Skip to content

Skip to secondary menu

Skip to table of contents

Jehovah’s Witnesses

Khana

O Butɔ Dap Tɔɔ̄ Bu Ɛɛbu

 Ekpokɛ̄ 1

Doo Nu Bari Kɔ Lokwa O Iya Dam Le Wa Le Bu Ɛɛbu

Doo Nu Bari Kɔ Lokwa O Iya Dam Le Wa Le Bu Ɛɛbu

“Nɛɛ abee wa dɛm aā buātɛ̄ bee wa dɛm nɛɛdam le nɛɛwa.”—Matiu 19:4

Jɛhova * Bari na abee doo lo tuatua iya dam le wa a. Kpa Baibol kɔ inɛ kɔ a bee dɛm lo tuatua nɛɛwa sa “ye su nɛ” nɛɛdam a. Bu Adam bee ɛɛ gbɛnɛ mmɛ lo dɔ akɔ: “Ɛhɛɛ, alɛ ama na ekpo a aaloo na ekpo le namloo a aaloo na namloo a.” (Jɛnɛsis 2:22, 23) Jɛhova lege gaa gbī kɔ pya dam le wa a tɔɔ̄ bu ɛɛbu.

Sɔ̄ bui iya ziī, o dap kɛɛrɛ kɔ dɛ̄dɛɛ̄ nu ekiā leere. Kerewo, bu kaka, kere dam ale wa ba wereloo ziī kaānā e ɛrɛ nage pio taaŋa. (1 Pya Kɔrint 7: 28) Bu nwīekpo kpa ama, o muɛ̄ pya nu kpa Baibol i gbī aāba, adap doo kɔ o iya dam le wa le o tɔɔ̄dum butɔ ale bu ɛɛbu lo ale bui yere bu dogo.—Le-yɔɔ 19: 8-11.

 1 DOO NU JƐHOVA A GBĪ BAH

NU KPA BAIBOL KƆ: Dam na ekobee loo butɔ a.—Pya Ɛfɛsɔs 5:23.

Lo ale o lu dam Jɛhova gbī a aāba kɔ o kuūdɛɛ̄ loo o wa bu fɛgɛ. (1 Pita 3:7) A bee dɛm o wa nua nɛɛ e mmɛnɛ a, ea gbī kɔ o aara ye bu ka le wereloo. (Jɛnɛsis 2:18) O ɛrɛ e wereloo o wa kaānā mmɛ lo dɔ kɛ̄ o su ye leeloo emanyɔɔ lo olo.—Pya Ɛfɛsɔs 5:25-29.

Lo ale o lu wa, Jɛhova gbī a aāba kɔ o ɛrɛ togatɛ̄ enwadɛɛ̄ loo o dam sa ye yerebah nɛ loe doo mmɛnɛ nu Jɛhova ye gbī bah. (1 Pya Kɔrint 11:3; Pya Ɛfɛsɔs 5:33) Yere kpotɛ̄ pya nu a biaɛfii sa ye gba bee bah aābu dɛ̄dɛɛ̄ o benyiɛ. (Pya Kɔlɔsi 3:18) Sɔ̄ o doowo, o lee kɛ̄dɛɛ̄ o dam le Jɛhova.—1 Pita 3:1-6.

NU O DAP DOO:

  • Bip o dam ale o wa nu o doo lo elu kaānā dam ale wa. Gbaɛ-ye-tɔloo kaānā, sa o doo nu o dap doo lokwa alee

  • Egerebu. Ae su sɔ̄ lɛɛ baɛ bui gaa suā loo ziī, loe ɛɛrɛ bu ziī

2 DASĪ ƐP KAĀNĀ KƐ̄ A TƆƆ̄LOO O DAM ALE O WA DOO

NU KPA BAIBOL KƆ: Lu ebɛɛ̄ kɔ o ɛp nu ania o dam ale o wa. (Pya Filipai 2:3, 4) Aara o dam ale o wa doodoo nu asi gbɛnɛ du sa nyɛŋiabu, kɔ Jɛhova gbī kɔ pya ye zooro a “ɛrɛ efɛɛloo kumaloo dɛ̄dɛɛ̄ nɛɛ.” (2 Timɔti 2:24) “Dɛ̄dɛɛ̄ ue anaa ɛrɛ ekɛɛrɛ le doodoo gɛ̄nɔ̄ a mm nɛɛ, mɛ edɛm a ɛrɛ suānu nua bobo.” Nyɔwo, dasī kɛɛrɛ kaāna nu o kɔ. (Kam 12:18, NW) Edɔɔ̄ Jɛhova e yerebah anɛ kɔ o kɔ ue bu fɛgɛ le wereloo.—Pya Galatia 5:22, 23; Pya Kɔlɔsi 4:6.

NU O DAP DOO:

  • Yere kara nɛ Bari kɔ anɛ a efɛɛ benyiɛ e lɛɛ o gae nyɔnɛ ye kɔnia ue alu gbɛnɛ, kuma nyiɛ a kɛ̄

  • Kɛɛrɛ nu o kɔ kaānā le kɛ̄ o kɔ doo

 3 GBAARAA ƐRƐ ABA EKƐƐRƐ

NU KPA BAIBOL KƆ: Sɔ̄ bui e’iya ziī, bui lu “aba namloo.” (Matiu 19:5) Mɛ, bui lege baɛ kee nɛɛ sa dap ɛrɛ keekee ekɛɛrɛ. Nyɔwo, a bɔloo kɔ bui nɔ̄ loe gbaa ɛrɛ aba bura le kɛ̄ nu i tɔɔ̄loo doo. (Pya Filipai 2:2) Lu ebɛɛ̄ kɔ bui gbaaloo sɔ̄ bui gaa biaɛ-nu-fii. Kpa Baibol kɔ: “Tɛmaloo bira bira, nu alu enɔɔ̄ ekiā leere.” (Kam 20:18, NW) Doraa kɔ nu Kpa Baibol kɔ a baɛ-i-loo sɔ̄ bui gaa gbaa doo pya biaɛfii akuī.—Kam 8:32, 33.

NU O DAP DOO:

  • Kɔ kɛ aa tɔɔ̄loo doo nɛ o dam ale o wa, naale aba ekɔ o ekɛɛrɛ ale kɔ ue tɛrɛ kɛ̄

  • Dasī nyɔnɛ o dam ale o wa bira loo lɛɛ o gae yere bee bu ziī nu

^ bar. 4 Jɛhova na bee Bari a, dookɛ̄ Kpa Baibol kɔsiā doo.