Skip to content

Skip to secondary menu

Skip to table of contents

Jehovah’s Witnesses

Khana

O Butɔ Dap Tɔɔ̄ Bu Ɛɛbu

 Ekpokɛ̄ 9

Bui Butɔ A Gbaa Taaŋaba Jɛhova

Bui Butɔ A Gbaa Taaŋaba Jɛhova

“Uuraa bee kɛ̄ nɛ Nɛɛ abee doo bunyɔɔ le kɛnɛkɛ̄.”—Mumuuna 14:7

Dookɛ oe nɔā doo abu nwīekpo kpa ama Kpa Baibol ɛrɛ gbɛnɛ-edo nu aa gbī bah loe yerebah anɛ̄ le o butɔ. Jɛhova gbī kɔ o le bu ɛɛbu. A yira yii kɔ lo o su ye taaŋaba nua tuatua, “dɛdɛɛ̄ pya lo nu ama elu edɛrɛ nyɔɔ inɛ.” (Matiu 6:33) Bu kaka, a gbī kɔ o lue ye gbo. Doo dɛ̄dɛɛ̄ nu o dap doo loe yii gbo Bari. Lo ama lu dee a kuī eera ai kpaānɛ̄.—Matiu 22:37, 38.

 1 AGƐRƐTƐ̄ O GBANIALOO KIIKƐ̄ JƐHOVA LE

NU KPA BAIBOL KƆ: “‘Mda elu Tɛ inɛ, e bɔɔlo elu pya na miɔŋɔ nɛɛdam le miɔŋɔ nɛɛwa,’ kɛ̄ Nɛɛ-ai-ɛrɛ [Jɛhova] . . . kɔ doolo.” (2 Pya Kɔrint 6:18) Bari gbī kɔ o lue ye gbo aye tɔɔ̄ waɛloo. Ziī sīdee o doowo, na tɛmaloo yere kara. Jɛhova gbī kɔ o yere kara “dɛ̄dɛɛ̄ sɔ̄.” (1 Pya Tɛsalɔnaika 5:17, NW) A taɛ ye loe dā ekɛɛrɛ o ɛrɛ bu a, le kɛ̄ nu a tɔɔ̄loo doo. (Pya Filipai 4:6) Sɔ̄ o nyɔnɛ pya o butɔ yere kara, ba e muɛ̄ kɛ̄ Bari lu Nɛɛ ale dum aloo doo.

Kaɛlɛɛ kɔ ue nɛ Bari, alu ebɛɛ̄ kɔ o gbaɛ̄-ye-tɔ̄-loo. O dap doolo ama tɛmaloo nɔ̄ ye Muɛ̄ Ue le pya kpa a baatɛ̄ Baibol. (Le-yɔɔ 1:1, 2) Ɛrɛ ekɛɛrɛ nyɔɔ nu o nɔ̄. (Le-yɔɔ 77:11, 12) Gbaɛ̄tɔ̄loo Bari gbī nage a aāba kɔ o si enɔānu Pya NɛɛKraist dɛ̄dɛɛ̄ sɔ̄.—Le-yɔɔ 122:1-4.

Kɔ nu akiiloo Jɛhova nɛ pya dɔɔ̄na lunage dɔɔ̄na gbɛnɛ sīdee loe agɛrɛtɛ̄ o gbanialoo ye loo. Kuma kɛ̄ o kiisī loe doolo ama doo, kɛ̄ o agɛrɛba ye tɔɔ̄ waɛloo doolo.—Matiu 28:19, 20.

NU O DAP DOO:

  • Sere sɔ̄ dɛ̄dɛɛ̄ dee loe buū Kpa Baibol sa yere kara

  • Doodoo butɔ, suaa bui taaŋaba emanyɔɔ ɛrɛ ekpeloo le seseea

2 ƐRƐ EKPELOO BU O TAAŊABA BUTƆ

NU KPA BAIBOL KƆ: “Suaa bui loo nua loo Bari, e alɛ etɔɔ̄ i waɛloo.” (Jemes 4:8) Bɔloo kɔ bui nɔɔ̄ kɛ̄ bui ɛrɛ taaŋaba butɔ doo sa bui nyɔnɛ dɛ̄dɛɛ̄ sɔ̄. (Jɛnɛsis 18:19) Mɛ pya dɔɔ̄na nu lege. O ɛrɛ etɔgɛ kɔ o wereloo Bari aabu o benyiɛ dɛ̄dɛɛ̄ dee. Agɛrɛtɛ̄ gbanialoo o butɔ ɛrɛ loo Bari tɛmaloo ekɔ nu aye kiiloo “sɔ̄ o le ɛŋɛtɛ̄ bu o tɔ, le sɔ̄ o kiā nyɔɔ dee, le sɔ̄ o mākɛ̄ le sɔ̄ o aakɛ̄.” (Deuteronomi 6:6, 7) Su seea sī a loe bee Joshua, lo abee kɔ: “Mɛ mda m daa loo le na tɔ, i gaa le sitam nɛ Jɛhova.”—Joshua 24:15.

NU O DAP DOO:

  • Ɛrɛ nɔɔ̄nu kpɔā ziī ziī nɛɛ ale o butɔ lo elu edoo dɛ̄dɛɛ̄ sɔ̄

Learn More

BA MƐƐ̄ NA BA GAA DOO NU JƐHOVA GBĪ ANII’EE ANI?

Ena Taāŋaba Butɔ Ani?

Gbītɛ̄ kɛ̄ lo nɔɔ̄nu ama edap a yerebah nɛ̄ doo loe tɔɔ̄ waɛloo Bari sa yere mɛm loo gbaaloo bu o tɔ.