Wulu kɔ nuhua edwɛkɛ ne azo

Wulu kɔ nuninyɛne ne azo

 TILE NNA

“Me Nee Wɔ Yɛkɔ Ɛleka Mɔɔ Ɛlɛkɔ La”

“Me Nee Wɔ Yɛkɔ Ɛleka Mɔɔ Ɛlɛkɔ La”

1, 2. (a) Kilehile Wulutu nee Nawome adendulɛ ne nee nyane mɔɔ ɛnee bɛlɛdi la anu. (b) Kɛzi ɛnee Wulutu adendulɛ ne le ngakyile fi Nawome ɛdeɛ ne anwo ɛ?

WULUTU nee Nawome lua Mowabe azɛlɛ wɔanaanwo ne mɔɔ la awoka ne mɔ avinli la azo. Bɛ mu nwiɔ a bɛlua azɛlɛ ɛhye azo a. Aleɛ ɛlɛdwo, na pɛ Wulutu mɔɔ ɔlɛnea ye ase anyunlu na ɔlɛdwenle ɛleka mɔɔ bɛbanyia bɛala la anwo nvoninli wɔ wɔ adwenle nu nea. Ɔkulo Nawome na ɔkpondɛ kɛ ɔyɛ mɔɔ ɔbahola biala la ɔnea ye.

2 Bɛ nuhua ko biala ɛlɛdi nyane kpole. Nawome ɛyɛ kunlavolɛ ɛvolɛ dɔɔnwo noko kɛkala ɔlɛsu ɔ mra nwiɔ, Kaeleɔn nee Maalɔn, mɔɔ ɛwu kenlensa ye la. Wulutu noko ɛlɛdi nyane. Ɛnee ɔ hu a le Maalɔn. Ɔ nee Nawome ɛlɛkɔ ɛleka ko, Bɛtelɛhɛm mɔɔ wɔ Yizilayɛ la. Wɔ adenle bie azo, bɛ adendulɛ ne le ngakyile. Nawome ɛlɛkɔ ye sua zo. Wulutu ɛlɛfi ye sua zo, yeagyakyi ye abusua, ye amaamuo nee ye awozonle ɔ nzi yeahɔ ɛleka mɔɔ ɔnze ɛkɛ la.Bɛgenga Wulutu 1:3-6.

3. Kpuyia boni mɔ anwo mualɛ a baboa yɛ amaa yɛazukoa Wulutu diedi ne a?

3 Duzu a hanle bɛlɛra ɛhye ɔmanle ɔyɛle nzenzaleɛ kpole ɛhye a? Kɛ ɔkɛyɛ na Wulutu ahola anlea ɔ nwo nee Nawome ɛ? Mualɛ ne mɔ mɔɔ yɛbanwu bɛ la bamaa yɛazukoa Mowabenli Wulutu diedi ne. (Eza nea ɛlɛka “ “Buluku Kɛnlɛma Bie.”) Mɔɔ lumua la, bɛmaa yɛzuzu deɛmɔti mraalɛ nwiɔ ɛhye radwule adenle tendenle ne mɔɔ kɔ Bɛtelɛhɛm azo la.

Abusua Mɔɔ Bɛlɛdi Nyane

4, 5. (a) Duzu a manle Nawome abusua ne hɔle Mowabe a? (b) Ngyegyelɛ boni a Nawome yiale wɔ Mowabe a?

4 Bɛtetele Wulutu wɔ Mowabe, maanle ekyi bie mɔɔ wɔ Nyevile Wulera ne aduduleɛ la anu. Ɔwɔ awoka zo, mbaka dɔɔnwo ɛnle ɛkɛ yɛɛ mbɔnza gua ye foa ko. Saa ɛhɔne ba Yizilayɛ bɔbɔ a, “Mowabe maanle nu” ɛdeɛ bɛdua debie a ɔyɛ boɛ.  Ɛhye a manle Wulutu yiale Maalɔn nee ye abusua ne a.—Wul. 1:1.

5 Ɛhɔne mɔɔ rale Yizilayɛ la manle Nawome ahu Yilemɛlɛke nyianle adwenle kɛ ɔ nee ɔ ye nee ɔ mra mrenya nwiɔ ne tu ahɔ Mowabe. Ɛnee bɛ adendulɛ ne baha abusua ne anu amra diedi, ɔluakɛ ɛnee ɔwɔ kɛ Yizilayɛma sonle Gyihova dahuu wɔ ɛleka mɔɔ yehile bɛ la. (Mɛla 16:16, 17) Nawome ammaa ye diedi anga aze. Noko, mekɛ mɔɔ ɔ hu wule la ɔlile nyane.—Wul. 1:2, 3.

6, 7. (a) Duzu ati a ɔgyegyele Nawome wɔ mekɛ mɔɔ ɔ mra mrenya ne mɔ gyale Mowabe mraalɛ la ɛ? (b) Duzu ati a kɛzi Nawome yɛle ye ase mɔ la le neazo kɛnlɛma ɛ?

6 Bie a Nawome lile nyane bieko wɔ mekɛ mɔɔ ɔ mra mrenya ne mɔ gyale Mowabe mraalɛ la. (Wul. 1:4) Ɛnee ɔze kɛ ɔ nlenya Ebileham zoanle manle bɛhɔgyale raalɛ wɔ ye menli mɔɔ sonle Gyihova la anu bɛrɛlɛle ɔ ra Ayezeke. (Mɔl. 24:3, 4) Nzinlii, Mosisi Mɛla ne bɔle Yizilayɛma kɔkɔ kɛ bɛmmamaa bɛ mra mrenya nee bɛ mra mraalɛ gya nyɛvolɛ, ɔluakɛ bɛbahola bɛamaa Nyamenle menli azonle awozonle.—Mɛla 7:3, 4.

7 Noko akee, Maalɔn nee Kaeleɔn gyale Mowabe mraalɛ. Bie a ɛhye gyegyele Nawome, noko ɔbɔle mɔdenle ɔhulole ye ase mɔ, Wulutu nee Ɔpa. Ɔbayɛ kɛ ɛnee ɔlɛ anyelazo kɛ kenlebie bɛdabɛ noko bɛbazonle Gyihova. Kɛ ɔde ye biala la, Wulutu nee Ɔpa anye liele Nawome anwo. Agɔnwolɛvalɛ kpalɛ zɔhane boale bɛ wɔ mekɛ mɔɔ bɛyiale ngyegyelɛ la. Mbɛlɛra nwiɔ ne annwo mralɛ na bɛ hu mɔ awu, bɛyɛle ahunlavolɛ.—Wul. 1:5.

8. Duzu a hwenle Wulutu bikyele Gyihova a?

8 Asoo ɛzonlenlɛ mɔɔ ɛnee Wulutu wɔ nu la boale ye manle ɔgyinlanle esiane ne anloa? Yɛnlie yɛnli. Ɛnee Mowabema sonle awozonle dɔɔnwo mɔɔ ɛnee bɛ nuhua kpanyinli ne a le Kimɔhye la. (Ɛdi. 21:29) Ɔzɔho kɛ bɛhilele menli nyane wɔ bɛ ɛzonlenlɛ nu na bɛvale ngakula bɛbɔle afɔle kɛmɔ ɛnee menli mɔɔ ɛha la yɛ la. Wulutu nwunle kɛ ɛlɔlɛ nee anwunvɔnezelɛ mɔɔ Yizilayɛ Nyamenle ne da ye ali anwo debie mɔɔ ɔzukoale ɔvile Maalɔn anzɛɛ Nawome ɛkɛ la ɛnee le ngakyile kolaa. Gyihova fa ɛhulolɛ nea ye menli, tɛ atisesebɛ ɔ. (Bɛgenga Mɛla ne 6:5.) Mekɛ mɔɔ Wulutu ahu ne wule la, bie a ɔbikyele Nawome na ɔmanle ɔhanle gyima mɔɔ Nyamenle bedevinli Gyihova ɛyɛ, nee kɛzi ɔfi ɛlɔlɛ yɛɛ anwunvɔnezelɛ nu ɔnea ye menli la anwo edwɛkɛ ɔhilele ye.

Mekɛ mɔɔ Wulutu ahu wule na ɔlɛdi nyane la ɔbikyele Nawome

9-11. (a) Kpɔkɛ boni a Nawome, Wulutu, nee Ɔpa zile a? (b) Duzu a yɛsukoa yɛfi ngyegyelɛ mɔɔ dole Nawome, Wulutu, nee Ɔpa la anu a?

 9 Ɛnee Nawome anye la kɛ ɔbade edwɛkɛ kpalɛ bie yeavi ye sua zo. Kenle ko, ɔbayɛ kɛ ɔdele ye wɔ gualilɛnli bie ɛkɛ ne kɛ aleɛ ɛbu Yizilayɛ. Gyihova ɛhakyi ɔ nye wɔ ye menli ne anwo zo. Ɛnee Bɛtelɛhɛm ɛyɛ kpalɛ bieko kɛmɔ ye duma ne kile la, “Aleɛ Sua Nu.” Nawome zile kpɔkɛ kɛ ɔsia yeahɔ ye sua zo.—Wul. 1:6.

10 Duzu a Wulutu nee Ɔpa bayɛ a? (Wul. 1:7) Ngyegyelɛ mɔɔ dole bɛ la manle bɛbikyele Nawome. Wulutu bikyele Nawome kpalɛ ɔlua atiakunlukɛnlɛma nee Gyihova anu diedi mɔɔ ɛnee Nawome lɛ la ati. Ahunlanvolɛ nsa ne dule bɛ bo kɛ bɛkɔ Dwuda.

11 Wulutu edwɛkɛ ne maa yɛnwu kɛ ngyegyelɛ to kpalɛma nee ɛtanema kɔsɔɔti. (Nolo. 9:2, 11) Ɔmaa yɛnwu kɛ saa yɛ dɔvolɛ bie wu a, ɔwɔ kɛ yɛmaa awie mɔ kyekye yɛ rɛle—titile menli mɔɔ fa Gyihova, Nyamenle ne mɔɔ Nawome zonlenle ye yɛ bɛ ɛvealeka la.—Mrɛ. 17:17.

Wulutu Lale Ɛhulolɛ Kpundii Ali

12, 13. Duzu ati a ɛnee Nawome kulo kɛ Wulutu nee Ɔpa sia kɔ bɛ sua zo a, na mɔlebɛbo ne duzu a mbɛlɛra nwiɔ ne yɛle a?

12 Ahunlanvolɛ nsa ne hɔle moa kpalɛ la, edwɛkɛ bieko rale Nawome adwenle nu. Ɔdwenlenle mraalɛ nwiɔ ne mɔɔ ɔ nee bɛ lua la nee ɛlɔlɛ mɔɔ bɛlale ye ali bɛhilele ye nee ɔ mra ne mɔ la anwo. Ɛnee ɔngulo kɛ ɔmaa bɛdi nyane bieko. Saa bɛfi bɛ sua zo na bɛ nee ye kɔ a, duzu a ɔbahola yeayɛ yeamaa bɛ wɔ Bɛtelɛhɛm a?

13 Yemɔti Nawome hanle kɛ: ‘Bɛzia, awie biala ɛhɔ ɔ nli sua nu. Gyihova nee bɛ ɛdɛnla gyɛlɛɛnye, kɛmɔ bɛ nee me nee menli mɔɔ ɛwu ɛhɔ la dɛnlanle la.’ Eza ɔzele bɛ kɛ Gyihova bamaa bɛanyia mrenya bɛagya, na bɛakyekye awuke. Edwɛkɛ ne toa zo kɛ: “Ɔyɛle bɛ atuu na ɔhɛlale bɛ. Na bɛdukuele nu bɛzunle.” Yɛte deɛmɔti ɛnee Wulutu nee Ɔpa kulo raalɛ ɛhye mɔɔ le atiakunlukɛnlɛma  na ɔnle angomedi la abo. Mbɛlɛra nwiɔ ne zele ye kɛ: “Kyɛkyɛ, yɛ nee wɔ kɔ ɛleka mɔɔ ɛvi la.”—Wul. 1:8-10.

14, 15. (a) Duzu a Ɔpa ziale kɛ ɔkayɛ a? (b) Mɔdenle boni a Nawome bɔle kɛ ɔmaa Wulutu azia a?

14 Noko Nawome anlie bɛ edwɛkɛ ne ando nu. Ɔhanle ɔtinlinle zolɛ kɛ ɔnrɛhola ɔnrɛboa bɛ kpalɛ biala wɔ Yizilayɛ, ɔluakɛ ɔnlɛ kunli mɔɔ ɔbanlea ye, na yeayɛ mralɛ mrenya mɔɔ bɛbagya bɛ a, ɔnlɛ anyelazo biala. Ɔhanle kɛ ɔdi nyane kɛ yeangola yeamboa bɛ la. Ɔpa dele Nawome edwɛkɛ ne abo. Ɔlɛ abusua wɔ Mowabe, ɔ nli de aze, yɛɛ ɔlɛ ɛleka mɔɔ ɔbadɛnla. Ɛnee ɔle kpalɛ kɛ ɔbadɛnla Mowabe. Yemɔti ɔvale nyane ɔyɛle Nawome atuu na ɔziale ɔhɔle.—Wul. 1:11-14.

15 Na Wulutu ɛ? Ɛnee Nawome edwɛkɛ ne fane ɔdaye noko ɔ nwo. Noko akee, yɛkenga kɛ: “Na Wulutu ɛdeɛ, yeamkponle kɛ ɔkɛzia.” Bie a ɛnee Nawome ɛlɛkɔ noko ɔkado ɔ nye la ɛnee Wulutu li ɔ nzi. Ɔzele ye kɛ: “Nea, ɛ hola ɛzia ɛhɔ ye sua zo ɔkazonle ye abusua bozonle ne mɔɔ ɔsonle ye dɛba la. Ɛdawɔ noko toa ye ɛ nee ye bɛhɔ.” (Wul. 1:15) Mɔɔ Nawome hanle la maa edwɛkɛ titile bie da ali. Tɛ kɛ ɛnee Ɔpa ɛzia ɛlɛkɔ ye menli ne anwo ala, emomu ɛnee yezia ɔkazonle ye “bozonle ne.” Ɛnee ɔ nye die nwo kɛ ɔbazonle Kimɔhye nee awozonle gyɛne. Asoo zɔhane a Wulutu dele nganeɛ a?

16-18. (a) Kɛzi Wulutu lale ɛhulolɛ kpundii ali ɛ? (b) Ɛhulolɛ kpundii nwo debie boni a yɛsukoa yɛfi Wulutu ɛkɛ a? (Eza nea mraalɛ nwiɔ ne anwo nvoninli ne.)

16 Mekɛ mɔɔ Wulutu gyi Nawome anyunlu ɛkɛ ne la ɛnee yezi mɔɔ ɔbayɛ la anwo kpɔkɛ dɛba wɔ ye ahonle nu. Ɛnee ɔkulo  Nawome nee Nyamenle ne mɔɔ Nawome sonle ye la. Yemɔti Wulutu hanle kɛ: “Mmafoa me kɛ mengyakyi wɔ mengɔ anzɛɛ menzia na memmatoa wɔ. Ɔluakɛ me nee wɔ yɛkɔ ɛleka mɔɔ ɛlɛkɔ la, mebadɛnla ɛleka mɔɔ ɛkɛdɛnla la. Wɔ menli bayɛ me menli, na wɔ Nyamenle ne ayɛ me Nyamenle. Ɛleka mɔɔ ɛkɛwu ɛkɛla la, ɛkɛ ne yɛɛ medame mebawu meala a. [Gyihova] ɛdua me kakɛ ɛgua me bie zo kɛ menwɔgyakyi wɔ menwɔzia a, kyesɛ ewule na akpakye yɛ mu nwiɔ yɛ avinli.”—Wul. 1:16, 17.

“Wɔ menli bayɛ me menli, na wɔ Nyamenle ne ayɛ me Nyamenle”

17 Wulutu wule la ye ɛvolɛ kɛyɛ 3,000 ɛne, noko yɛtɛkakye edwɛkɛ mɔɔ ɔhanle la. Bɛmaa yɛnwu subane mɔɔ sonle bolɛ, ɛhulolɛ kpundii. Ɛhulolɛ mɔɔ ɛnee Wulutu lɛ la anu yɛ se, ɛhye ati ɔbetanle Nawome wɔ ɛleka biala mɔɔ ɔhɔle la. Ɛnee ewule ala a bahola akpakye bɛ avinli a. Nawome menli ne bayɛ ye menli, ɔluakɛ ɛnee Wulutu ɛlɛgyakyi debie biala mɔɔ ɔze ye wɔ Mowabe mɔɔ Mowabe awozonle boka nwo bɔbɔ la ɔ nzi. Wulutu anyɛ kɛ Ɔpa la, ɔvile ye ahonle nu ɔhanle kɛ ɔkpondɛ kɛ Nawome Nyamenle, Gyihova ne yɛ ye Nyamenle. *

18 Akee bɛ mu nwiɔ bɛdoale adenle tendenle ne mɔɔ bɛlɛtu bɛahɔ Bɛtelɛhɛm la azo. Mgbondabulɛ bie ka kɛ ɔbayɛ kɛ bɛlile dapɛne ko na bɛadwu. Ɛhye manle bɛ nuhua ko biala nyianle adenle kyekyele ɔ gɔnwo arɛle.

19. Kɛzi yɛbahola yɛala Wulutu ɛhulolɛ kpundii ne bie ali wɔ yɛ abusua nu, yɛ nee yɛ gɔnwo mɔ avinli, nee asafo ne anu ɛ?

19 Ɛnɛ menli dɔɔnwo di nyane. Wɔ mekɛ ɛhye mɔɔ Baebolo ne ka kɛ “anwongyelelɛ dɔɔnwo bara” la anu, yɛ nwo amra wu na yɛdi nyane. (2 Tem. 3:1) Ɛhye ati yɛhyia Wulutu subane ne bie. Ɛhulolɛ kpundii—ɛhulolɛ mɔɔ ɔfa ɔ nwo ɔbeta debie na ɔngyakyi ye la—le subane kɛnlɛma mɔɔ nwolɛ hyia wɔ awozinli ewiade ɛhye anu a. Yɛhyia nwo wɔ agyalɛ nu, wɔ abusua nu, wɔ yɛ nee yɛ gɔnwo mɔ avinli, yɛɛ Keleseɛnema asafo ne anu. (Bɛgenga 1 Dwɔn 4:7, 8, 20.) Saa yɛnyia ɛhulolɛ zɔhane bie a, ɛnee yɛlɛsukoa Wulutu neazo kɛnlɛma ne.

Wulutu Nee Nawome Hɔle Bɛtelɛhɛm

20-22. (a) Kɛzi Mowabe mɔɔ Nawome hɔle la hanle ye ɛ? (b) Adwenle mɔɔ ɛndenrɛ la boni a Nawome nyianle a? (Eza nea Gyemise 1:13.)

20 Tɛ yɛ nloa ala a ɔwɔ kɛ yɛfa yɛka kɛ yɛlɛ ɛhulolɛ kpundii a; ɔwɔ kɛ yɛfa yɛ nyɛleɛ yɛda ye ali. Wulutu nyianle adenle kɛ ɔbala  ɛhulolɛ kpundii ali yeahile Nawome nee Gyihova, Nyamenle ne mɔɔ yekpa kɛ ɔsonle ye la.

21 Awieleɛ bɔkɔɔ ne, mraalɛ nwiɔ ne dwule Bɛtelɛhɛm, namule mɔɔ wɔ Gyɛlusalɛm nyiakɛ kɛyɛ mayɛlɛ nsia la azo. Ɔbayɛ kɛ ɛnee bɛze Nawome nee ye abusua ne wɔ sua ekyi ɛhye azo, ɔluakɛ Nawome dwule ɛkɛ ne la sua ne azo kpudwule. Mraalɛ mɔɔ wɔ sua ne azo la twe bɛ kɔme nea ye na bɛabiza kɛ, “Nawome ɛhye ɔ?” Ɔda ali kɛ adenle mɔɔ ɔdule ɔhɔle Mowabe la ɛmaa yehakyi; ɔ nyunlu kile kɛ ɔhɔle anwongyelelɛ nu na ɔlɛdi nyane.—Wul. 1:19.

22 Nawome hanle ngyegyelɛ mɔɔ ɔdole ye la ɔhilele ye mbusuafoɔ nee ɔ gɔnwo mɔ. Ɔdele nganeɛ bɔbɔ kɛ ɔwɔ kɛ bɛkakyi ye duma Nawome ne mɔɔ kile “Me Fɛlɛkolilɛ” la na bɛfɛlɛ ye Maala mɔɔ kile “Ɛnwonle” la. O, Nawome! Ɔdele nganeɛ kɛ Dwobu la, na ɔnyianle adwenle kɛ Gyihova Nyamenle a vale ngyegyelɛ ɛhye mɔ rale ɔ nwo zo a.—Wul. 1:20, 21; Dwo. 2:10; 13:24-26.

23. Duzu a Wulutu dwenlenle nwolɛ a, na ngyehyɛleɛ boni a ɛnee wɔ Mosisi Mɛla ne anu maa ehyiavolɛma a? (Eza nea ɔ bo ɛkɛ edwɛkɛ ne.)

23 Mraalɛ nwiɔ ne dwule Bɛtelɛhɛm la, Wulutu bɔle ɔ bo dwenlenle kɛzi ɔbanlea ɔ nwo nee Nawome la anwo. Ɔnwunle kɛ Gyihova ɛyɛ ngyehyɛleɛ kɛnlɛma bie wɔ Mɛla ne mɔɔ ɔvale ɔmanle Yizilayɛma la anu mɔɔ boa ehyiavolɛma a. Bɛmanle bɛ adenle kɛ saa ɔdwu ɛbuhenle a bɛkola bɛkɔ awie mɔ ɛya nu bɛkɔsesa ma ne mɔɔ bɛgyakyi bɛ bɛ nzi anzɛɛ wɔ ɛya ne mɔ anloa la. *Sɛlɛ. 19:9, 10; Mɛla 24:19-21.

24, 25. Mekɛ mɔɔ Wulutu hɔvindele Bowaze ɛya nu la duzu a ɔyɛle a, na kɛzi ɛnee ma ɛsesalɛ gyima ne de ɛ?

24 Ɛnee ɔle baale ɛdelɛ mekɛ, saa yɛfa yɛba ɛnɛ mekɛ ye anu a ɔbayɛ kɛ ɛnee ɔle April nu. Wulutu hɔle kɛ ɔkanlea saa ɔbanyia awie mɔɔ ɔbamaa yeasesa ma wɔ ye ɛya nu a.  Ɔhɔvindele Bowaze, sukoavolɛ bie mɔɔ le Nawome ahu Yilemɛlɛke mɔɔ ɛwu la busuanli la ɛya nu. Ɔwɔ nuhua kɛ Mɛla ne maa ye adenle kɛ ɔkola ɔsesa ma ne bie ɛdeɛ, noko yeanli ɔ ti anwo; ɔzɛlɛle nrenya ne mɔɔ nea gyima ne azo la adenle. Ɔmanle ye adenle, na Wulutu bɔle gyimayɛlɛ bo.—Wul. 1:22–2:3, 7.

25 Pɛ Wulutu mɔɔ li gyimayɛvoma ne anzi la anwo nvoninli nea. Mekɛ mɔɔ bɛlɛ bɛ ɛdedadeɛ ne bɛlɛpɛ baale ne la, ɛnee ɔli bɛ nzi ɔlɛsesa mɔɔ kɛgua aze anzɛɛ kɛha ɛkɛ la. Ɔkyekye mɔɔ ɔbanyia ye la na ɔfa ɔkɔ ɛleka mɔɔ ɔbawozo ma ne la. Ɔle gyima ɛsesebɛ mɔɔ die mekɛ, na saa ewia ne ɛlɛfi a yemɔ ɔnla aze fee. Noko akee, Wulutu angyakyi, ɔkagyinla la ɛnee ɔlɛkyikyi ɔ nyunlu ɛhɛnlɛnra anzɛɛ ɔlɛkɔ yeahɔli debie wɔ “kpɔda” ne mɔɔ bɛbo bɛmaa gyimayɛvoma ne la abo.

Wulutu hulole kɛ ɔbayɛ gyima ɛsesebɛ mɔɔ bɛmbu ye la yeanlea ɔ nwo nee Nawome

26, 27. Subane boni a ɛnee Bowaze lɛ a, na kɛzi ɔ nee Wulutu lile ɛ?

26 Ɔbayɛ kɛ Wulutu anzuzu kɛ awie mɔ ɛlɛnea ye, noko bɛnwunle ye. Bowaze nwunle ye na ɔbizale ɔ nwo edwɛkɛ wɔ ye sonvolɛ ne mɔɔ nea gyima ne azo la ɛkɛ. Bowaze le awie mɔɔ ɔlɛ diedi, ɔyɛ ye gyimayɛvoma mɔɔ nyɛvolɛ boka nwo la mo na ɔka kɛ: ‘Gyihova nee bɛ ɛdɛnla.’ Bɛdabɛ noko bɛdie zo zɔhane ala. Nrenya kpanyinli ɛhye mɔɔ sunsum nu ninyɛne hyia ye la bule Wulutu kɛ ɔ ra.—Wul. 2:4-7.

27 Bowaze vɛlɛle Wulutu kɛ “me ra raalɛ” na ɔhanle ɔhilele ye kɛ ɔmmakɔ ɛya gyɛne nu ɔkɔsesa ma na ɔ nee ye sonvolɛ mraalɛ ne mɔ ɛwoa ye ɛya ne anu amaa nrenya biala angyegye  ye. Ɔmanle bɛmanle Wulutu ewiazo aleɛ. (Bɛgenga Wulutu 2:8, 9, 14.) Mɔɔ tɛla biala la, ɔhanvole ye na ɔmanle ye anwosesebɛ. Wɔ adenle boni azo?

28, 29. (a) Duma kpalɛ boni a Wulutu nyianle a? (b) Kɛ ɔkɛyɛ na wɔava Gyihova wɔayɛ wɔ ɛvealeka kɛ Wulutu ɛ?

28 Mekɛ mɔɔ Wulutu bizale Bowaze debie mɔɔ ɔdaye ɛyɛvolɛ yeyɛ mɔɔ ɔti yenyia ɔ nyunlu ɛlolɛ la, ɔbuale ye kɛ yede mɔɔ yeyɛ yemaa ye ase Nawome la kɔsɔɔti. Ɔbayɛ kɛ Nawome hanle Wulutu anwo edwɛkɛ kpalɛ hilele mraalɛ mɔɔ wɔ Bɛtelɛhɛm la, na bɛdabɛ noko bɛhanle bɛmanle Bowaze dele. Eza Bowaze nwunle kɛ Wulutu ɛrayɛ Gyihova sonvolɛ, ɔluakɛ ɔhanle kɛ: ‘Gyihova ɛyila wɔ wɔ mɔɔ wɔyɛ la anwo; Gyihova ɛlo wɔ molozo na Yizilayɛ Nyamenle ne mɔɔ wɔravea ɔ ndɛba abo la ɛva wɔ ɛzie boɛ.’—Wul. 2:12.

29 Nea kɛzi edwɛkɛ ɛhye manle Wulutu anwosesebɛ a! Ɛnee yezi kpɔkɛ kɛ ɔbavea Gyihova Nyamenle andɛba abo, kɛmɔ anloma ralɛ bie fea ɔ nli andɛba abo na ɔnyia banebɔlɛ la. Ɔyɛle Bowaze mo kɛ ɔdendɛle kɛnlɛma ɔhilele ye la. Wulutu yɛle gyima wɔ ɛya ne anu toonwo aleɛ dwole.—Wul. 2:13, 17.

30, 31. Gyimayɛlɛ, anyezɔlɛ, nee ɛhulolɛ kpundii nwo ninyɛne boni a yɛsukoa yɛfi Wulutu ɛkɛ a?

30 Wulutu diedi ne le neazo kɛnlɛma maa yɛdayɛ mɔɔ yɛde anwogyegyelɛ mekɛ ɛhye anu la. Yeande nganeɛ kɛ kɛmɔ ɔle kunlavolɛ la ati ɔwɔ kɛ awie mɔ yɛ ninyɛne maa ye, yemɔti ɔ nye zɔle moalɛ biala mɔɔ ɔnyianle la. Yeanze nyiane kɛ ɔbayɛ gyima ɛsesebɛ mɔɔ bɛmbu ye bie la yeava yeanlea awie mɔɔ ɔkulo ye la. Ɔvale folɛdulɛ mɔɔ ɔbaboa ye yeamaa ɔ nee menli gyɛne ayɛ gyima wɔ ɛleka mɔɔ banebɔlɛ wɔ la ɔlile gyima. Mɔɔ hyia kpalɛ la, yeammaa ɔ rɛle anvi ye nɔhalɛ ɛvealeka ne—ɔ Ze, Gyihova Nyamenle mɔɔ bɔ ɔ nwo bane la.

31 Saa yɛda ɛhulolɛ kpundii ali kɛmɔ Wulutu yɛle la na yɛdi ye mɛlɛbɛnwoaze, gyima ɛsesebɛ ɛyɛlɛ nee ye anyezɔlɛ neazo ne anzi a, yɛdayɛ noko yɛ diedi ne baboa awie mɔ. Kɛzi Gyihova nleanle Wulutu nee Nawome ɛ? Yɛbazuzu ɛhye anwo wɔ tile mɔɔ doa zo la anu.

^ ɛden. 17 Yɛ ye nzonlɛ kɛ Wulutu anva amodinli “Nyamenle” ala a lile gyima a, kɛmɔ nyɛvolɛ bie mɔ yɛ ye la; wɔ aneɛ mɔɔ bɛlumuale bɛvale bɛhɛlɛle Baebolo ne la anu, ɔvale Nyamenle duma Gyihova noko ɔlile gyima. The Interpreter’s Bible ne ka kɛ: “Kɛlɛvolɛ ne manle ɔlale ali kɛ ɛnee ɛyɛvolɛ ɛhye sonle nɔhalɛ Nyamenle ne.”

^ ɛden. 23 Ɛnee ɔle mɛla kɛnlɛma mɔɔ Wulutu ɛtɛnwunle bie ɛlɛ wɔ ye sua zo a. Wɔ tete ne, ɛnee menli mɔɔ wɔ Aduduleɛ afoa nu la ɛmbu ahunlavolɛ fee. Buluku bie hanle kɛ: “Saa raalɛ ɔ hu wu a, kyesɛ ɔ mra mrenya na anlea ye; saa ɔnlɛ bie a, ɔwɔ kɛ ɔtɔne ɔ nwo ɔkɔ akɛlɛzonlenlɛ nu anzɛɛ ɔbɔ tuutuu ɛbɛla anzɛɛ ɔwu.”