Wulu kɔ nuhua edwɛkɛ ne azo

Wulu kɔ nuninyɛne ne azo

 TILE NWIƆ

“Ɔ Nee Nyamenle Bɛ Avinli Ande Ɛlɛ”

“Ɔ Nee Nyamenle Bɛ Avinli Ande Ɛlɛ”

1, 2. Gyima boni a Nowa nee ye abusua ne yɛle a, na ngyegyelɛ boni mɔ a bɛyiale a?

NOWA denrɛle ɔ nze na ɔhwenle ye nu ɔlua ye agbɔkɛ nu mɔɔ ɛnee ɛlɛyɛ ye nyane la ati. Yɛ Nowa mɔɔ de baka sinli zo, ɔlɛdie ɔ menle ekyii wɔ ye gyima ne anwo na ɔlɛnea kɛzi ɛlɛne ne kpole de la anwo nvoninli nea. Ɔte bilewu ne nvoanle; yɛɛ ɔte ninyɛne mɔɔ bɛlɛfa bɛayɛ mbaka ne anwo gyima la ane. Ɛleka mɔɔ Nowa de la, ɔkola ɔnwu ɔ mra mrenya ne mɔ kɛ bɛlɛyɛ mbaka ne anwo gyima. Ɔ nee ɔ mra mrenya ne mɔ, bɛ ye mɔ, yɛɛ ɔ ye mɔɔ ɔkulo ye la ɛva ɛvolɛ dɔɔnwo ɛyɛ gyima ɛsesebɛ ɛhye toonwo mekɛ ɛhye. Bɛyɛ bie, noko dɔɔnwo tɛbɔ ɛkɛ!

2 Menli mɔɔ wɔ ɛkɛ la zuzule kɛ bɛ kɔsɔɔti bɛle ahoasea. Mekɛ mɔɔ ɛlɛne ne ɛlɛyɛ kɛnlɛma la, ɛnee menli ɛlɛsele bɛ kɛ bɛse azule bayi ava ewiade amuala la. Bɛbule esiane ne mɔɔ Nowa hɔle zo bɔle bɛ kɔkɔ wɔ nwolɛ la kɛ ɔnrɛra, ɔle ngoaseasɛm ala! Ɛnee bɛnde ɔ bo kɛ awie bazɛkye ɔ nee ye abusua ne mekɛ wɔ gyima funli zɛhae anwo. Noko akee, Gyihova, Nowa Nyamenle ne annwu ye zɔ.

3. Adenle boni azo a Nowa nee Nyamenle avinli ande ɛlɛ ɛ?

3 Nyamenle Edwɛkɛ ne ka kɛ: Nowa nee nɔhalɛ “Nyamenle ne bɛ avinli ande ɛlɛ [“Nowa nee nɔhalɛ Nyamenle ne luale,” NW].” (Bɛgenga Mɔlebɛbo 6:9.) Ɛnee ɛhye kile duzu? Ɔngile kɛ Nyamenle rale azɛlɛ ye azo anzɛɛ Nowa hɔle anwuma wɔ adenle bie azo. Emomu, ɔkile kɛ Nowa diele ye Nyamenle ne bɔkɔɔ na ɔhulole ye kpalɛ, yemɔti ɔyɛle kɛ asɛɛ ɔ nee Gyihova bɛluale nwolɛ kɛ agɔnwolɛma la. Ɛvolɛ apenle dɔɔnwo anzi, Baebolo ne hanle Nowa anwo edwɛkɛ kɛ: ‘Ɔluale ye diedi zo ɔbuale ewiade ne fɔlɛ.’ (Hib. 11:7) Kɛzi ɔyɛle ye ɛ? Duzu a yɛbahola yɛazukoa yɛavi ye diedi ne anu ɛnɛ a?

Tenlenenli Wɔ Ewiade Ɛtane Nu

4, 5. Kɛzi ewiade ne zɛkyele bɔkɔɔ wɔ Nowa mekɛ zo ɛ?

4 Nowa nyinle wɔ ewiade mɔɔ ɛnee amumuyɛ ɛlɛkɔ zo ndɛndɛ wɔ nu la anu. Ɛnee ewiade ne ɛnle kpalɛ wɔ ye nenya Yinɔko, tenlenenli bieko mɔɔ nee Nyamenle luale la mekɛ zo. Yinɔko hanle  dole ɛkɛ ne kɛ bɛbabua bɛdabɛ mɔɔ bɛnze Nyamenle la ndɛne wɔ bɛ ninyɛndane nwo. Ɔdwule Nowa mekɛ zo la, ɛnee amumuyɛyɛlɛ ne ɛbo zo. Nɔhalɛ nu, wɔ Gyihova anye zo, ɛnee sonla ko ɛnle azɛlɛ ye azo mɔɔ di boɛ a, ɛnee basabasayɛlɛ ɛlie ebia wɔ azɛlɛ ye azo. (Mɔl. 5:22; 6:11; Dwu. 14, 15) Duzu a manle ninyɛne zɛkyele zɛhae a?

5 Ɛnee edwɛkɛ ɛzulolɛ bie ɛzi Nyamenle sunsum nu mralɛ, mɔɔ le anwumabɔvolɛ ne mɔ la avinli. Bɛ nuhua ko lumuale dele atua tiale Gyihova, na ɔyɛle ɔ nwo Seetan Abɔnsam ɔlua Nyamenle mɔɔ ɔsokpale ye na ɔmanle Adam nee Yive yɛle ɛtane la azo. Wɔ Nowa mekɛ zo, anwumabɔvolɛma gyɛne bɔle ɔ bo dele atua tiale Gyihova pɛlepɛle tumililɛ ne. Bɛgyakyile gyima mɔɔ bɛyɛ wɔ anwuma la na bɛrale azɛlɛ ye azo, bɛhakyile bɛ nwo menli na bɛragyale mraalɛ mɔɔ anwo yɛ fɛ la. Anwumabɔvolɛma angomedi nee anwomemaazo ɛhye mɔ manle alesama nyianle subane ɛtane.—Mɔl. 6:1, 2; Dwu. 6, 7.

6. Kɛzi Nɛfelem ne mɔ manle ewiade ne zɛkyele bɔkɔɔ ɛ, na duzu a Gyihova bɔle kpɔkɛ kɛ ɔbayɛ a?

6 Bieko, anwumabɔvolɛma mɔɔ hakyile bɛ nwo menli la nee mraalɛ wole ngakula mrenya mɔɔ bɛ mgbole nee bɛ anwosesebɛ le ngakyile la. Baebolo ne fɛlɛ bɛ Nɛfelem, mɔɔ ɔ bo kile “Azedolɛma”—menli mɔɔ maa awie mɔ tɔ aze. Nɛfelem amumuyɛma atisesebɛ ne mɔ manle ewiade ne zɛkyele bɔkɔɔ. Zɔhane ninyɛne ne mɔ ati, Bɔvolɛ ne nwunle kɛ “sonla amumuyɛyɛlɛ ne ɛyɛ kpole kpalɛ wɔ azɛlɛ ye azo, na ɛtane ngome ɛyi ye adwenle nee ye ahonle nu tɛkɛɛ.” Gyihova zile kpɔkɛ kɛ ɔbazɛkye zɔhane ɛtane ewiade ne wɔ ɛvolɛ 120 anu.—Bɛgenga Mɔlebɛbo 6:3-5.

7. Ngyegyelɛ boni a Nowa nee ɔ ye yiale wɔ mekɛ mɔɔ bɛbɔ bɛ mra ne mɔ anwo bane bɛavi subane ɛtane nwo la ɛ?

 7 Nea kɛzi ɔbayɛ se kɛ awie banlea ye abusua wɔ ewiade zɛhae anu a! Noko Nowa yɛle zɔ. Ɔnyianle yelɛ kpalɛ. Nowa nyianle ɛvolɛ 500 la, ɔ ye wole ngakula mrenya nsa—Hyɛm, Ham, yɛɛ Gyeefɛte. * Awovolɛ ne mɔ bɔle nu na bɛbɔle ngakula mrenya ne mɔ anwo bane wɔ subane ɛtane mɔɔ ɛlɛkɔ zo la anwo. Ngakula mrenya anye die “kakanyinlima” nee menli mɔɔ ‘bɛlie duma’ la anwo na bɛkanvo bɛ—yemɔti ɛnee bɛ nye balie Nɛfelem ne mɔ anwo. Nowa nee ɔ ye angola ambɔ ngakula ne mɔ anwo bane anvi menli mgbole ɛhye mɔ amile nyɛleɛ biala mɔɔ bɛdele la anwo ɛdeɛ, noko bɛholale bɛhilehilele bɛ Gyihova Nyamenle, mɔɔ kyi ɛtaneyɛlɛ kɔsɔɔti la anwo nɔhalɛ mɔɔ yɛ anyelielɛ la. Ɛnee ɔwɔ kɛ bɛboa ngakula mrenya ne mɔ bɛmaa bɛnwu kɛ basabasayɛlɛ nee atuadelɛ ne mɔɔ wɔ ewiade ne anu la yɛ Gyihova nyane.—Mɔl. 6:6.

Ɛnee ɔwɔ kɛ Nowa nee ɔ ye bɔ bɛ mra nwo bane fi subane ɛtane nwo

8. Kɛzi awovolɛ mɔɔ bɛze nrɛlɛbɛ la bahola azukoa Nowa nee ɔ ye neazo ne ɛ?

8 Awovolɛ mɔɔ wɔ ɛkɛ ɛnɛ la bahola anwu mɔɔ Nowa nee ɔ ye vale nu la. Ɛnɛ, basabasayɛlɛ nee atuadelɛ noko ɛzɛkye ewiade ne. Ngakula mɔɔ ɛde atua la ɛbu azua dɔɔnwo azo. Basabasayɛlɛ ɛbu ninyɛne mɔɔ ngakula fa dielie bɛ nye la anu. Awovolɛ mɔɔ ze nrɛlɛbɛ la yɛ biala mɔɔ bɛbahola la na bɛko bɛtia ninyɛne ɛhye mɔ ɔlua bɛ mra mɔɔ bɛkilehile bɛ anzondwolɛ Nyamenle, Gyihova, mɔɔ kenlebie bava basabasayɛlɛ ara awieleɛ la anwo debie la azo. (Edw. 11:5; 37:10, 11) Ɔbahola yeayɛ boɛ! Nowa nee ɔ ye holale yɛle zɔ. Bɛ mra mrenya ne mɔ nyinle na bɛbɔle ɛbɛla kpalɛ, bɛgyale mraalɛ mɔɔ bɛdabɛ noko bɛlɛ ɛhulolɛ kɛ bɛbava nɔhalɛ Nyamenle, Gyihova, bɛalumua bɛ ɛbɛlabɔlɛ nu la.

‘Bobɔ Ɛlɛne’

9, 10. (a) Gyihova edwɛkɛ boni a manle Nowa ɛbɛlabɔlɛ hakyile a? (b) Kɛzi Gyihova hanle ɛlɛka ne ɛbobɔlɛ nee bodane mɔɔ ɔgyi zo la anwo edwɛkɛ ɔhilele Nowa ɛ?

9 Kenle ko, Nowa ɛbɛlabɔlɛ hakyile bɔkɔɔ. Gyihova nee ye sonvolɛ ɛhye mɔɔ ɔkulo ye edwɛkɛ la dendɛle, na ɔhanle Ye kpɔkɛ mɔɔ yebɔ kɛ ɔsɛkye zɔhane ewiade ne la ɔhilele ye. Nyamenle zele Nowa kɛ: ‘Fa gɔfa baka bobɔ ɛlɛne.’—Mɔl. 6:14.

10 Ɛnee ɛlɛne ɛhye ɛnle meli kɛmɔ bie mɔ bu ye la. Bɛanyɛ ye kɛ meli mɔɔ ninyɛne bie mɔ wɔ nwolɛ la. Ɛnee ɔle ɛlɛka kpole bie ala. Gyihova hilele Nowa kɛzi ɛlɛne ne kpole bayɛ, kɛzi ɔbahyehyɛ ye nee kɛzi ɔbava bilewu yeaha ɔ kunlu nee ɔ nzi la. Ɔhanle deɛmɔti ɔwɔ kɛ ɔyɛ ye zɔ la ɔhilele Nowa: “Mebamaa ezule kpole bie adɔ toonwo abu aze . . . debie biala mɔɔ wɔ azɛlɛ ye azo la bawu.” Noko  akee, Gyihova nee Nowa yɛle ngyekyeleɛ: “Ɛ nee ɛ mra mrenya, nee ɛ ye, yɛɛ ɛ mra mrenya mraalɛ ne mɔ bavo ɛlɛne ne anu.” Eza Nowa bava nane biala nyinli nee belɛ ahɔ ɛlɛne ne anu. Bɛdabɛ mɔɔ bɛbahɔ ɛlɛne ne anu la a bɛanyia ngoane wɔ Azuyilɛ ne mɔɔ ɛlɛba la anu a!—Mɔl. 6:17-20.

Nowa nee ye abusua ne yɛle gyima bɔle nu manle Nyamenle edwɛkɛ rale nu

1112. Gyima kpole boni a bɛvale bɛmanle Nowa a, na kɛzi ɔlile nwolɛ gyima ɛ?

11 Ɛnee gyima kpole kpalɛ la Nowa anyunlu. Ɛlɛne ne le kpole—ɛnee ye tendenle bayɛ mita 133, ye tɛtɛlɛ mita 22, yɛɛ ye anwumahɔlɛ mita 13. Ɛnee ɔle kpole ɔtɛla meli biala mɔɔ bɛva ndaboa bɛyɛ wɔ ɛnɛ mekɛ ye bɔbɔ la. Asoo Nowa gyakyile gyima ɛhye, ɔdendɛle ɔ nzo abo kɛ ɔyɛ se, anzɛɛ ɔhakyile kɛzi ɔwɔ kɛ ɔyɛ ye la amaa yeanyɛ se yeammaa ye? Baebolo ne bua kɛ: “Nowa yɛle ɛhye mɔ na ɔyɛle debie biala mɔɔ Nyamenle zele ye la.”—Mɔl. 6:22.

12 Gyima ne lile ɛvolɛ dɔɔnwo, bie a ɛvolɛ 40 kɔdwu 50. Ɛnee ɔwɔ kɛ bɛbu mbaka, bɛtwe, bɛkpakyekpakye, bɛsiezie na bɛfa bɛsisa zo. Ɛnee ɛlɛne ne bayɛ nzɛzo nsa, mɔɔ lɛ ekpumgbunli dɔɔnwo na anlenkɛ la ye foa ko. Ɔda ali kɛ ɛnee nvɛnzɛlɛ gugua ɛlɛne ne anwuma yɛɛ bɛdu zo bɛmaa yehɔ anwuma mɔɔ ezule tɔ a ɔdua zo ɔgua aze a.—Mɔl. 6:14-16.

13. Nowa gyima ne boni a ɛnee ɔbayɛ kɛ ɔyɛ se ɔtɛla ɛlɛne ne ɛbobɔlɛ a, na kɛzi menli ne yɛle bɛ nyɛleɛ wɔ nwo ɛ?

13 Ɛvolɛ dɔɔnwo pɛle nu mɔɔ ɛlɛne ne ɛlɛyɛ kɛnlɛma la, ɔbayɛ kɛ Nowa anye liele kpole kɛ ye abusua ne ɛlɛboa ye la! Ɛnee debie bieko boka gyima ne anwo mɔɔ ɔzɔho kɛ yemɔ yɛ se kpalɛ tɛla ɛlɛne ne ɛbobɔlɛ a. Baebolo ne ka kɛ ɛnee Nowa bɔ “pɛlepɛlelilɛ nwo nolo.” (Bɛgenga 2 Pita 2:5.) Yemɔti ɔnyianle akɛnrazilɛ na ɔlile bɛ nyunlu ɔmanle bɛbɔle ɛtanevolɛma mɔɔ bɛnzonle Nyamenle la kɔkɔ wɔ ɛzɛkyelɛ ne mɔɔ ɛlɛba bɛ nwo zo la anwo. Duzu a bɛyɛle a? Gyisɛse Kelaese hanle mɔɔ hɔle zolɛ la anwo edwɛkɛ amozi kɛ, “bɛannwu” ye. Ɔhanle kɛ ɛbɛlabɔlɛ nu ninyɛne liele bɛ mekɛ—bɛlile, bɛnlonle, agyalɛ liele ebia—yemɔti bɛandie Nowa. (Mat. 24:37-39) Ɔda ali kɛ menli dɔɔnwo golole Nowa nee ye abusua ne anwo; ɔbayɛ kɛ bie mɔ dule ye ahonle na bɛdwazole bɛtiale ye ɛsesebɛ. Bie a bɛbɔle mɔdenle bɔbɔ kɛ bɛsɛkye ye gyima ne.

Menli nwunle daselɛ mɔɔ kile kɛ Nyamenle ɛlɛyila Nowa ɛdeɛ, noko bɛgolole ɔ nwo na bɛandie ye edwɛkɛ

14. Duzu a Keleseɛne mbusua bahola azukoa avi Nowa nee ye abusua ne ɛkɛ a?

14 Noko Nowa nee ye abusua ne angyakyi gyima ne. Ɔwɔ nuhua kɛ menli mɔɔ wɔ ewiade ne anu la bule ɛlɛne ɛbobɔlɛ ne kɛ ɔngyia, nrɛlɛbɛ ɛnle nu, anzɛɛ koasea gyima ɛdeɛ, noko bɛvale nɔhalɛlilɛ bɛhɔle zo bɛyɛle. Keleseɛne mbusua mɔɔ wɔ ɛkɛ ɛnɛ la bahola azukoa dɔɔnwo avi Nowa nee ye abusua ne diedi ne anu. Ye biala anu, yɛdayɛ noko yɛde mekɛ mɔɔ Baebolo ne fɛlɛ ye ewiade ɛhye “awieleɛ mekɛ” la anu. (2 Tem. 3:1) Gyisɛse hanle kɛ yɛ mekɛ ɛhye  bayɛ kɛ mekɛ ne mɔɔ Nowa bobɔle ɛlɛne ne wɔ nu la. Saa Keleseɛnema ɛlɛka Nyamenle Belemgbunlililɛ ne anwo edwɛkɛ ne na menli yɛ anyetele, bɛgolo bɛ nwo anzɛɛ bɛkpɔ bɛ wɔ nwolɛ bɔbɔ a, bɛkakye Nowa. Tɛ bɛdabɛ a bɛlɛdumua bɛayia ngyegyelɛ zɛhae bie a.

“Bɛvo Ɛlɛne Ne Anu”

15. Ɔka ekyi Nowa nyia ɛvolɛ 600 la alɔbɔlɛ edwɛkɛ boni a dole ye a?

15 Ɛvolɛ dɔɔnwo pɛle nu, na ngyikyi ngyikyi bɛwiele ɛlɛne ne bobɔ. Nowa ɛlɛkɔ ɛvolɛ 600 la, ye alɔvolɛ wule. Ɔ ze, Leemɛke wule. * Ye ɛvolɛ nnu anzi, Leemɛke ɔ ze, mɔɔ le Nowa nenya Mɛtusɛla wule, ɔlile ɛvolɛ 969, ɛhye manle dasanli mɔɔ dɛnlanle aze hyɛle wɔ Baebolo kɛlɛtokɛ nu la ngoane rale awieleɛ. (Mɔl. 5:27) Mɛtusɛla nee Leemɛke dɛnlanle aze wɔ nrenya ne mɔɔ lumua, Adam, mekɛ zo.

16, 17. (a) Nrɛlaleɛ fofolɛ boni a Nowa nyianle wɔ ye ɛvolɛ 600 ne anu a? (b) Ka mɔɔ Nowa nee ye abusua ne nwunle ye la anwo edwɛkɛ.

16 Wɔ tete selɛ Nowa ɛvolɛ 600 ne anu, ɔnyianle nrɛlaleɛ fofolɛ ɔvile Gyihova Nyamenle ɛkɛ ne kɛ: “Ɛ nee wɔ sua nu amra amuala bɛvo ɛlɛne ne anu.” Mekɛ ko ne ala, Nyamenle hanle hilele Nowa kɛ ɔva nane ngakyile kɔsɔɔti ɔhɔ ɛlɛne ne anu—nane biala mɔɔ anwo te, mɔɔ bɛfa bɛbɔ afɔle a ɔyɛ boɛ la nyinli nee belɛ nsuu, yɛɛ mɔɔ ɛha la nyinli nee belɛ ala.—Mɔl. 7:1-3.

 17 Bɛ rɛle ɛnrɛvi mɔɔ bɛnwunle ye la ɛlɛ. Nane dɔɔnwo ravole nu—bie ɛlɛtia, bie ɛlɛtu, bie ɛlɛkongo, bie tudu ɔ gyakɛ ngoko, bie kɔ ye foa ko foa ko—asolo kɛzi bɛ mgbole, bɛ nwo nee bɛ subane de a. Nea kɛzi Nowa babɔ mɔdenle avɛlɛvɛlɛ nane anwo ɛzulolɛ ne mɔ bɛtɛbɛtɛ yeamaa bɛahɔ ɛlɛne ne anu na yeamaa bɛala ɛleka ekyi ne wɔ anzondwolɛ nu la. Kɛlɛtokɛ ne hanle kɛ bɛhɔle ɛlɛne ne anu” wɔ Nowa anwo ɛkɛ.—Mɔl. 7:9.

18, 19. (a) Kɛzi yɛbahola yɛazuzu ninyɛne mɔɔ sisile Nowa mekɛ zo la anwo kpuyia mɔɔ kpolerazulɛma biza la anwo ɛ? (b) Kɛzi yɛnwu Gyihova nrɛlɛbɛ wɔ adenle mɔɔ ɔluale zo ɔliele nane ne mɔ ngoane la anu ɛ?

18 Kpolerazulɛma bie mɔ babiza kɛ: ‘Kɛzi debie zɛhae bahola azi ɛ? Na kɛ ɔkɛyɛ na nane ɛhye mɔ kɔsɔɔti adɛnla anzondwolɛ nu wɔ ɛleka ekyi bie ɛ?’ Suzu nwolɛ nea: Asoo ɔbo Bɔvolɛ ne mɔɔ bɔle ewiade la anwo zo kɛ ɔbali nane mɔɔ yebɔ bɛ la anwo zo, na bɔbɔ ɔhyia a yeamaa bɛayɛ bɛtɛɛ mɔɔ bɛ nwo ɛnyɛ ɛzulolɛ ɔ? Kakye kɛ, Gyihova a le Nyamenle ne mɔɔ bɔle nane ne mɔ a. Nzinlii, eza ɔkpakyele Nyevile Kɔkɔlɛ ne anu na ɔmanle sɛnzɛne ne gyinlanle ɛleka ko. Asoo ɔnrɛhola ɔnrɛyɛ debie biala mɔɔ zile wɔ Nowa mekɛ zo la? Nɔhalɛ nu, ɔbahola yɛɛ ɔyɛle ye zɔ!

19 Anrɛɛ Nyamenle bahola alua adenle gyɛne zo alie nane mɔɔ yebɔ bɛ la ngoane. Noko akee, ɔvile nrɛlɛbɛ nu ɔluale adenle mɔɔ kakye yɛ kɛ mɔlebɛbo ne, ɔhanle kɛ alesama ɛnlea abɔdeɛ biala mɔɔ die ɛnwomenle wɔ azɛlɛ ye azo la azo. (Mɔl. 1:28) Awovolɛ dɔɔnwo mɔɔ wɔ ɛkɛ ɛnɛ la fa Nowa edwɛkɛ ne kilehile bɛ mra kɛ Gyihova anye die nane nee menli mɔɔ yebɔ bɛ la anwo.

20. Kɛzi ɔbayɛ kɛ Nowa nee ye abusua ne yɛle gyima dɔɔnwo wɔ mekɛ mɔɔ ɔhale dapɛne ko na Azuyilɛ ne ara la ɛ?

 20 Gyihova hanle hilele Nowa kɛ yeha dapɛne ko na Azuyilɛ ne ara. Ɔbayɛ kɛ ɛnee abusua ne ɛnlɛ alagye. Ɛnee ɔwɔ kɛ bɛboɔboa nane ne mɔ anloa, bɛkpondɛ aleɛ mɔɔ abusua ne nee nane ne mɔ bali, na bɛtwe abusua ne ninyɛne bɛkɔ ɛlɛne ne anu. Ɔbayɛ kɛ Nowa aye ne nee Hyɛm, Ham yɛɛ Gyeefɛte aye mɔ titile anye bolole kɛ bɛsiezie ɛlɛne ne anu amaa yeayɛ ɛleka kɛnlɛma mɔɔ bɛbadɛnla a.

2122. (a) Duzu ati a ɔnle kɛ yɛmaa Nowa mekɛ zo amra anyetele ne si yɛ nwo a? (b) Mekɛ boni a agolobɛnwo ne mɔɔ Nowa nee ye abusua ne yiale la rale awieleɛ a?

21 Na menli mɔɔ ɛha la ɛ? “Bɛannwu” mɔɔ ɛlɛba la—ɔnva nwo kɛ ɛnee daselɛ dɔɔnwo kile kɛ Gyihova ɛlɛyila Nowa nee ye gyima ne azo la. Bɛnwunle nane dɔɔnwo ne mɔɔ ɛlɛkɔ ɛlɛne ne anu la. Noko ɔnle kɛ bɛ anyetele ne si yɛ nwo. Ɛnɛ, menli dɔɔnwo noko ɛnnwu daselɛ dɔɔnwo mɔɔ kile kɛ yɛde ewiade ɛtane ɛhye awieleɛ mekɛ nu la. Kɛmɔ ɛzoanvolɛ Pita hanle la, amgbuzilɛma si bɛ amgbu, bɛgolo menli mɔɔ tie Nyamenle kɔkɔbɔlɛ ne la anwo. (Bɛgenga 2 Pita 3:3-6.) Zɔhane ala a bɛgolole Nowa nee ye abusua ne anwo a.

22 Mekɛ boni a agolobɛnwo ne rale awieleɛ a? Kɛlɛtokɛ ne kile kɛ kenle ko ne mɔɔ Nowa nee ye abusua ne yɛɛ nane ne mɔ vole ɛlɛne ne anu la, “[Gyihova] dole ɛlɛne ne anlenkɛ ne anu.” Saa ɛnee agolobɛnwoma bie mɔ bikye ɛkɛ a, zɔhane deɛ ne mɔɔ Nyamenle yɛle la manle bɛyɛle koonwu. Saa yeamba ye zɔ bɔbɔ a, ezule ne manle bɛyɛle zɔ, ɔluakɛ ɔdɔle! Na ɔdɔle bilididi—ɔbule aze na ɔyɛle azɛlɛ ne azo fanwoo, kɛmɔ Gyihova hanle la.—Mɔl. 7:16-21.

23. (a) Kɛzi yɛkola yɛnwu kɛ Gyihova anye anlie ɛtanevolɛma mɔɔ bɛwule wɔ Nowa mekɛ zo la anwo ɛ? (b) Duzu ati a nrɛlɛbɛ wɔ nu kɛ yɛbazukoa Nowa diedi ne ɛnɛ ɛ?

23 Asoo Gyihova anye liele ɛtanevolɛma ne ewule nwo? Kyɛkyɛ! (Yiz. 33:11) Emomu, ɔmanle bɛnyianle adenle biala kɛ bɛbahakyi bɛ subane na bɛayɛ kpalɛ. Anrɛɛ bɛbahola bɛayɛ zɔ ɔ? Nowa ɛbɛlabɔlɛ ne bua kpuyia ɛhye. Kɛmɔ ɔ nee Gyihova luale, na ɔdiele Nyamenle wɔ debie biala anu la ati, Nowa hilele kɛ ɛnee bɛkola bɛnyia ngoane. Wɔ adenle ɛhye azo, ye diedi buale ye mekɛ zo ewiade ne fɔlɛ; ɔmanle ye mekɛ zo amra ɛtaneyɛlɛ ne lale ali wienyi. Ye diedi ne liele ɔ nee ye abusua ne ngoane. Saa ɛsukoa Nowa diedi ne a, ɛ nee wɔ alɔvolɛ banyia ngoane. Kɛmɔ Nowa yɛle la, ɛbahola ɛ nee Gyihova Nyamenle alua kɛ ɛ Gɔnwo. Na wɔayɛ ɔ gɔnwo dahuu!

^ ɛden. 7 Zɔhane mekɛ ne ɛnee menli tɛnla aze kyɛ tɛla ɛnɛ. Ɛnee bɛnyi bɛkyɛ ɔluakɛ ɛnee Adam nee Yive kpɔkɛdelɛ kpalɛ nee bɛ munlililɛ ne vile bɛ sa la ɛtɛkyɛle.

^ ɛden. 15 Leemɛke donle ɔ ra ne Nowa—ɔbayɛ kɛ ɔ bo kile “Ɛnwomenlelielɛ” anzɛɛ “Arɛlekyekyelɛ”—na ɔhanle ɔdole ɛkɛ ne kɛ Nowa babɔ ye duma ne anwo ɛbɛla ɔlua alesama mɔɔ ɔbamaa balie bɛ menle bɛavi azɛlɛ mɔɔ munzule ɛha ye la azo. (Mɔl. 5:28, 29) Leemɛke wule kolaa na ye ngapezo ne ara nu. Ɔbayɛ kɛ Nowa mame nee ɔ mediema ne mɔ wule wɔ Azuyilɛ ne anu.