Wulu kɔ nuhua edwɛkɛ ne azo

Wulu kɔ nuninyɛne ne azo

 TILE 22

Belemgbunlililɛ Ne Yɛ Nyamenle Ɛhulolɛdeɛ Wɔ Azɛlɛ Ye Azo

Belemgbunlililɛ Ne Yɛ Nyamenle Ɛhulolɛdeɛ Wɔ Azɛlɛ Ye Azo

TILE NE BODANE

Belemgbunlililɛ ne maa Nyamenle ɛwɔkɛ mɔɔ fane alesama nee azɛlɛ ne anwo la amuala ba nu

1, 2. (a) Duzu ati a ɔdwu mekɛ ne bie a ɔbahola yeayɛ se kɛ yɛbalie yɛali kɛ Paladaese ne bara amgba a? (b) Duzu a baboa yɛ yeamaa diedi mɔɔ yɛlɛ wɔ Nyamenle ɛwɔkɛ ne mɔ anu la anu amia a?

ƆLUA alehyenlɛ ne anu gyima ɛsesebɛ ti, adiema nrenya bie radwule debiezukoalɛ bo la ɛnee yevɛ. Ye gyima nu kpanyinli nee ye anli ye boɛ, ye abusua ne mɔɔ ɔnea bɛ nee ewule bie mɔɔ ɛlɛgyegye ɔ ye la ɛyɛ ye adwenleadwenle. Mekɛ mɔɔ edwɛne ne mɔɔ bɛfa bɛabɔ debiezukoalɛ ne abo bɔle ɔ bo la, ɔgule ɛnwomenle na ɔ nye liele kɛ yehola ɔ nee ɔ mediema ɛrayia wɔ Belemgbunlililɛ Asalo ne la. Edwɛne ne fane Paladaese asetɛnla mɔɔ yɛ nye la la anwo na nuhua edwɛkɛ ne hanle kɛ ɔva ɔ nye ɔbu kɛ ɔwɔ asetɛnla zɛhae anu. Ɔ nye die edwɛne ɛhye anwo, na mekɛ mɔɔ ɔ nee ye abusua ne ɛlɛto la, kenlebie anyelazo ne kyekyele ɔ rɛle.

2 Wɔde nganeɛ zɛhae bie ɛlɛ ɔ? Yɛ nuhua dɔɔnwo ɛde bie ɛlɛ. Nɔhalɛ nu, ɛtane ewiade ɛhye anu asetɛnla bahola amaa yeayɛ se kɛ yɛbalie yɛali kɛ Paladaese ne bara amgba. Yɛwɔ “anwongyelelɛ” mekɛ nu, yɛɛ ewiade ne mɔɔ yɛde nu la ɛnle kɛ paladaese. (2 Tem. 3:1) Duzu a bahola aboa yɛ yeamaa yɛanwu kɛ yɛ anyelazo ne bayɛ zɔ a? Kɛzi yɛdie yɛdi kɛ ɔnrɛhyɛ Nyamenle Belemgbunlililɛ ne barali tumi wɔ alesama amuala anwo zo ɛ? Bɛmaa yɛzuzu Gyihova ngapezo bie mɔ mɔɔ ye menli nwunle kɛ bɛpenle zo wɔ tete ne la anwo. Akee yɛbanlea kɛzi ngapezo zɔhane mɔ nee gyɛne ɛlɛpe zo anyelielɛ nu kɛkala la. Awieleɛ kolaa, mekɛ mɔɔ yɛ diedi ne anu ɛmia la, akee yɛbava yɛ adwenle yɛazie mɔɔ ngapezo ɛhye mɔ kile maa yɛ kenlebie la azo.

Kɛzi Gyihova Lile Ye Ɛwɔkɛ Zo Mekɛ Bie La

3. Ɛwɔkɛ boni a kyekyele Dwuuma mɔɔ ɛnee wɔ nlɔnu wɔ Babelɔn la arɛle a?

3 Pɛ asetɛnla mɔɔ ɔbayɛ kɛ ɛnee Dwuuma mɔɔ bɛwɔ nlɔnu wɔ Babelɔn wɔ nu wɔ ɛvoya nsia K.Y.M. anu la anwo nvoninli nea. Bɛ nuhua dɔɔnwo nyinle wɔ nlɔnu kɛ bɛ awovolɛ la, na ɛnee asetɛnla ne anu yɛ se kpalɛ. Gyihova anu diedi mɔɔ bɛlɛ la ati Babelɔnma golole bɛ nwo. (Edw. 137:1-3) Dwuuma mɔɔ bɛdi nɔhalɛ la zɔle anyelazo ko ɛhye anu wɔ ɛvolɛ dɔɔnwo anu: Gyihova bɔle ɛwɔkɛ kɛ ɔbamaa  ye menli ne azia ahɔ bɛ sua zo. Gyihova hanle kɛ ɛkɛ ne asetɛnla ne bayɛ ngakyile kolaa. Ɔvale Dwuda azɛlɛ ne mɔɔ bɛ sa baha ye bieko bɔbɔ la ɔtotole Yidɛn tola ne anwo​—ɔbayɛ paladaese! (Bɛgenga Ayezaya 51:3.) Ɛnee ɛwɔkɛ ne bamaa Nyamenle menli anyia anwodozo na yeaye bɛ adwenle nu mɔɔ bie a yeyɛ bɛ kesee la yeavi ɛkɛ. Adenle boni azo? Suzu ngapezo titile bie mɔ anwo nea.

4. Kɛzi Gyihova manle Dwuuma nyianle anwodozo kɛ bɛbanyia banebɔlɛ wɔ bɛ sua zo ɛ?

4 Banebɔlɛ. Tɛ paladaese azɛlɛ mumua ne a menli zɔhane mɔɔ bɛhɔle nlɔnu la bazia ahɔ zo a, emomu bɛbahɔ azɛlɛ mɔɔ ɛdɔ mgbane ɛvolɛ 70 mɔɔ bɛ nuhua ekyi bie ala a ɛnwu ye ɛlɛ la azo. Wɔ tete ne, ɛnee awenade, bedi, boboduma nee nane anwo ɛzulolɛ ngakyile zonle wɔ zɔhane mekɛ ne. Bie a abusua tile badwenle nwolɛ kɛ, ‘Kɛ ɔkɛyɛ na meabɔ me ye nee me mra anwo bane ɛ? Na mboane ne nee nlankɛ ne mɔ noko ɛ?’ Ɔnyɛ nwanwane kɛ bɛbadwenledwenle ɛhye mɔ anwo. Eza dwenle Nyamenle ɛwɔkɛ ne mɔɔ wɔ Ayezaya 11:6-9 nee kɛzi ɔbahola yeakyekye bɛ rɛle la anwo nea. (Bɛgenga.) Gyihova luale edwɛkɛ ɛhye azo manle menli mɔɔ bɛwɔ nlɔnu la nyianle anwodozo kɛ ɛhwee ɛnrɛyɛ bɛ nee bɛ nyɛmoa ne mɔ. Awenade bali ndile, mɔɔ kile kɛ ɔnrɛhye Dwuuma nlankɛ ne mɔ ɔnrɛli. Ɛnee ɔnle kɛ nɔhavoma sulo nane anwo ɛzulolɛ ɛhye mɔ. Gyihova bɔle ɛwɔkɛ kɛ, ɛsɛlɛ zo o, ɛhoayelɛ nu o, ɛhwee ɛnrɛyɛ ye menli ne wɔ Dwuda azɛlɛ ne mɔɔ bɛbava la azo.​—Yiz. 34:25.

5. Ngapezo boni a boale menli mɔɔ bɛvile nlɔnu la ɔmanle bɛnyianle anwodozo kɛ Gyihova bali bɛ ngyianlɛ biala anwo gyima ɛ?

5 Ninyɛne dɔɔnwo. Ninyɛne gyɛne bahola agyegye wɔ. ‘Mebahola meanlea me abusua ne wɔ azɛlɛ ne mɔɔ yɛbahɔ zo la azo ɔ? Nienwu a yɛbadɛnla a? Asoo yɛbanyia gyima yɛayɛ, na asoo ɔbayɛ kpalɛ yeadɛla mekɛ mɔɔ ɛnee yɛwɔ nlɔnu la?’ Gyihova luale ngapezo ne mɔ azo buale zɔhane kpuyia ne mɔ noko. Gyihova bɔle ɛwɔkɛ kɛ ezule badɔ amaa ye menli mɔɔ bɛyɛ tieyɛ la; na ɛhye bamaa “bɛ bɛyɔba azo.” (Aye. 30:23) Mɔɔ fane dabelɛ nee gyima kpalɛ nwo la, Gyihova bɔle ye menli ne ɛwɔkɛ kɛ: “Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie. Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali.” (Aye. 65:21, 22) Saa ɛfa asetɛnla ne ɛtoto nlɔnu mɔɔ bɛhɔle ye Babelɔn la anwo a, ɔbayɛ ngakyile kolaa. Na bɛ ngyegyelɛ mgbole ne mɔ mɔɔ manle bɛhɔle nlɔnu la ɛ?

6. Kpɔkɛdelɛ nwo ngyegyelɛ boni a Nyamenle menli ɛyia ye mekɛ tendenle a, na anwodozo boni a Gyihova manle menli mɔɔ bɛlɛfi nlɔnu la nyianle a?

6 Sunsum nu kpɔkɛdelɛ. Kolaa na Nyamenle menli ahɔ nlɔnu la, ɛnee bɛnde kpɔkɛ sunsum nu. Gyihova luale Ayezaya anwo zo hanle ye wɔ menli ne anwo kɛ: “Bɛ ti kanrɛlɛ mumua ne ɛnde kpɔkɛ, yɛɛ bɛ ahonle ɛwu.” (Aye. 1:5) Wɔ sunsum nu, ɛnee bɛ nye ɛzi yɛɛ bɛ nzo ɛdi, ɔluakɛ ɛnee bɛduodua bɛ nzo wɔ Gyihova folɛdulɛ ne anwo na bɛheda bɛ nye wɔ wienyi ne mɔɔ ɔlɛkile bɛ la anwo. (Aye. 6:10; Gyɛ. 5:21; Yiz.  12:2) Saa menli mɔɔ bavi nlɔnu ahɔ la yia ngyegyelɛ ko ne ala bie a, anwobanebɔlɛ boni a bɛbanyia a? Asoo anrɛɛ bɛnrɛminli Gyihova anyunlu ɛlolɛ? Nea kɛzi Gyihova ɛwɔkɛ ɛhye manle bɛ anwosesebɛ a: “Mekɛ ne anu anzodilirama bade buluku nu edwɛkɛ, na anyezinlirama vi bɛ awozinli kabii ne anu anwu debie.” (Aye. 29:18) Amgba, Gyihova bayɛ ye menli ne mɔɔ bɛnlu bɛ nwo la sunsum nu ayile. Saa bɛkɔ zo bɛyɛ tieyɛ a, ɔbamaa bɛ adehilelɛ nee ngilehilelɛ mɔɔ maa ngoane a.

7. Kɛzi ɛwɔkɛ mɔɔ Nyamenle bɔle ye menli mɔɔ wɔ nlɔnu la rale nu ɛ, na duzu ati a ɔwɔ kɛ ɛhye maa yɛ diedi nu mia a?

7 Asoo Gyihova lile ye ɛwɔkɛ zo? Edwɛkɛ mɔɔ zile la bua kpuyia ɛhye. Dwuuma mɔɔ ziale rale bɛ maanle nu la nyianle anwobanebɔlɛ, ninyɛne dɔɔnwo nee sunsum nu kpɔkɛdelɛ. Kɛ neazo la, Gyihova bɔle bɛ nwo bane vile menli mɔɔ ɛbɔ bɛ ɛyia mɔɔ ɛnee bɛ nwo yɛ se na bɛzonle bɛtɛla bɛ la anwo. Nane anwo ɛzulolɛ angye bɛ nyɛmoa anli. Nɔhalɛ nu, zɔhane Dwuuma ne nwunle paladaese ngapezo ne mɔɔ rale nu la ekyi bie ala kɛmɔ Ayezaya, Gyɛlɛmaya nee Yizikeɛle hɛlɛle la​—noko zɔhane edwɛkɛ ne mɔɔ rale nu mɔɔ Nyamenle menli nwunle ye la yɛ anyelielɛ na ɛnee yemɔ a bɛhyia nwo wɔ zɔhane mekɛ ne anu a. Saa yɛdwenle mɔɔ Gyihova yɛle manle ye menli ne la anwo a, yɛ diedi ne anu bamia. Saa ekyi ne mɔɔ rale nu la manle bɛ nye liele a, ɛnee kɛzi mɔɔ ɔbara nu bɔkɔɔ la bayɛ ɛ? Suzu mɔɔ Gyihova ɛyɛ ɛmaa yɛ ɛnɛ la anwo.

Kɛzi Gyihova Ɛbɔ Ɔ Bo Kɛ Ɔmaa Ye Ɛwɔkɛ Ne Mɔ Ara Nu Wɔ Yɛ Mekɛ Ye Anu La

8. “Maanle” boni a Nyamenle menli de nu ɛnɛ a?

8 Ɛnɛ, Gyihova menli ɛnde ɛleka ko anzɛɛ maanle ko anu. Emomu, Keleseɛnema mɔɔ bɛkpokpa bɛ la bɔ nu yɛ sunsum nu maanle, ‘Nyamenle Yizilayɛ.’ (Gal. 6:16) Bɛ nee bɛ gɔnwo mɔ ‘mboane gyɛne’ ne bɔ nu tɛnla sunsum nu “maanle,” ɛleka mɔɔ bɛbɔ nu bɛsonle Gyihova Nyamenle la anu. Zɔhane ɛzonlenlɛ ne le bɛ ɛbɛlabɔlɛ adenle. (Dwɔn 10:16; Aye. 66:8) Na “maanle” boni a Gyihova ɛva ɛmaa yɛ a? Ɔle sunsum nu paladaese. Nyamenle ɛwɔkɛ ne mɔ mɔɔ fane tɛnlabelɛ mɔɔ le kɛ Yidɛn ɛdeɛ ne la ɛra nu sunsum nu. Suzu neazo bie mɔ anwo nea.

9, 10. (a) Kɛzi ngapezo mɔɔ wɔ Ayezaya 11:6-9 la ɛlɛpe zo ɛnɛ ɛ? (b) Daselɛ boni a maa yɛnwu kɛ anzondwolɛ wɔ Nyamenle menli avinli a?

9 Banebɔlɛ. Yɛnwu koyɛlɛ nee anzondwolɛ mɔɔ wɔ nane anwo ɛzulolɛ nee menli nee bɛ nyɛmoa avinli la anwo nvoninli kɛnlɛma bie wɔ ngapezo mɔɔ wɔ Ayezaya 11:6-9 la anu. Asoo zɔhane nvoninli ne ɛlɛba nu ɛnɛ wɔ sunsum nu ɔ? Ɛhɛe! Wɔ ngyɛnu 9 ne anu, yɛnwu deɛmɔti ninyɛne ɛhye mɔ anwo ɛnrɛyɛ ɛzulolɛ bieko la: “Ɔluakɛ [Gyihova] anwo adwenle bayi azɛlɛ ye tɛkɛɛ kɛ nzule mɔɔ wɔ nyevile nu la.” Asoo “[Gyihova] anwo adwenle” kakyi nyɛmoa? Kyɛkyɛ, menli a saa bɛnwu Anwuma Anwumanli Nyamenle ne a bɛkakyi na bɛsukoa ye anzondwolɛ ndenle ne mɔ a. Yemɔti  a wɔ yɛ ɛnɛ sunsum nu paladaese ne anu, yɛkola yɛnwu zɔhane ngapezo ne mɔɔ ɛlɛpe zo la. Wɔ Belemgbunlililɛ ne tumi bo, Kelaese ɛdoavolɛma ɛlɛsukoa kɛ bɛbagyakyi bɛ subane mɔɔ ka menli ɛzulolɛ kɛ nane la na bɛ nee bɛ sunsum nu mediema adɛnla anzondwolɛ nu.

10 Kɛ neazo la, yɛzuzu afoa biala mɔɔ Keleseɛnema ɛngyi ɔlua Ngɛlɛlera ne anu ndelebɛbo mɔɔ yɛlɛ nee kpɔdekpɔde mɔɔ Nyamenle menli ɛyia ɔlua afoa biala mɔɔ bɛnle ati la anwo wɔ buluku ɛhye anu. Asoo ɔnyɛ nwanwane kɛ wɔ amumuyɛ ewiade ɛhye anu, yɛlɛ “maanle” bie mɔɔ nuhua menli kpo kɛ, saa bɔbɔ bɛnwulonwunla bɛ kɛ bɛku bɛ a, bɛnrɛva bɛ nwo bɛnrɛwula basabasayɛlɛ biala anu la ɔ? Nea kɛzi ɔda ali wienyi kɛ amgba Mɛzaya Belemgbunli ne maanlema lɛ anzondwolɛ kɛmɔ Ayezaya hanle la a! Gyisɛse hanle kɛ ɛlɔlɛ mɔɔ wɔ ye ɛdoavolɛma avinli la a bamaa bɛanwu bɛ a. (Dwɔn 13:34, 35) Kelaese ɛlɛfa abotane alua ‘akɛlɛ nɔhavo nee nrɛlɛbɛvolɛ’ ne azo ahilehile nɔhalɛ Keleseɛnema amuala yeamaa bɛala anzondwolɛ nee ɛlɔlɛ ali.​—Mat. 24:45-47.

11, 12. Duzu ɛhɔne a ɛlɛku menli mɔɔ wɔ ewiade la ɛnɛ a, noko kɛzi Gyihova ɛmaa aleɛ ɛbu ye menli ne anwo zo ɛ?

11 Ninyɛne dɔɔnwo. Sunsum nu ɛhɔne ɛlɛku ewiade ne anu amra. Baebolo ne bɔ kɔkɔ kɛ: “Bɛnlea, mekɛ ne ɛlɛba mɔɔ mebamaa ɛhɔne azi azɛlɛ ne azo a. Tɛ aleɛ ɛhɔne anzɛɛ nzule ɛhɔne ɔ. [Gyihova] edwɛkɛ ne anwo ɛhɔne  nee nzuhɔne a bahu bɛ a. Medame, [Gyihova] Nyamenle a mese a.” (Emɔso 8:11) Asoo sunsum nu ɛhɔne ku Nyamenle Belemgbunlililɛ ne maanlema ɛnɛ? Gyihova hanle ngakyile mɔɔ bala ye menli nee ye agbɔvolɛ avinli la anwo edwɛkɛ kɛ: “Bɛnlea, me sonvolɛma ne bali debie, na bɛmɛ, ɛhɔne bahu bɛ; bɛnlea, me sonvolɛma ne banlo nzule, na bɛmɛ, nzuhɔne bahu bɛ; bɛnlea, me sonvolɛma ne anye balie, na bɛmɛ, bɛ nyunlu bagua aze.” (Aye. 65:13) Asoo wɔnwu kɛ zɔhane edwɛkɛ ne ɛra nu?

12 Yɛnyia sunsum nu aleɛ dɔɔnwo kɛ azule mɔɔ se dahuu la. Yɛ mbuluku, video nee edwɛkɛ mɔɔ bɛbɔ bɛtie; debiezukoalɛ nee nyianu; nee ninyɛne mɔɔ wɔ Intanɛte ne azo la amuala le sunsum nu nziezielɛ mɔɔ boa yɛ wɔ ewiade ɛhye mɔɔ sunsum nu ɛhɔne ɛlɛku bɛ la anu a. (Yiz. 47:1-12; Dww. 3:18) Asoo ɛ nye ɛnlie kɛ wɔnwu kɛ Gyihova ɛwɔkɛ mɔɔ kile kɛ yɛbanyia ninyɛne dɔɔnwo la ɛra nu wɔ wɔ ɛbɛlabɔlɛ nu ɔ? Asoo ɛfa Gyihova nziezielɛ ɛdi gyima dahuu?

Yɛ asafo ne mɔ boa yɛ maa yɛnyia sunsum nu aleɛ kpalɛ, banebɔlɛ nee kpɔkɛdelɛ

13. Kɛzi wɔnwu kɛ Gyihova ɛwɔkɛ mɔɔ fane anyezinlirama mɔɔ bɛbanwu debie nee anzodilirama mɔɔ bɛbade edwɛkɛ anwo la bie ɛra nu ɛ?

13 Sunsum nu kpɔkɛdelɛ. Sunsum nu anyezinlira nee anzondilira ɛbu ɛnɛ. (2 Kɔl. 4:4) Noko Kelaese ɛlɛyɛ menli ayile wɔ ewiade amuala. Wɔnwu anyezinlira mɔɔ ɔ nye ɛbuke, yɛɛ anzondilira mɔɔ ɔ nzo ɛbuke la ɛlɛ ɔ? Saa wɔnwu menli mɔɔ bɛnyia Nyamenle Edwɛkɛ ne anu nɔhalɛ ndelebɛbo, bɛkpo ɛzonlenlɛ nu adalɛ mɔɔ mekɛ bie ɔmanle bɛyɛle anyezinlirama nee anzodilirama wɔ nɔhalɛ ne anwo a, ɛnee wɔnwu kɛ ɛwɔkɛ ɛhye ɛra nu: “Mekɛ ne anu anzodilirama bade buluku nu edwɛkɛ, na anyezinlirama vi bɛ awozinli kabii ne anu anwu debie.” (Aye. 29:18) Menli ɛya dɔɔnwo ɛlɛnyia sunsum nu ayileyɛlɛ ɛhye wɔ ewiade amuala. Awie biala mɔɔ ɛvi Babelɔn Kpole ne anu na ɔ nee yɛ bɔ nu sonle wɔ yɛ sunsum nu paladaese ne anu la di daselɛ kɛ Gyihova ɛwɔkɛ ne mɔ ɛra nu!

14. Daselɛ boni a yɛdwenledwenle nwolɛ a ɔbamaa yɛ diedi nu amia a?

14 Buluku ɛhye tile biala da daselɛ mɔɔ kile kɛ Kelaese ɛva ye ɛdoavolɛma ne ɛra sunsum nu paladaese wɔ awieleɛ mekɛ ɛhye anu la ali. Bɛmaa yɛhɔ zo yɛdwenledwenle nyilalɛ dɔɔnwo mɔɔ yɛlɛnyia wɔ zɔhane sunsum nu paladaese ne anu ɛnɛ la anwo. Yɛyɛ zɔ a, diedi mɔɔ yɛlɛ wɔ Gyihova ɛwɔkɛ ne mɔ anu la anu bamia.

“Wɔ Belemgbunlililɛ Ɛrala”

15. Duzu ati a yɛkola yɛnyia anwodozo kɛ azɛlɛ ne bayɛ paladaese a?

15 Ɛnee Gyihova mɔlebɛbo bodane ne a le kɛ ɔbayɛ azɛlɛ ye amuala paladaese. Ɔmanle Adam nee Yive dɛnlanle paladaese tola bie anu na ɔmanle bɛ mɛla kɛ bɛwo bɛyi azɛlɛ ne na bɛnlea abɔdeɛ muala mɔɔ wɔ nu la azo. (Mɔl. 1:28) Noko Adam nee Yive lile Seetan anzi dele atua na bɛvale bɛ bozoamra amuala bɛwulale sinlidɔlɛ, ɛtane ne ewule tumi  bo. Noko Nyamenle bodane ne ɛtɛkakyile. Saa ɔka a, ɔba nu bɔkɔɔ. (Bɛgenga Ayezaya 55:10, 11.) Yɛbahola yɛalie yɛali kɛ Adam nee Yive abozoamra bayi azɛlɛ ɛhye na bɛava ɛlɔlɛ bɛanlea Gyihova abɔdeɛ mɔɔ wɔ ewiade amuala paladaese ne anu la anwo zo. Wɔ zɔhane mekɛ ne, ngapezo ne mɔ mɔɔ fane paladaese asetɛnla nwo mɔɔ bɛlumuale bɛhanle bɛhilele Dwuuma mɔɔ bɛvi nlɔnu bɛrale la bape zo bɔkɔɔ! Suzu neazo ɛhye mɔ anwo nea.

16. Kɛzi Baebolo ne ka banebɔlɛ mɔɔ yɛbanyia ye wɔ Paladaese la anwo edwɛkɛ ɛ?

16 Banebɔlɛ. Awieleɛ kolaa ne, anyelielɛ edwɛkɛ ne mɔɔ wɔ Ayezaya 11:6-9 la bara nu bɔkɔɔ. Mrenya, mraalɛ, nee ngakula banyia banebɔlɛ wɔ ɛleka biala mɔɔ bɛkɛhɔ la wɔ azɛlɛ ye azo. Sonla anzɛɛ nane biala ɛnle ɛkɛ mɔɔ bagyegye awie a. Dwenle mekɛ mɔɔ ɛbanwu ewiade ɛhye amuala kɛ wɔ sua nu, ɛleka mɔɔ ɛbahola wɔabia azule, azudenle nee nyevile; wɔakpɔsa awoka ne mɔ nee azɛlɛ ne azo mɔɔ awie biala ɛngyegye wɔ la anwo nea. Saa aleɛ dwo a, adwenleadwenle ɛnrɛdɔ ɛ nwo. Edwɛkɛ mɔɔ wɔ Yizikeɛle 34:25 la bara nu, na Nyamenle menli ne “bɛadɛnla fienemgbole ne anu anwondɔlɛ nu na bɛala kpɔkɛ nu mbaka ne mɔ abo bɛalafe.”

17. Duzu ati a yɛbahola yɛanyia anwodozo kɛ saa Belemgbunlililɛ ne ɛlɛdi ewiade kɔsɔɔti azo a, Gyihova bali ye menli ne ngyianlɛ kɔsɔɔti anwo gyima ɛ?

17 Ninyɛne dɔɔnwo. Pɛ mekɛ mɔɔ ninyɛne le kɛ ehyia, ɛhɔne, anzɛɛ boɛyɛlɛ nwo ngyehyɛleɛ biala ɛnle ɛkɛ na yɛnyia aleɛ kpalɛ yɛdi la anwo nvoninli nea. Sunsum nu aleɛ dɔɔnwo mɔɔ Nyamenle menli ne nyia ye ɛnɛ la le daselɛ mɔɔ kile kɛ Mɛzaya Belemgbunli ne bamaa ye maanlema asa aha debie biala a. Mɔɔ Gyisɛse wɔ azɛlɛ ye azo la, ɔlale ye ali wɔ adenle ekyi azo kɛ ɔbahola yeamaa ɛwɔkɛ ɛhye mɔ ara nu ɔluakɛ ɔvale kpanwo nee fɛlɛ ekyi bie ala ɔmanle menli apenle dɔɔnwo mɔɔ ɛnee ɛhɔne ɛlɛku bɛ la aleɛ. (Mat. 14:17, 18; 15:34-36; Maake 8:19, 20) Saa Nyamenle Belemgbunlililɛ ne ɛlɛdi tumi wɔ azɛlɛ ye azo amuala a, ngapezo le kɛ ɛhye bara nu: “Akee [Gyihova] bamaa ezule adɔ agua bɛ ma mɔɔ bɛlua la azo na bɛ bɛyɔba azo dɔɔnwo. Mekɛ ne anu bɛ nlankɛ bahɔ adidileka mɔɔ le mgbole la anu ahɔdidi.”​—Aye. 30:23.

18, 19. (a) Duzu a ngapezo mɔɔ wɔ Ayezaya 65:20-22 la kile maa wɔ a? (b) Adenle boni azo a yɛbahyɛ kɛ “baka” a?

18 Ɛnɛ, menli dɔɔnwo ɛndwenle kɛ bɛbahola bɛanyia awuke mɔɔ anwodɔlɛ wɔ nu anzɛɛ gyima mɔɔ ahunlundwolɛ nee ahatualɛ kpalɛ wɔ nu la. Wɔ ngyehyɛleɛ ɛtane ɛhye anu, menli dɔɔnwo te nganeɛ kɛ bɛfa mekɛ dɔɔnwo bɛyɛ gyima ɛsesebɛ noko bɛnnyia mɔɔ sa bɛ nee bɛ abusua ne a, noko azukoavolɛ nee anyeboloma ɛnyia bɛ nwo. Nea kɛzi ewiade amuala bayɛ wɔ mekɛ mɔɔ ngapezo ɛhye bara nu la: “Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali. Kɛ baka si kyɛ na yeawu la, zɔhane ala yɛɛ me menli ne bahyɛ a, na me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ.”​—Aye. 65:20-22.

 19 Yɛ mekɛ mɔɔ ‘ɔbahyɛ kɛ baka’ la kile duzu? Saa ɛgyinla baka kpole bie abo a, asoo ɔnyɛ wɔ azibɛnwo wɔ mekɛ mɔɔ ɛlɛdwenle ɛvolɛ dodo mɔɔ baka ne ɛli anwo la ɔ? Bie a ɛnee ɔgyi ɛkɛ na bɛawo wɔ nenya nenya bɔbɔ. Bie a wɔ adwenle bayɛ wɔ kɛ saa ɛkɔ zo ɛtɛnla wɔ sinlidɔlɛ ne anu a, ɛbawu wɔagyakyi baka ne noko baka ne bahɔ zo anyi. Nea kɛzi Gyihova ɛla atiakunlukɛnlɛma ali yemaa yɛnyia anwodozo kɛ yɛbahyɛ na yɛadɛnla anzondwolɛ nu wɔ Paladaese a! (Edw. 37:11, 29) Mekɛ ne bara mɔɔ mbaka mɔɔ bɛhyɛ kpalɛ bɔbɔ la bayɛ yɛ nye zo kɛ ndile, bɛba bɛkɔ noko yɛmɛ yɛbadɛnla aze dahuu!

20. Kɛzi Belemgbunlililɛ maanlema mɔɔ bɛdi nɔhalɛ la banyia kpɔkɛdelɛ mɔɔ di munli la ɛ?

20 Kpɔkɛdelɛ kpalɛ. Ɛnɛ, anwodolɛ nee ewule ka awie biala. Wɔ adenle bie azo, yɛ kɔsɔɔti yɛnde kpɔkɛ​—ɛtane, anwodolɛ mɔɔ ɔnlɛ ye ayile la ɛhane yɛ. Nwolɛ ayile kokye ne ala a le Kelaese ɛkpɔnelɛ afɔle ne. (Wulo. 3:23; 6:23) Wɔ Ɛvolɛ Apenle Tumililɛ ne anu, Gyisɛse nee ye bokavolɛma baboa menli bɛamaa bɛanyia zolɛ nvasoɛ bɔkɔɔ na bɛaye ɛtane bɛavi alesama nɔhavoma anu ngyikyi ngyikyi. Ayezaya ngapezo ne bara nu bɔkɔɔ: “Na awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’ Bɛbava awie biala mɔɔ wɔ sua ne azo la ɛtane bɛahyɛ ye.” (Aye. 33:24) Pɛ mekɛ mɔɔ awie biala anye ɛnrɛzi, anzo ɛnrɛdi anzɛɛ ɔnrɛyɛ abubura la anwo nvoninli nea. (Bɛgenga Ayezaya 35:5, 6.) Anwodolɛ biala ɛnrɛbo Gyisɛse anwo zo​—kɛ ɔle nwonane nu, adwenle nu anzɛɛ nganeɛdelɛ nu. Belemgbunlililɛ maanlema mɔɔ bɛdi nɔhalɛ la banyia kpɔkɛdelɛ kpalɛ!

21. Kɛzi bɛbayɛ ewule ɛ, na duzu ati a zɔhane ɛwɔkɛ ne kyekye ɛ rɛle ɛ?

21 Na ewule mɔɔ ɛtane ɛva ɛra la noko ɛ? Yemɔ a le yɛ “kpɔvolɛ mɔɔ li amozi” a, kpɔvolɛ ko mɔɔ ye tumi bo sonla ɛdeɛ zo la ɛne. (1 Kɔl. 15:26) Noko asoo ewule anwo yɛ se mɔɔ Gyihova ɛnrɛhola ye ɔ? Yɛ mɔɔ Ayezaya hanle la nzonlɛ: “Ɔbame ewule bɔkɔɔ, na Awulae Nyamenle ne bakyikyi awie biala anye anwo monle.” (Aye. 25:8) Ɛbahola wɔapɛ zɔhane mekɛ ne anwo nvoninli ɔ? Bɛnrɛyɛ ɛzɛne bieko, azie ɛnle ɛkɛ, bɛnrɛli alɔbɔlɛ bieko na bɛazu! Mɔɔ ɔbayɛ ngakyile kolaa la a le kɛ menli ɛzunlɛ bayɛ anyelielɛ wɔ mekɛ mɔɔ Gyihova ɛlɛdi ye ɛwɔkɛ mɔɔ se ɔbamaa mɔwuamra azia ara ngoane nu azo la! (Bɛgenga Ayezaya 26:19.) Awieleɛ bɔkɔɔ ne, bɛbaye nyane biala mɔɔ ewule ɛva ɛra la bɛavi ɛkɛ.

22. Saa Mɛzaya Belemgbunlililɛ ne yɛ Nyamenle ɛhulolɛdeɛ wɔ azɛlɛ ye azo wie a, duzu a bazi a?

22 Ɛvolɛ Apenle Tumililɛ ne kahɔ ye awieleɛ la, ɛnee Belemgbunlililɛ ne ɛyɛ Nyamenle ɛhulolɛdeɛ bɔkɔɔ wɔ azɛlɛ ye azo, na Kelaese bava tumililɛ ne amaa ɔ Ze. (1 Kɔl. 15:25-28) Awieleɛ bɔkɔɔ ne mɔɔ alesama bali munli la, saa bɛye Seetan bɛfi kuma ne anu a, bɛbayia ɛkpɔlɛ mɔɔ li awieleɛ la. Yemɔ anzi, akee Kelaese bazɛkye ɛwɔlɛ ne nee menli mɔɔ bɛgyi ɔ nzi la. (Mɔl. 3:15; Yek. 20:3, 7-10) Noko menli mɔɔ  kulo Gyihova nɔhalɛ nu la banyia anyelazo kpalɛ. Bie a edwɛkɛ agbɔkɛ biala ɛnle ɛkɛ mɔɔ bamaa yɛade ɔ bo kpalɛ yɛadɛla ɛdendɛfoa bie mɔɔ wɔ Baebolo ne anu la. Yɛmɔ a le ɛwɔkɛ mɔɔ se nɔhavoma banyia “anyunlunyia fanwodi ne mɔɔ Nyamenle amra lɛ ye la.”​—Wulo. 8:21.

Belemgbunlililɛ ne bamaa Nyamenle ɛwɔkɛ mɔɔ fane alesama nee azɛlɛ ne anwo la amuala ara nu

23, 24. (a) Duzu ati a yɛdie yɛdi bɔkɔɔ kɛ Nyamenle ɛwɔkɛ ne mɔ bara nu ɛ? (b) Duzu a wɔsika ɛ bo kɛ ɛbayɛ a?

23 Ɛwɔkɛ ɛhye mɔ ɛnle anyelazo mgbane bie ala. Ye biala anu, Gyihova ɛwɔkɛ ne bara nu! Duzu ati ɔ? Kakye Gyisɛse edwɛkɛ ne mɔɔ yɛzuzu nwo wɔ buluku ɛhye tile mɔɔ lumua anu la. Ɔhilehilele ye ɛdoavolɛma ne kɛ bɛzɛlɛ Gyihova kɛ: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mat. 6:9, 10) Nyamenle Belemgbunlililɛ ne ɛnle awie adwenle nzuzulɛ. Ɔwɔ ɛkɛ ne amgba! Ɔlɛdi tumi wɔ anwuma kɛkala. Ye ɛvolɛ ɛya ɛne, yemaa Gyihova ɛwɔkɛ ne mɔ ɛra nu wɔ adenle mɔɔ yɛkola yɛnwu ye wienyi wɔ Keleseɛne asafo ne anu la azo. Yɛbahola yɛalie yɛali kɛ Gyihova ɛwɔkɛ ne mɔ muala bara nu wɔ mekɛ mɔɔ Nyamenle Belemgbunlililɛ ne barali tumi bɔkɔɔ wɔ azɛlɛ ye azo la!

24 Yɛze kɛ Nyamenle Belemgbunlililɛ ne bara. Yɛze kɛ Gyihova ɛwɔkɛ biala bara nu. Duzu ati ɔ? Ɔluakɛ NYAMENLE BELEMGBUNLILILƐ DI TUMI! Kpuyia mɔɔ ɔwɔ kɛ awie biala biza ɔ nwo la a le kɛ, ‘Asoo Belemgbunlililɛ ne di me nwo zo tumi?’ Bɛmaa yɛ muala yɛyɛ mɔɔ yɛbahola biala la kɛkala kɛ yɛbayɛ Belemgbunlililɛ zɔhane maanlema mɔɔ di nɔhalɛ, amaa yɛanyia ye tenlene tumililɛ ne mɔɔ di munli la azo nvasoɛ dahuu!