Wulu kɔ nuhua edwɛkɛ ne azo

Wulu kɔ nuninyɛne ne azo

 TILE 13

Belemgbunlililɛ Edwɛkɛhanlɛma Fa Bɛ Edwɛkɛ Kɔ Kɔɔto

Belemgbunlililɛ Edwɛkɛhanlɛma Fa Bɛ Edwɛkɛ Kɔ Kɔɔto

TILE NE BODANE

Kɛmɔ Gyisɛse hanle la, ye menli ne yia bɛ edwɛkɛhanlɛ gyima ne anwo dwazotia

1, 2. (a) Duzu a ɛzonlenlɛ nu mgbanyima holale yɛle wɔ edwɛkɛhanlɛ gyima ne anwo a, noko kɛzi ɛzoanvolɛ ne mɔ yɛle bɛ nyɛleɛ ɛ? (b) Duzu ati a ɛzoanvolɛ ne mɔ andie bɛ sa mɔɔ bɛvale bɛdole gyima ne azo la ɛ?

ƆLE Pɛntekɔso 33 Y.M. anzi mekɛ ekyii bie. Keleseɛne asafo ne mɔɔ wɔ Gyɛlusalɛm la ɛli dapɛne ekyii bie ala. Seetan nwunle kɛ mekɛ kpalɛ mɔɔ ɔwɔ kɛ ɔteta bɛ la ɛne. Ɔkpondɛ kɛ ɔsɛkye bɛ amaa asafo ne anwo anyɛ se. Seetan yɛle ye ndɛndɛ hakyile ninyɛne nu manle ɛzonlenlɛ nu mgbanyima vale bɛ sa dole edwɛkɛhanlɛ gyima ne azo. Noko ɛzoanvolɛma ne vale akɛnrasesebɛ hanle edwɛkɛ ne, na menli dɔɔnwo “liele Awulae lile.”​—Gyi. 4:18, 33; 5:14.

Ɛzoanvolɛma ne lile fɛlɛko kɛ “bɛdabɛ bɔbɔ Nyamenle ɛbu bɛ bie, na ɔlua Gyisɛse duma ne ati bɛnwu amaneɛ”

2 Dwazotiama ne vale ɛya bieko na akee bɛguale ɛzoanvolɛma ne efiade. Noko Gyihova anwumabɔvolɛ bukele efiade nlenkɛ ne wɔ nɔe ne, na aleɛ kahye la, ɛnee ɛzoanvolɛma ne ɛlɛka edwɛkɛ ne bieko! Eza bɛhyele ɛzoanvolɛma ne bɛhɔle arelemgbunli ne mɔ anyunlu na bɛbɔle bɛ somolɛ kɛ bɛbulu mɛla mɔɔ tia edwɛkɛhanlɛ ne la azo. Ɛzoanvolɛma ne vale akɛnrasesebɛ hanle kɛ: “Ɔwɔ kɛ yɛtie Nyamenle yɛtɛla sonla.” Arelemgbunli ne mɔ vale nwolɛ ɛya kpole na “bɛyɛle kɛ bɛku ɛzoanvolɛma ne.” Noko wɔ zɔhane mekɛ ne mɔɔ anu yɛ se la anu, Gameeleɛle, Mɛla kilehilevolɛ mɔɔ bɛbu ye kpalɛ la bɔle arelemgbunli ne mɔ kɔkɔ kɛ: “Bɛnlea boɛ . . . bɛgyakyi bɛ, bɛmmayɛ bɛ ɛhwee.” Mɔɔ yɛ nwanwane la a le kɛ, arelemgbunli ne mɔ diele ye edwɛkɛ ne na bɛgyakyile ɛzoanvolɛma ne. Duzu a nɔhavoma ɛhye yɛle a? Bɛ ahonle andu, bɛhɔle zo “bɛhilehilele na bɛbɔle Edwɛkpa ne mɔɔ fane Gyisɛse anwo la nolo.”​—Gyi. 5:17-21, 27-42; Mrɛ. 21:1, 30.

3, 4. (a) Nzɔne a Seetan ɛva ɛli gyima mekɛ tendenle ɛteta Nyamenle menli a? (b) Duzu a yɛbazuzu nwolɛ wɔ tile ɛhye nee nwiɔ ne mɔɔ doa zo la anu a?

3 Zɔhane ɛvolɛ 33 Y.M. kɔɔto edwɛkɛ ne a le dwazotia mɔɔ lumua mɔɔ mgbanyima vale rale Keleseɛnema asafo ne anwo zo a, noko ɛnee tɛ yemɔ a le mɔɔ li awieleɛ a. (Gyi. 4:5-8; 16:20; 17:6, 7) Wɔ yɛ mekɛ ye azo noko, eza Seetan di wula dwazotiama ɔmaa bɛpiepia tumivolɛma bɛmaa bɛfa bɛ sa bɛto yɛ edwɛkɛhanlɛ gyima ne azo. Dwazotiama ɛbɔ Nyamenle menli somolɛ dɔɔnwo. Ko a le kɛ yɛgyegye maanlema anzondwolɛ. Bie noko a le kɛ yɛle maamɔvoma; yɛɛ eza yɛkpɔsa azua nu yɛtɔne ninyɛne. Yɛ mediema ɛhɔ kɔɔto wɔ ye mekɛ kpalɛ nu ɛhɔhile kɛ zɔhane somolɛ ne mɔ le adalɛ. Boni a ɛvi edwɛkɛ ɛhye  mɔ anu ɛra a? Kɛzi ndɛne mɔɔ bɛbuale ye kɔɔto wɔ ɛvolɛ dɔɔnwo mɔɔ ɛpɛ nu anu la ka wɔ ɛnɛ ɛ? Bɛmaa yɛzuzu kɔɔto edwɛkɛ ekyi anwo na yɛnlea kɛzi bɛboa bɛmaa ‘yɛgyinla edwɛkpa ne anzi na yɛfa yɛsie ɛkɛ wɔ mɛla adenle zo’ la.​—Fel. 1:7, NW.

4 Wɔ tile ɛhye anu, yɛbava yɛ adwenle yɛazie kɛzi yɛgyinlanle nwolɛ adenle mɔɔ yɛlɛ yɛka edwɛkɛ ne anzi la azo. Adile nwiɔ ne mɔɔ doa zo la bahilehile kɔɔto edwɛkɛ bie mɔ mɔɔ yɛlile amaa yɛanyɛ ewiade ne ɛdeɛ na yɛava Belemgbunlililɛ ngyinlazo ne mɔ yɛabɔ yɛ ɛbɛla la anu.

Agyegyeamra​—Anzɛɛ Nɔhavoma Mɔɔ Bɛgyi Nyamenle Belemgbunlililɛ Ne Anzi?

5. Kɛmɔti a bɛhyele Belemgbunlililɛ edwɛkɛhanlɛma wɔ 1930 ne awieleɛ ɛ, na duzu a menli mɔɔ ɛnee li bɛ nyunlu la yɛlɛ adwenle kɛ bɛyɛ a?

5 Wɔ 1930 ne awieleɛ, azuamgbole nee maanle mɔɔ wɔ United States of America la yɛle kɛ bɛtinlitinli Gyihova Alasevolɛ bɛamaa bɛalie mɛla adenle zo kɛlata anzɛɛ tumi kɛlata bie na bɛayɛ bɛ ɛzonlenlɛ gyima ne. Noko yɛ mediema ne mɔ anyɛ. Bɛkola bɛbɔ kɛlata ne mɔɔ bɛkɔ bɛalie la bɛgua yɛɛ arane biala ɛnlɛ tumi kɛ ɔbava ɔ nloa yeawulowula Gyisɛse edwɛkɛ mɔɔ ɔhanle kɛ Keleseɛnema ɛha Belemgbunlililɛ edwɛkɛ ne la anu. (Maake 13:10) Ɛhye ati bɛhyele Belemgbunlililɛ edwɛkɛhanlɛma dɔɔnwo. Yemɔti menli mɔɔ li ahyehyɛdeɛ ne anyunlu la dwenlenle nwolɛ kɛ bɛfa edwɛkɛ ne bɛahɔ kɔɔto. Ɛnee bɛkpondɛ kɛ bɛmaa Maanle ne nwu kɛ bɛzi nwolɛ adenle mɔɔ Alasevolɛ ne mɔ lɛ sonle la anwo adenle mɔɔ ɔngyi mɛla zo. Wɔ 1938, edwɛkɛ bie zile mɔɔ manle kɔɔto edwɛkɛ dɔɔnwo vindele a. Duzu a zile a?

6, 7. Duzu a dole Cantwell abusua ne a?

6 Wɔ Dwɛkɛ nwonlomɔ, April 26, 1938, Newton Cantwell, mɔɔ yeli ɛvolɛ 60; ɔ ye, Esther; nee bɛ mra mrenya Henry, Russell, nee Jesse​—mɔɔ bɛdabɛ menli nnu ne amuala bɛle adekpakyelɛ titilema la hanle kɛ bɛkɔ daselɛlilɛ wɔ New Haven suakpole Connecticut azo. Nɔhalɛ nu, ɛnee bɛyɛ bɛ adwenle kɛ bɛkɔ a bɛnrɛzia. Duzu ati ɔ? Ɛnee bɛta bɛkye bɛ, yemɔti bɛnwunle kɛ bɛbahola bɛahye bɛ bieko. Noko mɔɔ ɛnee Cantwell abusua ne anye la ye ade la ammaa ɛhulolɛ mɔɔ bɛlɛ kɛ bɛka Belemgbunlililɛ edwɛkɛ ne la anga aze. Bɛvale ahale nwiɔ a bɛhɔle New Haven a. Newton hanle abusua ne kale mɔɔ Baebolo nwo mbuluku dɔɔnwo nee gramafuu wɔ nu la, yɛɛ Henry mɔɔ ɛli ɛvolɛ 22 la hanle kale ne mɔɔ speaker gyi zo la. Kɛmɔ ɛnee bɛ nye la la, amgba noko, yeangyɛ yɛɛ kpolisima gyinlanle bɛ a.

7 Bɛlumuale bɛhyele Russell mɔɔ yeli ɛvolɛ 18 la, bɛhyele Newton nee Esther noko. Ɛnee Jesse mɔɔ yeli ɛvolɛ 16 la gyi moa na ɔlɛnea ye awovolɛ nee ɔ diema ne mɔɔ kpolisima ne nee bɛ ɛlɛkɔ la. Ɛnee Henry ɛlɛka edwɛkɛ ne wɔ ɛleka gyɛne, yemɔti ɛnee yeha Jesse angomekye. Ɔvale ye gramafuu ne ɔdoale edwɛkɛhanlɛ ne azo. Kateleke mrenya nwiɔ manle Jesse bɔle  Adiema Rutherford ɛdendɛlɛ ne mɔɔ ɔ ti ne se “Agbɔvolɛ” la. Noko mɔɔ mrenya ne mɔ diele ɛdendɛlɛ ne la, bɛvale ɛya kpole mɔɔ anrɛɛ bɛbo Jesse. Jesse yɛle koonwu na ɔvile ɛkɛ, noko mekɛ ekyii bie anzi, kpolisima bie gyinlanle ye. Yemɔti bɛhyele Jesse noko. Kpolisima ne ambɔ Adiema Raalɛ Cantwell somolɛ, noko bɛbɔle Adiema Cantwell nee ɔ mra mrenya ne mɔ somolɛ. Noko bɛyele bɛ kenle ko zɔhane ala.

8. Kɛmɔti a kɔɔto ne buale Jesse Cantwell fɔlɛ kɛ ɔle agyegyeamra ɛ?

8 Siane bie mɔ anzi wɔ September 1938, bɛvale Cantwell abusua ne bɛhɔle New Haven kɔɔto. Bɛguale Newton, Russell, nee Jesse efiade kɛ bɛlɛdielie ezukoa mɔɔ bɛnlɛ nwolɛ tumi kɛlata la. Ɔnva nwo edwɛkɛ mɔɔ bɛvale bɛhɔdole Connecticut Kɔɔto Kpole ne anyunlu la, bɛbuale Jesse fɔlɛ kɛ ɔlɛsɛkye menli anzondwolɛ​—ɔle agyegyeamra. Duzu ati ɔ? Ɔluakɛ Katelekema nwiɔ ne mɔɔ bɛdiele ɛdendɛlɛ ne la lile daselɛ wɔ kɔɔto ɛkɛ ne kɛ ye ɛdendɛlɛ ne bɔle bɛ ɛzonlenlɛ ne aholoba na ɔhanle bɛ ɛya. Amaa mediema mɔɔ bɛli ahyehyɛdeɛ ne anyunlu la abua edwɛkɛ ne anwo bie la, bɛziale bɛvale edwɛkɛ ne bɛhɔdole U.S. Kɔɔto Kpole ne mɔɔ ɛnee wɔ ɛkɛ la anyunlu.

9, 10. (a) Kɛzi U.S. Kɔɔto Kpole ne lile Cantwell abusua ne edwɛkɛ ne ɛ? (b) Kɛzi edwɛkɛ zɔhane mɔɔ bɛlile la boa yɛ ɛ?

9 Ndɛnebuavolɛ Kpanyinli Charles E. Hughes nee ɔ gɔnwo mɔ ndɛnebuavolɛma mɔtwɛ bɔle ɔ bo diele ngilehilenu ne mɔɔ Adiema Hayden Covington, Gyihova Alasevolɛ lɔya bie vale  manle la wɔ March 29, 1940. * Mɔɔ Connecticut maanle lɔya ne hanle ye edwɛkɛ ne kɛ ɔfa yeamaa bɛanwu kɛ Alasevolɛ ne mɔ le agyegyeamra la, ndɛnebuavolɛ ko bizale ye kɛ: “Ɔnle nɔhalɛ kɛ menli anye anlie edwɛkɛ ne mɔɔ Kelaese Gyisɛse hanle wɔ ye mekɛ zo la anwo ɔ?” Maanle lɔya ne buale kɛ: “Bɛ nye anlie nwo, yɛɛ saa mekakye mɔɔ me Baebolo ne ka la kpalɛ a, eza ɔka mɔɔ dole Gyisɛse wɔ edwɛkɛ ne ɛhanlɛ nwo la anwo edwɛkɛ.” Anyelielɛ edwɛkɛ boni ɛ! Lɔya ne vale Alasevolɛ ne mɔ nee Gyisɛse hɔle ekpunli ko anu yɛɛ ɔvale maanle ne nee menli mɔɔ bɛbuale Gyisɛse fɔlɛ la ɔhɔle ekpunli ko anu mɔɔ yeannwu nuhua a. Wɔ May 20, 1940, Kɔɔto ne yɛle adwenle ko na bɛbuale Alasevolɛ ne mɔ benle.

Hayden Covington (ɔ nyunlu, avinli), Glen How (bɛne zo), nee mediema gyɛne ɛli konim ɛwie na bɛlɛfi kɔɔto ɛkɛ

10 Nvasoɛ boni a rale Kɔɔto ne edwɛkɛ ne azo a? Ɔmanle bɛnyianle anwobanebɔlɛ dɔɔnwo wɔ nwolɛ adenle mɔɔ bɛlɛ bɛsonle mɔɔ arane anzɛɛ maanle biala ɛngola ɛngyinla mɛla zo ɛnzi bɛ ɛzonlenlɛ nwo adenle la anwo. Bieko, Kɔɔto ne annwu debie biala wɔ Jesse nyɛleɛ nu “mɔɔ . . . gyegye maanlema anzondwolɛ a.” Ɛhye ati, edwɛkɛlilɛ ne manle ɔlale ali kɛ Gyihova Alasevolɛ ɛngyegye menli. Nea mɛla adenle zo konim kpole mɔɔ Nyamenle azonvolɛ lile a! Noko kɛzi ɔtɛboa yɛ ɛ? Lɔya bie mɔɔ le Dasevolɛ la hanle kɛ: “Nwolɛ adenle mɔɔ yɛlɛ kɛ yɛbazonle mɔɔ awie ɛngyegye yɛ na yɛnzulo kɛ bɛbazi yɛ adenle wɔ adenle ɛtane zo la maa yɛdayɛ, kɛ Alasevolɛ la ka anyelazo edwɛkɛ ne ɛnɛ kile awie mɔ wɔ ɛleka mɔɔ yɛde la.”

Maamɔvoma​—Anzɛɛ Yɛbɔ Nɔhalɛ Ne Nolo?

Quebec’s Burning Hate for God and Christ and Freedom Is the Shame of All Canada

11. Nolo boni a yɛ mediema mɔɔ bɛwɔ Canada la bɔle a, na duzu ati ɔ?

11 Wɔ 1940 ne anu, Gyihova Alasevolɛ mɔɔ bɛwɔ Canada la yiale dwazotia mɔɔ anu yɛ se. Yemɔti, amaa bɛamaa menli anwu ye kɛ Maanle ne ɛsisi bɛ wɔ nwolɛ adenle mɔɔ menli lɛ sonle anwo la, wɔ 1946, yɛ mediema ne mɔ mɔɔ bɛwɔ ɛkɛ la vale kenle 16 bɔle nolo mɔɔ nuhua a bɛhyehyɛle trate mɔɔ se Quebec’s Burning Hate for God and Christ and Freedom Is the Shame of All Canada la. Trate ɛhye mɔɔ lɛ mukelɛ nna la kpale adua mɔɔ ɛsɔfoma ne zile menli manle bɛdole nzaka, nyane mɔɔ kpolisima hilele bɛ, nee basabasa mɔɔ bɛyɛ bɛtia yɛ mediema mɔɔ bɛwɔ Quebec la anwo ɛdanlɛ bɔkɔɔ. Trate ne hanle kɛ: “Bɛtɛkye Gyihova alasevolɛ mɔɔ ɔngyi mɛla zo a. Bɛbɔ Gyihova alasevolɛ somolɛ kɛyɛ 800 wɔ Greater Montreal.”

12. (a) Duzu a dwazotiama ne yɛle wɔ trate ne nolobɔlɛ ne anwo a? (b) Somolɛ boni a bɛbɔle yɛ mediema ne mɔ a? (Eza nea ɔ bo ɛkɛ edwɛkɛ ne.)

12 Quebec Maanle Kpanyinli Maurice Duplessis, mɔɔ nee Wulomu Kateleke Ɛsɔfo Villeneuve yɛ gyima la akunlu andwo trate ne anwo na ɔhanle kɛ bɛbava “konle mɔɔ anwunvɔnezelɛ ɛnle nu” la bɛadoa Alasevolɛ ne mɔ. Menli mɔɔ bɛbuale bɛ ndɛne la bule bɔle nwolɛ ndɛndɛ vile 800 hɔdwule 1,600. Adekpakyelɛnli raalɛ ko hanle kɛ, “Kpolisima ne hyele yɛ toonwo mɔɔ ɛnee yɛngola yɛ nwo tia.” Bɛbɔle Alasevolɛ mɔɔ bɛhyele bɛ kɛ bɛlɛkyehyɛ trate ne la somolɛ kɛ bɛyɛ “maamɔvoma mbuluku mɔɔ tia mɛla.” *

13. Nwane mɔ a bɛlumuale bɛbɔle bɛ somolɛ kɛ bɛle maamɔvoma a, na kɛzi kɔɔto ne lile edwɛkɛ ne ɛ?

 13 Wɔ 1947, Adiema Aimé Boucher nee ɔ mra mraalɛ Gisèle, mɔɔ yeli ɛvolɛ 18, nee Lucille, mɔɔ yeli ɛvolɛ 11 la a bɛlumuale bɛlile bɛ edwɛkɛ wɔ kɔɔto kɛ bɛle maamɔvoma a. Ɛnee bɛhyɛ Quebec’s Burning Hate trate ne wɔ ɛleka mɔɔ bikye bɛ ɛya mɔɔ wɔ Quebec Sua ne nyiakɛ la azo, noko ɛnee ɔyɛ se kɛ ɛbanwu kɛ bɛle agyegyeamra mɔɔ bɛnli mɛla zo. Ɛnee Adiema Boucher bɛlɛ ɔ nwo aze yɛɛ ɔle bɛtɛɛ, ɔkɔ ye ɛbɔ nu koonwu, na ɔdwu mekɛ ne bie a ɔfa ye ɛkpɔnwɔ ne mɔɔ ehwili doa ye la ɔkɔ sua zo. Noko ɛnee ye abusua ne ɛgyinla ngyegyelɛ mɔɔ bɛhanle nwolɛ edwɛkɛ wɔ trate ne anu la bie mɔ anloa. Kɔɔto ne mɔɔ bɛvale bɛ bɛhɔle la ndɛnebuavolɛ ne mɔɔ ɔngulo Alasevolɛ ne mɔ edwɛkɛ la kpole kɛ ɔbalie daselɛ mɔɔ kile kɛ Boucher abusua ne ɛnze nwolɛ bie la ado nu. Emomu, ɔliele somolɛbɔlɛ ne ɔdole nu kɛ trate ne zile basabasayɛlɛ adua na ɛhye ati ɔwɔ kɛ bɛbua Boucher abusua ne fɔlɛ. Yemɔti ɛnee ndɛnebuavolɛ ne edwɛkɛ ne ala a le kɛ: Ɔle ɛtane kɛ ɛkɛha nɔhalɛ! Bɛbuale Aimé nee Gisèle ndɛne wɔ maamɔvoma mbuluku mɔɔ tia mɛla la anwo, na bɛdole kakula ekyi Lucille bɔbɔ efiade kenle nwiɔ. Eza yɛ mediema ne mɔ vale edwɛkɛ ne hɔle Canada Kɔɔto Kpole mɔɔ wɔ maanle ne anu la anu na bɛliele bɛdole nu kɛ bɛbadie bɛ edwɛkɛ.

14. Duzu a yɛ mediema mɔɔ bɛwɔ Quebec la yɛle wɔ ɛvolɛ ne mɔ mɔɔ bɛkpɔle bɛ la anu a?

14 Wɔ ɔ muala anu, yɛ mediema ne mɔ mɔɔ bɛwɔ Quebec la vale akɛnrasesebɛ hanle Belemgbunlililɛ edwɛkɛ ne dahuu wɔ mekɛ mɔɔ bɛlɛkpɔ bɛ ɛsesebɛ la, na mɔɔ fi nu ba la yɛ anyelielɛ. Bɛbɔle trate ne nolobɔlɛ bo wɔ 1946 la anzi ɛvolɛ nna anu, Alasevolɛ mɔɔ bɛwɔ Quebec la bule bɔle nwo vile 300 ɔhɔdwule 1,000! *

15, 16. (a) Kɛzi Canada Kɔɔto Kpole ne lile Boucher abusua ne edwɛkɛ ne ɛ? (b) Kɛzi konimlilɛ ɛhye hanle yɛ mediema ne mɔ nee awie mɔ ɛ?

15 Wɔ June 1950, Canada Kɔɔto Kpole ne anu ndɛnebuavolɛma ngɔnla ne amuala diele Aimé Boucher edwɛkɛ ne. Siane nsia anzi wɔ December 18, 1950, Kɔɔto ne buale yɛ benle. Duzu ati ɔ? Adiema Glen How, Alasevolɛ ne mɔ lɔya ne hilehilele nu kɛ Kɔɔto ne liele dole nuhua kɛ saa awie maa awie mɔ yɛ basabasa anzɛɛ ɔmaa bɛte atua bɛtia arane a yɛɛ ɔkile kɛ ɔle “maamɔvo” a. Noko “edwɛkɛ zɛhae bie ɛnle trate ne anu, yɛɛ bɛhɛlɛle ye kɛmɔ mɛla maa ɛdendɛlɛ nu fanwodi nwo adenle la.” Adiema How zɔle zolɛ kɛ, “menlumuale menwule kɛzi Gyihova manle yɛlile konim la.” *

16 Ɛnee amgba Kɔɔto Kpole ne kpɔkɛzilɛ ne le konimlilɛ kpole maa Nyamenle Belemgbunlililɛ ne. Ɔyele mɔɔ bɛbagyinla zo bɛali edwɛkɛ gyɛne 122 mɔɔ ɛha mɔɔ bɛbɔle Alasevolɛ mɔɔ bɛwɔ Quebec la somolɛ wɔ nwo kɛ bɛyɛ mbuluku mɔɔ tia mɛla la ɔvile ɛkɛ. Bieko, Kɔɔto ne edwɛkɛ ne hilele kɛ kɛkala Canada maanlema nee maanle mɔɔ bɛ nee Canada wɔ ekpunli ko anu la lɛ adenle ka mɔɔ arane yɛ a ɔgyegye bɛ la anwo edwɛkɛ. Eza konimlilɛ ɛhye bɔle Quebec Asɔne ne nee Maanle ne ɛtetalɛ mɔɔ bɛvale bɛrale Gyihova Alasevolɛ nwo zo la guale. *

 Yɛsi Kongo​—Anzɛɛ Yɛbɔ Nyamenle Belemgbunlililɛ Ne Nolo?

17. Kɛzi arane bie mɔ bɔ mɔdenle kɛ bɛyɛ yɛ edwɛkɛhanlɛ gyima ne ɛ?

17 Kɛmɔ Keleseɛnema mɔɔ lumua la yɛle la, Gyihova azonvolɛ mɔɔ wɔ ɛkɛ ɛnɛ la ɛnle “kɛ menli mɔɔ fa Nyamenle edwɛkɛ ne si kongo la.” (Bɛgenga 2 Kɔlentema 2:17.) Noko arane bie mɔ bɔ mɔdenle kɛ bɛbalua gualilɛ nwo mɛla zo bɛanlea yɛ ɛzonlenlɛ gyima ne azo. Maa yɛzuzu kɛzi kɔɔto ne nleɛnleanle edwɛkɛ ɛhye anu nwunle ye saa Gyihova Alasevolɛ le kongozilɛma anzɛɛ azonvolɛ la anu nwiɔ anwo.

18, 19. Kɛzi Denmark mgbanyima bɔle mɔdenle kɛ bɛsi edwɛkɛhanlɛ gyima ne adenle ɛ?

18 Denmark. Wɔ October 1, 1932, bɛlile mɛla bie mɔɔ ɛnee ɔmmaa adenle kɛ awie badɔne mbuluku wɔ mekɛ mɔɔ ɔtɛdiele kongozilɛ nwo tumi kɛlata la. Noko yɛ mediema ne mɔ anlie bie. Ye alehyenlɛ nu, nolobɔlɛma nnu hɔle daselɛlilɛ wɔ Roskilde, sua bie mɔɔ wɔ maanle ne suakpole Copenhagen adɔleɛ kɛyɛ mayɛlɛ 20 la azo. Ye aledwolɛ nu, ɛnee bɛnnwu nolobɔlɛnli ko, August Lehmann. Bɛhyele ye kɛ ɔlɛtɔne ninyɛne mɔɔ ɔnlɛ tumi kɛlata a.

19 Wɔ December 19, 1932, bɛvale August Lehmann bɛhɔle kɔɔto. Ɔhanle kɛ ɛnee ɔlɛkyehyɛ Baebolo nwo mbuluku yeamaa menli na ɛnee ɔndɔne debie. Kɔɔto ne nee ye yɛle adwenle. Kɔɔto ne hanle kɛ: “Ahenle mɔɔ bɛhye ye la . . . kola nea ɔ nwo na ɔnnyia mɔɔ ɔlɛyɛ la azo nvasoɛ biala yɛɛ ɔtɛyɛle ye adwenle kɛ ɔkpondɛ bie, emomu, gyima mɔɔ ɔlɛyɛ la ɛmaa yebɔ kakɛ.” Kɔɔto ne gyinlanle Alasevolɛ ne mɔ anzi na ɔbuale kɛ gyima mɔɔ ɛnee Lehmann ɛlɛyɛ la “ɛmboka kongozilɛ nwo.” Noko akee ɛnee Nyamenle menli agbɔvolɛma ɛzi kpɔkɛ kɛ bɛsi edwɛkɛhanlɛ gyima ne adenle wɔ maanle ne amuala anu. (Edw. 94:20) Maanle lɔya ne vale edwɛkɛ ne toonwo hɔle maanle ne Kɔɔto Kpole ne anu. Duzu a yɛ mediema ne mɔ yɛle a?

20. Kɛzi Denmark Kɔɔto Kpole ne lile edwɛkɛ ne ɛ, na duzu a yɛ mediema ne mɔ yɛle a?

20 Ɔka dapɛne na bɛahɔha edwɛkɛ ne wɔ Kɔɔto Kpole ne anu la, Alasevolɛ mɔɔ bɛwɔ Denmark amuala la wulale bɛ edwɛkɛhanlɛ gyima ne anu. Wɔ Dwɛkɛ, October 3, 1933, Kɔɔto Kpole ne vale ye kpɔkɛzilɛ ne dole gua. Ɔ nee kɔɔto ekyi ne yɛle adwenle kɛ August Lehmann ando mɛla. Edwɛkɛ ɛhye hilele kɛ Alasevolɛ ne mɔ bahola aha edwɛkɛ ne dahuu mɔɔ awie ɛngyegye bɛ a. Mediema ne mɔ akee yɛle edwɛkɛhanlɛ gyima ne dɔɔnwo bɛvale bɛhilele kɛ bɛ nye sɔ konim mɔɔ Gyihova ɛmaa bɛli la. Ɔvi zɔhane Kɔɔto edwɛkɛ ne azo, yɛ mediema mɔɔ bɛwɔ Denmark la ɛhola ɛyɛ bɛ ɛzonlenlɛ gyima ne mɔɔ arane ɛngyegye bɛ a.

Alasevolɛ akɛnrasesebɛma mɔɔ wɔ Denmark wɔ 1930 ne anu

21, 22. Kpɔkɛ boni a U.S. Kɔɔto Kpole ne zile wɔ Adiema Murdock edwɛkɛ ne anwo a?

21 United States. Wɔ Molɛ, February 25, 1940, bɛhyele adekpakyelɛnli Robert Murdock, Jr., nee Alasevolɛ gyɛne nsuu wɔ mekɛ mɔɔ bɛlɛka edwɛkɛ ne wɔ Jeannette, suakpole bie mɔɔ bikye Pittsburgh mɔɔ wɔ Pennsylvania maanle nu la. Bɛbuale bɛ fɔlɛ kɛ bɛandɔ tumi kɛlata mɔɔ maa bɛkyɛ mbuluku la. Bɛvale  edwɛkɛ ne bɛhɔle bieko la, U.S. Kɔɔto Kpole ne liele dole nu kɛ ɔbadie bɛ edwɛkɛ.

22 Wɔ May 3, 1943, Kɔɔto Kpole ne vale ye kpɔkɛzilɛ ne mɔɔ boa Alasevolɛ ne mɔ la dole gua. Kɔɔto ne anlie tumi kɛlata mɔɔ ɔwɔ kɛ bɛdie la ando nu ɔluakɛ yemɔ “batinlitinli nwolɛ adenle mɔɔ Arane Mɛla ne ɛva ɛmaa la azo.” Kɔɔto ne bɔle suakpole ne mɛla ne guale kɛ ɔsi “nwolɛ adenle mɔɔ menli lɛ kɛlɛ mbuluku na bɛsonle mɔɔ awie ɛngyegye bɛ la adenle.” Mɔɔ Ndɛnebuavolɛ William O. Douglas fa Kɔɔto ɛkɛ ne amra dɔɔnwo nzuzulɛ ado gua la, ɔhanle kɛ, tɛ Gyihova Alasevolɛ gyima ne “ala a le kɛ bɛbaha edwɛkɛ ne anzɛɛ bɛbahyɛ ɛzonlenlɛ nwo mbuluku. Ɔ mu nwiɔ bɔ nu.” Ɔdoale zolɛ kɛ: “Ɔwɔ kɛ bɛbɔ ɛzonlenlɛ nu gyima ɛhye anwo bane . . . kɛmɔ bɛbɔ asɔne azua nu ɛzonlenlɛ mɔɔ bɛgyinla ɛkponle nzi bɛkilehile anwo bane la.”

23. Duzu ati a 1943 kɔɔto konimlilɛ ngakyile ne mɔ hyia yɛ ɛnɛ a?

23 Ɛnee Kɔɔto Kpole ne ndɛnebualɛ ne le mɛla adenle zo konimlilɛ kpole maa Nyamenle menli. Ɔzile menli holɛ mɔɔ yɛde la azo​—Keleseɛne azonvolɛ, tɛ kongozilɛma. Wɔ kenle titile zɔhane wɔ 1943, Gyihova Alasevolɛ lile bɛ edwɛkɛ 13 ne anu 12, mɔɔ Murdock ndɛnebualɛ ne boka nwo la anu konim wɔ Kɔɔto Kpole ne anyunlu. Kɔɔto kpɔkɛzilɛ ɛhye mɔ ɛyɛ neazo  kpole wɔ kenlensa ye kɔɔto edwɛkɛ bie mɔ anu wɔ mekɛ mɔɔ yɛ dwazotiama zule adenle mɔɔ yɛlɛ kɛ yɛbaha Belemgbunlililɛ edwɛkɛ ne wɔ bagua nu nee azua nu anwo kpolera la.

“Ɔwɔ Kɛ Yɛtie Nyamenle Yɛtɛla Sonla”

24. Saa arane bie fa ɔ sa to yɛ edwɛkɛhanlɛ gyima ne azo a, duzu a yɛyɛ a?

24 Kɛ Gyihova azonvolɛ la, saa arane ne mɔ maa yɛ adenle kɛ yɛha Belemgbunlililɛ edwɛkɛ ne a, yɛkile nwolɛ anyezɔlɛ kpole. Noko saa arane bie fa ɔ sa to yɛ edwɛkɛhanlɛ gyima ne azo a, yɛkakyi ndenle mɔɔ yɛdua zo yɛka edwɛkɛ ne la na yɛkɔ zo yɛyɛ yɛ gyima ne wɔ adenle biala mɔɔ ɔbayɛ boɛ la azo. Kɛmɔ ɛzoanvolɛma ne yɛle la, “ɔwɔ kɛ yɛtie Nyamenle yɛtɛla sonla.” (Gyi. 5:29; Mat. 28:19, 20) Wɔ mekɛ ko ne ala, yɛsɛlɛ kɔɔto ne mɔ kɛ bɛye bɛ sa mɔɔ bɛva bɛdo yɛ gyima ne azo la. Suzu neazo nwiɔ anwo.

25, 26. Edwɛkɛ boni a hɔle zo wɔ Nicaragua mɔɔ hɔwiele Kɔɔto Kpole ne anyunlu a, na boni a vile nu rale a?

25 Nicaragua. Wɔ November 19, 1952, edwɛkpatɛlɛvolɛ nee ɔfese sonvolɛ Donovan Munsterman hɔle Office of Immigration ne mɔɔ wɔ maanle ne suakpole Managua azo la anu. Bɛhanle bɛhilele ye kɛ ɔhɔnwu Arnoldo García, ɔfese kpanyinli ne. Kpanyinli ne hanle hilele Donovan kɛ bɛdua Gyihova Alasevolɛ mɔɔ bɛwɔ Nicaragua la amuala kɛ “bɛmmaka bɛ edwɛkɛ ne na bɛkilehile bɛmaa menli nwu bɛ ɛzonlenlɛ ne bieko.” Mɔɔ ɔbizale ye deɛmɔti la, Kpanyinli García hilehilele nu kɛ arane maanle sonvolɛ ne ammaa Alasevolɛ ne mɔ adenle kɛ bɛyɛ bɛ ɛzonlenlɛ gyima ne yemɔti bɛbule bɛ kɛ bɛnlɛ adwenle kpalɛ. Nwane mɔ a bɔle yɛ somolɛ ne a? Wulomu Kateleke ɛsɔfo ne mɔ.

Nicaragua mediema ne mɔ wɔ mekɛ mɔɔ bɛvale bɛ sa bɛdole gyima ne azo la

26 Ɛkɛ ne ala Adiema Munsterman eza vale edwɛkɛ ne hɔdole Ministry of Government and Religions ne nee Maanle Kpanyinli Anastasio Somoza García anyunlu, noko bɛampili  ye. Yemɔti mediema ne mɔ hakyile bɛ ndenle ne. Bɛtotole Belemgbunlililɛ Asalo ne mɔ anu, bɛyiale wɔ ekpunli ngyikyi ngyikyi nu na bɛgyakyile awɔdenle zo daselɛlilɛ, noko bɛhɔle zo bɛhanle Belemgbunlililɛ edwɛkɛ ne. Wɔ mekɛ ko ne ala anu, bɛvale bɛ edwɛkɛ bɛhɔdole Nicaragua Kɔɔto Kpole ne anyunlu kɛ ɔmaa bɛye bɛ sa mɔɔ bɛva bɛdo gyima ne azo la. Adwelie ngɛlata manle edwɛkɛ ne amuala salole, na Kɔɔto Kpole ne liele dole nu kɛ ɔbadie bɛ edwɛkɛ ne. Boni a vile nu rale a? Wɔ June 19, 1953, Kɔɔto Kpole ne hɛlɛle ye kpɔkɛzilɛ ne mɔɔ boa Alasevolɛ ne mɔ la. Kɔɔto ne nwunle kɛ bɛ sa mɔɔ bɛvale bɛdole gyima ne azo la tia ɛdendɛlɛ, adwenle nee diedi nwo adenle mɔɔ menli lɛ la wɔ mɛla nu. Eza ɔhanle kɛ Nicaragua arane ne nee Alasevolɛ ne mɔ ɛva agɔnwolɛ kɛmɔ ɛnee ɔde la.

27. Duzu ati a Kɔɔto ne kpɔkɛzilɛ ne zinle Nicaraguama anwo a, na kɛzi mediema ne mɔ bule konimlilɛ ɛhye ɛ?

27 Ɔzinle Nicaraguama anwo kɛ Kɔɔto Kpole ne ɛha bie ɛmaa Alasevolɛ ne mɔ la. Kolaa na zɔhane mekɛ ne adwu la, ɛsɔfo ne mɔ nyianle Kɔɔto ne nwo zo tumi toonwo mɔɔ ɛnee akee Kɔɔto ne ɛngulo kɛ ɔbabɔ bɛ edwɛkɛ yeagua. Eza arane mgbanyima tumi ne yɛle kpole mɔɔ ɔdwu mekɛ ne bie a Kɔɔto ne ɛngola ɛmbɔ bɛ kpɔkɛzilɛ ne ɛngua. Yɛ mediema ne mɔ liele lile bɔkɔɔ kɛ, ɔluakɛ bɛ Belemgbunli ne bɔ bɛ nwo bane na bɛkɔ zo bɛka edwɛkɛ ne la ati a bɛlile konim ɛhye a.​—Gyi. 1:8.

28, 29. Nzenzaleɛ boni a rale arɛlevilɛ nu wɔ Zaire wɔ 1980 avinli ɛkɛ ne a?

28 Zaire. Wɔ 1980 avinli ɛkɛ ne, ɛnee Alasevolɛ kɛyɛ 35,000 a wɔ Zaire mɔɔ kɛkala bɛfɛlɛ ye Democratic Republic of Congo la. Amaa bɛali Belemgbunlililɛ gyima ne mɔɔ ɛlɛnyi ndɛndɛ anwo gyima la, ɛnee ɔfese ne ɛlɛsisi azua fofolɛ. Wɔ December 1985, bɛyɛle maanle maanle avinli nyianu bie wɔ maanle ne suakpole Kinshasa azo na mediema 32,000 mɔɔ bɛvi maanle ngakyile zo la yile suakpole ne nwɔhoalilɛleka ne. Noko nzinlii, Gyihova azonvolɛ tɛnlabelɛ ne bɔle ɔ bo hakyile. Duzu a zile a?

29 Adiema Marcel Filteau, edwɛkpatɛlɛvolɛ bie mɔɔ vi Quebec, Canada, mɔɔ nwunle kpɔdekpɔdeyɛlɛ mɔɔ Duplessis tumililɛ ne vale rale la, ɛnee sonle wɔ Zaire wɔ zɔhane mekɛ ne. Ɔhanle mɔɔ zile la: “Wɔ March 12, 1986, mediema mɔɔ ɛnee li yɛ nyunlu la nyianle kɛlata mɔɔ kile kɛ maanle ne mɛla ɛnlie Gyihova Alasevolɛ ahyehyɛdeɛ ne mɔɔ wɔ Zaire la ɛndo nu.” Maanle Kpanyinli Mobutu Sese Seko, a vale ɔ sa wulale kɛlata ɛhye abo a.

30. Kpɔkɛ mɔɔ anu yɛ se la boni a ɛnee ɔwɔ kɛ Ɔfese Kɔmatii ne si a, na duzu a bɛzile kpɔkɛ kɛ bɛyɛ a?

30 Ye alehyenlɛ nu, maanle ne riledio vale dole gua kɛ: “Yɛnrɛde Gyihova Alasevolɛ anwo edwɛkɛ wɔ [Zaire] bieko ɛlɛ.” Kpɔdekpɔdeyɛlɛ bɔle ɔ bo ɛkɛ ne ala. Bɛzɛkyele Belemgbunlililɛ Asalo ne mɔ, na bɛwuale yɛ mediema ne mɔ, bɛhyele bɛ, bɛguale bɛ efiade na bɛbole bɛ. Bɛguale ngakula bɔbɔ efiade. Wɔ October 12, 1988, arane ne liele yɛ ahyehyɛdeɛ ne agyadeɛ, na Maanle Sinzavolɛma ne, sogyama eku bie, hɔdɛnlanle ɔfese ɛkɛ. Mediema mɔɔ fɛta la hɔzɛlɛle Maanle Kpanyinli Mobutu bieko,  noko yeanga nwolɛ ɛhwee. Wɔ zɔhane mekɛ ne, ɛnee ɔwɔ kɛ Ɔfese Kɔmatii ne si kpɔkɛ mɔɔ anu yɛ se: “Asoo ɔwɔ kɛ yɛfa edwɛkɛ ne yɛkɔto Kɔɔto Kpole ne anyunlu anzɛɛ ɔwɔ kɛ yɛkendɛ?” Timothy Holmes, mɔɔ ɛnee le edwɛkpatɛlɛvolɛ nee maanle ne Ɔfese Kɔmatii ne ngitanwodivolɛ wɔ zɔhane mekɛ ne la hanle kɛ: “Yɛzɛlɛle nrɛlɛbɛ nee adehilelɛ yɛvile Gyihova ɛkɛ.” Nzinlii mɔɔ yɛyɛle nwolɛ asɔne la, kɔmatii ne nwunle kɛ ɔnfɛta kɛ bɛbava edwɛkɛ ne bɛahɔ kɔɔto wɔ zɔhane mekɛ ne. Emomu, bɛvale bɛ adwenle bɛziele mediema ne mɔ mɔɔ bɛnea bɛ nee ndenle mɔɔ bɛdua zo bɛayɛ edwɛkɛhanlɛ gyima ne la azo.

“Mekɛ mɔɔ bɛdi edwɛkɛ ne wɔ kɔɔto la, yɛnwunle kɛzi Gyihova kola kakyi ninyɛne la”

31, 32. Kpɔkɛ mɔɔ yɛ azibɛnwo la boni a Zaire Kɔɔto Kpole ne zile a, na kɛzi ɔhanle yɛ mediema ne mɔ ɛ?

31 Ɛvolɛ dɔɔnwo pɛle nu. Ngyegyelɛ mɔɔ bɛvale bɛrale Alasevolɛ ne mɔ anwo zo la hanle aze yɛɛ ɛbulɛ mɔɔ menli lɛ maa sonla fanwodi la yɛle kpole wɔ maanle ne anu. Ɔfese Kɔmatii ne nwunle kɛ mekɛ ɛdwu kɛ bɛbava edwɛkɛ ne bɛahɔdo Zaire Kɔɔto Kpole ne anyunlu. Ɔyɛ anyelielɛ kɛ, Kɔɔto Kpole ne hanle kɛ bɛbanleɛnlea edwɛkɛ ne anu. Wɔ January 8, 1993, mɔɔ ɛnee asɛɛ ɛvolɛ nsuu ɛdwu ɔvi mekɛ mɔɔ maanle kpanyinli ne vale ɔ sa dole yɛ gyima ne azo la, Kɔɔto ne hanle kɛ mɔɔ arane ne vale yɛle Alasevolɛ ne mɔ la tia mɛla na bɛyele bɛ sa mɔɔ bɛvale bɛdole yɛ gyima ne azo la. Dwenle mɔɔ ɛhye kile la anwo! Ndɛnebuavolɛma ne vale bɛ ngoane dole esiane nu bɔle maanle kpanyinli ne kpɔkɛbɔlɛ guale! Adiema Holmes hanle kɛ, “Mekɛ mɔɔ bɛdi edwɛkɛ ne wɔ kɔɔto la, yɛnwunle kɛzi Gyihova kola kakyi ninyɛne la.” (Dan. 2:21) Konimlilɛ ɛhye manle yɛ mediema ne mɔ diedi nu mianle. Bɛdele nganeɛ kɛ Belemgbunli ne, Gyisɛse, hilele ye menli ne adenle manle bɛnwunle mekɛ nee kɛzi ɔwɔ kɛ bɛyɛ ninyɛne la.

Mediema mɔɔ wɔ Democratic Republic of Congo lile fɛlɛko wɔ mekɛ mɔɔ bɛnyianle fanwodi kɛ bɛzonle Gyihova la

 32 Mɔɔ bɛyele bɛ sa bɛvile gyima ne azo la, bɛmanle ɔfese ne adenle bɛmanle ɔzile ɔfese fofolɛ na ɔvale edwɛkpatɛlɛvolɛma nee Baebolo nwo mbuluku ɔrale maanle ne anu. * Nea kɛzi ɔyɛ anyelielɛ kɛ Nyamenle menli mɔɔ wɔ ewiade amuala bɛanwu kɛzi Gyihova bɔ ye menli ne sunsum nu boɛlilɛ nwo bane la!​—Aye. 52:10.

‘Gyihova Le Me Boavolɛ’

33. Duzu a yɛsukoa yɛfi kɔɔto edwɛkɛ ekyi ɛhye mɔɔ yɛnleɛnlea nu la anu a?

33 Kɔɔto edwɛkɛ mɔɔ yɛnleɛnlea nu la maa ɔda ali kɛ Gyisɛse lile ye ɛwɔkɛ ɛhye azo: “Mebamaa bɛ nrɛlɛbɛ nee edwɛkɛ agbɔkɛ meamaa bɛaha na bɛ kpɔvolɛma biala ɛnrɛhola bɛ nyunlu gyinla yeye bɛ nloa azo.” (Bɛgenga Luku 21:12-15.) Ɔdwu mekɛ ne bie a Gyihova maa ɛnɛ mekɛ ye anu Gameeleɛlema bɔ ye menli ne anwo bane anzɛɛ ɔka ndɛnebuavolɛ nee lɔya akɛnrasesebɛma ɔmaa bɛdi pɛlepɛle. Gyihova ɛmaa yɛ dwazotiama akodeɛ ne mɔ anloa ɛtili. (Bɛgenga Ayezaya 54:17.) Dwazotia ɛngola ɛnzi Nyamenle gyima ne adenle.

34. Duzu ati a yɛ kɔɔto konimlilɛ ne mɔ yɛ nwanwane ɛ, na bɛkile duzu? (Eza nea ɛlɛka “ Kɔɔto Konimlilɛ Mɔɔ Boale Belemgbunlililɛ Edwɛkɛhanlɛ.”)

34 Duzu ati a yɛ kɔɔto konimlilɛ ne mɔ yɛ nwanwane ɛ? Suzu ɛhye anwo nea: Gyihova Alasevolɛ ɛnle menli mɔɔ bɛlie duma anzɛɛ bɛnyia tumi wɔ menli nwo zo a. Yɛndo ɛra yɛɛ yɛngyinla maanyɛlɛma nzi. Eza bɛbule yɛ nuhua ne mɔɔ bɛvale bɛ bɛhɔle kɔɔto la kɛ “bɛle menli mɔɔ ɛnze nwoma.” (Gyi. 4:13) Yemɔti wɔ sonla nye zo, ɛnee kɔɔto ne ɛnlɛ debie kpalɛ biala mɔɔ ɔgyinla zo yeaho yeatia ɛzonlenlɛ nee maanyɛlɛ nu dwazotiama mɔɔ bɛlɛ tumi la na yeaboa yɛ a. Noko kɔɔto ne mɔ ɛli ɛboa yɛ fane dɔɔnwo! Yɛ konimlilɛ ne maa ɔda ali kɛ ‘yɛgyinla Nyamenle anyunlu yɛtendɛ kɛ Kelaese sonvolɛma.’ (2 Kɔl. 2:17) Ɛhye ati, yɛ nee ɛzoanvolɛ Pɔɔlo ka kɛ: “[Gyihova] le me boavolɛ, menrɛzulo ɛhwee.”​—Hib. 13:6.

^ ɛden. 9 Cantwell nee State of Connecticut edwɛkɛ ne a lumua wɔ edwɛkɛ 43 mɔɔ ɛnee la U.S. Kɔɔto Kpole ne anyunlu mɔɔ Adiema Hayden Covington holale lile boale mediema ne mɔ a. Ɔwule 1978. Ɔ ye, Dorothy, zonlenle nɔhalɛ nu hɔkpulale ye ewule nu wɔ 2015 wɔ mekɛ mɔɔ ɛnee yenyia ɛvolɛ 92 la.

^ ɛden. 12 Bɛgyinlanle mɛla bie mɔɔ bɛlile wɔ 1606 la azo a bɛbɔle bɛ somolɛ a. Ɔmaa agyinladulɛma adenle kɛ, saa bɛte nganeɛ kɛ edwɛkɛ mɔɔ awie ɛha la anloa yɛ se a, bɛbahola bɛabua ahenle fɔlɛ​—saa bɔbɔ mɔɔ ɔhanle la le nɔhalɛ a.

^ ɛden. 14 Wɔ 1950, dahuu ɛzonlenlɛ gyimayɛvoma 164 zonlenle wɔ Quebec​​—ɛnee Geleade sukoavoma 63 mɔɔ bɛwie bɛ ndetelɛ ne la boka nwo ɔnva nwo dwazotia anu ɛsesebɛ mɔɔ ɛnee la bɛ nyunlu la.

^ ɛden. 15 Ɛnee Adiema W. Glen How le lɔya mɔɔ lɛ akɛnrasesebɛ mɔɔ honle manle Gyihova Alasevolɛ ɛya dɔɔnwo mɔɔ bɛwɔ Canada nee maanle gyɛne zo la wɔ kɔɔto ɔvi 1943 kɔdwu 2003.

^ ɛden. 16 Ɛkpondɛ edwɛkɛ ɛhye anu ngilehilenu dɔɔnwo a, nea edwɛkɛ “The Battle Is Not Yours, but God’s” mɔɔ wɔ April 22, 2000, Awake! ne mukelɛ 18-24 la anu.

^ ɛden. 32 Ngyikyi ngyikyi Maanle Sinzavolɛma ne vile ɔfese ɛkɛ ne; noko bɛzile ɔfese fofolɛ wɔ ɛleka gyɛne.