Wulu kɔ nuhua edwɛkɛ ne azo

Wulu kɔ nuninyɛne ne azo

 Foa 5

Kɛzi Ɛ Nee Ɛ Nwo Amra Badɛnla Anzondwolɛ Nu La

Kɛzi Ɛ Nee Ɛ Nwo Amra Badɛnla Anzondwolɛ Nu La

“Bɛyɛ atiakunlukɛnlɛma, bɛbɛlɛ bɛ nwo aze, bɛyɛ bɛtɛɛ na bɛzi abotane.”Kɔlɔsaema 3:12

Saa ɛgya a ɛnee wɔnyia abusua fofolɛ. Ɛbahulo wɔ awovolɛ na wɔali bɛ eni ɛdeɛ, noko wɔ bokavolɛ ne anwo hyia tɛla awie biala mɔɔ wɔ azɛlɛ ye azo la. Bie a, ɛ nwo amra ɛnrɛde ɛhye abo. Noko Baebolo ngyinlazo bahola aboa wɔ yeamaa anzondwolɛ adɛnla ɛ nee ɛ nwo amra avinli na mekɛ ko ne ala wɔamaa wɔ abusua fofolɛ ne noko agyinla.

 1 NYIA Ɛ NWO AMRA ANWO ADWENLE KPALƐ

MƆƆ BAEBOLO NE KA LA: “Di ɛ ze nee ɛ nli eni.” (Ɛfɛsɛsema 6:2) Saa wɔnyi kɛ nzɔne bɔbɔ a, ɔwɔ kɛ ɛdi wɔ awovolɛ eni na ɛbu bɛ. Kakye kɛ wɔ bokavolɛ ne noko lɛ ye awovolɛ mɔɔ ɔwɔ kɛ ɔdi bɛ eni a. Yemɔti saa ɔ nee bɛ di ngitanwo a mmamaa ɔgyegye wɔ ɔluakɛ “ɛhulolɛ ɛnle anyebolo.”1 Kɔlentema 13:4; Galeehyeama 5:26.

DUZU A ƐBAHOLA WƆAYƐ A?:

  • mmaka edwɛkɛ le kɛ “Wɔ abusua ne bɔ me anyiemgba dahuu” anzɛɛ “Mɔɔ meyɛ la ɛnzɔ wɔ mame anye ɛlɛ”

  • Bɔ mɔdenle kɛ ɛbade wɔ bokavolɛ ne abo

 2 SI PI WƆ MEKƐ MƆƆ ƆFƐTA LA

MƆƆ BAEBOLO NE KA LA: “Nrenya fi ɔ ze nee ɔ nli anwo na ɔfa ɔ nwo ɔbɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko.” (Mɔlebɛbo 2:24) Saa ɛgya a, wɔ awovolɛ bade nganeɛ kɛ ɛtɛde bɛ ɛdeɛ, yemɔti bie a bɛbava bɛ nwo bɛawulowula wɔ agyalɛ ne anu.

Ɔwɔ kɛ ɛ nee wɔ bokavolɛ ne si ninyɛne mɔɔ bɛbamaa bɛ adenle wɔ nu nee mɔɔ bɛnrɛmaa bɛ adenle la anwo kpɔkɛ na ɛka ɛkile bɛ. Fi ɛbulɛ nu ka nɔhalɛ ne kile bɛ. (Mrɛlɛbulɛ 15:1) Mɛlɛbɛnwoaze, bɛtɛɛyɛlɛ, nee abotane baboa yeamaa ɛ nee ɛ nwo amra adɛnla anzondwolɛ nu na wɔali folɛdulɛ ɛhye azo: “Bɛde bɛmaa bɛ gɔnwo mɔ ngoko ngoko wɔ ɛhulolɛ nu.”Ɛfɛsɛsema 4:2.

DUZU A ƐBAHOLA WƆAYƐ A?:

  • Saa kɛzi ɛ nwo amra fa bɛ nwo wulowula wɔ agyalɛ ne anu la gyegye wɔ a, ɛ nee wɔ bokavolɛ ne ɛzuzu nwo wɔ mekɛ kpalɛ nu

  • Ɛ nee wɔ bokavolɛ ne adwenle ɛyɛ ko wɔ kɛzi bɛbali nwolɛ gyima la anwo