bɛɛ̄ sɔ̄ o gbaaloo pya ba ɛrɛ yira bu Bari kaānā dɛ̄dɛɛ̄ sɔ̄, sa ba dɛrɛ nyiɛ nyɔɔ ye yii. O ɛrɛ nage gbɛnɛ egbɔ̄ nyiɛ sɔ̄ o yerebah nɛ pya dɔɔ̄na ba gbī agɛrɛloo. Nyɔnɛ wa kɔnia yira o ɛrɛ bu Jɛhova le pya ye yii. Kiisī loe pee sɔ̄ bu e yerebah nɛ pya dɔɔ̄na ba le bu ebɛɛ̄, e oa kpoora loo a lɛɛ loo pya aa wereloo sa a kuūdɛɛ̄ loo.—Kam 18:1; 1 Pya Kɔrint 15:58.

NU O DAP DOO:

  • Nyɔnɛ o gbo aa waɛloo kɔnia sa doolo aa yerebah nɛ

  • Kɔ taɛ taɛ pya nu aa bɛɛ̄ bu kaka sīdee