Skip to content

Skip to secondary menu

Skip to table of contents

Jehovah’s Witnesses

Khana

O Butɔ Dap Tɔɔ̄ Bu Ɛɛbu

 Ekpokɛ̄ 6

Kɛ̄ Pya Miɔŋɔ Nyaānā Iya Dam Le wa Doo

Kɛ̄ Pya Miɔŋɔ Nyaānā Iya Dam Le wa Doo

“Miɔŋɔ . . . lu epoo a aaba Jɛhova.”—Le-yɔɔ 127:3

Sɔ̄ nwiī mɛā, wee nua ɛɛŋa le toh loo dam le wa. Sɔ̄ bui ɛrɛ aā nwiī, edap alu nyɛŋia loo loe gbī muɛ̄ kɔ gbɛnɛkpo o sɔ̄ le o ekpo elu esu kuā-dɛɛ̄ loo o nwiī. Kaɛ daa le nyaā ekɛɛrɛ dap nɛ taaŋa bui gbaaloo. Olo le o dam ale o wa e gbaa nɔɔ̄nu nyaānā loe kuūdɛɛ̄ loo bui nwiī le loe doo kɔ bui iya le wa a kiisī. Bu mɛ sīdee na zuurabahtɔ̄ Baibol e yerebah anɛ loe aaba loo pya taaŋa ama ani?

 1 DĀ BEE LOO KƐ̄ NWIĪ DAP NYAĀNĀ BUI TƆƆ̄DUM DOO

NU KPA BAIBOL KƆ: “Wereloo ɛrɛ nyɔɔ̄nyɔɔ̄ egerebu sa lu fɛgɛ.” Gbaāloo wo, “wereloo naa gbī nu loo aba ɛɛ, naa nwaāba ɛrɛ saŋ.” (1 Pya Kɔrint 13:4, 5) Doodoo ka a maɛ̄ nwiī aā, o ekɛɛrɛ e aadee bia nyɔɔ o nwiī. Kerewo, o dam dap buātɛ̄ e kɛɛrɛ kɔ o ɛp ye tɛrɛ. Nyɔwo, oa ibere kɔ alu nage ebɛɛ̄ kɔ o kuū dɛɛ̄ loo o dam. Tɛmaloo egerebu le fɛgɛ, o dap ye yerebah nɛ kɔ a suā kɔ o gbīe ye. Ae nia ye loe kuūdɛɛ̄ loo nwiī.

“Pya dam . . . yɔaa bui wa tɔɔ̄ bu suānu.” (1 Pita 3:7) Dā beeloo kɔ o wa epee gbɛnɛkpo ye ekpo nyɔɔ o nwiī. Ae ɛrɛ pio aā tam. Ea dap ye piag, ye ɔɛ loo, ale edoo kɔ nyiɛ ye aa sukɛ̄. Pio sɔ̄ adap a ɛrɛ saŋ nɛ, mɛ piiga loe ziire loo, nyɔnɛbee “nee anaa nwaāba ɛrɛ saŋ lee ee nɛɛ a ɛrɛ ekpo.” (Kam 16:32) Su buābee daānu, sa ye yere kpotɛ̄ dookɛ̄ alu ebɛɛ̄ doo.—Kam 14:29.

NU O DAP DOO:

  • Pya tɛ: Yerebah nɛ̄ o wa loe kuūdɛɛ̄ loo nwiī kere uunɛ̄ li. Fii sɔ̄ lɛɛ loo pya dɔɔ̄na nu lokwa o dap pee gbɛnɛkpo sɔ̄ kpaɛ̄ o wa le o nwiī

  • Pya ka: Sɔ̄ o dam gbī e yerebah anɛ̄ loe kuūdɛɛ̄ loo nwiī, su ye yerebah. Lo anaa para kaānā, oa ye gbɛ, mɛ bu fɛgɛ, tɔgɛ ye kɛ̄ e doo doo

 2 DOORAA KƆ BUI WERELOO LOO ZIĪ A AGATƐ̄

NU KPA BAIBOL KƆ: “Ba elu aba etɛɛ̄nɛ̄ namloo.” (Jɛnɛsis 2:24) Kere adoo ziī aā nɛɛ eyira bu bui butɔ, nyɛŋiabu kɔ olo le o dam ale o wa lege elu “aba etɛɛ̄nɛ̄ namloo.” Piiga kaānā lo edoo kɔ bui wereloo loo ziī a agatɛ̄.

Wa, ɛrɛ nia loo yerebah le yere kpotɛ̄ a aaba o dam. Kɛ̄ o tɔgɛ nia doo dap nua “bobo.” (Kam 12:18) Dam, kɔ nɛ o wa kɛ̄ o ye wereloo sa a si gbɛnɛ du a loo doo. Leera ye nyɔɔ kɛ̄ a kuūdɛɛ̄ loo butɔ̄ doo.—Kam 31:10, 28.

“Doolo lɔgɔ nɛɛ naa gbī alɛɛ nu, mɛ nu elee nɛ nɛɛ yɛrɛ le.” (1 Pya Kɔrint 10:24) Dɛ̄dɛɛ̄ sɔ̄, wee doo nu elee loo o dam ale o wa eera. Baɛ bui dam le wa, a gbaa kɔnia ue, kaɛgɛa ziī, sa gbaɛtɔ̄loo ziī. Oa gbī o lee loo bu gbaa maniakɛ̄. Doo kɛ̄ alu ebɛɛ̄ o dam ale o wa doo. Kpa Baibol kɔ: ‘Bui a aaloo enɛ ziī, kɛɛrɛ kɔ bui gbaa yira.’ (1 Pya Kɔrint 7:3-5) Nyɔwo, baɛ bui gbaaraa kɔnia ue taɛ kɛ̄ ai tɔɔloo doo. Lo o egerebu sa ye dā bee loo e agɛrɛtɛ̄ bui wereloo.

NU O DAP DOO:

  • Oa ibere esere sɔ̄ aba baɛ bui etɔniā

  • Doo pio nwī gbagbara nu edoo kɔ o dam ale o wa a suā kɔ o were-ye-loo, doodoo kue ye lele bee ale dɔɔ̄ nu ye nɛ

 3 KPƆĀĀ BUI NWIĪ

NU KPA BAIBOL KƆ: “Aa dee o bee le nwīgbomiɔŋɔ o bee suā nu ale bu kpa kaɛ, lo ae doo kɔ o ɛrɛ suānu mmɛ loo kpɔā.” (2 Timɔti 3:15) Nɔɔ̄ nu o doo loe tɔgɛnu o nwiī. Kere sɔ̄ asii bee mɛā, a bee para enɔ̄ nu bu nyɛŋia sīdee. Kere sɔ̄ abee le bu ka, o nwiī dap suā loo o muɛ̄, sa sua sɔ̄ bu a ɛɛ le sɔ̄ bu a biira. Buū nu ye nɛ sɔ̄ alege nwīgbagbara nwiī. Kere adoo anaale e dā beeloo nu o gaa buū, e yerebah ye nɛ kɔ ania ye e buū nu sɔ̄ ae lua gbɛnɛ.

O nwiī naa tera gbɛnɛ loe gbaɛtɔ̄ sɔ̄ o gaa yere kara nɛ Bari. Doo kɔ adā sɔ̄ o gaa yere kara nɛ Jɛhova. (Deuteronomi 11:19) Kere sɔ̄ bui gaa bira bii, kɔ nu akiiloo pya nu Bari dɛm ye nɛ. (Le-yɔɔ 78:3, 4) Kuma sɔ̄ o nwiī gaa nyim, a gaa le muɛ̄ wereloo o ɛrɛ loo Jɛhova sa a nɔ̄ e were-ye-loo nage.

NU O DAP DOO:

  • Aadee yere kara bara suānu loe kpɔā o nwiī

  • Tɛɛ̄nyɔɔ pya nu akiiloo Bari nɛ o nwiī lokwa a buātɛ̄ enɔ̄ wa