Wulu kɔ nuhua edwɛkɛ ne azo

Wulu kɔ nuninyɛne ne azo

 FOA KO

“Mebakpondɛ Mɔɔ Ɛminli La”

“Mebakpondɛ Mɔɔ Ɛminli La”

Boane ne ɛminli. Ɛnee ɔ nee mboane ekpunli bie a ɛlɛdidi a, na ngyikyi ngyikyi ɔhwenle ɔ nwo. Kɛkala ɔnnwu mboane ekpunli ne yɛɛ mboaneneavolɛ ne. Awozinli ɛlɛba. Yeminli wɔ bɔnza bie mɔɔ nane anwo ɛzulolɛ wɔ nu la anu, ɔnlɛ banebɔlɛ biala. Akee boane ne dele ye neavolɛ ne ane, neavolɛ ne nriandile hɔmaanle ye zo, ɔvale ye ɛdanlɛ ne ɔguale ɔ nwo na ɔ nee ye hɔle sua nu.

GYIHOVA ɛha ye fane dɔɔnwo kɛ ɔle kɛ mboaneneavolɛ ɛhye la. Yemaa yɛ anwosesebɛ wɔ ye Edwɛkɛ ne anu kɛ: ‘Medame mumua ne mebakpondɛ me mboane ne, na meanlea bɛ.’​—Yizikeɛle 34:11, 12.

“Ɔ Sa Nu Mboane”

Nwane mɔ a le Gyihova mboane a? Saa yɛbaha a, Gyihova mboane a le menli mɔɔ kulo ye na bɛsonle ye la. Baebolo ne ka kɛ: “O bɛrɛla, bɛmaa yɛbɔ yɛ ti aze yɛzonle ye; bɛmaa yɛhoto [Gyihova], yɛ Bɔvolɛ ne. Ɔluakɛ ɔle yɛ Nyamenle, yɛɛ yɛle ye adidileka menli, nee ɔ sa nu mboane.” (Edwɛndolɛ 95:6, 7) Gyihova azonvolɛ kulo kɛ bɛdi bɛ Neavolɛ ne anzi kɛmɔ mboane yɛ la. Asoo bɛdi munli? Kyɛkyɛ. Ɔdwu mekɛ ne bie a, Nyamenle azonvolɛ bɔ “asande,” anzɛɛ bɛyɛ kɛ “mboane mɔɔ ɛminli la.” (Yizikeɛle 34:12; Mateyu 15:24; 1 Pita 2:25)  Noko, saa awie twe ɔ nwo fi Gyihova anwo a, ɔlɛ anyelazo kɛ ahenle bazia ara.

Asoo ɛdie ɛdi kɛ Gyihova tɛde Neavolɛ? Kɛzi Gyihova ɛhile kɛ ɔle Mboaneneavolɛ ɔmaa yɛ ɛnɛ ɛ? Suzu ndenle nsa anwo:

Ɔmaa yɛ sunsum nu aleɛ. Gyihova se: “Mebamaa bɛ adidileka kpalɛ. Bɛbadɛnla azɛlɛ kpalɛ mɔɔ aleɛ wɔ zolɛ la azo na bɛadidi.” (Yizikeɛle 34:14) Gyihova kɔ zo maa yɛ sunsum nu aleɛ ngakyile wɔ ye mekɛ nloa na ɛhye maa yɛ nye die. Asoo ɛkakye edwɛkɛ mɔɔ ɛgengale, ɛdendɛlɛ anzɛɛ vidio bie mɔɔ buale wɔ nzɛlɛlɛ la ɔ? Asoo yemɔ ammaa wɔande nganeɛ kɛ Gyihova dwenle ɛ nwo ɔ?

Ɔbɔ yɛ nwo bane yɛɛ ɔboa yɛ. Gyihova ɛbɔ ɛwɔkɛ kɛ: “Mebakpondɛ mɔɔ ɛminli la, mebabɔ mɔɔ ɛbubu la bɔlɛ, na meamaa mɔɔ anwo ɛbɛlɛ ye la anyia anwosesebɛ.” (Yizikeɛle 34:16) Gyihova maa mɔɔ ɛyɛ bɛtɛɛ anzɛɛ adwenleadwenle ɛdɔ ɔ nwo la anwosesebɛ. Saa adiema bie ɛlɛdi nyane, ɔluakɛ bie a ɔ gɔnwo diedinli bie ɛvo ye la ati a, Gyihova boa ye. Ɔmaa mɔɔ ɛvo adenle nee mɔɔ nganeɛdelɛ ɛtane gyegye ye la sia ba sua nu.

Ɔdwenle Yɛ Nwo. Gyihova se: “Mebakpondɛ me mboane ne mɔ. Mebalie bɛ meavi ɛleka mɔɔ bɛzande bɛ bɛhɔgua la.” (Yizikeɛle 34:12, 16) Wɔ Gyihova afoa nu, saa ye boane bie minli a ɔngile kɛ anyelazo ɛnle ɛkɛ. Saa boane bie minli a Gyihova ze ye, ɔkpondɛ ye na saa ɔnwu ye a, ɔdi fɛlɛko kpole. (Mateyu 18:12-14) Ɔfɛlɛ ye nɔhalɛ azonvolɛ kɛ “me adidileka mboane.” (Yizikeɛle 34:31) Ɛle zɔhane mboane ne mɔ anu ko.

Wɔ Gyihova afoa nu, saa ye boane bie minli a ɔngile kɛ anyelazo ɛnle ɛkɛ. Saa ɔnwu ye a, ɔdi fɛlɛko kpole

“Maa Yɛnyia Gyinlagyakɛ Kɛ Dɛba Ne La”

Duzu ati a Gyihova ɛlɛkpondɛ wɔ na yeavɛlɛ wɔ kɛ ɛzia ɛrɛla a? Ɔkulo kɛ ɛ nye die. Yebɔ ɛwɔkɛ kɛ ɔbamaa nyilalɛ “anyenye” kɛ ezule amaa ye mboane. (Yizikeɛle 34:26) Ɛhye ɛnle ɛwɔkɛ mgbane bie ala. Ɛze kɛ ɛwɔkɛ ɛhye le nɔhalɛ.

Kakye mekɛ mɔɔ ɛnwunle Gyihova la. Kɛ neazo la, kɛzi ɛdele nganeɛ wɔ mekɛ mɔɔ ɛnwunle Nyamenle duma nee bodane mɔɔ ɔlɛ ɔmaa alesama la ɛ? Ɛkakye kɛzi ɛnee ɛ nye die saa ɛ nee ɛ gɔnwo mɔ Kilisienema yia wɔ debiezukoalɛ nee nyianu bo la? Na mekɛ mɔɔ ɛhanle edwɛkpa ne na awie hilele nwolɛ anyelielɛ noko la ɛ, asoo ɛ nye anlie ɔ?

Ɛbahola wɔanyia anyelielɛ ɛhye mɔ bieko. Nyamenle tete azonvolɛ bie mɔ zɛlɛle kɛ: “O [Gyihova], fa yɛ bɔ wɔ ɛbolɛ. Maa yɛnyia gyinlagyakɛ kɛ dɛba ne la.” (Awolɛyelɛ 5:21) Gyihova diele bɛ nzɛlɛlɛ ne, bɛziale bɛzonlenle ye na bɛ nye liele bieko. (Nihɛmaya 8:17) Kɛ Gyihova bayɛ wɔ la ɛne.

Noko, ɔnla aze kɛ ɛbazia wɔara Gyihova ɛkɛ. Suzu ngyegyelɛ mɔɔ ɛbahola wɔayia ye nee kɛzi ɛbali zolɛ konim la bie mɔ anwo.