Wulu kɔ nuhua edwɛkɛ ne azo

Nyamenle Belemgbunlililɛ Ne A Le Duzu?

Nyamenle Belemgbunlililɛ Ne A Le Duzu?

Ɛbaha kɛ ɔle . . .

  • debie mɔɔ wɔ wɔ ahonle nu ɔ?

  • edwɛkɛ mɔɔ bɛka ala ɔ?

  • arane mɔɔ wɔ anwuma ɔ?

 MƆƆ BAEBOLO NE KA LA

“Anwuma Nyamenle ne bava belemgbunlililɛ bie azie ɛkɛ mɔɔ bɛnrɛzɛkye ye ɛlɛ a.”​—Daneɛle 2:44, Ewiade Fofolɛ Ngilebɛbo.

“Bɛmaa yɛ ralɛ nrenyia; na maanlebulɛ ne bala ɔ bati.”​—Ayezaya 9:6; ɔbodwɛkɛ.

KƐZI ƆBABOA WƆ LA

  • Arane kpalɛ mɔɔ baboa wɔ la.​—Ayezaya 48:17, 18.

  • Wɔ ewiade fofolɛ ne mɔɔ ɛlɛba la anu, ɛbanyia kpɔkɛdelɛ kpalɛ nee anyelielɛ.​—Yekile 21:3, 4.

 ASOO YƐBAHOLA YƐALIE MƆƆ BAEBOLO NE KA LA YƐALI AMGBA?

Ɛhɛe, ɔlua ninyɛne nwiɔ bie ati:

  • Gyisɛse hilele mɔɔ Nyamenle Belemgbunlililɛ ne bayɛ la. Gyisɛse hilehilele ye ɛdoavolɛma ne kɛ bɛzɛlɛ kɛ Nyamenle Belemgbunlililɛ ne ɛrɛla na Nyamenle ɛhulolɛdeɛ ɛyɛ ɛkɛ wɔ azɛlɛ ye azo. (Mateyu 6:9, 10) Gyisɛse hilele kɛzi bɛbabua zɔhane asɔneyɛlɛ ne la.

    Mekɛ mɔɔ Gyisɛse wɔ azɛlɛ ye azo la, ɔmaanle menli mɔɔ ɛhɔne ɛlɛku bɛ la aleɛ, ɔyɛle wuliravolɛma ayile, na ɔdwazole mowuamra! (Mateyu 15:29-38; Dwɔn 11:38-44) Kɛmɔ Gyisɛse bayɛ Nyamenle Belemgbunlililɛ ne azo Belemgbunli la ati, ɔmaanle bɛnwunle ninyɛne ngɛnlɛma mɔɔ zɔhane Belemgbunlililɛ ne bayɛ amaa ye maanlema la anwo neazo.​—Yekile 11:15.

  • Mɔɔ ɛlɛsisi wɔ ewiade la di daselɛ kɛ ɔnrɛhyɛ na Nyamenle Belemgbunlililɛ ne ara. Gyisɛse hanle kɛ saa ɔka ekyii Belemgbunlililɛ ne maa anzodwolɛ ba azɛlɛ ye azo a, konle, ɛhɔne, nee azɛlɛkpusulɛ basisi ewiade ye.​—Mateyu 24:3, 7.

    Ɛnɛ, yɛnwu kɛ ninyɛne zɔhane ɛlɛsisi. Yemɔti yɛbahola yɛanyia anwodozo kɛ ɔnrɛhyɛ Nyamenle Belemgbunlililɛ ne baye ngyegyelɛ ɛhye mɔ kɔsɔɔti avi ɛkɛ.

 DWENLE ƐHYE ANWO

Kɛzi ɛbɛlabɔlɛ bayɛ wɔ Nyamenle Belemgbunlililɛ ne tumi bo ɛ?

Baebolo ne bua kpuya zɔhane wɔ EDWƐNE 37:29 yɛɛ AYEZAYA 65:21-23.