Wulu kɔ nuhua edwɛkɛ ne azo

Wulu kɔ nuninyɛne ne azo

 KPUYA 9

Asoo Ɔwɔ Kɛ Medie Ngakyihakyililɛ Medi Ɔ?

Asoo Ɔwɔ Kɛ Medie Ngakyihakyililɛ Medi Ɔ?

DEƐMƆTI ƆHYIA LA

Ngakyihakyililɛ le nɔhalɛ a, ɛnee ɛbɛlabɔlɛ ɛnlɛ bodane biala. Saa amgba bɛbɔle ninyɛne a, yɛbahola yeabua ɛbɛlabɔlɛ nee kenle bie anwo kpuya mɔɔ anwo hyia la.

BONI A ƐBAYƐ A?

Suzu tɛnlabelɛ ɛhye anwo: Alex adwenle ɛdu ɛfonyia. Ɔdie Nyamenle nee ninyɛnebɔlɛ ɔdi. Noko ɛnɛ, ye kilehilevolɛ ne se ngakyihakyililɛ le nɔhalɛ na abɔdeɛ nwo nrɛlɛbɛvolɛma neɛnleanu mɔɔ bɛyɛ la die to nu. Alex ɛngulo kɛ ɔbadɔ nu. Ɔka kɛ, ‘Saa abɔdeɛ nwo nrɛlɛbɛvolɛma kile kɛ ngakyihakyililɛ le nɔhalɛ a, duzu ati a ɔwɔ kɛ mebiza bɛ nwolɛ edwɛkɛ a?’

Saa ɛdawɔ a ɛle Alex a, asoo anrɛɛ ɛbalie ngakyihakyililɛ wɔado nu ɔluakɛ wɔ mbuluku ne mɔ se ɔle nɔhalɛ la ati?

GYINLA NA SUZU NWO!

Menli mɔɔ su edwɛkɛ ɛhye anwo kpolera la ka mɔɔ bɛdie bɛdi la anwo edwɛkɛ ndɛndɛ mɔɔ bɛnze deɛmɔti bɛdie bɛdi la.

  • Bie mɔ die ninyɛnebɔlɛ di ɔluakɛ bɛhilehile bɛ wɔ bɛ asɔne la ati.

  • Bie mɔ die ngakyihakyililɛ di ɔluakɛ bɛhilehile bɛ wɔ sukulu la ati.

 KPUYA NSIA MƆƆ ƆWƆ KƐ ƐDWENLE NWO

Baebolo ne ka kɛ: “Sonla ala a si sua a, yɛɛ Nyamenle noko a ɛyɛ ninyɛne muala a.” (Hibuluma 3:4) Asoo ɛbahola wɔalie edwɛkɛ ɛhye wɔado nu?

Saa ɛka kɛ tɛ Bɔvolɛ bie a bɔle ninyɛne kɔsɔɔti a, ɔle kɛ asɛɛ ɛlɛka kɛ tɛ awie a zile sua ɛhye la

MƆƆ BƐKA: Debie biala mɔɔ wɔ anwuma nee aze la rale ala.

1 Kɛ ɔyɛle mɔɔ ninyɛne mɔɔ wɔ anwuma nee aze la rale ɛ?

2 Boni a nrɛlɛbɛ wɔ nu a—ninyɛne mɔɔ wɔ ɛkɛ la amuala rale mgbane anzɛɛ awie a yɛle a?

MƆƆ BƐKA: Sonla vi nane nu a rale a.

3 Saa sonla vi nane nu—kɛ neazo la, saa yɛvi akatia nu a—duzu ati a ngakyile kpole kpalɛ wɔ kɛzi sonla yɛ ye ninyɛne nee kɛzi akatia yɛ ye ninyɛne la anu ɛ?

4 Duzu ati a ngoane nu ninyɛne “ngyikyi” bɔbɔ le kpomgbondee ɛ?

MƆƆ BƐKA: Daselɛ mɔɔ kile kɛ Ngakyihakyililɛ le nɔhalɛ la wɔ ɛkɛ.

5 Asoo ahenle mɔɔ ɔlɛka edwɛkɛ ɛhye la ɛyɛ neɛnleanu na ɔdaye mumua ne yenwu daselɛ ne ɔ?

6 Menli nyɛ a die ngakyihakyililɛ to nu ɔluakɛ bɛha bɛhile bɛ kɛ menli mɔɔ anye gyi bɛ ti anwo la amuala die to nu a?

“Saa ɛlua kpɔkɛ nu na ɛnwu sua kɛnlɛma bie a, ɛbadwenle kɛzi ɔyɛ nwanwane kɛ mbaka ne asa ngane ne mɔ ɛbubu ɛgua kɛnlɛma ɛmaa yeyɛ sua la anwo ɔ? Kyɛkyɛ! Nrɛlɛbɛ ɛnle nu. Yemɔ ɛnee duzu ati a ɔwɔ kɛ yɛdie yɛdi kɛ debie biala mɔɔ wɔ anwuma nee aze la rale mgbane ɛ?”—Julia.

“Fa ye kɛ awie ɛha ɛhile wɔ kɛ esiane bie mɔɔ zile wɔ mbuluku ɛpelentelɛ ɛleka bie la ɛmaa ɛnke ne mɔɔ bɔle guale bane ne anwo la ɛha ɛbɔ nu na yeyɛ edwɛbohilelɛ buluku. Anrɛɛ ɛbalie wɔali ɔ?”—Gwen.

 DUZU ATI A ƆWƆ KƐ ƐNYIA NYAMENLE ANU DIEDI A?

Baebolo ne se, fa wɔ ‘adwenle’ di gyima kpalɛ (Wulomuma 12:1, NW) Ɛhye kile kɛ ɔnle kɛ Nyamenle anu diedi mɔɔ ɛlɛ la gyinla

  • NGANEƐDELƐ ZO (Ɛbaha kɛ awie mɔɔ lɛ tumi la wɔ ɛkɛ)

  • MƆƆ MENLI KA KILE WƆ LA AZO (Mede menli mɔɔ kulo ɛzonlenlɛ la avinli)

  • ƐTINLITINLILƐ ZO (Bɛtetele me kɛ menlie Nyamenle menli—meyɛ nwolɛ ɛhwee a ɔnyɛ boɛ)

Ɔwɔ kɛ wɔ diedi ne nyia ngyinlazo kpalɛ.

“Saa mewɔ sukulu na melɛtie kɛzi me kilehilevolɛ ne kilehile kɛzi yɛ sonlabaka ne yɛ gyima la anu a, debie biala ɛngile kɛ Nyamenle ɛnle ɛkɛ. Sonlabaka ne afoa ngakyile ne mɔ amuala lɛ bɛ gyima mɔɔ bɛdi a, bɔbɔ wɔ ninyɛne ngyikyi bie anu na gyima ɛhye kɔ zo mɔɔ yɛnde nwolɛ ɛhwee a. Sonlabaka ne bo sonla ndelebɛbo zo!”—Teresa.

“Saa menwu sua mɔɔ doa zo dɔɔnwo, meli mgbole mɔɔ menli fo anzɛɛ kale a, mebiza me nwo kɛ, ‘Nwane a yɛle ɛhye mɔ a?’ Kɛ neazo la, menli mɔɔ lɛ adwenle la a yɛ kale a, ɔwɔ kɛ ninyɛne ngyikyi keha bɔ nu kolaa na yeayɛ gyima. Na saa awie a yɛle kale a, ɛnee noko kɛ ɔde ye wɔ sonla afoa nu la ɛne.”—Richard.

“Mekɛ mɔɔ melɛsukoa abɔdeɛ nwo ninyɛne nwo debie dɔɔnwo la, ɛnee ngakyihakyililɛ ɛlɛsɔho adalɛ edwɛkɛ mɔɔ bɛka ala. . . . Me deɛ mɔɔ mehyia ‘diedi’ kpole na mealie ngakyihakyililɛ meali meadɛla Bɔvolɛ ne.”—Anthony.

DWENLE NWO

Ɔnva nwo ɛvolɛ dodo mɔɔ bɛva bɛyɛ neɛnleanu la, bɔ zo mɔɔ abɔdeɛ nwo nrɛlɛbɛvolɛma bava ngilehilenu mɔɔ fale ngakyihakyililɛ nwo mɔɔ bɛ muala bɛbahola bɛalie bɛado nu la ara a. Saa abɔdeɛ nwo nrɛlɛbɛvolɛma ɛngola ɛnlie ngakyihakyililɛ ɛndo nu—na bɛbu bɛ kɛ bɛze deɛ a, asoo ɔle ɛtane kɛ ɛbabiza bɛ nwolɛ edwɛkɛ ɔ?