Wulu kɔ nuhua edwɛkɛ ne azo

Wulu kɔ nuninyɛne ne azo

 Foa 7

Kɛzi Ɛbahilehile Ɛ Ra La

Kɛzi Ɛbahilehile Ɛ Ra La

“Bɛmaa mɛla ɛhye mɔɔ melɛfa meamaa bɛ la ɛdɛnla bɛ ahonle nu, na bɛva bɛhilehile bɛ mra.”Mɛla ne 6:6, 7

Gyihova hyehyɛle abusua ne la, ɔvale ngakula ɔwulale awovolɛ asa. (Kɔlɔsaema 3:20) Kɛ awovolɛ la, ɔle wɔ gyima kɛ ɛbahilehile ɛ mra wɔamaa bɛahulo Gyihova na bɛayɛ mgbanyinli mɔɔ nvasoɛ wɔ bɛ nwo zo. (2 Temɔte 1:5; 3:15) Ɔwɔ kɛ ɛdawɔ noko ɛnwu mɔɔ wɔ ɛ ra nrenya anzɛɛ raalɛ ahonle nu la. Neazo kpalɛ mɔɔ ɛbayɛ la anwo hyia. Saa ɛmaa Gyihova Edwɛkɛ ne tɛnla wɔ ahonle nu a, yɛɛ ɛbahola wɔahilehile ɛ mra kpalɛ a.Edwɛndolɛ 40:8.

 1 MMAMAA ƆYƐ SE KƐ Ɛ MRA NEE WƆ BALI ADWELIE

MƆƆ BAEBOLO NE KA LA: “Ɔwɔ kɛ awie biala tie ɔ nzo anwo, ɔmmatendɛ dɔɔnwo.” (Gyemise 1:19) Ɛkulo kɛ ɛ mra ne mɔ nwu kɛ bɛkola bɛka edwɛkɛ biala bɛkile wɔ. Ɔwɔ kɛ bɛnwu kɛ saa bɛkulo kɛ bɛka edwɛkɛ bɛkile wɔ a ɛbadie bɛ. Ɛ nee bɛ ɛdɛnla anzondwolɛ nu amaa bɛahola bɛaha bɛ edwɛkɛ bɛahile wɔ. (Gyemise 3:18) Saa bɛnwu kɛ ɛbadea bɛ anzɛɛ ɛbava ɛya a, bɛnrɛha nɔhalɛ ne bɛnrɛhile wɔ. Si bɛ nwo abotane, na da ye ali kɛ ɛkulo bɛ.Mateyu 3:17; 1 Kɔlentema 8:1.

DUZU A ƐBAHOLA WƆAYƐ A?:

  • Saa ɛ mra kulo kɛ bɛka edwɛkɛ bɛkile wɔ a, tie bɛ

  • Ɛ nee bɛ ɛli adwelie dahuu, tɛ mekɛ mɔɔ bɛlɛyia ngyegyelɛ la angome

2 BƆ MƆDENLE KƐ ƐBADE MƆƆ BƐKPONDƐ KƐ BƐKA LA ABO

MƆƆ BAEBOLO NE KA LA: “Sonla mɔɔ lɛ ndelebɛbo la bakpazi.” (Mrɛlɛbulɛ 19:8) Ɔdwu mekɛ ne bie a, ɔwɔ kɛ ɛdwenle edwɛkɛ agbɔkɛ mɔɔ ɛ mra fa di gyima la anwo amaa wɔanwu kɛzi bɛte nganeɛ la. Ngakula ta ka edwɛkɛ wudu nu anzɛɛ bɛka edwɛkɛ bie mɔ mɔɔ tɛ mɔɔ bɛkile la ɛne. “Andeamua le koasea.” (Mrɛlɛbulɛ 18:13) Mmafa ɛya ndɛndɛ.Mrɛlɛbulɛ 19:11.

DUZU A ƐBAHOLA WƆAYƐ A?:

  • Bɔ kpɔkɛ kɛ ɔnva nwo edwɛkɛ biala mɔɔ bɛbaha la, ɛnrɛpɛ bɛ nloa azo anzɛɛ ɛnrɛva ɛya

  • Kakye kɛzi ɛnee ɛte nganeɛ wɔ mekɛ mɔɔ ɛnee ɛle kɛ ɛ mra ne mɔ la nee ninyɛne mɔɔ ɛnee nwolɛ hyia wɔ la

 3 Ɛ NEE WƆ BOKAVOLƐ NE ƐYƐ KO

MƆƆ BAEBOLO NE KA LA: “Me ra nrenya, tie ɛ ze ngilehilelɛ, yɛɛ mmakpo ɛ nli folɛdulɛ.” (Mrɛlɛbulɛ 1:8) Gyihova ɛmaa selɛ nee ninli tumi wɔ ngakula ne mɔ anwo zo. Ɔwɔ kɛ ɛkilehile ɛ mra ɛmaa bɛbu debie na bɛyɛ tieyɛ. (Ɛfɛsɛsema 6:1-3) Kɛ awovolɛ la, saa ‘bɛ nloa ɛnzɛ bɛ nwo’ a, ngakula ne mɔ banwu ye. (1 Kɔlentema 1:10) Saa bɛ adwenle ɛnyia a, mmada ye ali wɔ ngakula ne mɔ anyunlu anrɛɛ ngakula ne mɔ ɛnrɛbu bɛ.

DUZU A ƐBAHOLA WƆAYƐ A?:

  • Bɛzi adenle mɔɔ bɛbalua zo bɛahwe bɛ mra ne mɔ anzo la anwo kpɔkɛ

  • Saa ɛ nee wɔ bokavolɛ ne adwenle ɛnyia wɔ ɛ mra ne mɔ ɛtetelɛ nu a, nea kɛ ɛbade adwenle mɔɔ wɔ bokavolɛ ne lɛ la abo

 4 YƐ NGYEHYƐLEƐ

MƆƆ BAEBOLO NE KA LA: “Tete kakula wɔ adenle mɔɔ ɔwɔ kɛ ɔfa zo la anu.” (Mrɛlɛbulɛ 22:6) Ɔwɔ kɛ ɛyɛ gyima ɛsesebɛ ɛfa ɛtete ɛ mra. Ɔwɔ kɛ ɛyɛ kɛzi ɛbatete bɛ na wɔadenrɛdenrɛ bɛ la anwo ngyehyɛleɛ. (Edwɛndolɛ 127:4; Mrɛlɛbulɛ 29:17) Ɛdenrɛdenrɛlɛ ɛhye ɛngile kɛ ɛtwe bɛ nzo ala, emomu ɔwɔ kɛ ɛmaa bɛnwu deɛmɔti wɔli mɛla bie la. (Mrɛlɛbulɛ 28:7) Bieko, kilehile bɛ maa bɛhulo Gyihova Edwɛkɛ ne na bɛnwu ngyinlazo mɔɔ wɔ nu la. (Edwɛndolɛ 1:2) Ɛhye bamaa bɛanyia adwenle kpalɛ.Hibuluma 5:14.

DUZU A ƐBAHOLA WƆAYƐ A?:

  • Boa ɛ mra maa bɛnwu kɛ Nyamenle wɔ ɛkɛ na bɛbahola bɛanyia ye nu anwodozo

  • Boa bɛ maa bɛzukoa kɛzi bɛbanwu ɛbɛlabɔlɛ nu esiane bie mɔ mɔɔ le kɛ mɔɔ wɔ Intanɛte zo nee Intanɛte adwelielilɛ ɛleka bie mɔ la. Kile bɛ kɛzi bɛbazi menli mɔɔ nee ngakula da adenle la

“Tete kakula wɔ adenle mɔɔ ɔwɔ kɛ ɔfa zo la anu”