Wulu kɔ nuhua edwɛkɛ ne azo

Wulu kɔ nuninyɛne ne azo

Bɛne zo: Adiema raalɛ mɔɔ ɛlɛbɔ Adiema Rutherford ɛdendɛlɛ ne wɔ Alabama, U.S.A., wɔ 1930 awieleɛ; fema zo: Switzerland

 FOA 1

Belemgbunlililɛ Nɔhalɛ Edwɛkɛ—Bɛmaa Yɛ Sunsum Nu Aleɛ

Belemgbunlililɛ Nɔhalɛ Edwɛkɛ—Bɛmaa Yɛ Sunsum Nu Aleɛ

 ƐNWU kɛ ngɛlɛlera ne mɔɔ ɛ nee wɔ Baebolo sukoavo ne ɛgenga la ɛmaa ɔ nye ɛlie ɔluakɛ yede ɔ bo. Akee ɔka kɛ, “Yemɔti ɛlɛkile kɛ Baebolo ne kilehile kɛ yɛbahola yɛadɛnla aze dahuu wɔ Paladaese​—wɔ azɛlɛ ye ala azo ɔ?” Ɛ gɔnwo ne mɔɔ ɛ nee ye lua daselɛlilɛ nu la sele na ɔka kɛ, “Ɔyɛ, boni a ɛnwunle ye wɔ Baebolo ne anu a?” Edwɛkɛ ne tɔ sukoavo ne anwo zo na ɔkpusu ɔ ti ɔka kɛ, “Menlie menli kɛ bɛhilehilele me deɛ ɛhye ɛlɛ!” Ɛkakye kɛ ɔhanle edwɛkɛ ko ne ala wɔ dapɛne bie mɔ mɔɔ ɛze ɛhɔ la anu, wɔ mekɛ mɔɔ lumua mɔɔ ɔnwunle kɛ Nyamenle duma a le Gyihova la.

Wɔnyia anwubielɛ ɛhye bie ɛlɛ ɔ? Nyamenle menli dɔɔnwo ɛnyia bie. Ninyɛne ekyi bahola amaa yɛahakye ahyɛlɛdeɛ mɔɔ sonle bolɛ mɔɔ yɛ sa ɛha ye la​—nɔhalɛ ne anwo nrɛlɛbɛ ne! Gyinla na dwenle nwolɛ nea: Kɛzi ɛnyianle zɔhane ahyɛlɛdeɛ ne ɛ? Yɛbazuzu zɔhane kpuyia ne anwo wɔ foa ɛhye anu. Adenle mɔɔ Nyamenle menli ɛlua zo ɛnyia sunsum nu ndelebɛbo ngyikyi ngyikyi la ɛla ye ali wienyi kɛ Nyamenle Belemgbunlililɛ ne wɔ ɛkɛ amgba. Ye Belemgbunli ne, Gyisɛse Kelaese ɛlɛbɔ mɔdenle kɛ ɔmaa bɛahilehile Nyamenle menli ne nɔhalɛ ne wɔ ɛvolɛ mɔɔ bo ɛya ko la anu.

WƆ FOA ƐHYE

TILE 3

Gyihova Da Ye Bodane Ali

Asoo ɛnee Belemgbunlililɛ ne boka Nyamenle mɔlebɛbo bodane ne anwo? Kɛzi Gyisɛse hanle Belemgbunlililɛ ne anwo edwɛkɛ ɛ?

TILE 4

Gyihova Kpogya Ye Duma Ne

Duzu a Belemgbunlililɛ ne ɛyɛ wɔ Nyamenle duma ne anwo a? Kɛzi ɛdawɔ mumua ne ɛbahola wɔaboa wɔamaa bɛade Gyihova duma nwo ɛ?

TILE 5

Belemgbunli Ne Maa Wienyi Bie Ta

Bɛdele Nyamenle Belemgbunlililɛ ne, zolɛ neavolɛma, ye maanlema nee nɔhalɛ mɔɔ yɛdi la abo kpalɛ.