Wulu kɔ nuhua edwɛkɛ ne azo

Wulu kɔ nuninyɛne ne azo

 Foa 6

Ngakula Maa Nzenzaleɛ Ba Agyalɛ Nu

Ngakula Maa Nzenzaleɛ Ba Agyalɛ Nu

“Mralɛ mrenya le agyadeɛ mɔɔ vi [Gyihova] ɛkɛ a.”Edwɛndolɛ 127:3

Saa agyalɛma wo a bɛ nye die noko ɔ nee ye ngyegyelɛ lua. Kɛmɔ bɛnlɛ anwubielɛ la ati, bie a bɛbanwu kɛ kakula ne ɛlɛdie bɛ mekɛ nee bɛ anwosesebɛ amuala. Nafelɛ mɔɔ bɛbasolo nee nzenzaleɛ gyɛne mɔɔ bara la kola ka bɛ agyalɛ ne. Ɔbahyia kɛ ɛ nee wɔ bokavolɛ ne yɛ nzenzaleɛ bie mɔ amaa bɛanlea kakula ne na bɛabɔ bɛ agyalɛ ne anwo bane. Kɛzi Baebolo nu folɛdulɛ baboa wɔ yeamaa wɔali ɛhye anwo gyima ɛ?

 1 TE KƐZI AWOLƐ KOLA KAKYI NINYƐNE LA ABO

MƆƆ BAEBOLO NE KA LA: “Ɛhulolɛ lɛ abotane, ɔ ti akunlu le kɛnlɛma.” Bieko, ɛhulolɛ ɛnle “angomedi, ɔnva ɛya.” (1 Kɔlentema 13:4, 5) Kɛmɔ bɔ zo mɔɔ wɔwo bie la ati, wɔannea a ɛbava wɔ mekɛ kɔsɔɔti wɔamaa ɛ ra ne. Noko, ɛ hu bade nganeɛ kɛ ɔ nwo ɛngyia wɔ, yemɔti kakye kɛ ɔhyia ɛ nwo. Si abotane, fi atiakunlukɛnlɛma nu boa ye maa ɔnwu kɛ ɔ nwo hyia wɔ na bɛbɔ nu bɛnlea kakula ne.

“Mrenya . . . saa bɛ nee bɛ ye mɔ de a ɔwɔ kɛ bɛnwu ye kɛ bɛle mraalɛ na bɛnlɛ anwosesebɛ.” (1 Pita 3:7) Te ɔ bo kɛ ɛ ye bava ye mekɛ dɔɔnwo nee ye anwosesebɛ yeanlea ɛ ra ne. Yenyia gyima fofolɛ na ɛhye bamaa yeavɛ na bɔbɔ yeaye adwenleadwenle yeado ɔ nwo. Ɔdwu mekɛ ne bie a, ɔbava ɛ nwo ɛya. Anrɛɛ si abotane ɔluakɛ “sonla mɔɔ ɛnva ɛya mgbane mgbane la le kpalɛ tɛla katakyie.” (Mrɛlɛbulɛ 16:32) Da nwunu ali na boa ye.Mrɛlɛbulɛ 14:29.

DUZU A ƐBAHOLA WƆAYƐ A?:

  • Selɛma: Boa ɛ ye maa ɔnlea kakula ne bɔbɔ wɔ nɔɔzo. Te mekɛ mɔɔ ɛfa ɛyɛ ninyɛne gyɛne la azo amaa wɔanyia mekɛ wɔamaa ɛ ra ne nee ɛ ye

  • Ninlima: Saa ɛ hu kpondɛ kɛ ɔboa wɔ wɔ kakula ne ɛnleanlɛ nu a, maa ye adenle. Saa yeannwu debie bie yɛ a, mmatea ye, emomu si abotane kile ye

 2 MIEMIA WƆ AGYALƐ NU

MƆƆ BAEBOLO NE KA LA: “Bɛyɛ nwonane ko.” (Mɔlebɛbo 2:24) Ɔwɔ nu kɛ awie fofolɛ ɛra abusua ne anu ɛdeɛ, noko kakye kɛ ɛ nee wɔ bokavolɛ ne tɛde “nwonane ko.” Bɔ mɔdenle kɛ ɛbamaa ɛlɔlɛ adɛnla wɔ agyalɛ ne anu.

Yelɛma, bɛhile ninyɛne mɔɔ bɛ hu mɔ yɛ boa bɛ la anwo anyezɔlɛ. Saa ɛkanvo ɛ hu a ɔbayɛ ye “ayile” yeamaa yeahola yeagyinla nzenzaleɛ ne anloa. (Mrɛlɛbulɛ 12:18) Kunlima, bɛha bɛhile bɛ ye mɔ kɛ bɛkulo bɛ na bɛsonle bolɛ bɛmaa bɛ. Kanvo ɛ ye wɔ gyima mɔɔ ɔyɛ ɔnea abusua ne la anwo.Mrɛlɛbulɛ 31:10, 28.

“Awie biala mmadwenle ɔ ngome ye boɛyɛlɛ nwo.Bɛdwenle bɛ gɔnwo mɔ ɛdeɛ nwo.” (1 Kɔlentema 10:24) Dahuu yɛ ninyɛne mɔɔ baboa wɔ bokavolɛ ne la. Kɛ agyalɛma la, bɛbɔ nu bɛli adwelie, bɛhanvo bɛ nwo, na bɛdie bɛ bokavolɛ ne. Wɔ nla nu, mmayɛ angomedi. Dwenle wɔ bokavolɛ ne anwo. Baebolo ne ka kɛ: “Bɛmmabɔ bɛ nwo abolɛ, kyesɛ bɛ mu nwiɔ bɛdumua bɛkponle zolɛ.” (1 Kɔlentema 7:3-5) Yemɔti bɛ mu nwiɔ bɛha nwolɛ edwɛkɛ kpalɛ. Saa ɛsi abotane na ɛnyia ndelebɛbo a ɔbamaa wɔ agyalɛ ne anu amia.

DUZU A ƐBAHOLA WƆAYƐ A?:

  • Nyia mekɛ maa wɔ bokavolɛ ne

  • Yɛ ninyɛne ngyikyi mɔɔ maa ɔnwu kɛ ɛkulo ye la. Kɛ neazo la, ɛbahola wɔavɛlɛ ye wɔ fonu zo anzɛɛ wɔahyɛ ye debie

 3 Ɛ RA NE ƐTETELƐ

MƆƆ BAEBOLO NE KA LA: “Sumunli wɔ ngakula nu yɛɛ ɛzukoale Nyamenle Edwɛkɛ ne mɔɔ maa wɔ nrɛlɛbɛ mɔɔ . . . ɔkola ɔmaa wɔ ngoanelielɛ la.” (2 Temɔte 3:15) Suzu kɛzi ɛbatete ɛ ra ne la anwo. Kolaa na bɛawo ye la ɛnee ɔkola ɔsukoa debie. Mekɛ mɔɔ ɔla ɛkolɛ ne anu la, ɛnee ɔte ɛ ne na ɔnwu kɛzi ɛte nganeɛ la. Kenga kile ye wɔ ye adɔma nu. Bie a ɔnrɛde mɔɔ ɛlɛkenga la abo, noko saa ɔnyi a ɔbamaa ɔ nye alie ɛgengalɛ nwo.

Ɛbahola wɔaha Nyamenle anwo edwɛkɛ wɔahile ye. Maa ɔde kɛ ɛ nee Gyihova ɛlɛtendɛ wɔ asɔneyɛlɛ nu. (Mɛla ne 11:19) Saa ɛ nee ye ɛlɛdi nwɔhoa a, anrɛɛ ka ninyɛne mɔɔ Nyamenle ɛyɛ la kile ye. (Edwɛndolɛ 78:3, 4) Mekɛ mɔɔ ɛ ra ne ɛlɛnyi la ɔbanwu ye kɛ ɛkulo Gyihova na ɔbamaa ɔdaye noko yeahulo ye.

DUZU A ƐBAHOLA WƆAYƐ A?:

  • Sɛlɛ Nyamenle ɛkɛ ne nrɛlɛbɛ fa tete ɛ ra ne

  • Ka edwɛkɛ mɔɔ anwo hyia la fane dɔɔnwo kile adɔma ne maa ɔbɔ ɔ bo ɔzukoa