Skip to content

Skip to table of contents

Jehovah’s Witnesses

Select language Khana

 Ekpokɛ̄ 7

Sīdee O Dap Tɔgɛnu O Nwiī

Sīdee O Dap Tɔgɛnu O Nwiī

“Dɛ̄dɛɛ̄ pya lo ue mda anɛ bu lok anii’ee gaa le le abu benyiɛ, eo gaa le agɛrɛloo wa tɔgɛ pya o miɔŋɔ.”—Deuteronomi 6:6, 7

Sɔ̄ Jɛhova bee buātɛ̄ butɔ, abee su tɛ le ka sere bee pya wa miɔŋɔ. (Pya Kɔlɔsi 3:20) Alu toh aa le bee doodoo tɛ ale ka loe kpɔā o nwiī kɔ a wereloo Jɛhova sa lu kaānā nɛɛ sɔ̄ etura nɛɛ. (2 Timɔti 1:5; 3:15) O ɛrɛ nage e suā nu ale nyiɛ o nwiīnɛɛdam ale o nwiīnɛɛwa. Kɛadoo, oloo edoba lu nu a kuī gbɛnɛ. O para etɔgɛ Muɛ̄ Ue Jɛhova o nwiī lo ale olo yere ye bu oloo benyiɛ.—Le-yɔɔ 40:8.

 1 DOO KƆ A WAƐ BAH O MIƆŊƆ LOE KƆ UE ANƐ

NU KPA BAIBOL KƆ: “Nwaba dā nu naa nwabah kɔ ue.” (Jemes 1:19) Doo dogo bu sīdee edoo kɔ pya o miɔŋɔ a sue loo kɛ̄ akɔ ue nɛ. Ba ɛrɛ e suā kɔ o kpɛnaloo e gbaɛtɔ̄ sɔ̄ ba gbī ekɔ ue. Doolo nyiɛ wa sukɛ̄ lokwa awa waɛbah ekɔ nu awa le nyiɛ. (Jemes 3:18) Lo ba kɛɛrɛ kɔ o bɛ loo sa wa begee ue, ba naale esue nyiɛ kɛ̄ kaānā akɔ ue nɛ. Egerebu loo pya o miɔŋɔ, sa doo kɔ ba a suā dɛ̄dɛɛ̄ sɔ̄ kɔ o were-wa-loo.—Matiu 3:17; 1 Pya Kɔrint 8:1.

NU O DAP DOO:

  • Ɛrɛ sɔ̄ nɛ̄ pya o miɔŋɔ sɔ̄ ba gbī ekɔ ue anɛ

  • Nyɔnɛ pya o miɔŋɔ kɔnia sɔh dɛ̄dɛɛ̄ sɔ̄, ea naale aba sɔ̄ taaŋa sira

2 PIIGA LOE DĀ BEE LOO TAƐ NU AWA LE NYIƐ

NU KPA BAIBOL KƆ: “Nɛɛ asu buābee daa nu gaa le kiisī leere.” (Kam 16:20, NW) Pio sɔ̄ piiga loe dā beeloo nu anua ba kɔ nu ba kɔa. Gbɛnɛkpo sɔ̄ pya zege wee kɔ ue yɛgɛ ale kɔ yee kɛ̄. “Lo ale ziī nɛɛ ture ebip sɔ̄ asii dā, lu ezu le kɛɛ ye nɛ.” (Kam 18:13) Oa nwaāba ɛrɛ saŋ.—Kam 19:11.

NU O DAP DOO:

  • Biaɛfii kɔ oo lee nwaāba kɔ ue sɔrɛ yɛɛ ale doo dogo yee kɛ̄, kaɛlɛɛ nu pya o miɔŋɔ kɔ

  • Piiga loe nyɛŋiabu kɛ̄ nu bee a tɔɔ̄loo doo sɔ̄ o bee le nwiī le nu abee a kuī loo “kpɔā nwiī bu dee a ɛrɛ ekii”

 3 GBAARAA LOO

NU KPA BAIBOL KƆ: “Dā, na nwiīnɛɛdam zuurabahtɔ̄ o tɛ, e oa kii tɔgɛnu o ka.” (Kam 1:8) Jɛhova nɛ ekpo tɛ le ka bee pya wa miɔŋɔ. O ɛrɛ etɔgɛ pya o miɔŋɔ kɔ ba a nwa-adɛɛ̄ sa a gbaɛtɔ̄loo. (Pya Ɛfɛsɔs 6:1-3) Pya miɔŋɔ dap suā sɔ̄ wa tɛ le wa ka naa ɛrɛ aba “ekɛɛrɛ.” (1 Pya Kɔrint 1:10) Lo ale bui sii kuūnɛ muɛ̄, bui aa doo kɔ bui miɔŋɔ asuā, nyɔnɛbee edoo kɔ ba aa i nwadɛɛ̄.

NU O DAP DOO:

  • Kɔniaā sa kuūnɛ muɛ̄ nyɔɔ kɛ̄ bui kamɛnɛ bui miɔŋɔ doo

  • Lo ale o dam ale wa ɛrɛ kee ekɛɛrɛ nyɔɔ kɛ̄ e kpɔā bui miɔŋɔ doo, piiga loe ɛp nu alu ekɛɛrɛ o dam ale o wa

 4 NƆƆ̄ KƐ̄ E KPƆĀ YE DOO

NU KPA BAIBOL KƆ: “Tɔgɛ nwiī bu dee a ɛrɛ ekii.” (Kam 22:6) Tɔgɛnu pya o miɔŋɔ leere naale edooa bu bugia. O ɛrɛ enɔɔ̄ kɛ̄ o kpɔā pya o miɔŋɔ doo, gbaā nage loo kɛ̄ o kamɛnɛ wa doo. (Le-yɔɔ 127:4; Kam 29:17) Kakamɛnɛ naa aadee kura su kpɔte wa nua loo, mɛ nu ale bu na yerebah nɛ pya o miɔŋɔ loe dā beeloo nu anua alu enɛ lok. (Kam 28:7) Tɔgɛ nage wa kɔ, ba a wereloo Muɛ̄ Ue Jɛhova sa dabee loo pya nu a gbī. (Le-yɔɔ 1:2) Lo ama e yerebah wa nɛ loe ɛrɛ kaānā ekɛɛrɛ benyiɛ.—Hibru 5:14.

NU O DAP DOO:

  • Muɛ̄ suā kɔ pya o miɔŋɔ ɛmadɛɛ̄ Bari nua taɛ taɛ nɛɛ lo ba dap dɛrɛ nyiɛ nyɔɔ

  • Yerebah wa nɛ loe suā sa kpoora loo lɛɛ loo pya kɛtɔɔ̄ adap wa nua taaŋa loo bu dogo, doodoo lo alu egbī muɛ̄ bu intanɛt. Tɔgɛ̄ wa kɛ̄ ba a kpoora loo lɛɛ loo pya adap wa zū yere bu dogo kunagā doo

““Tɔgɛ nwiī bu dee a ɛrɛ ekii””