Wulu kɔ nuhua edwɛkɛ ne azo

Wulu kɔ nuninyɛne ne azo

 ƐZUKOALƐDEƐ 7

Tete Kɔkɔbɔlɛ Bie

Tete Kɔkɔbɔlɛ Bie

Gyihova ɛnrɛmaa ɛtanevolɛma ɛnrɛzɛkye Paladaese. Ɔ gɔnwo mɔ ala a badɛnla ɛkɛ a. Duzu a bado ɛtanevolɛma a? Amaa wɔanwu mualɛ ne la, suzu edwɛkɛ mɔɔ zile Nowa mekɛ zo la anwo. Nowa dɛnlanle aze ɛvolɛ apenle apenle mɔɔ ɛze ɛhɔ la. Ɛnee ɔle sonla kpalɛ mɔɔ dahuu ɔbɔ mɔdenle kɛ ɔbayɛ Gyihova ɛhulolɛdeɛ a. Noko menli gyɛne mɔɔ ɛnee wɔ azɛlɛ ne azo la yɛle ninyɛndane. Yemɔti Gyihova hanle hilele Nowa kɛ ɔfa azuyilɛ yeazɛkye ɛtanevolɛma ne amuala. Ɔhanle ɔhilele Nowa kɛ ɔbobɔ ɛlɛne amaa ɔ nee ye abusua ne anwu wɔ mekɛ mɔɔ Azuyilɛ ne kɛra la.​—Mɔlebɛbo 6:9-18.

Nowa nee ye abusua ne bobɔle ɛlɛne ne. Nowa bɔle menli kɔkɔ kɛ Azuyilɛ ne ɛlɛba, noko bɛandie ye. Bɛhɔle zo bɛyɛle ninyɛndane. Mekɛ mɔɔ bɛbobɔle ɛlɛne ne bɛwiele la, Nowa vale nane dɔɔnwo hɔle ɛlɛne ne anu, na ɔ nee ye abusua ne noko hɔle nu. Gyihova akee maanle ahumu kpole bie dule. Ezule dɔle nɔɔzo nee ewiazo kenle 40. Nzule ne yile vale azɛlɛ ne kɔsɔɔti azo.​—Mɔlebɛbo 7:7-12.

 Ɛtanevolɛma ne wule, noko Nowa nee ye abusua ne nyianle ngoane. Gyihova bɔle bɛ nwo bane wɔ Azuyilɛ ne anu na ɔvale bɛ ɔrale azɛlɛ mɔɔ ɛtaneyɛlɛ ɛnle zo la azo. (Mɔlebɛbo 7:22, 23) Baebolo ne se eza mekɛ ɛlɛba mɔɔ Gyihova bazɛkye bɛdabɛ mɔɔ bɛkpo kɛ bɛbayɛ mɔɔ tenrɛ la. Bɛnrɛzɛkye kpalɛma. Bɛbadɛnla aze dahuu wɔ Paladaese azɛlɛ ne azo.​—2 Pita 2:5, 6, 9.

Menli dɔɔnwo yɛ ninyɛndane ɛnɛ. Ngyegyelɛ ɛyi ewiade tɛkɛɛ. Gyihova soa ye Alasevolɛ fane dɔɔnwo kɛ bɛbɔ menli ne kɔkɔ, noko menli dɔɔnwo ɛngulo kɛ bɛtie Gyihova edwɛkɛ ne. Bɛngulo kɛ bɛkakyi bɛ ndenle ne mɔ. Bɛngulo kɛ bɛdie mɔɔ Nyamenle ɛha ye wɔ kpalɛ nee ɛtane nwo la bɛto nu. Duzu a bado menli ɛhye mɔ a? Asoo bɛbahakyi kenle bie ɔ? Bɛ nuhua dɔɔnwo ɛnrɛhakyi ɛlɛ. Mekɛ ɛlɛba mɔɔ bɛbazɛkye ɛtanevolɛma a, na bɛnrɛdɛnla aze bieko ɛlɛ.​—Edwɛndolɛ 92:7.

Bɛnrɛzɛkye azɛlɛ ne; bɛbayɛ ye paladaese. Bɛdabɛ mɔɔ bɛbayɛ Nyamenle agɔnwo mɔ la badɛnla aze dahuu wɔ Paladaese.​—Edwɛndolɛ 37:29.